Salmos 149
149
Salmo 149
Ndaka ñayii ñuu Israel ma, na jin ndachiñu'u i Su'si ma
1Jín kata o in yaa jaa nuu Su'si o Iya Tátnuni ma,
te jín ndachiñu'u o ya ja ka kuu o
ñayii ka iyo va'a ka iyo ndaa nuu maa ya ma.
2Jin ndusii ini ni, ñayii ñuu Israel ja ka kuu ni ñayii ñuu Sion a,
vaa maa ya ni sa'a ña'a, te maa ya kúu Rey ni.
3Jin kandava jin kandita ni, te jin ndachiñu'u ni ya,
te jin skixin ni pandero ma, te jin tee ni yutnu kúu arpa ma,
te jin kata ni.
4Vaa Su'si Iya Tátnuni ma chi iyo sii ini xeen ya ji'in ñuu ya ma,
te kua'a ya jayiñu'u ñayii ka ndakunitnuni
ja masu nawa kuu jin sa'a i,
nú masu ja onde maa ya ma,
sana kuu jin kaku i nuu ja u'vi ma.
5Jín ndusii ini ndaka o ja ka kuu o
ñayii ñatuu na ja u'vi‑ka ka sa'a ma,
vaa ja maa ya, te ni ka kundee o nuu ja u'vi ma.
Te jín kata o nuu ya, visi ka ndatuu o nuu jito ka kixi o ma.
6Te jín kata o te jín ndachiñu'u o Su'si o a,
te jín koo tu'va o, te jín kinda'a o yuchi kúu espada
xen‑xeen nduu nuu i ma,
7sukan‑va'a jín ndachunaa o nuu ñayii ndaka ñuu ma,
te jín ndando'o jín ndaneni maa i ja ni ka sa'a i ma,
8sukan‑va'a jín ku'ni o ndaka rey ma,
ji'in ndaka ñayii ka ndanuu‑ka ma
ji'in yo'o kaa tna'a ja vee‑ka ma,
9te sukan, te ko kuu sukan ndee nuu tnu'u Su'si o a,
sukan iyo ja jin ndo'o jin neni tee ka kuu rey ma,
ji'in tee ka tatnuni ma
ja ka iyo de in‑ka ñuu ma.
Kovaa jayiñu'u ndaka yo'o
ja ka iyo va'a ka iyo ndaa o nuu Su'si ma
ko kuu
ja sukan jin ndo'o jin tna'a ñayii yukan ma.
¡Aleluya! ¡Te jayiñu'u na koo nuu Su'si ma!
Currently Selected:
Salmos 149: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
