Proverbios 12
12
1Ñayii jan‑ta'vi ja ka ndaka'an so'o ñayii ma
naxe ko sa'a ko kuu i ma
chi ñayii ndichi kúu i,
kovaa ñayii saxiko ja ka ndaka'an so'o ñayii ma nuu i ma
chi in ñayii so'o kúu i te ñatuu ndása'a i kuenda i ma.
2Ñayii jani vii jani va'a ini ma
chi játna ini Su'si ma ja sukan kúu i ma,
kovaa ñayii jani ini ndimaa ja u'vi sa'a i ma
chi maa Su'si ma sa'a ja ndachunaa i ja sa'a i ma.
3Vaa ñayii sa'a ja u'vi ma
chi masu kuu konukuiñi va'a i,
kovaa ñayii sa'a ja va'a ja ndaa ma
chi ni'i yo'o va'a i te konukuiñi va'a i nuu Su'si ma
te masu na in xtuu ña'a.
4Te ña'a ñu'u kaji ñu'u va'a ini ma
chi ja sa'a ja kúu ña ma te ní'i yii ña ma jayiñu'u,
kovaa ña'a ñatuu ñu'u kaji ñu'u va'a ini ma
chi sukan kúu kue'e kívi onde yiki ñayii ma
sukan kúu ña nuu yii ña ma.
5Ñayii jika ndaa nuu Su'si ma
chi ndimaa ja ndaa ja ndija kúu ja jani ini i te ká'an i ma,
kovaa ñayii sa'a ja u'vi ma
chi ndimaa tnu'u xnda'vi tna'a kúu ja ká'an i ma.
6Onde ndaka tnu'u ká'an i ma,
ûni kuenda tnu'u ja ja'ni i ñayii ma kúu,
kovaa ñayii ka iyo ndaa nuu Su'si ma
chi ndimaa tnu'u vii tnu'u va'a ka ka'an i,
te ja sukan ka kuu i ma chi chindee ña'a i
ja jin kaku i nuu ja u'vi ma.
7Vaa Su'si ma chi sa'a ya ja ñayii ka sa'a ja u'vi ma
chi jin naa i ve'e ke'e i ma,
kovaa ñayii ka sa'a ja va'a ja ndaa ma
chi ni‑kani ni‑jika jin koteku i ji'in sa'ya tata i ma.
8Ñayii ndichi ma chi naxe sa'a naxe kúu maa i ma,
te sukan ka ka'an vii ka ka'an va'a ñayii ma ja kuu i ma,
kovaa ñayii ñatuu va'a ini ma
chi masu na in ká'an vii ká'an va'a ja kuu i
chi su'va ka saxiko ña'a ñayii ma.
9Ja va'a‑ka kúu in ñayii visi ka ka'an ndeva'a i ja kuu i ma
kovaa ka iyo ñayii ka chindee ña'a nawa jiniñu'u i ma,
sana tee jani ini ja maa de kúu‑ka ma
te ni ja kaa de ma masu nawa neva'a de.
10Ñayii sa'a ja va'a ja ndaa ma
chi jito va'a i ndaka kiti neva'a i ma,
kovaa ñayii sa'a ja u'vi ma
chi masu va'a ini i chi sa'a ndeva'a i kiti neva'a i ma.
11Ñayii satniñu itu i ma
chi ndimaa koo ja kaa ja ko'o i,
kovaa ñayii kua'an vee‑ni kúu i ma
chi ñatuu jáku'ni ini i nawa sa'a i ma.
12Ñayii kúneé kú‑uun ma
chi ndíyo ini i ja ko kuu i sukan ka kuu ñayii ka sa'a ja u'vi ma,
kovaa masu jini i nawa ndetu ña'a ja ndo'o i,
kovaa ñayii sa'a ja va'a ja ndaa ma
chi ni‑kani ni‑jika ndimaa ja va'a ko kuu ja ndani'i ndatna'a i.
13Ñayii sa'a ja u'vi ma
chi maa ja xnda'vi i ñayii ma nukun‑tuu maa i te ndando'o ndaneni i,
kovaa ñayii ká'an ndimaa ja va'a ja ndaa ma
chi vivii yanduu yandoso i nuu ndaka tnundo'o kenda ma.
