Rafudoo Akarafa 4

Anutufa Mosena oosana oosana kudifaanna auqaani feera afeeka aminau.

1Mosefa Anutuna ufa iriseenoo kaifaa iramirinoo qinau. Isaraee maqannaa misa sia qini ufa qaindusia, sia qini ufa iria qiniara unna fee qimasee Yaaweefa sia ani afusaa kooroo ifana unna qimriananoo qifaqa qinee naqifee ianauree. Naqifee ianaqee misa qini oosana qafee fee kuqaa fee qifaree. 2Qufanoo Anutufa qinau, Anee asaukuki nanee uqirafa nidanee. Qufanoo Mosefa qinau, Saunu uqirausa nidaqa. 3Qufanoo,Anutufa iriseenoo qinau. Doo mi saununa maqasaa aqua qufanoo maqasaa aqusoofanoo mi saunufa sakani kambiqa fufanoo Mosefa mina qafamaseenoo rufiasee sandanau. 4Sandoofanoo, Karaambaiqa fannoo mina qimaminoo qinau. Anee asaukunnai mi sakanina ameesa qumaraa qufanoo qumarasoofanoo kaifaa saunu kammafinau. 5Miqooqari Yaaweefa Mosena qimaminau. Anee ooqureenana Isaraee maqannaasa nifusaa mi ainainna auqainaqa misa qini Anutusara kuqaa Abarahaamana faqa Isakeena faqa Yakooboona faqa misa misa Anutufa kuqaa ani afusaa kooroo inoo fee qifaranoo.

6Kaifaa Karaamaiqa fannoo Mosena qimaminoo qinau. Anee aneenna siutaki asauku upeekaa. Qufanoo Mosefa nari siutaki asauku upeekasee raduku soofanoo, mina asakusaa karoorafannoo qoonamuara foora marinau. 7Anutufa kafaa qinau aneenna asauku kaifaa upeekaa qufanoo upeekaseenoo radukusee qafoofanoo asauku mau namuandaundau irafa sia marinau. Dinniara foora kai marinau. 8Anutufa kafaa Mooseena qimaminoo qinau. Anee indaaru saunu uqannifiqaina sia irifana innaaqiana asauku uqannifiqainaqa misa kuqaa fee qimasee irifaranoo. 9Misa ani mi ainaina qanda qafamasee sia ani ufa irifana anee Niru nammari saka qumareenana aadana maqasaa adiasainanoo fidika kai mandifinaqa qafaaqa.

10Mooseefa Yaaweena ufa iriseenoo qimaminau. Oo Yaawee sia qini diiqaa. Qinee ooqaindari sia amiqimmasee faiqí nifusaa ufa qunausa maridaqa. Maqee anee qini qima qimiannaqooqari sia mifa qini mareeqee ufa qimarunausaikamma qiseenoo. Qinee sia ufa qunausa ufara mamma qimarunausa maridaqa. 11Miqi qufanoo Anutufa Mooseena qimaminoo qinau. Yafee nifauru nimidanoo fee. Yafee sia ufa qiasaika faqa naaqoo qaunirausaika faqa mannisaidanoo fee. Yafee nifu maqarana faqa nifu dimbarana faqa nimidanoo fee. Qinee Yaaweesa kai miqidaqa. 12Moosee anee doo fua. Qinee ani ufa dadaaqi aakapaanana qinnaranoo.

13Mooseefa kaifaa Yaaweena qimaminoo qinau. Oo Yaawee anee moo aqiqainanoo fuani. 14Yaaweefa mina iriseenoo aranaqoofanoo qinau. Doo amana ani afasaafa Aaroonafa Reefina atikinaafa andeeqasee ufa qimarifa marifaqa qinee iridaqa. Mifa maqee aniara randanoo anidanoo. Mifa ani paqurimandee asasiannoo. 15Anee mina qimaminanoo mifa misa qimannimiani. Qinee inniqara dadaaqianaqa ufa qimannimifaranoo. Qinee inneeqara ifandinna ainaina qimannimianaqa auqeefaranoo. 16Anutufa kafaa Mooseena qimaminau. Aaroonafa ani ufa mareeqee faiqí anaasee qimannimiannoo. Mifa ani oora foora marinana anee mina Anutufara foora maridana mifa auqaaninna ainaina anee aakapeennaranoo. 17Anee aneenna saunu faqa uqirafa fua. Minannai oosana oosana ainaina faiqí sia amana auqaaqaa ira ainaina auqeennaranoo.

