Rafudoo Akarafa 16

Isaraee maqannaasa mannaa faqa ufini faqa mara naqau.

1Isaraee maqannaasa Isipa maqa maaqaindari quqasee anuqooqari inaaqiannaa quqoona 15 faasaanasaa Sinai aaqana dinni Eerimma maqa maaqa dinni qambaana Sinnaa aadana maqa maaqaki oonuraqau. 2Misa aiqamausa aadana maqa maaqai funara Mooseesa Aaroonasa kaukaata qimannimaqasee qiqau. 3Maasa Isipa maqa maaqaki mariafannaqoo Yaaweefa daruaqaana. Miqoo maasa maridaqa aandau faqa akaqa narana maasa didi maruna maasa qimana kai neemariqiafana. Inneeqara miqooqaraana maasa qifiqeeqeeqa maa aadana maqa maaqanaki quqasaafaqa aandaroo darinaqa kuqu taikaanaura.

4Yaaweefa misa ufa iriseenoo Mooseena qimaminoo qinau. Qinee maqee inni aiqamausa naranara qiananoo innaarunaindari aakuara foora aqufina mara neefaranoo. Faasaambaasaana narana quqasaanaqa faiqí anaasee raudamafiqa moodaa faasaana amanakai maree marifaranoo. Qinee miqimmasee misa nimanamasee qafaanaura. Misa qini ufa irifaree sia fee irifaree. 5Moodaannai qisauku taikasee dinni ani moodaa marasee 6 faasaana qaara eenda narana amanasaa mara deedaqamma quqaaqa. 6Mooseesa Aaroonasa Isaraee maqannaa aiqama suqusee qimannimiqa qiqau. Maqee eenee marinaqa innee Yaaweenara Isipa maqa maaqaindari nifiqee anunara irifaranoo. 7Kananaana innee Yaaweefa maasaki maridanoo daroo daraa ida kaaqa qeemarina qafeefaranoo. Innee minara aanoo qimariana doo mifa irinoo. Innee sia maaqanda rau qimariafanoo fau. Maaqanda faiqí faiqi kai maridaqa mina naakapurufa mau fidaqa mina kai qimannimidaqa. 8Mooseefa kafaa qimanniminoo qinau. Eendinanoo Yaaweefa aandau niminaqa neefaranoo. Kananaana bereeta fooqaana inni nimana kai nimiannoo. Innee mina firaaqoo aanoo qimarianara miqiannoo. Innee maasara aanoo qimariana sia maasarau miqi mariafanoo, Yaaweenara aanoo qimariafanoo.

9Mooseefa Aaroona qimaminoo qinau. Anee Isaraee maqannaa aiqama qima niminaqa Yaaweena oorinni ani kikiqiaqa. Mifa misa aanooqira ufa irinara miqiaqa.

10Aaroofa faiqí anaasee ufa qimannimi marufaqa quandafi aadana maqa maaqai qafoofanoo oonamuki Yaaweena daroo daraa ira kaaqa qarafa koorooinau.

11Yaaweefa Mooseena qimaminoo qinau. 12Qinee Isaraee maqannaa aanoo qira ufa doo iriqa. Maaqi qimasee qimannimia fafaa eendinoo mammandi marinaqa misa aandau nimianaura duna kananaana uqanna bereeta fooqaana nári narana nimana kai nimianaura. Nimisaanaqa innee qini Yaaweesa inneeqa Anutusara irifaranoo.

13Miqi qimasoofanoo eendi marufanoo afidauqa moomoo qaqamaraidaqa anirameeqee uiqaana maqusa amanaikiqau. Kananaana qififaramu uiqaana maqa aiqama fiqu fiqu inoo marinau. 14Qififaramu taikafufanoo adamanna ainaina kaqikaafauqa aadana maqa mau marinau. Mi ainainafa pupusamuara foora kaqikaafauqa marinau. 15Isaraee maqannaasa mina qafamaseeqa mina oosanara randeeqa narí qimami narí qimamiqa qiqau. Maana nana ainaina fee maridanoo fee qiqau. Miqi qufanoo Mooseefa maaqi qimasee qimanniminau. Yaaweefa narana naaqeera nimidannoo. 16Yaaweefa maaqi qimasee qimanniminau. Innee inneeqa faiqi anaasee faqa inneeqa nimana kai maraaqa. Inneeqa maaqaki mariasa nimana nimana kai susufinna qumbiqa quqaaqa. 17Isaraee maqannaa irisee miqimmiqau. Akaqausa moomoo maroofaqa akaqausa qoodaa maraqau.

