Oosana 29

Yakooboofa Rabanana maaqai ooruranau.

1Miqi qimaseenoo innaaru qimaseenoo Yakooboofa suani oosana qaannai mariasa, misa maqa maaqai oonu ranau. 2Oonureenoo qafoofanoo nammari madika qusau saqanna marufanoo qaaramooki sipsipauqa mi nammari madikana afainni faiqaqeeufaqa misasaa rakisirausa miqoo rakisimariqau. Sipsipauqa mi madikanakinaa nammari neemariqau. Firaa ooninnoo mi madikana rafaaqafuqoofanoo marinau. 3Sipsipauqa aiqama moodaa qoo aniroofaqa sipsipasaa rakisirausa mi oonina quanda quandamma aqusee nammari nimisee kaifaa mi oonina quanda qundamma mafi rafaaqafi mariqau.

4Yakooboofa sipsipasaa rakisi marusa oonu nindafeenoo qinau. Qini qikaqaafasaa, innee yaindaraasee maridaqee. Misa qiqau, maasa Qaraana maqusaindaraasa maridaqa.

5Yakooboofa iriseenoo qinau. Innee Naqoorana anaiqi Rabannanara iridee qufaqa misa qiqau. Eeoo maasa minara iridaqa.

6Miqi qufanoo Yakooboofa qinau. Rabannafa amiqisaa fee maridanoo fee. Misa qiqau. Eeoo amiqisaa maridanoo. Mina qafaa, doo mina araamuna Raseera nammarifa mina sipsipauqa nifiqee anidanoo.

7Yakooboofa misa sipsipa oosana qafeenoo qinau. Innee naqifee ifaqee sipsipa suani qambaana mara quqaqaafaqee maridee. Dauni nammari nimiseeqa mara quqasaifaqa misa fida qusau neeqa nifaaqa maraaqa.

8Mi maqannaasa iriseeqa qiqau. Maasa sia miqianaura. Aiqama sipsipa maaqoo aniraifaqa ooni quanda quandamma aqusee nammari nimifaranoo.

9Yakooboofa misa faqa ufa qimarufanoo Raseera nammarifa narí akoona Rabanna sipsipauqa nifiqee aniranau. 10Yakooboofa narí anoona Reebeeka nammarina asookina araamuna qafamaseenoo Rabanna sipsipa faqa qafamaseenoo findifinoo nammari madikaki rafaaqafuqoo oonina quanda quandamma mafi quqaseenoo Raseera nammarina sipsipauqa nammari niminau. 11Nammari nimiseenoo Raseera nammarina ooriki amooqaidanoo asasirafa firaafa minaki marufanoo iki raqanau. 12Iki raqaseenoo Raseera nammarina qimaminoo qinau. Qinee ani akoona ati Reebeeka nammarina amaaku maridaqa. Raseera nammarifa mina ufa iriseenoo sandeenoo oonuree narí akoona qimaminau.

13Rabannafa narí anauqi Yakooboona ufa iriseenoo sandeenoo oonu mafi kaqaramma qumareenoo amooqaseenoo sukudaakutamasee afiqeenoo narí maaqai aninau. Miqoo oonu maridanoo Yakooboofa Rabanna aiqama ainaina kambiqoonara qimaminau. 14Rabannafa iriseenoo maaqi qimasee qimaminoo qinau. Anee qini moodaa fidika mariananoo. Miqi qimasoofanoo Yakooboofa moodaa uqoona mina faqa miqoo marinau.

Yakooboofa Rabannana araamuna qara mararee qimasee mina ainaina imarinau.

15Rabannafa maaqi qimaseenoo Yakooboona qimaminoo qinau. Kuqaa anee qini qinauqi mariananoo, sia fifau qini ainaina kai innaranoo. Maqee oosana araseeqa feefauru amiqambuanaura. Ani naqifee mandee feefauru amianauree.

16Rabanna araamuna qara qaaraqanda mariqau, indaaruqaafa Reeaa nammarifa marinau inaaqianaafa Raseera nammarifa marinau. 17Reeaa nammarifa indaaruqaafa amiqira oori afiri faqaafa marinau. Raseera nammarifa mina faqa arusee kaaqa amiqirafa uqanna marinau. 18Yakooboona irirafa Raseera nammarinara kai iri marufa marinau. Minara iriseenoo Yakooboofa Rabannana narí ainaini maruna akiiqara qimaminoo qinau. Amanee qinee Raseera nammarina maraanauree. Anee eedoo qinaqa qinee mina akiiqara qisauku dinni taikasee dinni ani qaara marasee 7 aukuana ani ainaina ianaura.

