Sunda hi suma a sunuzinid’a 7
7
Etienne nga mi väd’u zlad’a
1Ma ngol ma ngat buzuna mi djop Etienne ala: Zla ndata ni gagazi zu?
2Etienne mi hulong mi dala: B’oziyona kabuyonu, agi humugiya. Alo ma subura mi nde tam ir abui ngolo Abraham kid’a mi nga Mesopotami avok ka mam bei i kak kur Haran tua d’a. 3Mi dum ala: Ang nde woi kur ambazang aduk simiyengû, ang i yam ambas sa an mba ni tagangzid’a. 4Ata yi máma, mi ar ambas sa Kalde-d’a, mi i kak kur Haran. Bugol matna habuma, Alona mi djogom kur andaga d’a agi nga kaka kur ki tchetchem wandid’a. 5Alona mi hum nga yina kurut ti, yima tin asema pî nga d’i. Wani kid’a mam bei mi vut gorâ tua d’a, Alona mi hlum vunam ala mba mi hum ambasa mba mi hat mandjavam ma mi mba blogoma mi. 6Alona mi dum ala: Andjavang mba mi kak yam andaga d’a dinga, a mba lazi magomba, a mba lazi ndaka bizad’a kikis fid’i. 7Wani Alona mi dala: Andjaf suma a mba lazi magombina, an mba ni kazi sariyad’a kaziya. Bugola, azi mba buzuk keyo, a mba suburun ata yima wana. 8Alona mi djin vunam ki sed’em á ngat bayâd’a. Kid’a Abraham mi vut Isak-ka, mi ngad’am bayâd’a kur bur ma klavandina. Isak mi vut Jakob, mi ngad’am bayâd’a, Jakob mi vut abuyoi ngolo suma dogo yam mbàna, mi ngad’azi bayâd’a mi.
9Abuyoi ngolo ndazina a le yungôra yam Josef. A guzum mbei abo suma, a i ki sed’em Ezipte-na. Wani Alona mi nga ki sed’emu, 10mi pad’am mbei kur ndak mamba pet. Mi mbud’um sama djivi ma ned’a avok Faron amul ma Ezipte-na. Faron mi tinim á te yam Ezipte kaziyam pet mi. 11Kur bur máma baktara d’a ngola ti nde yam andaga d’a Ezipte-d’a pet kandaga d’a Kanan-nda. Abuyoi ngolo a fe ndaka ngola kayam azi nga fe vama te d’i. 12Wani kid’a Jakob mi hum ala awuna mi nga Ezipte d’a, mi sun abuyoi ngolo á avok kikidjid’a. 13Ata mba mazi d’a á mbàd’id’a, Josef mi simat tam mi b’oziyoma. Faron mi wandjafâ hi Josef-fâ mi. 14Ata yi máma, Josef mi ge sunda á yomï abum Jakob ki b’oziyoma pet, nala, suma dok kid’iziya yam vahl. 15Jakob mi i Ezipte, mi mit sä kua kabuyoi ngolo mi. 16A yozi mad’azi a izi Sikem, a tozozi kur zul la Abraham mi guzut ki beged’a abo Hamor ma Sikem-ma gromid’a.
17Wani ata yima vun ma hle ma Alona mi hlum ki Abraham ma mi ar go á ndakina, Israel-lâ a zul kur Ezipte ngola, 18gak amul ma ding ma we nga Josef fuo na, mi te yam Ezipte. 19Amul máma mi le lem mba tchod’a ki simiyêya, mi le abuyoi ngolo ndaka ala a tchuk grozi suma gureina woi kayam a bo woyo. 20Ni kur atchogoi ndata ba, a vut ki Moise. Mi djif ir Alona heî. A ngomom avo habum tilâ hindi. 21Kid’a azi gum mbeid’a, Faron goromba ti hlum ti wulum d’igi gorotna na. 22A hat Moise ned’a hi Ezipte-nid’a pet, mi nga kad’enga kur zla d’a ded’a ki sun mamba pet mi.
