Mak 12

‑Ghlɛzɛɛnkwlaklʋlɩnyaa 'la ‑nyandla

(Mat 21.33-46; Luk 20.9-19)

1Zozii ya maa ‑nyandlaa nɩkplaan solulɩɛ bhɔ, ɔ ya maa 'cla lebhe: «Nclɔɔ bhlo ya ‑ghlɛzɛɛnkwla golo, ɔ yaa glɔ cɩkpa, ɔ ya ‑ghlɛzɛɛnylida nʋ 'nyɩ ɔ ya 'kʋtotopaaplʋ 'sla. Ɩla leean ɔ ya 'kwlaa ‑diinvɛɛnnʋnya te le mayɔɔsɔ 'ka poli 'nyɩ ɔ ya lowluun mʋ. 2Daa ‑ghlɛzɛɛnsadaa ŋeni 'lɛ na, ɔ ya ɔla lobhoco bhlo, lobholinʋnyaa 'bhlɩ lobhu le ma 'kaa sicaa ‑ghlɛzɛɛnkwlaa tlʋ 'lɛ na, ɔla da 'nyɩ. 3‑Ma ma yɔɔ 'kʋbhli, ma yɔɔ bhuti 'nyɩ ma ya ɔya wlɩɩ ‑kɔfɩa 'tli. 4Ɔ ya ‑awlɛ maa 'bhlɩ ‑buun ‑lobhoco bhlo lobhu. 'Dɛ ‑naanɔa ‑ma, ma ya ɔla 'wlua 'bhla 'nyɩ ma yɔɔ vla. 5Ɔ ya ‑awlɛ bhlo lobhu. Ɔmɔ ‑naa ‑ma, ma yɔɔ 'bhla ɩya ‑buun ‑naanʋa ‑bhutukpa. Ma ya ‑anʋa bhuti 'nyɩ ma ya 'lɛ ‑anʋa 'bhla. 6Ɔla gbakabhacoa bhlogbɩɩ ‑tɛɛ ‑ɔ ‑tolʋnɩa 'mɔɔ 'lɛ. Bhɩalɩdaa, ɔ yɔɔ maa 'bhlɩ lobhu, sa ɔ claa ɔcɩ lebhe: 'Na 'cʋa, ma cɩɔ zʋ. 7‑Ma ‑diinvɛnnʋnya ‑naa, ma ya neennununu 'nyɩ ma ya 'cla lebhe: Ɔmɔ ‑ɔ ‑glɩ 'lɛ ‑ajaalinyɔa. A ci! ‑A 'bhlɔɔ ɩya ‑ajaa 'ka ‑ana 'plɩ. 8Ma yɔɔ 'kʋbhli, ma yɔɔ 'bhla 'nyɩ ma yɔɔ glɔa leen 'pa.» 9Na Zozii ya maa 'cla lebhe: «'Lɩsaa ‑ghlɛzɛɛnkwlaatoa cɩ 'ka 'lɛ nʋ bha? Ka ɔ cɩ 'ka 'lɛ ci, ɔ 'ka 'lɛ ‑diinvɛnnʋnya ‑naa 'bhla ɩya ɔ 'ka 'lɛ ‑ghlɛzɛɛnkwlaa ‑buun ‑naanʋa wlɩɩn zʋ. 10Zieziewɔlɩa nɩkplaan, a 'ta ka ‑azla wɔɔkle ‑naa zɛlɩ bha?

Cokwiea ‑paaslanyaa 'pa 'lɛ 'kwlaan na,

ɛmɛ ‑ɛ 'plɩ 'lɛ lopolugbuducokwiea.

11 Ɩmɩ ‑naa ‑glɩ ‑Kwlenyɔ 'la nʋnʋgbɩ.

Ɩ ‑glɩ ‑ala da ‑jakajakagbɩ!»

12Ma 'matɩanɩa 'mɔɔ 'kʋbhlida, ‑ma ‑alawleea 'la ŋanɔ bhlaa maa. Ma ya sɛɛ cibhlili lebhe mala gbʋ ɔ bua 'lɛ ‑nyandlaaa ‑naa. Ma yɔɔ cɩɩnwlʋlʋ 'nyɩ ma ya mʋ.