14Vaa maa maa o ndani'i ndatna'a nawa ká'an o ma
xi nawa sa'a nawa kúu o ma ndeva'a‑ni nú ja va'a xi ja u'vi kúu.
15Ñayii so'o xeen kaa ma
chi ndaka ja sa'a i ma chi jani ini i ja ja va'a kúu,
kovaa ñayii ndichi ma
chi ndimaa kándija i ja ka ka'an so'o ñayii ma nuu i ma.
16Ñayii so'o ma
chi yachi‑ni káxtnu'u i ja ndákiti ini i,
kovaa ñayii ndichi ma
chi masu sánuu i nawa ka ka'an ndeva'a ñayii ma nuu i ma.
17Ñayii ká'an ndaa ma
chi ndáka'an ndaa i naxe iyo ma,
kovaa ñayii tnu'u ma
chi masu ndáka'an ndaa i naxe iyo ma
su'va ndúku i naxe xnda'vi i ñayii ma.
18Ka iyo ñayii ma chi tnu'u ka ka'an i ma‑ni,
te ka sa'a i ja tna‑u'vi ini o vi'i‑ka sana ni xtnakue'e ña'a i,
kovaa ñayii inundichi ma chi vivii ka ka'an i
te ka ndataa i tnu'u kanu ini
kuenda tnu'u ja in jatatna ni ji'i o te ni nduva'a o.
19Ñayii ká'an ndaa ká'an ndija ma chi ni‑kani ni‑jika koo i,
kovaa ñayii ká'an tnu'u ma chi nunuu‑ni koo i te naa i.
20Ñayii sa'a ja u'vi ma
chi nanimaa tnu'u xnda'vi tna'a ma ñu'u ini anua i ma,
kovaa ñayii ndí ini naxe koo mani i ji'in in‑ka ñayii ma
chi nanimaa tnu'u sii ini iyo ini anua i ma.
21Ñayii sa'a ja va'a ja ndaa ma
chi ni‑in ja u'vi ndo'o i,
kovaa ñayii sa'a ja u'vi ma
chi nukoxtna'a nukoxtnii ja u'vi sa'a i ma ndani'i i.
22Su'si Iya Tátnuni ma
chi saxiko ya ñayii tnu'u ma,
kovaa játna ini ya sukan ka sa'a ka kuu
ñayii ka sa'a ja va'a ja ndaa ma.
23Ñayii ndichi ma chi masu nde savixi i maa i ndaka ja jini i ma,
kovaa ñayii ndee ini ma chi ja ká'an i ma‑ni,
te yachi‑ni ndatuu maa i ja ñatuu na tnu'u ndichi neva'a i.
24Ñayii ñu'u ini te satniñu i ma
chi ko ni'i ko tna'a i te koo ñayii jin satniñu nuu i ma,
kovaa ñayii kuxi ma
chi masu ni'i nde i te in‑ka ñayii xi‑nuu ko satniñu i‑ni.
25Tnu'u ndí ini xeen ma
chi sa'a i ja kúxii ini ñayii ma
te ñatuu‑ka na tnu'u ndee tnu'u ndatnu i iyo,
kovaa nuna kenda in ñayii ká'an vii ká'an va'a ma
chi sani te sa'a i ja ndúsii ini ñayii ma.
26Ñayii sa'a ja va'a ja ndaa ma
chi kuu skaka i in‑ka ñayii ma ichi va'a ma,
kovaa ñayii sa'a ja u'vi ma
chi kuan koo i ichi jin skenaa i maa i ma.
27Ñayii kuxi ma
chi onde kiti ni ja'ni i ma masu no'o i ji'in ti ve'e i ma
ja jin kaa i kuñu ti ma,
kovaa ñayii ñu'u ini ma
chi jini i ja ja va'a xeen kúu ndaka ja ni'i tna'a i ma.
28Ja ko sa'a o ja va'a ja ndaa ma
chi kua'an o ichi nuu koteku o ni‑kani ni‑jika,
te masu kûu o te skenaa o maa o.
Currently Selected:
Proverbios 12: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