19Qufanoo Rabannafa qimaminau. Qinee amana ani amianaura, moo oosana nimiranara qikooqaidanoo. Doo anee qini faqa maridana ainainia. 20Rabannafa miqi qimasoofanoo Yakooboofa Raseera nammarina marararee qimaseenoo qisauku dinni taikaseenoo dinni ani qaara maraseenoo 7 aukuana mina ainaina maisee marinau. Yakooboofa Raseera nammarinara aidi marufanoo mi aukuanna namufa qaaramoo faasaanara foora aiqaranau. 21Dinni taikasee dinni ani qaara marasee 7 aukuana taikasoofanoo Yakooboofa Rabanna qimaminoo qinau. Doo qini maanaaqa qimiraree qunna aukuanafa aiqareenoo. Doo Raseera nammarina qiminaqa maraa. 22Rabannafa eedoo qimaseenoo narí araamuna amundaida oomaqa sakasee aiqama naaroofaqa ani naqau. 23Mi eendanaki Rabannafa narí araamuna indaaruqaana Reeaa nammarina qumee Yakooboona maaqaki quqasoofanoo Yakooboofa auna Raseera nammarifa mifoo qimaseenoo mina faqa sakasee faiqanau. 24Rabannafa miqoo qaraasa oosana mareeno narí ainainira maanaaqa moo minauqu Siripaa nammarina mareeqee narí araamuna Reeaa nammarina ainaina maisaanifeera aminau. 25Iaqoofanoo findifinoo Yakooboofa qafamaseenoo, boo Reeaa nammari fee qinau. Yakooboofa Rabanna funnai oonureenoo aqinoo qinau. Anee naqifee ifanee qini miqimma qimaqeenee. Qinee Raseera nammarina marararee qimasee ani ainaina maiseeqa. Anee nanaree qini qikaru q inanee. 26Rabannafa qinau. Maasa maaqoo qaraasa oosana sia miqinoo maridanoo. Indaaruqaana naaree amundaseeqa inaaqiannaana kasooaqee inaaqianna amundaidaqa. 27Anee Reeaa nammarina faqa kaqi marinanoo mina oomaqirafa 7 faasaana mariannoo. Taikainaqa miqoo kafaa Raseera nammarina faqa amianaura. Amianana miqooqari mina akiiqara anee oosana araseenana kaifaa dinni taikasee dinni ani qaara marasee 7 aukuana qini ainaina innaranoo. 28Yakooboofa minara iriseenoo eedoo qimaseenoo Reeaa nammarina faqa mariufanoo qoomaqa narana taikoofanoo Rabannafa narí araamuna Raseera nammarina faqa aminau. 29Kafaa Rabannafa narí ainainira maanaaqa mina auqu Biriqaa nammarina mareeqeenoo Raseera nammarina ainainianifeera aminau. 30Amufanoo Yakooboofa Raseera nammarina faqa sakasee faiqanau. Yakooboofa Raseera nammarinara aidi marufanoo Reeaa nammarinara sia amiqimma aidi marinau. Miqidanoo Rabannana ainainiranaki kafaa qisauku dinni taikasee dinni ani qaara marasee 7 aukuanaki marinau.

Yakooboona faiqi namu ufa.

31Yakooboona irirafa Raseera nammarinasaa kai mundinoo marunara Reeaa nammarinara akoo akaa mimarinau. Miqi marunara Karaambaiqa qafeenoo dadaaqufanoo Reeaa nammarifa amuaqu qaikinau. 32Reeaa nammarifa amuaqu qaikinoo mariiufanoo faiqi akoonaiqi maqanau. Maqaseenoo qinau. Karaambaiqa qiniara qimudaoo qinara qini qifaaqi fannoo maqee qinisaa atooqeenoo fee qianaura. Mi irirana iriseenoo mi faiqina auqu Reeubeena fee qinau.

33Reeaa nammarifa marikinoo kaifaa amuaqu qaikinoo mariiufanoo faiqi akoonaiqi moo maqanau. Maqaseenoo qinau. Qini qifaaqi qini ameesuqi marinara Karaambaiqa irinoo qiniara qimudaoo qimaseenoo maa faiqina qiminoo. Minara mina auqu Simeeoona fee qinau.

34Reeaa nammarifa marikinoo kafaa amuaqu qaikinoo mariiufanoo faiqi akoonaiqi moo maqaseenoo qinau. Doo maqee uqanna qini qifaaqi fannoo doo qinisaa atooqaannoo, qinee qaaramoo akoonaiqi maqaseeqa. Minara iriseeqa mi faiqina auqu Reefi nee qiqa.

35Reeaa nammarifa marikinoo kaifaa amuaqu qaikinoo mariiufanoo faiqi akoonaiqi moo maqanau. Maqaseenoo qinau doo maqee qinee Karaambaiqa amooqidaqa, maa faiqina auqu Yuda fee qidaqa. Reeaa nammarifa Yudana kai maqaseenoo mi kamuqoo kisaaqasaa marinau.

Currently Selected:

Oosana 29: bjr

Highlight

Copy