1 Koorinti 15
15
Yisufa kuqiranakiqari findifunara koorooidanoo.
1Oo qini qikaqaafasaa ooqai qinee Pauroosa Yisuna amiqira fasaasa ufa qimannimiafannana, innee mina irisee maqeeiafanoo inni irirafa minasaa rusisoofa mapukinoo marinara inni naaqoo auqaidaqa. 2Yisuna amiqira fasaasa ufa qimannimiafannana, innee mina rakisi mapuku qumareeqa innaarunai asumu marirana maree mariafanoo. Abee innee indaaru kuqaa fee iriqee iqau unna qimasee iridee qifaara.
3Qinee sia qinee qeeqa ufa kaifau qimannimiafannanau. Yisuna aiku asauku mariannaindari anu ufana firaaqoo uriqarara ufa qimannimiafannana. Mi ufana oosana maaqimminoo maridanoo. Asauku mundirafa tamummaqara fasiqauqa akarakinaa ufamau finoo maasa mandainainara kuquqimaqanau. 4Kuqufufaqa misa mina iri akundamasoofanoo qaaramoo faasaana marinoo tamummaqara fasiqa akarakinaa ufamau finoo kuqiranakiqari findifinau. 5Findifufanoo Peetooroona afusaa koorooinoo miqooqari qisaukuqara taikaseenoo qikunni ooqu qaaraqanda mareenoo niqiqaaninna fasiqausa aiqama nifusaa koorooufaqa qafaqau. 6Qafamasoofanoo miqooqari narí ufa irimarusa faifa handareeta fasiqa anaesee moomoo uqanna nifusaa moodaa kari kai kooroo inau. Misauqakiqari akaqausa asooqaqee kuqufufaqa, moomoosa kaqi maridaqa. 7Miqooqari Yisufa Yameesana afusaa kooroomambinoo miqooqari niqiqaaninna fasiqausa nifusaa kooroomambinoo qimanniminau.
8Inaaqianna uqanna qini Pauroosa qifusaa faqa koorooinau. Qinee daaduma uqanna moo oosanakiqari amaneendaraasa eedadara foora mariafanausa maridaqa Yisufa qini qifusaa kambiqoofaqa qafaqiafana. 9Qinee Yisufa niqiqoo fasiqausakina ureeqarausa maridaqa. Qinee Anutuna ufara suqimariasa aupurarana nimiafanausa marunnanara naqi fee ifaqee misa qiniara Yisufa niqiqoo fasiqafee qida fee, sia qinee misa nimana maridaqa. 10Anutufa sia qini ureeqaranara irinoo kaqi narí afauaranannai qini mareeqeenoo narí niqiqoo fasiqausaki quqaqiseenoo ufa qimannimiannee afeeka qimufanoo sia qiniki mandaikinau. Qinee aiqama niqiqoo fasiqausa urinaaqaramasee faiqí aanaaseeki maqusa maqusa kadaapiriqa, sia qeeqa kaifau miqidau Anutufa qimu afeekafa qiniki kasinara miqidaqa. 11Yisufa maasara kuqinoo findifunara qimannimunnufana akaqa niqiqoo fasiqausa nookinaanee iridee qini dookinaanee iridee, mi ufana kai maasa qimannimisaafanaqa minasaa inni irirafa rusinoo maridanoo.
Maasa kuqiranakinaana findifuannanara qidanoo.
12Maasa asauku mundirafa kuqiranakiqari findifunara maasa qimannimiafanaqa innikiqari akaqausa naqimasee kuqirausara sia findififaranoo fee qida fee. 13Kuqirausa kasooqaqee sia kuqiranakiqari findifirarifanoofau asauku mundirafa miqi kai inoofau sia findifu qini. 14Ooqai asauku mundirafa kuqiranakiqari sia findifinaqau maasa qimannimira ufafa sia marinaqau sia qimannimunaiqini, innee inneeqa irirana rusimari ainainafa sia mariqini. 15Kuqirausa kuqiranakiqari sia findififanoofau asauku mundirafa faqa sia findi fiqini. Anutunara asauku mundirana kuqiranakiqari uqeeree maqi qiafannanara kuqirausa kuqiranakiqari sia findififaqau maasa qimannimiafanna ufanara unna ufa fee qini. 16Kuqirausa sia findi fifaqau asauku mundirafa faqa sia findifiqini. 17Asauku mundirafa kuqiranakiqari sia findifinaqau inniqa saqarikirafa kai fifau ainainara foora sia mari ainainnaki faqa innee inneeqa mandainainaki kaqi auiamakifau furufarammiaqini. 18Kuqirausa kuqiranakiqari sia findififaqau moomoosa asauku mundiranasaa irirana rusisaida kuqimariasa sia innaarunai fini auiamakifau furufariaqini. 19Maasa maaqoo marunna kamuqoora kai iriseefau asauku mundirana minasaa irirana rusidau, maasa mandainaina firaafa mariqini, aiqama maqannaasa maqa afaaqasasa mariasakiqari maasa dinee teeroo uriqaranoo mariqini.
