Rafudoo Akarafa 5

Mooseesa Aaroonasa Isipa maqannaasa kinna oonu qafaqau.

1Innaaru qimasoofaqa Mooseesa Aaroonasa Faraoo funnai oonuree qimamiqa qiqau. Oo Faraoo, Yaaweefa maasa Isaraee maqannaa Anutufa aniara maaqi qinoo. Anee qini faiqi namu idukusainaqa aadana maqa maaqaki oonureeqa oomaqa mandee qiniara innaaru qidaqa qimooqiaqee qinoo. 2Faraoofa miqanda ufa iriseenoo qinau. Yaaweefa yafee. Nanaree mina ufara eedoo qimasee Isaraee maqannaasa niiqaana fifaree. Sia qinee Yaaweenara iridaqa. Minara qinee sia uqanna Isaraee maqannaasa niiqaanaura.

3Mooseesa Aaroonasa kafaa Faraoona qimamiqa qiqau. Maasa Heeburu maqannaasa Anutufa maasa qifusaa koorooinoo. Anee maasara eedoo qinaqa qaaramoo faasaana aadana maqa maaqaki oonuree Yaaweena maasa Anutuna tatufirana suqa amianaura. Maasa sia miqiananoo mifa firaa manda auriranannai fee firaa dariranannai fee maasa aiqama daruannoo. 4Faraoofa iriseenoo Mooseesa Aaroonasa qimanniminoo qinau, inneeqara nanaree faiqí anaasee qini ainaini mariasa nifiqee fuafaqee minnisee fidee. Saina kafaa anirandee ainainiranaki fuaqa. 5Innee Isaraee maqannaasa maqee moomoo kammafi qini ainainirana minnisararee fee qidafee.

6Mi faasaana kai Faraoofa Isipa maqannaa karabusasaa rakisi marusa faqa Isaraee maqannaa niqoonausasaa rakisi marusa faqa qimanninoo qinau. 7Innee maqee sia kafaa uita asaki ateekasee Isaraee maqannaa nimifaqa minannoo maaqa usakee maria simmeerana auquaqa. Sai faqa nári kai maraaqa. 8Maraseeqa sia oorudupi masee auquaqa. Aiqama kari auqi mariana amana kai auquaqa. Misa kudiki mariasa maridaqa qiniara maasa idukusainaqa maasa oonuree Yaaweena nári Anutuna tatufirana suqa amianee qidaqa. 9Miqi qidaqifaqa innee firaa kadaapi nimifaqa misa oonauqee anauqee idaqa Mooseesa Aaroonasa qinna unnufausa sia iriaqa.

10Miqi qufaqa karabusasaa rakisi marusa faqa Isaraee maqannaasa nári niqoonausasaa rakisi marusa oonuree maaqi qimasee Isaraee maqannaasa qimannimiqau. Faraoofa maasara sia uita asaki raraku mini nimiaqee qidanoo. 11Mifa inniara inneeqa kai minakinai randasee maree miniseeqa ooqai auqiu simmeerana amana kai auquaqee qinoo. 12Miqi qufaqa misa Isipa maqa maaqaki aiqamatinai nidaqa uita asaki randasee suqimariqau. 13Isipa maqannaa karabusasaa rakisi marusa fuki faaki qidaqa qiqau. Innee ooqai maasa uita asaki nimiafana auqeeundee masee mina amana kai simmeera auquaqa. 14Miqi qimaseeqa karabusasaa rakisi maru Isipa maqannaa fasiqausa Isaraee maqannaasa nári niqoonausasaa rakisiaqeera mara quqaqoosa naruseeqa qiqau. Innee nanaree simmeera ooqai auqiuna amana sia auqidee.

15Qufaqa Isaaraee maqannaa rakisirausa Faraoo funnai oonuree qimamiqa qiqau. Oo uriqararafa. Anee naqaa fee ifanee maasa maaqimma qimaqaidanee. 16Misa sia uita asaki nimiseeqa kaqi maasara simmeera auquaqee qidaqa. Mina saara maasa daria. Sia maasa oosanasaa fau. Inneeqa oosanasaa fifau miqiafanoo.

17Faraoofa iriseenoo qimanniminau. Innee kudiki mariasa ainainiranara nikooqaifaqa qiniara maasa idukuqisainaqa Yaaweena tatufirana suqamianee qimariafanoo. 18Doo kaqi kaqi anirandee inneeqa ainainai fuaqa. Misa sia inni uita asaki nimifaranoo. Inneeqa kai uita asaki maree miniseeqa ooqai iundee kai moomoo simmeera auquaqa. Doo fuaqa.

19Isaraee maqannaasa nári niqoonausasaa rakisi marusa Faraoofa ooqai auqiundee kai masee auquaqee qunara irisee doo maasa ummaaraki maridee qiqau. 20Faraoo funnaindari quqasee anidaqa Mooseesa Aaroonasa misa nifeesidaqa marufaqa ani paquriqau. 21Ani paqurimmasee qimannimiqa qiqau. Yaaweefa inniqara oosana qafamaseenoo mina akiiqara nimiannoo. Inneeqara oosana arasaafanoo minasaara Faraoofa narí rakisirausa faqa maasa daruannoo. Inneeqara Faraoofa maasa daruanifeera andaana rumasaafanoo daruannoo.

Mooseefa aundura ummaara roofanoo Anutu funnai anunu rinau.

22Mooseefa misa ufa iriseenoo quandakufanoo oonureenoo Yaaweenara innaaru qinau. Oo Yaawee, anee naqaafee ifanee Isaraee maqannaa maa mandaikana mannimaqaidanee. Anee naqi fee ifanee qini mai diiqeenee. 23Qinee Faraoo funnai oonureeqa ani ufa qimamiafanna qooqari Faraoofa Isaraee maqannaasa mandaika kai mannimaqaidanoo. Anee sia uqanna dadaaqira kari mariananoo.

Currently Selected:

Rafudoo Akarafa 5: bjr

Highlight

Copy