Wlɔ 3

Ncɛlɩa 'fɩan ‑glɩ nyinyinʋnya

1Na, 'lɩsaa Zifʋnyɔ* ‑kaa 'lɛ 'nyɩ -ɩ zia 'lɛ ɔmɔa ‑ɔ 'ta 'lɛ Zifʋnyɔ ‑glɩ na 'kʋ bha? 'Nyɩ 'lɩsaa 'kʋdɩlɩɛa lalɩɔ 'lɛ bha? 2Saa 'fɩan nɩkplaan, mala ‑nvʋsʋɛa ‑zu ‑bhutukpa. ‑Bɛɛ, Zifʋnyaa*, maa Laagɔ zʋ 'lɛ ɔla wɔɔnyɩtʋa wlɩɩn. 3Na, ka Zifʋnyaa ‑anʋa 'la ‑nʋawlɛa 'ta li na, ɩ ‑sa 'dɛ Laagɔ 'nɛa bha? 4Ɩ 'ta sɛɛ ‑kʋ, ɩ ‑sa 'tɛɛ 'dɛ! ‑Ma ‑a cibhlili lebhe Laagɔ ‑glɩ ‑nʋawlɛ 'nyɩ nclɔɔ ‑glɩ 'lɛ yodizʋnyɔ, sa ɩ ‑zieo lebhe: Ɩ ‑fata lebhe ‑naa wɔɔnyɩtʋa nɩkplaan, ma cibhlili lebhe ‑n ‑glɩ 'kʋnylugolunyɔ ɩya ma ‑kɔɔ 'tɩtɩpla na, ‑naa wɔlɩ ‑sɩa maa.

5Na, ‑ala nʋnʋgbɩa ‑ɩ 'ta 'lɛ 'kʋnylugolu na, ɩ ‑ka ‑sa Laagɔ 'la 'kʋnylugolulɩɛa ‑zɔnwlaa na, wɔɔsaa ‑a ‑kanɩ ‑awlɛ 'lɛ ɩya ‑a ‑ka nyɩtɛ bha? Laagɔ ‑ka ‑anyɩ ɔla dɔgbɛa 'kʋ salɩda ‑kʋ na, ‑n 'ta ka ɔ pala 'ta 'lɛ lebhe ɔ 'ta 'kʋnylugolunyɔ ‑glɩ bha? Ncɛlɩa 'fɩan 'bhisa 'kʋ n nyɩtɛ 'lɛ. 6Ɩ 'ta sɛɛ ‑kʋ! Sa, Laagɔ 'taa 'kʋnylugolunyɔ ‑glɩa na, 'nsasa ɔ cɩ 'kaa 'lɛ ‑laagɔzɔan 'tɩtɩ ‑plaplalɩ bha? 7‑Ma ka 'na yodia ‑ka gba 'nyɩ Laagɔ 'la ‑nʋawlɛa ‑ka ‑zɔn 'wlʋ 'kpataa le ɩ 'ka ɔla 'klʋagba 'plɩ na, 'lɩsaa 'la gbʋ, ‑amʋ, n lɩnɩ ‑awlɛ 'lɛ nyinyinʋnyɔ 'la gbaylɩsalɩɛa bha? 8‑Aana, saa ‑ala ‑glaankalɩnya nyɩtɛ 'lɛ na, ‑a ‑cɩ 'cla lebhe ‑a nʋ nyinyi 'kplookʋ, ɩya 'nanɩ 'kɩɩ nɩkplaan 'wlʋlʋ bha? Ncɛlɩ ‑naa, maya mala gbaylɩsalɩɛa ‑fata.

9Na, ‑a nabhe 'lɩsaa bha? ‑Anyɩ Zifʋnya, ‑ka ‑a zi 'lɛ ‑daa 'lɔlɩa 'kʋ bha? ‑A 'ta maa ‑kʋ zi ‑ylɛylɛ! Sa ‑a ya tooto pala lebhe ncɛlɩa ‑tɛtɛa, Zifʋnya ‑aana maa ‑ɔ ta 'lɛ Zifʋnya ‑glɩo na, ma ‑kʋ nyinyi 'la geylia nɩkplaan. 10Sa, ɩ ‑zieo lebhe:

'Kʋnylugolunyɔ 'ta 'kʋ,

bhlogbɩɩ 'bhebhee 'ta ‑kʋ.

11 Dɩgalɩnyɔ bhlogbɩɩ 'ta ‑kʋ,

bhlogbɩɩa 'bhebheea ‑ɔ ka 'lɛ Laagɔ 'matɩ na, ɔ 'ta ‑kʋ.

12 Maa 'fɩan ya ‑gugonanɛa 'kʋ 'wlʋ,

nebhlogbɩɩ, ma ya ‑abhɔlɛnya 'plɩ,

bhlogbɩɩa ‑ɔ ka 'lɛ 'nanɩ nʋ na, ɔ 'ta ‑kʋ,

bhlogbɩɩ 'bhebhe 'ta ‑kʋ.

13 Mala ‑blɩɩzɔan ‑glɩ lesua ‑ʋ 'ta 'lɛ ‑kpaslɩlɩɔ na.

Ma ‑ka mala mɩɔa 'nyɩ ma 'nyiglili ncɛlɩ.

Kpaclɩglaa 'la nɩkplaan 'la 'nyu ‑pɩpɛlɩɔ maa neen.

14 'Palɩɛ ɩya ‑abhɔlɛwɔlɩ ‑yelio mala nea.

