Jacques 4

Agi lagi banad’a ki duniyad’a d’i

1Durâ ki huneîd’a suma a nga adigagina a tcholï ni lara ge? A tcholï nata d’od’ok magi d’a nga d’i dur ayîna ki hliwigid’a d’uo zu? 2Agi nga minigi va, wani agi ndak á fum mbi; agi nga tchagi matna, agi nga lagi d’od’oka á fe va, wani agi ndak á fum mbi. Agi nga lagi huneîd’a, agi nga durugi tagiya, wani agi nga fagi vama agi minima d’i, kayam agi nga tchenegi Alona d’i. 3Agi nga tchenegiya, agi nga fagi va d’i, kayam agi nga tchenegi ki tchen nda irata d’i, kayam agi minim ná ndak vun minda hi hliwigid’a. 4Agi suma bei d’engzengâ, agi wagi nga d’ala le yam duniyad’a ka’î djangûna kAlona d’uo zu? Wani sama min á le banad’a ki duniyad’ina, mi mbut ni sama djangûna hAlonina. 5Ata yima mbaktumba hAlonid’a ti dala: Alona nga mi le yungôra yam muzuk ma mi heizi kurina na, agi djib’eregi ala ni hawa zu? 6Wani nga mi vei suma d’a kala, kayam mbaktumba hAlonid’a ti dala: Alona nga mi noî suma a nga le yam mba ad’engina woyo, wani nga mi ve suma lulumana sumad’a. 7Agi gagi yagi kä avok Alona, agi tchologi ad’enga ngingring á noî Diable woyo. Hina wani, mba mi ring ngei dei ki sed’egiya. 8Ar agi hud’ugi go gen Alona, mam mba mi hud’ï gevegi go mi. Agi suma le tchod’a, agi mbuzugi abogi woyo. Agi suma lop ira, ar agi mbuzugi hurugi woi yed’et. 9Agi mbud’ugi tagi hohoud’a, agi tchigiya, agi yorogi tagiya, agi mbud’ugi san magid’a tchina, ar agi mbud’ugi furî magid’a yor tad’a mi. 10Agi gagi yagi kä avok Salad’a, mam mba mi hlagi yagi akulo.

Ang ka sariyad’a yam wiyengâ d’i

11B’oziyona, ar agi dagi zla d’a tchod’a yam tagi d’i. Le sana mi de zla d’a tchod’a yam wiyema d’oze mi ka sariyad’a kamu ni, mi ka’î djangûna ki gata, mi ka ni sariyad’a yam gata mi. Le angî sama ka sariyad’a yam gatina ni, angî sama nga mi tit yam gatina d’i, wani angî ma ka sariyad’a katna. 12Alona tu ni ma tin gatina, ni ma ka sariyad’a mi. Mam tu ni ma ndak á sut sumina, ni ma b’lak sumina mi. Angî nge ba, ang ka sariyad’a yam ndrangâ ge?

Ang le yam mba ad’enga d’i

13Agi suma a nga dagi ala: Ini d’oze avini, ei mba i kur azì ma sa hina, ei mba lei bizad’a tu, ei mba mbud’i aboya, ei mba fei beged’a mi na, agi humugiya. 14Agi wagi nga vama mba ndjivina d’i. Agi ni me ge? Agi suma d’igi amborogei d’a ti ge ndjö bugola ti b’rau woid’a na na, agi ni me ko ge? 15Djivid’a agi dagi nala: Le Salad’a mi mina ni, ei mba kagei karid’a, ei mba lei na, d’oze lei na. 16Wani ki tchetchemba, agi nga suburugi tagiya, agi nga lagi yam mba ad’enga. Andjaf subur ta d’a hina d’a ni tchod’a. 17Wani sama we vama djivina á led’a ko ba mi lum mbuo na, mi le ni tchod’a.

Currently Selected:

Jacques 4: BA

Highlight

Copy