Wlɔ 5

Pupue ‑kʋnɩ ‑aya Laagɔ ‑gbaaglɩɩn

1Na, ‑ala pɔɔtɛtɛa 'la gbʋ, Laagɔ ya 'lɛ ‑anyɩ 'kʋnylugolunya ple na, ɔ ya ‑ala ‑Kwlenyɔ Zozi Klisi 'kʋ 'plɩlɩ, 'nyɩ pupue yanɩ ‑ayɔɔsɔ ‑gbaaglɩɩn ci. 2Ɔmɔ 'kʋ ‑a 'plɩlɩ 'lɛ, pɔɔtɛtɛ nɩkplaan, 'nyɩ ‑a ya 'lɛ 'nanɩ ‑naa Laagɔ nʋ 'lɛ ‑anyɩ na 'lɩ. Na, ‑a 'tɛlɩ pɔlɛ 'kʋ lebhe ‑a -cɩ ka Laagɔ 'la 'klʋagbaa 'lɩ, 'nyɩ ‑a kpolili ɩmɩ ‑naa nɩkplaan. 3'Nyɩ ‑ala 'kwlɩbhɩɛ 'titio, ‑a kplolili ‑awlɛɛ nɩkplaan, ‑masa ‑a ‑ci lebhe 'kwlɩbhɩɛ lamʋ pɔɔklalɩɛ, 4pɔɔklalɩɛ lamʋ 'lɛ gbɩɩnclalɩɛ 'la ‑sɩalɩɛ, 'nyɩ gbɩɩnclalɩɛ 'la ‑sɩalɩɛ lamʋ 'lɛ pɔlɛkʋtɛlɔ. 5'Nyɩ pɔlɛkʋtɛlɔ, ʋ 'nyiglili 'ta, sa ‑Kplɔkplɔ ‑Wugoa* Laagɔ 'nyɩ 'lɛ ‑anyɩ na, ʋ ya Laagɔ 'la ‑walʋ ‑ala pɔlɩa nɩkplaan 'kɔsɔ.

6Na, daa ‑a 'taa 'lɛ 'tɛtɩ ‑ylɛylɛ ‑ka na, dɛ daa clɩɩa -ɩ ‑zʋɔ 'lɛ na ɩ ŋeni 'lɛ na, Klisi 'ku 'lɛ nyinyinʋnya 'la gbʋ. 7Nclɔɔ 'ka 'lɛ ŋonu le ɔ cɩ 'kʋnylugolunyɔ 'la gbʋ 'ku na, ɩ ‑tete ɩ 'tɛ. ‑Baasakpa, nclɔɔ cɩ sɛ ŋonu le ɔ 'ka 'nanɩnʋnyɔ 'la gbʋ 'ku. 8‑Ma ɩmɩ ‑naa nɩkplaan, Laagɔ 'ka 'lɛ ‑anyɩ ɔla ‑walʋa pala na, 'dɛ daa ‑a ‑glɩa 'lɛ nyinyinʋnya na, Klisi ya 'lɛ ‑ala gbʋ 'ku. 9Na, ɔla 'kwɩa ya 'lɛ gba 'nyɩ ‑a ya 'lɛ 'kʋnylugolunya 'plɩ na, 'nsasa ɔ cɩ 'taa 'lɛ ‑anyɩ Laagɔ 'la dɔgbɛa cɩ da tlʋbhalɩ bha? 10‑Masa, daa ‑a ‑glɩa 'lɛ Laagɔ 'la ‑zɔbhɛlɩgbanya na, ɔla 'Cʋa 'la 'kwɩa ya gba 'nyɩ pupue ya ‑a ‑yɔɔsɔ ‑gbaaglɩɩn ci. Na, daa pupue ‑kʋnɩ ‑a ‑yɔɔsɔ ‑gbaaglɩɩn na, 'nsasa ɔla 'Cʋa 'la jabhʋa cɩ 'ta 'lɛ gba ɩya ɔ 'ka ‑anyɩ gbʋʋnsa bha? 11‑N 'ta ɩmɩ ‑naa bhlobhlo 'la gbʋʋ, ‑ma ‑a kpolili ‑awlɛ Laagɔ nɩkplaan, ala ‑Kwlenyɔ Zozi Klisi 'la gbʋ, sa ɔ ya ‑aya Laagɔ cɩ zʋlʋ tooto na.

