2 Timooti 4

Pauroofa faiqí anaasee qimannimira oosanara Timootina qimaminau.

1Oo Timooti qinee Pauroosa Anutuna afusaa faqa asauku mundirana kuqirausa faqa kaqi mariasa faqa aaquqimannimaqee marina afusaa faqa doori kandamasee ani faqa aaquqimamaqaidaqa. Yisufa kaifaa kooroomafi aiqamausa rakisianinnanara iriseeqa ani aaquqimamaqaidaqa. 2Anee Yisuna amiqira fasaasa ufara faiqí anaasee qimannimia, narí qanaa fee kaqiqoo fee sandanainai qimasee qimannimia, anee misa iriaqaa iaqee qimasee qimanniminaqa misa iriaqa anee mandoosana maree mariasara qaoo qia, anee faiqí aanaaseera nifeeqaraidana poodua. Anee ubiqafi sanaasamasee faiqí anaasee qimannimia.

3Qusasaa sia anoona ufa naamuaqirana irifaranoo misa nári manda nidimari ainainna kai afaqee fidaqa nári naaqookinaa manda irirana naamuaqimariasa misauqa kai moomoo nifiqasee innee mi manda irirausa kai qimaqimiaqee qifaranoo. 4Misa anoona ufara nimeesuqusee kai fifau uriara kai naaqoo rammatini imariasa. 5Timooti misa miqimarifana anee aneenna kasoomambi ubiqafinana misa ani ariranee aupuraranee amimarifana kaqi kai fua. Amiqira fasaasa ufa naamuaqira saika maqee maqee marana fua, anee aneenna aiqama saikaki maridana Anutuna ainainira faiqi maridaqee qimasaidana marana fua.

6Oo Timooti anee iria doo qini fidika ruqiqa qimaqeefandinnafa doo ani maridanoo. Doo qusasaa misa qini darifaqa qinee maa mariranakiqari doo taikasee fifuanauranoo. 7Doo qinee amiqira rakiranakiara foora rakumaree uriqaramafiara foora mafiqa. Doo narí amani narí amanira sandaranaki qimudaanaiqimaseeqa sandaqa aniifaqa doo taikarana paquriqa. Qinee Anutuna ufa faqa marirana faqa andeeqasee qumaree sandeeqa taikarana aniree paquriqa. 8Doo maqee sandaida uriqareemariasa feefauru qiniara deedaqinoo maridanoo. Karaambaiqa andeeqasee ufa nimimarifa qumira faasaana andeeqeemariasa qafee qini qikiaaqa afisuannoo. Mikari sia qini kai qimiannoo, moomoosa minara nidimarisa mina koorooiranara afeesidaqa nidimarifaqa afeesimariasa misa faqa nimiannoo.

Pauroofa Timootina qimaminau, qini qamunna papiaqa maree mini qimia.

9Oo Timooti anee kaqi kaqi mindari aniree qiqafaa. 10Deemasafa maa maqa maaqanakinaa ainainara kaaqa ridanoo qini minniqiseenoo doo Teesaroonika maqusai finoo Kareeseenasafa doo Karatia maqa maaqai finoo, Titusafa Daramatia maqa maaqai finoo. 11Rukaafa sia rumbaranaki marifa kaqi marifa mifa kai qini faqa maridanoo. Anee Marikoona afiqee minisainanoo Anutuna saika qini dadaaqiani. 12Tikikusafa qini faqa marina qinee doo aqiqaunanoo Eefeesusa maqusai finoo. 13Qini suara qamunna Tarooasa maqusai faiqí moo auqu Karapoosana maaqaki quqaqaafannana anee aninana aimaree ania. Qini papiqauqa faqa qini akara papiqa faqa aimaree mini qimia.

14-15Areesandeerafa mifa qainna faqa koopaa faqa auqimarifa mifa narí mandoosana mareenoo qini firaaqoo mandaikamaqimaqeenoo, mifa firaaqoo maasa qimannimira ufara akooqaidanoo anee faqa firaaqoo minara eerairia. Anutufa miqimarina akiaqara arirana mina amiannoo.

16Qinee Roomma maqannaa kootaki indaaru kamu mariafananoo sia moo fannoo qini dadaaqinau aiqamausa qini quqaqisee sandamafufaqa qeeqaraa kai kooti mariqiafana. Qinee Anutunara sia mina akiaqara nimiannee qidaqa. 17Misa fufanoo Karaambaiqa kai qumee qini pooduqee marufaqa qinee kootaki kikiqamafi Yisuna ufa aiqama amiqimasee aanaamuru aiqama qimannimiafanaqa iriqau. Miqimasaafananoo Anutufa kaasau aandau ookinaanara foora qini rafieenoora foora inau. 18Karaambaiqa fannoo oosana oosana mandainainakinaana qini mareeqeenoo narí innaaruna ququsaki amiqimasee quqaqisaannoo. Mina areenarafa naaru naaru mariani, kuqaa.

Pauroofa nimandoo ufafa.

19Anee Pirisikira nammarifa faqa narí afaaqi Akuiraana faqa nimandaa, Ooneesifoorusafa faqa narí faiqi anaasee faqa nimandaa. 20Erasatusafa Koorinti maqusai miqoo kasooinoo marinau Taroofimusafa aurimarufaqa Mireetusa maqusaki quqaqiafana.

21Suara aukuana aniannoo anee naaree amanamasee qafeenana ania. Eeuburusafa faqa Pudeenasafa faqa Rinusafa faqa Karaudiafa faqa maaqoo maria qikaqaafasaasa faqa aiqamausa Timooti ani amandaidaqa.

22Karaambaiqa maraquna fannoo ani faqa mariani Anutuna afaarirafa inni aiqamausa faqa mariani.

Currently Selected:

2 Timooti 4: bjr

Highlight

Copy