Sezalɩ 'la ‑lapooa

(Mat 22.15-22; Luk 20.20-26)

13Ma ya Zozii 'bhlɩ Falizɩɛnnya* ɩya Ewlɔdʋ 'la ‑kandinya ‑zlʋsaasa lobhu le ma 'kɔɔ 'gbuzu ‑zɔn 'pa ɩya ma 'kɔɔ wɔlɩ neen 'matɩlɩ. 14Ma ya mʋ 'nyɩ ma yɔɔ 'cla lebhe: «Canyɔ, ‑anyɩ ‑a ‑ci lebhe ‑n ‑glɩ ‑nʋawlɛɛnyɩtɛnyɔ 'nyɩ ‑n 'gulu 'ta nclɔɔ bhlogbɩɩ. ‑N kope 'ta ncɛlɩ 'la kʋkʋkʋlɩɛa 'ciin, ‑ma Laagɔ 'la ‑gugwiea ɛmɛ ‑n pala 'lɛ ‑nʋawlɛɛsa. Na ɩ nanɩ lebhe ‑a ‑plʋ Sezalɩ 'la ‑lapooa bha, ‑ma ‑a 'la ‑plʋ bha?» 15‑Ma ɔmɔ, ɔ ‑cia 'lɛ mala ‑kplakplaa na, ɔ ya maa 'cla lebhe: «'Lɩsaa 'la gbʋ a paan 'lɛ 'gbuzu ‑zɔn bha? A ‑la kaan ala 'dalaa n 'kaa kope.» 16Ma yɔɔ ma ‑la. Zozii ya maa 'cla lebhe: «'Wlukle ‑naa ɩya 'ŋlɩ ‑naa, ncaasaa nɩɩ ɩ ‑glɩa 'lɛ bha?» Ma nabhe: «Sezalɩ.» 17Na Zozii ya maa 'cla lebhe: «Lʋʋa ‑ʋ ‑glɩ 'lɛ Sezalɩ 'la lʋʋ na, a 'nyɩnɩʋ Sezalɩ ɩya lʋʋa ‑ʋ ‑glɩ 'lɛ Laagɔ 'la lʋʋ na, a 'nyɩnɩʋ Laagɔ.» 'Nyɩ ɔmɔ 'wluku ma ‑kʋa nikpooslalɩɛ 'kadie nɩkplaan.

'Kwɩɩnkʋbhue

(Mat 22.23-33; Luk 20.27-38)

18Saduseyɛɛnnyaa*, ‑ɔ cla 'lɛ lebhe 'kwɩɩnkʋbhue 'ta ‑kʋ na, ma ya Zozii cɩ ci. Ma yɔɔ wɔɔkle ‑naa neencla lebhe: 19«Canyɔ, ‑anyɩ ‑ala gbʋ, Moyizi ya zie lebhe: Gbazɩ nclɔɔ ‑ka ɔ bholi ‑ka, ɔ ‑ka 'ku, ɔ ‑ka 'ŋlɔ te 'nyɩ ɔ 'ta 'cilee ‑ka na, 'naa ɔ 'cɩ 'kuzluŋlɔa ɩya ɔ 'nyɩ ɔ bholia valɩnɩkpla. 20Bholiecɩ ‑ngbɔɔsɔ ma ‑kʋa. ‑Bɛka ‑naanɔa ya 'ŋlɔ cɩ, ɔ 'ta valɩnɩkpla te 'nyɩ ɔ ya 'ku. 21‑Mɔsɔ ‑naanɔa ya 'ŋlɔa 'cɩ, ɔ 'ta valɩnɩkpla te 'nyɩ ɔ ya 'ku. ‑Mɔta ‑naanɔa ‑ma, sɛɛ bhlogbɩɩ. 22Maa ‑ngbɔɔsɔa 'ta valɩnɩkpla te. 'Ŋlɔa ya leenbhɩalɩ 'nyɩ ɔmɔ ‑ma, ɔ ya 'ku. 23Na 'kwɩɩnkʋbhoclɩɩa 'kʋ, daa ma cɩ 'ka 'lɛ 'kwɩɩnkʋbho na, sa maa ‑ngbɔɔsɔa yaa 'mɔɔ 'lɛ 'cɩ na, ‑anɔsaa 'titi 'la ŋlɔɔ ɔ cɩ 'kanɩ 'lɛ 'plɩ bha?» 24Zozii ya maa 'cla lebhe: «A 'ta 'lɛ Zieziewɔlɩa ɩya Laagɔ 'la 'tɛtɩa ‑ci na, ɩla gbʋ dɛ a mlɔ 'lɛ ‑sa bha? 25Sa, daa ma cɩ ka 'lɛ 'kwɩɩnkʋbho na, ŋodi ɩya 'ŋlɔ 'la cɩcɩɛ 'tanɩ ‑kʋ, ‑ma 'ka ma ‑kʋnɩ 'lɛ le 'bhlaandleecɩa* ‑ɔ ‑kʋ 'lɛ 'yɛpɩ ‑laagɔɔn na 'bhisa. 26‑Ɩ ‑glɩ 'lɛ le 'ku cɩ 'ka 'kwɩɩnkʋbho na, Moyizi 'la ‑afluwaa nɩkplaan, sua ʋ ŋamaa 'lɛ na 'la wɔlɩa 'la daa, saa, Laagɔ 'clɔɔ 'lɛ lebhe: N ‑glɩ Ablaamʋ 'la Laagɔ, Izakɩ 'la Laagɔ ɩya Zakɔpʋ 'la Laagɔ na, a 'ta ka ‑azlɩɩ zɛlɩ bha? 27Ɔ 'ta 'ku 'la Laagɔ ‑glɩ, ‑ma ‑jaja ncɛlɩ 'la Laagɔ. A ya ‑gbɔɔn mlɔ.»