20Anoona ufa maaqimminoo maridanoo. Doo kuqaa asauku mundirafa kuqiranakiqari findi finau, mina findifirafa maasa kuqirausa findifirana qima afeekaikidanoo mapukidanoo. Doo kuqaa maridanoo. 21Ooqai indaaru moodaa fasiqannai kai kuqirana kambiqanau, miqi kai inoo moodaa fasiqannai kuqiranakiqari findifirafa kambiqanau. 22Maasa aiqama fasiqa anaasee Adamana faiqi namu marunnanara kuqidaqa, miqikai inoo asauku mundirana faiqi namu marianara Anutufa misa kuqiranakinaana uqeera quqaannoo. 23Sia dapi dapi Anutufa kuqiranaki uqeeraannoo andeeqaseenoo mara findifuannoo, asauku mundirana naaree doo mara findifumaqoofanoo maridanoo miqooqari mifa quminna aukuana mina aiku asauku mareeqee findifuma nimaqaannoo. 25Anutufa narí asauku mundirana mapuku amaqaseenoo qimaminau. Anee aiqama ainainasaa rakisimaree fimarinaqa qinee Anutusa aiqama namuqaa afaannainaina mareeqeeqa ani asauku mundirana aramandunnai quqasaanana anee maqa mammaaqai radamusainaqa kaifaa rakisianauranoo. 26Inaaqianna radamuaninna namuqaafa kuqirafa maridanoo mina faqa radamuannoo. 24Miqoo taikarafa kambiqaannoo Asauku mundirafa afaannauqa uriqararausa faqa misa faiqí firaasa faqa misa afeeka fasiqauqa aiqama mareeqeenoo narí aramandunnai quqaseenoo radamuseenoo narí ququsakinaasa aiqamausa mareeqeenoo narí akoona amiannoo.
27Tamummaqara fasiqausa akarakinaafa minara maaqimminoo maridanoo.
Anutufa aiqama ainaina mina aramandunnai kai quqaannoo fee qidanoo.
Tamummaqara fasiqa minara miqi qimasoofaqa qinee minara maaqi qidaqa. Anutufa aiqama ainaina mina aramandunnai quqararee qidanoo sia nariarau mina aramandunnai quqararee qidaqinoofau. 28Anutufa aiqama ainaina mareeqeenoo asauku mundirana rakisirana ameemaanai quqasainanoo asauku mundirafa mina amaaku fannoo quandaki Anutuna aramandunnai narí keeqaannoo, aiqama ainaina quqoona aramandunnai keeqafinanoo miqooqari Anutufa aiqama ainainatia uqanna uriqararafa mariannoo.
(Pauroofa maru aukuanna faiqí moo fannoo Yisuna ufa irimarufa sia nammari mararai kuqufufanoo moo fannoo qaara kari nammari maree marinau. Mifa nariara faqa kuqunara faqa maree marinau. Mi aukuanna mi oosannara Pauroofa qimannimirara maaqi qinau.)
29Inni Koorinti maqannaasaki kuqirausara nammari maree marusara misara naqi fee qianauree. Kuqirausa kuqiranaki sia findifuafaqa innee nanaree fifau misaree qimasaida fifau nammari maraidee. Innee yanee dadaaqidee miqidee. 30Maasara faqa iriaqa maasa Yisuna ufa saara aiqama faasaana moomoo kari aupurarana narirana eerairirana maraidaqa. 31Qini qikaqaafasaa, qinee aiqama faasaana kuqiranara aniraannoo qidaqa eerairidaqa. Qinee sia kaiqeesa maana koorooidaqa. Innee maasa karaambaiqa asauku mundirana Yisunaki fimarianara nimooidaqa minara kai kooroomannimidaqa.
(Pauroona aukuana Roomma maqannaasa sia Yisuna ufa irimariasa nári oosana maraidaqa faiqí anaasee qafaifanoo adiafaa ianifee qimasee ooni faandamuraki faiqí faqa kaasau aandau faqa mara quqasoofaqa rakimariqau. Yisuna ufa irimaru ufafa taikaanifeera mara quqasoofanoo kaasau aandau naru neemarinau. Pauroofa minara iriseenoo Koorinti maqannaasa qimannimidanoo mina kikiqusimarinau. Koorinti maqusanaasa maa ufana qimanniminoo qinau.)
