Oze 14
14
OD’A HALONID’A MBA D’I KA’Î O D’A GAGAZID’A
YAM ISRAEL-LÂ
(14)
Ma djok vuna nga mi yi Israel-lâ a mba gen Alona
1Agi Israel-lâ, agi hulongôgï
gen Ma didina Alo magina,
kayam agi pugugi kä yam tcho magid’a.
2Agi mbeyegï ki zla d’a avunagid’a gen Ma didina,
agi dum ala: Ang vat hurung ngei
yam tchila mamid’a pet,
ang vami atang ki djivid’a.
Ami mba suburung ki vunami
kal la ami hang amuhlîd’a.
3Amul ma ngol ma Asiri-na mba mi sud’umi d’i,
ami mba fulumi yam akulumeina d’i,
ami mba dami mi sun nda ami lat kabomid’a ala:
Nda’î alo mamina d’uo d’a.
Kayam ni ang ba, we hohowa ma hokuyod’a.
4Ma didina mi dala:
An mba ni sut Israel-lâ woi
kur sun mazi d’a ata yat tuo d’a,
an mba ni tagazi o man nda gagazi d’a kazid’a,
kayam ayî mana mi vat tei kazi da’.
5An mba ni mbut kazi ni d’igi mbad’ïd’a na,
azi mba b’o d’igi tamasa na,
sideyezi mba mi sir kä d’igi agu ma Liban-na na mi.
6Abozi mba mi ruî woyo,
a mba djif d’igi agu olif-fâ na,
a mba his afufuîd’a d’igi agu d’a Liban-nda na mi.
7Sum mana a mba hulongî a mba kak ad’u anguzunu,
a mba zum gemena,
a mba tchuk grona d’igi guguzlud’a na,
simiyêzi mba mi nde yina
d’igi süm guguzlu d’a Liban-nda na.
8Suma Efraim-ma a mba dala:
Vama ndolomi ki fileina ni me ge?
An mba ni hulongôzi humba yam tchen mazid’a,
an mba ni tin iran kaziya,
an mba ni mbut ni d’igi agu sipre
ma d’uf ma gugulîna na kaziya.
Ni yam an ba, agi fagi ki te magina.
*
9Ar sama ned’a mi hum ad’u zlad’a hi Oze-d’a,
ar sama wad’ud’a mi wäd’u zla ndata,
kayam lovota hi Ma didinid’a ni d’ingêr.
Suma d’ingêrâ a mba tit kua,
wani suma bei hum vuna a mba puk kä.
Currently Selected:
Oze 14: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.