Wlɔ 7
7
'Klisigɩlɩnyɔ 'tanɩ ‑jlɩmaa ‑zɔn ‑kʋ
1Bholiecɩnyɩ, a 'ta sɛɛ ‑ci lebhe daa nclɔɔ ‑ja ka 'lɛ na, dɛ ‑jlɩmaa ‑kalɩɔ 'lɛ ‑jioli 'kʋ bha? Ncɛlɩa ‑ɔ ‑ci 'lɛ ‑jlɩmaa na, ma n solu 'lɛ. 2'Ŋlɔa ɔya ŋodi ‑nʋɔ 'lɛ 'cɩcɩɛ na, daa ŋodia ‑ja ka 'lɛ na, 'cɩcɩɛ 'la ‑jlɩmaa ‑kʋ ɔ ‑yɔɔsɔ ‑gbaaglɩɩn. ‑Ma gbazɩ ŋodia ‑ka bhli, ɔ ‑ka 'ku na, 'ŋlɔa 'tanɩ 'cɩcɩɛ 'la ‑jlɩmaa ‑zɔn ‑kʋ. 3Na, daa ɔ ‑ŋutoa ‑ja 'lɛ na, gbazɩ ɔ ‑ka ‑buun -ŋodi 'cɩ na, ka ma cɩ 'kɔɔ 'lɛ ŋodimatɩŋlɔ la. ‑Ma, ɔ ‑ŋutoa -ka 'ku na, ɔ 'tanɩ 'cɩcɩɛ 'la ‑jlɩmaa ‑zɔn ‑kʋ. Na, ka ɔ ‑ka ‑buun -ŋodi 'cɩ na, maa cɩ 'tɔɔ ŋodimatɩŋlɔ la.
4N bholiecɩnyɩ, anyɩ ‑ma, 'sɛtɛɛ bhlogbɩɩ, aya Klisi 'la 'nyɛkɛa 'la bhloplɩlɩɛa nɩkplaan, a ya ‑jlɩmaa 'la gbazɔ 'ku, le a 'kanɩ ‑bun nclɔɔ 'nʋa 'plɩ. Ɔmɔ ‑ɔ ‑glɩ 'lɛ ɔmɔa ‑ɔ ‑bho 'lɛ 'kwɩɩn 'kʋ na, ɩya ‑a kanɩ 'ca tlʋ ɩya ‑a ka Laagɔ 'nyɩ. 5‑Masa, daa ‑a ‑kʋa 'lɛ 'nyɛkɛa 'la ‑kwleliea ‑zɔn na, ‑lɩɩ ‑mizimizia 'la 'tʋa ‑ʋ bhlaa 'lɛ ‑anyɩ na, 'plɩlɩa ‑jlɩmaa 'kʋ, 'nyɩ ɩ nʋnʋa 'lɛ ‑ala 'nyɛkɛa nɩkplaan lobholi, le ‑a ka 'kwɩ 'la 'ca tlʋ. 6‑Ma ‑pɔtɔnʋ, ‑a yanɩ 'lɛ lʋʋa ‑ʋ ‑zʋa 'lɛ ‑anyɩ 'kpomuun na, ʋla gbazɔ 'kʋ na, ‑a yanɩ ‑jlɩmaa 'la ‑kwleliea ‑zɔn 'wlʋ. Na, -a yanɩ ‑jlɩmaa ‑zɔn la ‑godogodonamʋa te, 'nyɩ ‑a lobholunɩ 'lɛ Laagɔ 'namʋ ‑lelu nɩkplaan, 'Wugoa 'la ‑kwleliea ‑zɔn.
‑Jlɩmaa -a 'nyɩ 'lɛ nyinyi 'tɛtɩ
7Na, wɔɔsaa ‑a nabhe ‑a kaa 'lɛ nyɩtɛ bha? Ka ‑jlɩmaa ‑glɩ 'lɛ nyinyi bha? ‑Wɔɔ, a 'ta nyinyi ‑glɩ! ‑Ma ‑jlɩmaa -a gba 'lɛ 'nyɩ n ya 'lɛ nyinyi cibhlili. ‑Masa, ɩ ‑ka ‑kʋ lebhe ‑jlɩmaa 'taa 'cla lebhe: ‑Lɩɩ ‑mizimizi 'la 'tʋ 'la 'bhlɔɔ na, 'n cɩ 'taa ‑lɩɩ ‑mizimizi 'la 'tʋ cibhlili. 8Na, ‑jlɩmaa ya nyinyi 'plɩlɩda 'nyɩ, 'nyɩ ɩ ya 'lɛ gba 'nyɩ ‑lɩɩ ‑mizimizi 'la 'tʋ bhlanɩ 'lɛ. Sa, ‑jlɩmaa 'ta ‑kʋ na, nyinyi ‑glɩ lʋʋa ‑ʋ ‑kuo 'lɛ na. 9‑Godogodoa, daa ‑jlɩmaa 'ta ka kaa 'lɛ ‑kʋ na, n ‑kʋa. ‑Ma daa ‑jlɩmaa ci 'lɛ na, nyinyi ya jabha, 10'nyɩ ‑amʋ, n ya 'lɛ 'ku. Na, ‑jlɩmaa ‑a ‑cɩ kaa ‑amʋa 'lɛ jabhʋ 'nyɩ na, a yaan 'kwɩ ‑lalɩ. 11Sa, a ya nyinyi 'plɩlɩdaa 'nyɩ, ɩ yaan 'nyiglili, 'nyɩ ɩ yaan 'kwɩ ‑lalɩ na.