32Qinee Pauroosa Eefeesusa maqusai kaasau aandaura foora marufaqa misa faqa rakimariqiafana. Kuqirausa sia kuqiranakiqari findififaqau qinee maaqoo Eefeesusa maqusai mi fasiqausa faqa rakidaqa nana ainainee maraanauree qimasee misa faqa rakiqiafana, fifau maaqoo maria fasiqaanaaseesa qiqafaaqee qimasee fee rakiqiafana. Oo sia miqi qiafana. Kuqaa kuqiranakiqari findi fuanauree qidaqa miqi qiafana. Faiqí firaasa unna ufa moo minara maaqimminoo maridanoo. Duna maasa kuquannanara maqee narana nammari moomoo naa. Qinee Pauroosa minara maaqi qidaqa. Kuqirausa kuqiranakiqari sia findififaqau anoonammifooqini, findififaranoo unna qimariafanoo.
33Innee sia mi unna ufana iriaqa,
Moo amaana ufa minara maaqi qidanoo, Mandoosana maree maria aqoondisa inni marirana putaamma nimaqeefaranoo.
34Innee Koorinti maqannaasaki akaqausa kuqirausa sia findifi maria ufana qimariasa inni putaamma nimaqaifaqa innee misa mandoosana maraseeqa furufarirana maree mariafanoo. Innee mina minnisee kafaa andeeqara irirana marasee inneeqa mandoosana quqasee andeeqaramau fuaqa. Inneeqa nisauruaqa innikiqari akaqausa Anutuna afeekara sia amiqimasee iri marifanoo kaqi meeramau irirana irimariafanoo.
Maasa kuqiranakiqari findifuanna qifaaqanara qidanoo.
35Inniki moo fannoo kuqirausa findi firanara maaqi qiannoo, kuqirausa doo putaamminoo maridanoo naqimasee fee findi fifaree, nana afaaqee findi fuannoo fee. 36Anee furufarimarianafa mi ufana qimariananoo. Anee nandi ummaqusainanoo sia aaqee kambiqaannoo mifa putaa mambinanoo mina uapaaqi fannoo inaaqiana kambiqaannoo. 37Innee sakuma qaqama fee moo narana qaqama fee ummaqidaqa sia narana faqa amanee faqa ummaqi mariafanoo qaqama kai ummaqi mariafanoo. Ummaqusaafanoo sia qaqama kai kambiqaidanoo narana anoona namufaqa amanee namufaqa kambiqaifaqa qafee mariafanoo. 38Anutufa narí iriranannai aiqama aadu aadu qaqama nári aadu aadu kambiqaaninnana anoona namufaqa amanee namufaqa nimidanoo. Anutufa aiqama qaqama andeeqasee narí kai anoona amidanoo.
39Kasimari ainaina nimaqi miqi kai idanoo sia aiqama moodaa nimaqi faqaasa maridaqa. Faiqí moo nimaqi faqaasa maridaqa aandau moo nimaqi faqaasa maridaqa, ufini moo nimaqi faqaasa maridaqa, noodaanna moo nimaqi faqaasa maridaqa.
40Innaarunaindaraa nifaaqa faqaasa faqa maqasaaqaraa nifaaqa faqaasa faqa aaduma maridaqa. Innaarunaindaraa nifaaqa areenarafa moo maridanoo maqasaa qaraasa nifaaqa areenarafa moo maridanoo. 41Suani afu narí areenarafa aaduma moo maridanoo, quqoona narí areenarafa aaduma moo maridanoo, fasau narí areenarafa aaduma moo maridanoo, fasau misaki faqa aadu aadu areenarafa maridaqa.
42Kasooqaqee kuqirausa kuqiranakiqari findififanoo miqiminoo mariannoo. Faiqí anaasee kuqufifanoo mina iri akundee mariafa maqasaaqaraafa maqa maridanoo. Kuqiranakiqari Anutufa uqeerasainanoo mi afaaqafa naaru naaru marira afaaqa mariannoo. 43Nikundee mari nifaaqafa ummooqukidanoo mandaikidanoo, kasooqaqee kuqiranakiqari Anutufa uqeerasainanoo afu qafainanoo idaaqirafa amiqirafa afeeka mariannoo. 44Nikundee maria nifaaqafa maqasaaqaraa nifaaqa ufaasu marifa maridanoo. Anutufa uqeerasainanoo naaru marianinna innaarunai nifaaqa mariannoo. Maqasaa nifaaqa ufaasu nifaaqa maaqoo mariana amana kai marifa maridanoo. Mifa marinanoo innaaruna naaruara marira nifaaqa amana kai marifa kuqaa mariannoo.