23Kid’a Moise bizam ndak dok fid’id’a, mi djib’er ala mi i gol b’oziyom Israel-lâ. 24Kid’a mi we ma Ezipte-na nga mi to wiyemid’a, mi ndjun kamu. Mi sam atchugulumu, mi tchi ma Ezipte-na woyo. 25Mi djib’er kurum ala b’oziyom Israel-lâ a wala nata mam ba, Alona mba mi hum lovota á pad’azi woi kur magomba. Wani azi we nga hina d’i. 26Tcha ndjivinda mi i geveziya, mi fe Israel-lâ mbà a nga to taziya. Mi min á zlabazi adigaziya, mi gad’azi ala: Agi ni b’oziyo tagiya. Ni nana ba, agi lagi tagi sulu’â hina ge? 27Wani ma nga mi le ndrama sulu’îna, mi zut Moise seyo, mi dum ala: Ni nge ba, mi tining amula ki ma ka sariyad’a kami ge? 28Ang min tchan d’igi ang tchi ma Ezipte-na kama na zu? 29Kid’a Moise mi hum zla ndatid’a, mi ring kur ambas sa Madiyan-nda, mi kak sä kua. Nata yi máma ba, mi vut gro andjofâ mbà.
30Kid’a mi le bizad’a dok fid’id’a, malaikana mi nde tam mbei iram hur fulâ go kahina d’a Sinai-d’a, aduk sin aku d’a nga d’i ngal aduk azlupid’a. 31Kid’a Moise mi we hina d’a, mi le atchap yam vama mi nde tam mbei irama. Ata yima mi hut go á sizarama, mi hum dela hi Salad’id’a. Mi dum ala: 32An nAlona habuyong ngolona, an nAlona hi Abraham-ma, Alona hi Isa’â, Alona hi Jakob-ma mi. Moise mi nde zlaka abo mandarâ, mi ndak á gol iram abo máma d’i. 33Ata yi máma, Ma didina mi dum ala: Ang fok atuguru mangâ woi asengû, kayam yima ang nga tchola kua wana nandaga d’a an tinit irat vata. 34Gagazi, an we djop vuna hi man suma avo Ezipte-nina. An hum zam ta mazid’a, an tchugï asen kä á pad’azi woyo. Ki tchetchemba, ang mbeya, an sunung kur Ezipte.
35Ni Moise ma Israel-lâ a noyôm mbei ala: Sama tining amula ki ma ka sariyad’a kami ni nge nge na ba, Alona mi sunum á tamula kazi á pad’azi woi zlapa ki malaika ma nde tam mbei iram aduk awei-avirinina. 36Ni Moise ba, mi buzuk Israel-lâ woi yam ambas sa Ezipte-d’a, mi lahle suma ndandalâ kahle suma simata kur andaga d’a Ezipte-d’a, kur alum ma ngol ma Tchereuna, kur fulâ bizad’a dok fid’i mi. 37Ni Moise máma ba, mi de mi Israel-lâ ala: Alona mba mi tchol ki mam ma djok vuna tu aduk b’oziyogina d’igi an na. 38Ni mam ma nga tchola kur tok ka hur fulîd’a ki malaika ma mi dum zlad’a yam ahina d’a Sinai-d’a kabuyoi ngolona. Ni mam ma mi ve zla d’a arid’a hAlonid’a, mi heizina mi.
39Wani abuyoi ngolo a min ge yazi kä ad’um mbi. A noyôm mbeyo, a hulong tin huruzi yam Ezipte. 40Azi de mi Aron ala: Ang yoromi alo ma teteng ma mba mi tit avoromina, kayam Moise ma kol ma buzugumï woi kur andaga d’a Ezipte-d’ina, ami wami nga vama luma d’i. 41Kur bur máma a yor vama d’igi gor amuhlâ na na. A mba ki vama ngat buzuna mi filei máma, a le furîd’a yam sun nda a lat kabozid’a. 42Wani Alona mi mbud’uzi azigamu, mi arazi á kud’or ahle suma akulona d’igi a b’ir kur mbaktumba hi suma djok vun Alonid’a na ala:
Agi Israel-lâ,
kid’a agi lagi bizad’a dok fid’i abagei hur fulîd’a,
agi mban d’uwar ma a ngad’ama kahle suma ngat buzuna zu?