Adaan ɩya Zozi Klisi 'la palɩlɩlɩɛ

12Na, nclɔɔ bhlogbɩɩ 'kʋ nyinyi 'plɩlɩ 'lɛ, 'nyɩ ɩ ya 'lɛ ‑laagɔzɔan ble, 'nyɩ ɩ ya 'lɛ 'kwɩ ‑lamʋ, 'nyɩ ɛ bhlanɩ 'lɛ ncɛlɩa 'fɩan, ‑masa maa ‑tɛtɛa ya nyinyi nʋ na. 13Sa, 'fɩɔn ‑jlɩmaa 'ka 'lɛ kʋ na, nyinyi ‑kʋa tooto ‑laagɔzɔan. ‑Ma maa zɛlɩ 'ta nyinyi daa ‑jlɩmaa 'ta 'lɛ ‑kʋ na. 14'Bhlɩmɔɔn, ‑ɩ bhɔlʋ 'lɛ Adaan 'la 'bhlɛsʋa nɩkplaan ‑aan Moyizi 'kʋ na, ncɛlɩ ‑kʋa 'kwɩ 'la ‑kweliea ‑zɔn, 'nyɩ maa ‑ɔ 'ta 'lɛ Adaan 'la nyinyia 'bhisa 'kʋ ‑naanɩ nʋ 'titio na, ma ‑kʋmʋa ɛla ‑kwleliea ‑zɔn. Na, Adaan ‑ɔ palalɩ 'lɛ ɔmɔa ‑ɔ -cɩ ka 'lɛ ci na.

15‑Ma ‑ngasitʋlɩa 'ta ‑kʋ le vavalʋʋa. Sa, ɩ ‑ka ‑kʋ le nclɔɔ bhlogbɩɩ 'la ‑ngasitʋlɩɛ ‑ka ncaabhutukpa 'kwɩ ‑lalɩ na, 'nsasa vavalʋʋa Laagɔ pleli 'lɛ nclɔɔ bhlogbɩɩ 'kʋ, 'nyɩ ‑ɔ ‑glɩ 'lɛ Zozi Klisi na, ‑ʋ cɩ 'ta 'lɛ ncaabhutukpa 'kʋcɩlɩ bha? 16'Nyɩ wɔlɩa ‑ɩ gɩlɩ 'lɛ nclɔɔ bhlogbɩɩ 'la nyinyia na, ɩya ɩmɩa ‑ɩ gɩlɩ 'lɛ Laagɔ 'la vavalʋʋa na, ɩ 'ta 'wlʋlʋ. ‑Masa, nclɔɔ bhlogbɩɩ 'la nyinyia 'la 'tɩtɩa ya gbaylɩsalɩɛ ‑lamʋ. ‑Ma ncaabhutukpa 'la nyinyia 'la leen, Laagɔ 'la vavalʋʋa ya gbʋʋnsalɩɛ ‑lamʋ. 17Na, 'kwɩ ‑ka nclɔɔ bhlogbɩɩ 'kʋ 'plɩlɩ, 'nyɩ ɔmɔ bhlogbɩɩ 'la nyinyia 'la gbʋ, ncɛlɩa 'fɩan ‑ka ɛla ‑kwleliea ‑zɔn ‑kʋ na, 'nsasa Zozi Klisi bhlogbɩɩ 'wluku, maa ‑ɔ lɩ 'lɛ Laagɔ 'la ‑danaanɔa 'la 'nanɩ ‑bhutukpaa ɩya 'kʋnylugolulɩɛa ɔ nyɩ 'lɛ na, maa cɩ 'taa 'lɛ jabha ɩya ma 'ka 'lɛ kʋ bha?

18Na, saa ‑tɛɛa nclɔɔ bhlogbɩɩ 'la ‑ngasitʋlɩɛa 'plɩ 'lɛ ncɛlɩa 'fɩan 'la gbaylɩsalɩɛ na, 'sɛtɛɛ bhlogbɩɩ nclɔɔ bhlogbɩɩ 'la 'kʋnylugolulɩɛa 'la nʋnʋgbɩa 'plɩ 'lɛ ncɛlɩa 'fɩan 'la da, 'kʋnylugolulɩɛa ‑ɩ nyɩ 'lɛ jabhʋa na. 19‑Masa, saa ‑tɛɛa nclɔɔ bhlogbɩɩ 'la 'nyiyiliea ɔ 'ta 'lɛ 'lɩ na, ɩ ya 'lɛ ncaabhutukpa nyinyinʋnya ple na, 'sɛtɛɛ bhlogbɩɩ, nclɔɔ bhlogbɩɩ 'la 'nyiyiliea ple 'lɛ ncaabhutukpa 'kʋnylugolunya.

20Na, ‑jlɩmaa ya ci 'nyɩ ‑ngasɩtʋlɩɛ ya 'kʋzʋlʋzʋlʋlʋ. ‑Ma daa nyinyi zubholi 'lɛ na, Laagɔ 'la dananɔa ya 'kʋmɩanɩ, 21ɩya saa ‑tɛɛa nyinyi ‑kwlelia 'lɛ 'kwɩ nɩkplaan na, 'sɛtɛɛ bhlogbɩɩ Laagɔ 'la dananɔa ‑ma 'ka ‑ala ‑Kwlenyɔ Zozi Klisi 'kʋ 'plɩlɩ, ɩya ʋ 'ka 'kʋnylugolulɩɛ nɩkplaan ‑kwleli, jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na 'la gbʋ.

Currently Selected:

Wlɔ 5: NTLD13

Highlight

Copy