15 Mala kplia ‑ylɩ ‑dolu 'la sakɔsɔlɩɛ 'la gbʋ.

16 Mala 'plɩlɩda ‑glɩ nyumolɩɛ ɩya ‑munzue.

17 Ma 'ta pupue 'la ‑gugwie ‑ci.

18 Ma 'ta Laagɔ 'la zʋlɩɛ bhlogbɩɩ ‑ka.

19'Bhlɩmɔɔn, ‑a ‑ci lebhe ɩmɩa ‑tɛtɛa ‑jlɩmaa bhli 'lɛ 'kʋ na, maa ‑ɔ ‑kʋ 'lɛ ‑jlɩmaa ‑zɔn na, maa a solu 'lɛ, ɩya nia ‑tɛtɛa 'ka mɛ, ɩya Laagɔ ‑deliin, ‑laagɔzɔn bhuoa 'ka ɩla nyinyia cibhili. 20Dɛ Laagɔ ‑deliin, ‑jlɩmaa 'la 'kʋ 'plɩlɩɛa cɩ 'ta 'lɛ nclɔɔ bhlogbɩɩ 'kʋnylugolunyɔ ple, sa nyinyi 'la cibhlililie ‑tɛɛ ‑jlɩmaa lamʋ 'lɛ.

Pɔɔtɛtɛ ‑ɛ ple 'lɛ nclɔɔ 'kʋnylugolunyɔ

21‑Ma ‑pɔtɔnʋ, Laagɔ ya ɔla 'kʋnylugolulɩɛa pala, 'nyɩ ‑n 'ta ‑jlɩmaa ɔ 'ta 'lɛ 'kʋ 'plɩlɩ, ‑ma ‑jlɩmaa ɩya Laagɔnekʋnyɩtɛnyaa* li ɔla ‑danʋfʋɛ. 22Laagɔ 'la 'kʋnylugolulɩɛa ‑kʋ ‑ɩ ‑nyɩɔ maa ‑tɛtɛa ‑ɔ zʋ 'lɛ mala pɔɔtɛtɛa Zozi Klisi 'kʋ na, 'nyɩ ɩ 'ta nɩkplaangbazlɩlɩlɩɛɛn ‑ka. 23‑Masa, ncɛlɩa 'fɩan ya nyinyi nʋ, 'nyɩ ma 'tanɩa Laagɔ 'la 'klʋagbaa nɩkplaan ‑kʋ. 24‑Ma Laagɔ 'la dananɔa nɩkplaan, ɔ plenɩ maa 'kʋnylugolunya 'kpɔkpɔ, sa Zozi Klisi ya maa gbʋʋnsa na. 25Ɔmɔ Laagɔ ‑sa 'lɛ le ɔ 'plɩ maa ‑tɛtɛa ‑ɔ ‑ka 'lɛ ɔla pɔɔtɛtɛ na, mala nyinyia 'la ‑aghlɛ, ɔla ‑dolua 'la sakɔsɔlɩɛ nɩkplaan, ɩya ɔ 'ka pala lebhe nyinyia ncɛlɩ nʋ 'lɛ ‑godogodoa 'nyɩ ɔ 'ta 'lɛ maa ɩla gbaylia ‑sa na, ɩ ‑glɩa ɔla 'kʋnylugolulɩɛa 'la ghleda, 26daa ɔ klaa 'lɛ pɔlɛ na. Na, ‑pɔtɔnʋ ‑ma, ɔ pala ɔla 'kʋnylugolulɩɛa, le ma 'ka cibhlili lebhe ɔ ‑glɩ 'kʋnylugolunyɔ, ɩya ɔ 'ka ɔmɔa ‑ɔ ‑ka 'lɛ Zozii 'la pɔɔtɛtɛ na, 'kʋnylugolunyɔ ple.

27Na, wɔlɩa nclɔɔ cɩ 'ka 'lɛ nɩkplaan kpolili na, ɩ ‑kʋ ‑awlɛ bha? ‑Wɔɔ ɩ 'tanɩ ‑kʋ. Na, ɔ ‑kaa 'lɛ 'ŋlɩ 'nyɩ ɩ 'tanɩ 'lɛ ‑kʋ bha? Nʋnʋgbɩa bha? ‑Wɔɔ, ‑n 'ta nʋnʋgbɩa, ‑ma pɔɔtɛtɛ. 28‑Masa, ‑a gugu lebhe pɔɔtɛtɛ, ɛmɛ ‑ɛ ple 'lɛ nclɔɔ 'kʋnylugolunyɔ, ‑ma ‑n 'ta ‑jlɩmaa 'la nʋnʋgbɩaa. 29Na Laagɔ, Zifʋnya* bhlogbɩɩ ‑tɛɛ 'la Laagɔ ɔ ‑glɩ 'lɛ bha? Ɔ 'ta ‑daa 'lɔlɩa 'la Laagɔ ‑glɩmʋ bha? ‑Wɔɔ, ɔ ‑glɩmʋ mala Laagɔ, 30‑masa Laagɔ ‑glɩ bhlo na. Ɔmɔ ‑ɔ ‑cɩ ka 'lɛ maa ‑ɔ ‑dɩɔ 'lɛ 'kʋ na 'la pɔɔtɛtɛa 'kʋ 'plɩlɩ ɩya ɔ 'ka maa 'kʋnylugolunya ple, ɩya ɔ 'ka maa ‑ɔ 'ta 'lɛ 'kʋ ‑dɩɔ na ‑masɛɛ 'la pɔɔtɛtɛa 'kʋ 'plɩlɩ, ɩya ɔ 'ka maa 'kʋnylugolunya ple. 31Na, ka ‑a 'plɩlɩ 'lɛ pɔɔtɛtɛa 'kʋ 'nyɩ ‑a sa 'lɛ ‑jlɩmaa 'dʋʋn bha? ‑N 'ta sɛɛ, ‑ma ka -a zʋ 'lɛ ‑jlɩmaa 'kpaan.

Currently Selected:

Wlɔ 3: NTLD13

Highlight

Copy