43Hawa! Wani agi yogi zlub’ud’a halo ma a yum ala Molo’â,
ki tchitchiud’a halo magi ma Refan-na.
A ni filei ma agi lagizi á kud’uroma.
Kayam ndata, an mba ni igi magomba sä woi dei bugol Babilon.
44Abuyoi ngolo a nga ki zlub’ud’a á le glangâsâ yam Alona hur fulâ. Azi minit ni d’igi Alona mi de mi Moise na ala: Ang le dedege d’igi vama ang wuma na. 45Abuyoi ngolo a yo zlub’u ndata, a nga tit ad’u Josue, a mba kur andagad’a handjaf suma ding suma Alona mi digizi woi avorozina. Zlub’u ndata ar gak kur atchogoid’a hi David-ta. 46Mam mi ma Alona mi vum sumad’a, mi tchenem á fe yima min gong nga kaka mAlona hi Jakob-ma. 47Wani ni Salomon ba, mi minim gonga.
48Wani Alo ma sä akulo ma kal teglesâ nga mi kak kur gong nga sana minit kabomba d’i. Ni d’igi ma djok vun Alona mi de na ala:
49Ma didina mi dala:
Akulod’a ni zlam man nda amula,
andagad’a ni vama tin asen kama.
Nandjaf gongâ me ba, agi mba minindji ge?
Ni yima lara ba, an mba ni tuk tan kua ge?
50Ni an ba ni lahle ndazina pet kabon nduo zu?
51Agi suma delegi ad’engina, agi suma b’alagi hurugi suma dugugi humagi woi á hum yid’a hAlonid’ina, agi nga zud’ugi Muzuk ma bei tchod’a ba na woi teteu, agi lagi ni d’igi abuyogi ngolo a le na mi. 52Ni ma djok vun Alona ma lara ba, abuyogi ngolo a djobom vunam mbuo ge? A tchi suma a tchi wal zla mbad’a hi Ma d’ingêrîna woyo. Ki tchetchemba, agi hum abo suma á tchum mi. 53Agi ni suma a vagi gata hAlonid’a abo malaikanina, wani agi ngomot nga d’i.
Tchid’a hi Etienne-nda
54Kid’a suma b’ak zlad’a a hum zla ndatid’a, huruzi zal ngola, a mut siyazi atamu. 55Wani Etienne mi oî ki Muzuk ma bei tchod’a ba na, mi so iram gola akulo, mi we subura hAlonid’a ki Jesus mi nga tchola ata Alona bigam mba ndjufa. 56Mi dazi ala: Agi gologiya! An wakulod’a mal leyo, Gor Sana mi nga tchola ata Alona bigam mba ndjufa mi. 57Wani a er ad’uzi akulo, a duk humazi woyo, a tumî ringâ guvuf a vumu. 58A tanam mbei bugol azina, a durum kahinad’a, a tchumu. Suma glangâsâ a tchuk baru mazi ma ngolâ kä asem gor azongâ, simiyêm ala Saul. 59Kid’a azi nga dur Etienne kahinad’a tua d’a, mi tchen ala: Salad’a Jesus, ang hlan muzuganu. 60Ata yi máma, mi grif kä, mi er ad’um akulo, mi dala: Salad’a, ang ndum tcho ndata kazi d’i. Kid’a mi de zla ndata dad’a, mi mid’a.
Saul mi ndjak vunam ki sed’ezi yam tchid’a hi Etienne-nda mi.
Currently Selected:
Sunda hi suma a sunuzinid’a 7: BA
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.