Oosana 49
49
Yakooboofa narí aiku asauku taikara qafaaqooqa qimannimu ufafa.
1Yakooboofa narí faiqi namu naaramaseenoo qima niminau. Innee aiqama maaqoo aniraifaqa kasooaqee inni kina kambiqaaninna ainainara qima nimiana iriaqa.
2Innee qini Yakooboosa faiqi namu innee qini fiqu fiqu mambifaqa inneeqa nikausa qini Isaraeerasa ufa iriaqa. 3Reeubeenafa anee qini ooqa faiqi mariananoo.
Anee qini afeeka indaaruqaafa mariananoo.
Anee aiqama qini faiqi namu kiqari uriqararafa kaaqa afeekaiki marianafa mariananoo. 4Anee nammari aufindee imarianafa kaaqa afeekaiki marianafa mariananoo.
Anee sia uriqarana marinnaranoo.
Anee qini qaarisaa qini ainainira anaasee sakasee faiqaannanara miqinnaranoo.
5Simeeoonasa Reefisa innee qara moodaa fidika mariafanoo.
Innee qara inneeqa rakira duru saamunnoo faiqí mandaikamma nimaqaqau. 6Qini irirafa sia misa kukeeqara ufaki ootupanoo maridanoo.
Qinee sia miqanda ufa suqiranaki marianaura.
Misa nirana qoofaqa faiqí anaasee narusee miqooqari nasuridaqa burimakau akoonauqa naununu ateekaqau. 7Inniqara aannoo qiranasaa niqirafa mariannoo.
Innee kaqi fifau nárí marianara minara niqirafa mariannoo.
Isaraee maqa maaqakina inniqara faiqi namu furufaramambuaqa.
8Yakooboofa miqanda nifaaqooqa qimaseenoo quandafinoo Yudana afaaqooqa qinau.
Yuda, ani akaqaafasaa ani amooqifara.
Anee aneenna namuqaa ninukasaa reenana rafaaqa finafa mariananoo.
Ani akoona faiqi namu ani oorinni niqoori saunu areefaranoo. 9Yuda anee kaasau aandaura foora faiqí nárí marianafa mariananoo.
Anee firaa kaasau ainaina mariana, anee aandau arusee namasee faiqaqee inanoo moo fannoo sia ani afauriannoo, rufiaannoo. 10Yudafa karaambaiqa duru feefa uaqeeiannoo.
Minasaa ani aruakinausa uriqaraqa maridaqa rakisi nimaqeefaranoo.
Mifa uriqarara auqu marasee rakisi nimaqanoo fifiinoo Siroo maqusaki oonuraannoo.
Miqoo maridanoo aiqama maqannaasa mina ameemaanai marifanoo rakisinnimaqaannoo
mina aiku oosana maridaqa mina ufa mau kai fifaranoo. 11Mifa narí doonki timmusa uainna sandasaa rumbeenoo.
Uainnauqakiqari kaaqa amiqiranasaa rumbeenoo.
Mifa narí qamunna fidika arira uainna anoonaki nammaruqinoo. 12Mifa uainna neemarifanoo mina afu fidikandanda inoo marifanoo mimmi naamma anoona neemarifanoo afai eekara aridanoo.
13Miqi qimasee Yudana qimamiseenoo Seeburunana quandafi afaaqooqa qinau.
Seeburuna, anee ooruku nammari afainni marinaranoo.
Sipauqaindi nammariara rufiasee ani mandaaqasee marifara.
Ani maqa maaqa oosu Sidoona maqa maaqa ati raquru aminoo mariannoo.
14Miqi qimasee Seeburuna qimamiseenoo Yakooboofa quanda finoo Isakaana afaaqooqa qinau.
Isakaa anee afeeka doonkiara foora mafinana narana uqauqa amuaaqa faiqaqeeia.
Yooseefaafa narí akaqaa fasaauqa aqoondikira ufa niminau.
15Isakaafa idooara maqusa qafoofanoo amiqinoo marufanoo kummarama fufanoo ataufakaaqa firaa ummaara quqasee maranoo nimarinau. Mifa ainainira faiqiara foora ainainiannoo.
16Yakooboofa Isakaana qimamiseenoo quandafinoo Dannaana afaaqooqa qinau.
Dannaafa narí maqannaasa uriqararafa mariannoo.
Misa Isaraee maqannaa foora marifaranoo. 17Anee ukadiqara foora aana afainni marinanoo qoosa fannoo aatata finana aiku raquraminanoo maqasaa aqufinanoo faiqí minasaa marina afiqu aqusainanoo aanaaqiannaindari aqufuani.