‑Jlɩmaa 'kadiea

(Mat 22.34-40; Luk 10.25-28)

28‑Jlɩmazienyɔ* bhlo ya Zozii cɩmɛ. Ɔ yaa wɔlɩa ɔya maasɔ 'tɩtɔa 'lɛ na 'nu, 'nyɩ ɔ lɩa 'lɛ lebhe Zozii yaa ma 'nanɩ neenŋonu na, ɔ yɔɔ neencla lebhe: «‑Jlɩmaa saa ‑a 'ghlia 'lɛ 'nyɩ ‑a zia 'lɛ a 'yea 'fɩan 'kʋ bha?» 29Zozii yɔɔ 'cla lebhe: «'Lɩka ‑jlɩmaa ‑a 'ghli 'lɛ 'nyɩ ‑a zi 'lɛ a 'yea 'fɩan 'kʋ na.

Po 'nyukwliin, Izlayɛlɩ*,

‑Kwlenyɔ, ‑ala Laagɔ,

ɔmɔ bhloo, ‑ɔ ‑glɩ 'lɛ ‑Kwlenyɔ.

30 ‑N ‑cɩ ka ‑Kwlenyɔ ‑naa Laagɔ wabha,

‑naa pɔlɛa 'fɩan nɩkplaan,

‑naa 'wugoa 'fɩan nɩkplaan,

‑naa wɔɔgugwie 'fɩan ɩya

‑naa 'tɛtɩa 'fɩan nɩkplaan.

31'Lɩka ‑mɔsɔ ‑naanaa:

Wabha ‑n 'yʋ le ‑mɔ 'titi ‑ncɩ 'bhisa.

‑Buun ‑jlɩmaa 'ta 'ghli a 'ka ‑ana -naa 'kʋ zi.» 32‑Jlɩmazienyɔa yɔɔ 'cla lebhe: «‑Kpaacɛ, Canyɔ! ‑N ‑ya ‑nʋawlɛ nyɩtɛ. Ɔ ‑glɩ bhlo 'nyɩ ‑buun ‑naanɔ bhlogbɩɩ 'tanɩ ‑kʋ. 33‑N kɔɔ 'lɛ ‑naa pɔlɛa 'fɩan nɩkplaan, ‑naa dɩgalɩa 'fɩan nɩkplaan, ‑naa 'tɛtɩa 'fɩan nɩkplaan wabha ɩya ‑n ka 'lɛ ‑n 'yʋ wabha le ‑mɔ 'titi ‑ncɩ 'bhisa na, ɩ nanɩ 'nyɩ ɩ zi mlabhlalɩɛ ɩya 'slakasalɩɛa 'fɩan 'kʋ.» 34Zozii 'lɩ 'lɛ lebhe ɔ ya dɩgalɩ nɩkplaan nyɩtɛlɩ na, ɔ yɔɔ 'cla lebhe: «‑N 'ta Laagɔ 'la Nyɩbhɛlɩdua* ‑cɩ da tlʋ.» 'Nyɩ nclɔɔ bhlogbɩɩ 'lɩ 'taanɩa 'tɛtɩ ɩya ɔ 'kaanɩa 'mɔɔ wɔlɩ neencla.

