Salmos 7
7
Salmo 7
Sukan kakan‑ta'vi o nuu Su'si iya ja'nde ndaa tniñu ma
1Su'si maa sa, Iya Tátnuni,
nuu maa in‑ni ni kúkanu ini sa ja chindee ña'a ni
ja na kaku sa nuu ndaka ñayii ka sondikin ña'a
ja jin sa'a ña'a i ja u'vi ma.
2Vaa sukan ka kuu ndika'a ma, sukan ka kuu i,
te nasa yukan, te jin ni'i ña'a i, te jin ka'ni ña'a i,
te ñatuu na in chindee‑ka ña'a ja kaku sa nuu i ma, vi Su'si.
3Iya Tátnuni, ñatuu na ja u'vi ni sa'a sa,
4vaa masu nama uun ni sa'a ndeva'a sa
ñayii iyo mani ji'in sa ma,
te ni masu nama uun ni sa'a ndeva'a sa
ñayii ñatuu kúnimani nuu sa ma.
5Kovaa nú iyo nawa ni sa'a sa ma,
na sondikin ña'a maa ñayii ñatuu kúnimani nuu sa ma,
te nú ni ni'i ña'a maa i ma,
te na xtuu xndii ña'a i nuu ñuyaka ma,
te jayiñu'u sa ma jín xtuu jín xndii maa i nuu ñu'ú a.
6Ndokuiñi ni, vi Iya Tátnuni,
te kanaa maa ni ji'in ñayii ñatuu ka kunimani nuu sa a.
Te chindee ña'a ni, te ka'nde ndandaa ni tniñu sa
ji'in ñayii ñatuu ka kunimani nuu sa ma.
Sukan, te kuni ndaa sa ja iyo sa ji'in ni.
7Te maa ni chi jin ndakonduu ña'a ñayii ka ndututu
ja ka ndachiñu'u ña'a i ma
ja ka iyo i ndi‑in ndi‑in ñuu ma,
vaa maa ni chi onde sukun ma núkoo ni
ja tátnuni ni nuu i ma, vi Su'si.
8Iya Tátnuni, maa ni ndakan kuenda nuu ndi‑in ndi‑in ñuu ma,
te nuu saña ka'nde maa ni tniñu naxe ni yo sa'a, ni yo kuu sa,
te ka'an maa ni naxe ni yo iyo sa nuu ni ma.
9Xnaa ni ñayii ka sa'a ja u'vi ma,
ja ñatuu ka kandija ña'a i maa ni ma,
te sunkani va'a ni ñayii ka sa'a ja va'a ja ndaa ma.
Vaa maa ni chi Su'si iya sa'a ja va'a ja ndaa ma kúu ni,
te jinitnuni ni nawa ka jani ini ñayii ma, vi Su'si maa sa.
10Kovaa saña chi kúkanu ini sa
ja Su'si ma kúu iya kasi ndee kasi ndoso ña'a nuu ja u'vi ma,
vaa maa ya sa'a ja jin kaku
ñayii ka iyo ndaa ini anua i ma nuu ya ma.
11Su'si ma chi iya ka'nde ndaa tniñu ñayii ma kúu ya.
Chukan kúu ja ndi‑kivi ndi‑kivi ndákiti ini ya
nuu ñayii ka sa'a ja u'vi ma.
12Nú ma jin ndakani jin ndaka'vi ini ñayii ma
ja jin ndakan‑ta'vi i nuu Su'si ma
ja na sakanu ini ña'a ya kuechi i ma
chi maa ya chi jâ ni ndakiin vava'a ya
yuchi kúu espada ya ma,
te jâ ni satu'va vava'a ya kuji ya ma,
ji'in ja nani flecha ma.
13Te jâ ni januu ya ndenu kani ya ma,
te ka iyo tu'va ndaka ja jin sa'a ja jin kûu ñayii ma.
14Jin konde'ya ni ñayii sa'a ja u'vi ma,
ja ndimaa ja u'vi jâ ni tnaa i ini anua i ma,
te sukan ndó'o néni ña'a ja sani te kâku lulu ña ma,
sukan ndó'o néni i vitna.
Te jâ iyo tu'va ja ndani'i ndatna'a maa i ja ni xnda'vi i maa i ma.
15Ni sa'a maa i in yavi kunu kunu,
te suni maa ini yavi yukan kêe tuku maa i.
16Suni maa ndaka ja u'vi ni yo sa'a, ni yo kuu i ma
ndajinu siki maa i ma, te ndachunaa maa i.
17Saña chi ndachiñu'u sa Iya Tátnuni ma,
vaa sa'a ndaa sa'a ndija ya.
Nuu maa ya ja iyo ya onde sukun ma kata sa,
vaa maa ya kúu Su'si Iya Tátnuni ma.
Currently Selected:
Salmos 7: xtm
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.