Mooseefa Isipa maqusai kafaa anirandee finau.

18Mooseefa Yaaweena ufa iriseenoo narí airaamaku Yeetaroo funnai oonureenoo qimaminoo qinau. Amanee qinee Isipa maqusai kafaa anirandee oonuree qeeqa ainaina niqafaanauree. Misa kaqi fee maridee doo fee kuqia. Miqiqufanoo Yeetaroofa iriseenoo eedoo qimasee aiqanau.

19Mooseefa Midianna maqa maaqai kaqi marufanoo Anutufa kafaa qimaminoo qinau. Doo findi finana kafaa Isipa maqusai fua. Ani arirari marusa doo kuqia. 20Mooseefa irisee eedoo qimaseenoo narí anaaqa faqa faiqi namu faqa mareeqee doonkisaa quqaseenoo finau. Anutufa maree fuannee qu saununa faqa maree finau.

21Anutufa Mooseena qimaminoo qinau. Anee Isipa maqa maaqai oonureenana misa karaambaiqa afusaa faiqí sia amana auqaaqaa ira ainaina qinee amiafanna afeekanannoo auqaa. Miqi marinaqa qinee Faraoona kaukaata qira irirana amiananoo sia eedoo qinaqa Isaraee maqannaasa fifaranoo. 22Anee maaqi qimaseenana Faraoona qimamia. Yaaweefa maaqi qidanoo. Isaraee maqannaasa qini ooqa faiqiara foora maridammiaafoo qia. 23Qinee ani qimamidaqa. Anee qini ooqa faiqiuqa Isaraee maqannaasa quqasainaqa misa oonuree qini qimooqiaqa, qunana anee qaoo qianaqa doo maqee ani ooqa faiqi aruanaura.

24Mooseefa narí faiqi anaasee faqa fidanoo eendufanoo aanai faiqanau. Eendaki Anutufa anireenoo Mooseena kuqa arirara inau. 25Miqufanoo Mooseena anaaqa Sipooraa nammarifa ooni raiqarana qumareenoo narí amaaku afaaqa ati aukuseenoo minannoo Mooseena aiku auqamaseenoo maqasaa quqanau. Quqaseenoo qinau. Anee qini qifaaqi fidika aanaaqi fasiqa mariananoo fee qinau. 26Miqimmasoofanoo Yaaweefa Mooseena sia arinau.

27Miqi qimarufanoo Yaaweefa Aaroona qimaminoo qinau. Anee aadana maqa maaqai fidana Mooseena paquria. Aaroonafa eedoo qimasee Anutuna naaquqara aaqanai ooru Mooseena paqurinau. Paqurimasee amooqa nanau. 28Amooqasoofanoo Mooseefa Isipa maqa maaqai fuanifeera Yaaweefa qimamuna faqa oosana oosana ainainara faqa Aaroona qimaminau. Yaaweefa faiqí sia amana auqaaqaa ira ainaina auqannee quna faqa Aaroona qimaminau. 29Mooseesa Aaroonasa Isipa maqa maaqai ooqureeqa Isaraee maqannaa faiqí firaasa naarama quqaqau. 30Quqaseeqa Yaaweefa Mooseena qimamu ufausa aiqama Aaroonafa qimannimisoofanoo Mooseefa faiqí sia amana auqaaqaa ira ainainauqa misa nifusaa auqanau. 31Isaraee maqannaasa Aaroona mi ufana iriseeqa kuqaa mifoo qiqau. Misa Yaaweefa misa unnai anunara nariqa firaa aupuraranara irisee kumma ramafufaqa innaaru qiqau.

Currently Selected:

Rafudoo Akarafa 4: bjr

Highlight

Copy