12‑Ma ‑jlɩmaa ‑kplɔ, 'nyɩ ala nɩkplaan 'la wɔlɩa ‑kplɔ, ɩ 'nylugolu 'kʋ 'nyɩ ɩ nanɩ. 13Na, lʋʋa ‑ʋ nanɩ 'lɛ na, ʋ cɩ 'na 'kwɩ 'plɩ bha? ‑Wɔɔ! ‑Ma nyinyi ‑ɩ 'plɩlɩ 'lɛ lʋʋa ‑ʋ nanɩ 'lɛ na 'kʋ, 'nyɩ ‑ɩ yaan 'lɛ 'kwɩ ‑lalɩ, ɩya ɩ 'ka pala lebhe ɩ ‑glɩ nyinyi. 'Lɩka ‑sa nyinyi 'plɩlɩ 'lɛ ‑jlɩmaa nɩkplaan 'la wɔlɩa 'kʋ, 'nyɩ ɩ ya 'lɛ ɩla 'tɛtɩa ‑tɛtɛa ‑zɔnwlaa.
Nyinyi ‑zʋɔ nclɔɔ 'kpomuun
14‑A ‑ci sɛɛ lebhe ‑jlɩmaa 'wlʋlʋ Laagɔ wlɩɩn 'bhlɩɩ, ‑ma ‑amʋ, n ‑glɩ 'nyɛkɛ, 'nyɩ geyu 'bhisa, n ‑zʋlʋɔ nyinyi wlɩɩn 'pɛlʋ. 15‑Masa ɩmɩa n nʋ 'lɛ na, n 'nu 'ta ɩla ‑zɔn. Ɩmɩa n ‑wa 'lɛ na, 'n nʋ 'tɩɩ, ‑ma ɩmɩa n ‑zɔ 'lɛ na, ɩmɩ n nʋ 'lɛ. 16'Nyɩ ɩmɩa n 'ta 'lɛ ‑wa na, n ‑kanɩɩ nʋ na, 'dɛndlana, n ‑ya ‑jlɩmaa ‑plɔ 'lɛ, 'nyɩ n cibhlili 'lɛ lebhe a nanɩ. 17Na, ‑n 'ta ‑amʋ ‑ɔ nʋ 'ta 'lɛ sɛɛ, ‑ma nyinyia ‑ɩ ‑kʋʋn 'lɛ nɩkplaan na, ɩmɩ ‑ɩ ‑kʋ 'lɛ. 18Sa n ‑ci sɛɛ lebhe 'nanɩ 'taan nɩkplaan ‑kʋ, ka n nabhe n 'ka 'lɛ 'cla le 'na 'nyɛkɛa nɩkplaan. N ‑wa lebhe n cɩ 'nanɩ nʋ, ‑ma 'n mino 'ta, 19‑ofi lebhe 'nanɩa n ‑wa 'lɛ na, 'n nʋ 'tɩɩ, ‑ma nyinyia n 'ta 'lɛ ‑wa na, ɩmɩ n nʋ 'lɛ. 20Na, ɩmɩa n 'ta 'lɛ ‑wa na, n ‑kanɩɩ nʋ na, 'dɛndlana, ‑n 'ta ‑amʋ ‑ɔ nʋ 'tanɩ 'lɛ sɛɛ, ‑ma nyinyia ‑ɩ ‑kʋʋn 'lɛ nɩkplaan na, ɩmɩ ‑ɩ ‑kʋ 'lɛ.
21Na, ‑amʋa ‑ɔ ‑wa 'lɛ lebhe ‑ɔ ka 'nanɩ nʋ na, 'lɩka wɔlɩa n lɩ 'lɛ na, nyinyi ‑tɛɛ n mino 'lɛ 'nyɩ n nʋ 'lɛ. 22N ‑ka ncɩ nɩkplaan mʋ na, Laagɔ 'la ‑jlɩmaa ‑kaan 'tʋ. 23‑Ma n lɩ lebhe ‑buun -jlɩmaa bhlo ‑kʋʋn 'nyɛkɛɛn a mʋnʋ ‑jlɩmaa ‑a ‑ka 'lɛ 'na 'wugoa 'tʋ na gbatlɩ, 'nyɩ a zʋʋn 'lɛ 'kpomuun, nyinyi 'la ‑jlɩmaa ‑a ‑kʋʋn 'lɛ 'nyɛkɛɛn na nɩkplaan. 24‑Munzue yaan bho. Na, ncaasaa ‑ɔ -cɩ kaan 'lɛ 'kwɩ 'la 'nyɛkɛ ‑naa 'la geylia nɩkplaan ‑sa bha? 25'Naa bhɔlʋɛ ŋeni Laagɔ! Ɔmɔ ‑bɔɔ ‑ɔ -glalɩɩ 'lɛ 'kʋ ‑ala ‑Kwlenyɔ Zozi Klisi nɩkplaan
Na, 'lɩka ‑sa 'na wɔɔgugwiea nɩkplaan, n ‑glɩ 'lɛ Laagɔ 'la ‑jlɩmaa 'la geyu, 'nyɩ 'na 'nyɛkɛa nɩkplaan, n ‑glɩ 'lɛ nyinyi 'la geyu.
Currently Selected:
Wlɔ 7: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.