45Tamummaqara fasiqauqa akara minara maaqimminoo maridanoo.
Indaaruqaa fasiqa Adamafa kasimaruna auquqoofa marinau.
Qinee Pauroosa minara maaqi qidaqa. Adamana aanaaqiannaa fasiqa Yisufa maqee marirana faqa naaru marirana faqa nimimari maraqunafa maridanoo. 46Sia naaru marirafa naaru kambiqaidanoo maqasaaqaraafa naaree kambiqaidanoo, miqooqari kai naaru marirafa kambiqaidanoo. 47Indaaruqaa Adamafa maqasaaqaraa kookoomannai auqirafa marinau. Inaaqianna Adamafa Yisufa innaarunaindari quminau. 48Maqasaaqaraasa nári nikoona Adamana fooqaasa maqa nifaaqafaqaasa maridaqa. Innaarunai fimariasa innaarunaindaraa fasiqa Yisuna afaaqaikirausa marifaranoo. 49Maqee maasa maqannai auqira fasiqa afaaqa afisiqa moodaa karammiqa maridaqa kasooqaqee maasa miqikai masee innaarunaindaraa fasiqa afaaqa afisusee miqi kai iqa moodaa karakaimmianaura.
50Oo qini qikaqaafasaa qini Pauroosa ufa anoona maaqimminoo maridanoo. Faiqí nimaqi faqaasa faqa fidika faqaasa faqa sia Anutuna ququsaki keeqafifanoo naida nimiannoo. Ufaasu maqasaa ainaina faqa sia amana naaru marirana maraannoo.
51Innee amiqimmandee iriaqa, kukeeqara ufa qimannimianaura, maasa sia aiqama kuquanaura. Qusasaa uqanna Anutufa tautumaqimaqaseenoo maasa moo kamaakamma qimaqaannoo. 52Nifu tasunduna tasunduna kaqi kaqi idanoo miqirafa kai inaaqianna ufireena fannoo fuaqainanoo Anutufa maasa moo kamaakamma qimaqaannoo. Mi ufireenna fuaqasainanoo kuqirausa minakiqari naaru marira nifaaqa faqaasa findififanoo maasa aiqama moo kamma qimaqaannoo. 53Ufaasu maqasaa nifaaqa faqa sia kaqi ooru fifaranoo naaru marirana naaree afisumareeqa ooru fifaranoo. Kaqi mariasa kuqifandinausa misa afeeka nipata naaree afisumaree amana innaarunai ooru fifaranoo. 54Ufaasu maqasaaqaraa nipata faqaasa kuqifandinausa naaru marira nifaaqa sia kuqimaria nifaaqana afisumareeqa doo miqoo ooqeenaasa akara anoona kambiqaannoo. Misa maaqi qiqau.
Anutufa doo kuqirana aiqama nambiqama taikaseenoo mina uraaqaranoo maridanoo.
Kuqirana rafaaqafirafa doo taikeenoo.
Kafaa moo akarakinaa ufa minara maaqi qidanoo.
55Oo kuqirafa maasa rafaaqafimarianafa ani uriqarara afeeka yaifee maridanoo. Doo taikeenoo.
Oo kuqirafa ani aupurara afeeka maasa qimimarianafa yaifee maridanoo. Doo taikeenoo.
56Akara miqinoo marifaqa qinee Pauroosa minara maaqi qidaqa. Maasa aiqamausa mandoosana fannoo kai aupurara afeeka kuqirana amifanoo doo kuqirafa maasa daridanoo. Kafaa mandainaina fannoo mina narira afeeka Anutuna nimaarusira sandufakiqari kambiqaidanoo. 57Oo Anutufinnai dufi dufi qidaqa. Maasa inni saimbaqa karaambaiqa asauku mundirana Yisunannai kuqirana faqa mandainaina faqa maasa uriqaraqa maridaqa.
58Oo qini qikaqaafasaa doo minara iriseeqa sia kasi kasiaqa mapukuseeqa atukaraqa mariaqa. Karaambaiqa marirana nirana mariana maqee maqee minaki kai noori runusee mariaqa. Karaambaiqa marirana niranaki marianara aiqama saika naaru marira anoona marifa maridanoo karaambaiqa marirana nirana sia moo fannoo anoona siaifa maridanoo. Anoona marifa kai maridanoo.
Currently Selected:
1 Koorinti 15: bjr
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