Laagɔ 'la ‑Sasanyɔa ɩya Daviti

(Mat 22.41-46; Luk 20.41-44)

35Laagɔpaakadiea* ‑zɔn, Zozii ya wɔɔnyɩtʋ 'ma 'nyɩ ɔ caa. Ɔ 'claa lebhe: «'Nsasa 'nyɩ, ‑jlɩmaazienyaa* claa 'lɛ lebhe Laagɔ 'la ‑Sasanyɔa* ‑ɔ ‑glɩ Daviti ‑yowli bha? 36Daviti ɔmɔ 'titi, ‑Kplɔkplɔ ‑Wugoa* yaa 'mɔɔ 'kʋ kwlili 'nyɩ ɔ ya 'cla lebhe: ‑Kwlenyɔ ya 'na ‑Kwlenyɔa 'cla lebhe:

Kʋʋn 'lipasɔ 'kʋ sa

ɩya n 'ka ‑naa ‑zɔbhɛlɩgbanyaa,

‑naa 'kʋnamʋnʋlʋʋ ple.

37Daviti 'titi lɔɔ ‑Kwlenyɔ, na 'nsasa ɔ ‑glɩglɩlɩa 'lɛ ɔ ‑yowli bha?» ‑Alawleea ‑poa 'mɔɔ 'nyukwliin pɔlɛkʋmɛnɔɔn.

Zozii nyɩtɛ ‑jlɩmaazienyaa 'la wɔlɩ

(Mat 23.1-36; Luk 20.45-47)

38Zozii claa maa ɔla cacawɔlɩa nɩkplaan lebhe: «A zʋlʋ ‑jlɩmaazienyaa* pɔlɛ 'kʋ, ma ‑wa loku 'kadɩ nɩkplaanplalɩɛ, ma ‑wa lebhe ncaasidiin, ma 'pa maa ‑ayo. 39Bhibhiepalɩa* ‑zɔn, ‑ma ‑wa 'kʋklʋʋn kpua 'kʋ sakʋlɩɛ 'nyɩ 'tlɔnblɩ 'kʋ, ma ‑wa 'lɛ ‑bɛka sakʋdɩa. 40Maa ‑ɔ li 'lɛ 'kuzluŋwlɛ 'kʋ 'nyɩ ‑ma tlʋbhalɩ 'lɛ 'kpɔkpɔsa bhibhieli nɩkplaan na, ma cɩ 'ka gbaylɩsalɩɛ 'kadie 'lɩ.»

Ŋaazɩ ‑kuzluŋlɔ 'la vavalʋʋ

(Luk 21.1-4)

41Zozii ‑kʋa 'bhaklɔa 'kʋklʋʋn sa, ɔ kopea saa ‑alawleea palɩpalɩlɩa 'lɛ 'dalaa 'bhaklɔa nɩkplaan na. 'Dalatocɩ ‑gbɔɔn palɩa 'dala ‑bhutukpa. 42Ŋaazɩ ‑kuzluŋlɔ bhlo ya ci 'nyɩ ɔ ya 'dencie ‑mɔsɔ palɩ. 43Zozii ya ɔla gɩlɩnyaa* la, ɔ ya maa 'cla lebhe: «N solui anyɩ, ɩ ‑glɩ ‑nʋawlɛ, ŋaazɩ ‑kuzluŋlɔ ‑naa, ɔ ya 'nyɩ ɔ ya ncɛlɩa 'fɩan ‑ɔ palɩ 'lɛ 'bhaklɔa nɩkplaan na 'kʋzi. 44Sa maa 'fɩan ‑ɔ palɩ 'lɛ 'dalaa na, mala 'bhɛlɩa 'la zuloa 'kʋ ma 'manɩ 'lɛ, ‑ma ɔmɔ, ɔla ŋaazɩa nɩkplaan, lʋʋa bhlogbɩɩa ɔ ‑kaa 'lɛ le ɔ 'ka kʋ na, ɔ yʋʋ ‑tɛtɛa 'nyɩ.»

Currently Selected:

Mak 12: NTLD13

Highlight

Copy