18Aiqamausa suqusee narí amani narí amani masee qafoofanoo akaqausa moomoo suqufanoo akaqausa oodaa suqiqau. Moomoo suqusa namasoofanoo nimuaqumminau. Oodaa suqusa misa faqa namasoofanoo nimuaqu kaimminau. Aiqamausa nári nimana kai suqiqau. 19Mooseefa qimanniminoo qinau. Sia ataraasa duna nararee qimasee quqaaqa. Aiqama naaqa.

20Miqi qufaqa akaqausa Mooseena ufa rukiasee duna kananaana nararee qimasee quqasoofanoo putaa undufanoo qimi kai qumbiqoofanoo Mooseefa aranaqoofanoo aanoomannimaqanau.

21Aiqama kananaana nári nimana kai suqusaida neemariqau. Kaqi mafisoofauqa suani urureenoo ididiufanoo nammari nammarimma taikanau. 22Dinni ani moodaa marasee 6 faasaanasaa qaara kari suqarana amana kai maraqau. Miqi masoofaqa Isaraee maqannaasa uriqararausa aniree mi ainainnara Mooseena qimamiqau. 23Mooseefa iriseenoo moo ufa maaqi qimasee qimanniminau. Duna Yaaweena naaquqara idooara faasaana mariannoo. Mi faasaanna minaindi mariannoo. Innee nana ainainee suqararee qinnana maqee suqaaqa. Kaqi marinna narana aaduma quqaqaifanoo marinaqa duna suqa naaqa.

24Misa Mooseefa qimannimundee iqa dunaindi kaqi maaqaki quqaqau. Iqaqoofaqa qafoofanoo sia putaa inoo qimi marinau amiqinoo marinau. 25Mooseefa minara qimanniminoo qinau. Doo maqee mina naaqa. Maqee Sabata idooara faasaana Yaaweenaindi maridanoo. Minara innee fuka narana uiqaana maqusa naambeeaqara mararafa sia mariannoo. 26Innee qisauku dinni taikasee dinni ani moodaa marasee 6 faasaana narana suqu quqaaqa. Qisauku dinni taikasee dinni ani qaara marasee 7 faasaana idooara faasaana marinaqa sia miqoo narana mariannoo.

27Qisauku dinni taikasee dinni ani qaara marasee 7 faasaanasaa akaqausa narana suquanee qimasee oonu qafoofanoo sia marinau. 28Anutufa mina qafamasee Mooseena qimaminau. Innee kisaaqasaa fee qini ufa rukiaidaqa sia qini sanda ufa afaqeefaree. 29Innee iriaqa. Qinee Yaaweesa idooara faasaana nimiqa. Miqunnanara qinee dinni taikasee dinni ani moodaa marasee 6 faasaanasaa qinee qaara faasaana narana amana kai nimianaura. Aiqamausa mi faasaanna inneeqa mariaqoo kai mariaqa, sia kasiaqa. 30Faiqí anaasee minara iriseeqa dinni ani qaara marasee 7 faasaanaikufaqa sia ainaini mariqau. 31Isaraee maqannaasa mi narannara mannaa fee qimariqau. Mifa ooroorana qaqama fooqaafa eekara arirafa marinau. Mina namasoofanoo mina adiafaa irafa ookasaasa anoonannai auqira biskitara foora imarinau. 32Mooseefa Yaaweena ufa iriseenoo maaqi qimasee qimanniminau. Yaaweefa inniara maaqi qidanoo, qinee mannaa nimmunnana akaqana afeeki mara quqaqai marinaqa inneeqa ninaiqimara nikeeku nikaaku uqannifiqaidaqa maaqi qimasee qimannimiaqa. Yaaweefa Isipa maqasaaqari maasa aadana maqasaa nifiqee anireenoo qimufaqa naafannanee qimasee uqannifiqaaqa.

33Miqi qimasee qimannimiseenoo Mooseefa Aaroona qimaminau. Anee qafee moo mara maree mannaa suqeeqee Anutuna afusaa quqasainaqa kasooaqee kambiqainausa qafaaqa.

34Yaaweefa Mooseena qimamundee inoo Aaroonafa mi naranna mara mareenoo moodaanaki kira bookisa aaqa quqasoofanoo marinau. 35Isaraee maqannaasa 40 aukuanaki mannaa neemariqau. Mi naranna naqa fifiufaqa Kannaana maqasaa nariqa mariraree quqoo oonuraqau. 36Mikari misa ummaara amana masee qafee marufa qaaraqanda marinau. Moo fannoo moodaa kaqikaa susufinna amana marinau. Moo fannoo qisaukuqara 10 kaqikaa susufinauqa amana marinau.

Currently Selected:

Rafudoo Akarafa 16: bjr

Highlight

Copy