Ad’u Tinda 39

Josef mi nga avo hi Potifar

1Suma Ismael-lâ a i ki Josef Ezipte. Potifar azong ma ngolâ hi Faron-na ni ma ngolâ hi azigar suma a nga ngom amulîna, mi guzum abo suma Ismael suma a mba ki sed’ema.

2Ma didina mi nga ki Josef; sun nda mam nga mi lata pet, nga d’i labom djivid’a. Mi nga avo hi salam ma Ezipte-na. 3Salama Potifar mi wala Ma didina mi nga ki Josef, kayam ahle suma mi lazina pet, a nga le djivid’a abomu. 4Josef mi mbut djivid’a ir salama kur sun mamba, mi tinim ngola yam suma avo hatama, mi hum ahle mama pet abomu. 5Wani ata yima Potifar mi tinim yam aziyam mi hum ahle mama pet aboma, Ma didina mi b’e vunam kam yam Josef. Ma didina mi b’e vunam yam ahle mama pet kaziyam kasinem mi. 6Kayam ndata, Potifar mi ar ahle mama pet abo Josef; vama ar rei nga d’i, ni te ma mam tuma hol.

Potifar amamba nga hal Josef

Wani Josef nazong ma djif heîna. 7Bugol ahle ndazina, atchad’a hi salamid’a golomu, ti dum ala: Ang mbeï bur ki sed’enu.

8Josef mi hulong dat ala: An min ndi. Salana mi han ahle mama pet abonu, vama ar rei hawa hur aziyam ma bei mi handji abona nga d’i. 9Sama ding ma kad’enga yam azì ma wana kalana nga d’i, vama mam d’elen kam tu pî nga d’i; ni ndak hol, kayam nda’î amamba. Mina ni nana ba, an dok ni le sun nda tcho d’a ngola avok Alona na ge? 10Wani ki burâ pet ndat nga d’i dum ala mi bur ki sed’ed’u, wani mi min bur ki sed’et ti.

11Wani bur tu Josef mi kal avo á le sun mamba; sama ding nga avo d’i. 12Atchad’a hi Potifar-ra ti vum baru mamba ndinding, ti dum ala: Ang mbeï bur ki sed’enu. Wani mi fogot baru mamba abod’u, mi ring ngei abua.

13Ata yima ti we mi ring arat baru mamba abotna, 14ti yï azungeî matna, ti dazi ala: Gola! Ma Hebre ma ndjuvun vumina nga mi lü ki sed’emiya, mi mba kä ala mam bur ki sed’enu, wani an tchi wulula akulo kamu. 15Kid’a mam hum an tchi wulula akulo kamba, mi ring ngei abua, mi aran baru mamba abon kä wana.

16Ti ngom barud’a hi Josef-fa abot gak ndjuvut mba avo. 17Ndat ti dum d’igi ti davok kä na ala: Magom ma Hebre ma ang vamizina, mi mba kä á b’laganu. 18Ata yima an tchi wulula, ni yi kam akulona, mi ring abua, mi aran baru mamba abon kä wana.

19Ata yima salama mi hum zlad’a hamamba d’a ala: Magom mangâ mi lan hina, mi lan hina d’a, hurum zal ata Josef ngola. 20Mi ve Josef, mi gum klavi ata yima amulâ tchuk sum mama dangeina kuana; Josef nga kaka kur dangeina.

Josef mi nga kur dangeina

21Wani Ma didina mi nga ki Josef, mi tagam djivi mamba, mi mbud’um djivid’a ir ma ngol ma ngom dangeina. 22Ma ngol máma, mi hum suma dangeina abom pet; sun nda lat kur gong nga dangeinid’a pet, mam lat ni mamu. 23Ma ngol máma nga mi djib’er yam ahle suma mi hazi abo Josef-fâ d’uo d’a. Kayam Ma didina mi nga ki Josef, ahle suma mi lazina pet nga mi faziya.

Currently Selected:

Ad’u Tinda 39: BA

Highlight

Copy