18Yakooboofa Dannaanara miqi qimaseenoo Anutunara innaaru qinoo qinau.
Oo Yaawee qinee ani dadaaqiranara afeesidaa.
19Miqi qimaseenoo Kadannana afaaqooqa qinau.
Kada nipuraraa fasiqauqa ani arifaranoo.
Miqifana anee quandaki nariqa nifaqee finnaranoo.
20Miqi qimaseenoo Yakooboofa Aseeranara qinau.
Ani maqa maaqaki narana moomoo amiqirafa kai mariannoo.
Anee kinna ami mariandee ira narana kai neemarinnaranoo.
21Napatari anee kaasau aandaura fooqaana maridana aneenna aidiranasaa sandana nua.
Anee amiqira faiqi moomoo maqeennaranoo.
22Yooseefaafa anee irumu miqirafa maridana nammari afainni kambiqafi aqama moomoo ireennaranoo. 23Ani namuqaa nimudaanai qimasee nári duru feefannoo ani arirara afaqeefaranoo. 24Miqifanoo Yooseefaana duru fannoo sia paruparuqiannoo tipu kai qinoo mariannoo. Yakooboona Anutufa aiqama afeeka faqaafa mina afeeka aminanoo mina asauku fannoo afeekaikiannoo. Mi Anutufa Isaraee maqannaasa rakisirafa misa afeeka kukeeqara maqusa maridanoo. 25Ani akoona Anutufa ani dadaaqiannoo.
Aiqama afeeka faqaa Anutufa ani amiqi amiqiani.
Innaarunaindaraa aakunnoo ani amiqi amiqimma amaqaannoo.
Maqakiqari ururainna nammarifa ani amiqi amiqirana amiani.
Ani burimakau aandau faqa faiqi aanaaqiuqa faqa amiqi amiqimma nimaqaani. 26Moomoo taatuqeenauqa faqa sakummauqannoo faqa ani amiqi amiqimma amaqaani.
Ooqeenaa aaqanasaaqaraa amiqi amiqirafa ani amiqi amiqiannoo.
Naaruara marira aaqanasaaqaraa amiqi amiqirafa ani amiqimma amaqaani.
Oosana oosana ainaina qinee qunna amiqi amiqirafa ani Yooseefaanasaa mariannoo. Anee aneenna afasausa kiqari uriqararafa marinnanasa mi ainainausa anisaa mariannoo.
27Miqi qimasee Yooseefaana qimamisee quandafinoo Beensaminna qimaminau.
Beensaminna anee kaasau fainiara foora marinaranoo.
Anee kananaana faqa eendimarinana faqa aandau arusee neennaranoo.
28Doo miqimasee Yakooboofa narí faiqi namu indaaruqaana saa oosana araseenoo aiqama mafi nifaaqooqa qimasanau. Miqimasoofaqa misa qisauku qara taikasee qikunooqu qaara marasee oosana faiqi namu Isaraee maqannaa mariqau.
Yakooboofa kuqufufaqa akundoo ufafa.
29Yakooboofa nifaaqooqa qimannimaqaseenoo maaqi qimasee narí faiqi namu qimaniminau. Qinee kaqi kaaqoo kuqiqa qeeqa qikeeku qikaaku marianaki oonu ootupaanaura. Innee sia maaqoo qikundaaqa. Ooqai Abaraqaammafa nikundara maqa feefauru maqoofa maridanoo. Qeeta maqannaa Eefaroona maqaki qini qikausa nikundoonaki qini faqa qikundaaqa. 30Kannaana maqa maaqaki Makapeera maqusa Mamareena maqusa suani afu oosana qaanai maridanoo. Abaraqaammafa Eefaroonafa unnai mi maqana feefaurummaseenoo nikundanau. 31Miqoo misa Abaraqaammana faqa mina anaaqa Saraqa nammmarina faqa nikundaqau. Minakikai Isakeena faqa mina anaaqa Reebeeka nammarina faqa nikundaqau. Qinee minaki inni ninoona Reeaa nammarina akundeeqa. 32Mi maqana faqa minakinaa ooni aamara faqa Qeeta maqannaasa unnai feefauriqia. Qini minaki qikundaaqa. 33Yakooboofa narí faiqi namu qimannimi taikasee aiku raqandaammasee doo kuqinoo narí akeeku akaaku unnai finau.
Currently Selected:
Oosana 49: bjr
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.