Proverbios 22
22
1Ja va'a‑ka kuu ja jin ka'an vii jin ka'an va'a ñayii ma ja kuu o
kuechi ja sa'a o ja va'a ja ndaa ma
sana ja koneva'a kua'a o xu'un
te ni‑in ñayii ma masu jin kunimani nuu o.
2Ñayii xiku ma ji'in ñayii kúnda'vi ma, inuu‑ni ka kuu i,
vaa nduu i ma chi maa Su'si ma ni sa'a ña'a.
3Ñayii ndichi ma chi nú jini i ja iyo yika i ma
chi su'va jikayata i,
kovaa ñayii ñatuu jáku'ni ini ma
chi yituu yine'e i
te onde ni'i maa i ja u'vi sa'a ja ndo'o neni i ma.
4Ñayii kaa vii kaa kuee ini ma te ñatuu kúvixi i ja maa i kúu‑ka
vaa yu'u i Su'si ma vaa jini i ja iya ndákan kuenda kúu ya ma,
ja ndani'i ndatna'a i kúu ja ko ni'i ko tna'a i ja koneva'a i,
te koo jayiñu'u i, te koteku i ni‑kani ni‑jika,
5kovaa ichi kua'an ñayii sa'a ja u'vi ma
chi nanimaa tnundo'o tnuneni kenda koo nuu i ma,
vaa jani ini i ja va'a‑ni kúu ja sa'a i ma,
kovaa ndimaa ja skenaa i maa i kúu.
6Kaxtnu'u ni nuu sa'ya ni a ichi va'a káxtnu'u maa Su'si ma,
sukan‑va'a kivi kuu nija'nu i ma te masu xndoo i ichi Su'si ma.
7Ñayii ka kuxiku ma chi ka tatnuni maa i nuu ñayii nda'vi ma,
te ñayii ka wanuu xu'un ma chi suni ka tatnuni maa i
nde a ka kuni i ja jin sa'a ñayii ni ka jikan‑nuu xu'un nuu i ma.
8Ñayii sa'a ja u'vi in‑ka ñayii ma
chi tna'a ja ni sa'a i ma ndani'i ndatna'a maa i,
te ndando'o ndaneni maa i,
te sukan, te xnaa ya ñayii ka sa'a ja u'vi ma.
9Ñayii va'a ini ma te kúnda'vi ini i ñayii nda'vi ma
te wa'a i ja kaa ñayii nda'vi ma
chi skuta'vi ya i ja va'a te ko ni'i ko tna'a i.
10Máko kuan‑ta'vi ni ñayii ndee ini te so'o kaa i ma nuu iyo ni a,
sukan‑va'a na naa maa ja u'vi ma te masu na in kanaa‑ka,
te ni a ko skiti tna'a‑ka ini i.
11Ñayii játna ini ja koo vii koo luu ini anua i ma,
chi ja sukan vivii ká'an i ma, te ketna'a ini tee kúu rey ma ji'in i.
12Iya Tátnuni ma chi jito ñukuun ya ñayii ndichi ma,
kovaa sákanuu sákani'ni ya ja jani ini ñayii tnu'u ma.
13Ñayii kuxi ma chi ja ma satniñu i ma
chi ndúku yu'u i naxe kundee i ja ma satniñu i ma‑ni,
te ká'an i:
“Vaa ichi ma iyo in ndika'a,
te kaa ña'a ti nuna ki'in o jin satniñu o.”
14Ja ká'an ña'a kívi nduu ji'in tee ja masu yii ña kúu de ma
chi sukan kúu in soko kunu kunu kúu,
te tee kúndee ña xnda'vi ña ma
chi ndákiti ini Su'si ma nuu de naku kándija de ja ká'an ña ma.
15Suchi jaa ma ûni ndikin tna'a xeen i
ji'in ja sa'a ndee ini i te sa'a so'o xeen i maa i,
kovaa nuna ndaka'an‑so'o o nuu i te skonduu o yutnu xii yata ka'a i
chi ndatnii i kuenda te ko kuu i in ñayii va'a.
16Ñayii ndúku ja kuxiku i ma te sa'a ndeva'a i ñayii nda'vi ma
ji'in ñayii skuta'vi nawa neva'a i ma nuu ñayii xiku ma,
chi ja ndetu ña'a kúu ja ndunda'vi ndukee maa i.
17Koniniso'o ñukuun ni ja ka ka'an ñayii inundichi ma
te ndasa'a ni kuenda ndaka ja káxtnu'u sa ya.
18Chi ja va'a xeen ko kuu nuna tava'a ni ini anua ni a
te ndaka'án ni te kuu ndaka'an ni nuu ndaka‑ka ñayii ma.
19Vitna te ndákaxtnu'u sa nuu ni a,
sukan‑va'a kukanu ini‑ka ni Su'si o Iya Tátnuni ma.
20Saña chi oko uxi jichi tnu'u ndichi ya ni kaxtnu'u sa,
te ndimaa tnu'u va'a tnu'u kuatniñu o ka kuu,
21sukan‑va'a kutu'va ni tnu'u ndaa tnu'u ndichi ni kaxtnu'u sa a,
te kuu kaxtnu'u ndaa ni nuu ñayii jin kakan‑tnu'u ña'a ma.
22Má sakui'na ni ñayii nda'vi ma
te ni máko ka'an ndeva'a ni nuu ñayii ndó'o néni ma,
23vaa Iya Tátnuni ma chi kúnda'vi ini ya ñayii nda'vi ma
te iyo ya ji'in i te chindee ya i te kaku i,
te ñayii sakui'na nuu ñayii nda'vi ma
chi maa Su'si ma xnaa ndaka ja neva'a i ma.
24Máko ketna'a ini ni ji'in ñayii yachi xeen ndákiti ini i ma,
25nasa yukan te kutu'va ni sukan sa'a sukan kúu i ma,
te sa'a i ja skenaa ni maa ni ja sukan sa'a ni ma.
26Máko ko kuu ni yunuu ñayii jikan‑nuu ma
te tavi i nuu in‑ka ñayii ma,
27vaa nú ma ni'i ni ja ndakua'a ni ma
chi onde jito kixi ni ma jin ndaxtandee i.
28Máko ndaxsama ni nuu ka nukuiñi yuu xe'ñu
ni ka jani tna'a ni jana'a‑ka ma.
29Ñayii satniñu va'a ma chi kuu i kunukuechi i nuu rey ma,
te masu nuu ndeva'a‑ni ñayii kunukuechi i.
Currently Selected:
Proverbios 22: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
