Mat 9
9
Zozii ya bhubhubhubhunyɔ bhlo jabha
(Mak 2.1-12; Luk 5.17-25)
1Zozii ya gɔlʋʋn 'tɔ, ɔ ya 'nyia 'kʋtaan 'plɩlɩ 'nyɩ ɔ ya ɔ 'bhlɩduku cɔlɔ. 2Ma yɔɔ bhubhubhubhunyɔ bhlo ‑la, ɔ pʋa 'kʋpʋlʋʋ 'kʋ. Zozii 'lɩ 'lɛ mala pɔɔtɛtɛa na, ɔ ya bhubhubhubhunyɔa 'cla lebhe: «'Na 'cʋ, pɔɔvʋ 'la 'bhlɔɔ, ‑ma ‑naa nyinyia ya ‑vɔɔ.» 3‑Jlɩmaazienya* ‑zlʋsaasa nyɩtɛlɩa macɩ nɩkplaan lebhe: «Nclɔɔ ‑naa nyanɩ Laagɔ!»
4‑Ma, Zozii ‑cia 'lɛ mala wɔɔgugwiea na, ɔ ya maa 'cla lebhe: «'Lɩsaa 'la gbʋ a ‑kaa 'lɛ ala pɔlɩa nɩkplaan ‑sa 'la wɔɔgugwie ‑nyinye bha? 5Ma 'ka 'lɛ 'cla lebhe: ‑Naa nyinyia ya ‑vɔɔ, ‑aana ‑bho 'kʋ ɩya ‑n namʋ na, ‑anɩsaa ‑ɩ 'taa 'lɛ 'tɛ bha? 6Na, a 'ka 'lɛ cibhlili lebhe Nclɔɔa 'Cʋa* ‑ka ‑dʋdʋa 'kʋ ‑jioli ɩya ɔ 'ka nyinyi va na», ɔ ya bhubhubhubhunyɔa 'cla lebhe: «‑Bho 'kʋ, 'ma ‑naa 'kʋpʋlʋʋa ɩya ‑n mʋ ‑n 'bhisleen.» 7'Nyɩ nclɔɔa ya 'kʋbho, 'nyɩ ɔ ya ɔ 'bhisleen mʋ. 8‑Alawleea 'lɩ 'lɛ ɩmɩ ‑naa 'ciin na, ŋanɔ yaa pla 'nyɩ a woa Laagɔ ‑evli, ɔmɔa ‑ɔ 'nyɩ 'lɛ ncɛlɩ ‑sa 'la 'tɛtɩ ‑naa na.
Zozii ya Matie la
(Mak 2.13-17; Luk 5.27-32)
9Zozii ‑kʋa 'lɛ mʋda na, ɔ ya nclɔɔ bhlo 'lɩ, ma lɔɔ Matie, ɔ ‑kʋa ‑lapooplʋpalʋa ‑zɔn sa. Ɔ yɔɔ 'cla lebhe: «Gɩlɩɩn!» 'Nyɩ ɔ ya 'kʋbho, ɔ yɔɔ gɩlɩ.
10Clɩɩ bhlo, ma ‑kʋa Matie 'bhisleen 'tlɔnblɩ kʋ. ‑Lapooclanya ‑bhutukpa ɩya nyinyinʋnya ya ci, ma ya Zozii ‑ɩya ɔla gɩlɩnyaa* cɩsakʋ. 11Na, ma 'lɩ 'lɛ ɩmɩ ‑naa 'ciin na, Falizɩɛnnyaa* ya ɔla gɩlɩnyaa 'cla lebhe: «'Lɩsaa 'la gbʋ ala canyɔa ɔya ‑lapooclanyaa ɩya nyinyinʋnyaa lilia 'lɛ dabhlo bha?»
12‑Ma Zozii yaa maa neennu 'nyɩ ɔ ya 'cla lebhe: «Maa ‑ɔ ‑ja 'lɛ na, ‑n 'ta maa ‑ɔ 'matɩ 'ta 'lɛ ‑dɔtɛ, ‑ma maa ‑ɔ 'ta 'lɛ ‑ja na. 13Na, a mʋ ɩya a 'matɩ ka wɔɔkle ‑naa 'la ‑zɔnsalɩɛa: Ŋaazɩɩnlɩlɩɛ n ‑wa 'lɛ, ‑ma ‑n 'ta ‑teyiyimlaa. Sa, ‑n 'ta 'kʋnylugolunya lakan n 'ta 'lɛ ci, ‑ma nyinyinʋnya lakan n ci 'lɛ.»
Zozii nyɩtɛ ‑zelizlolɩɛ 'la wɔlɩ
(Mak 2.18-22; Luk 5.33-39)
14'Nyuwluzʋnyɔ Zaan 'la gɩlɩnyaa* ya Zozii cɩmɛ 'nyɩ ma yɔɔ neencla lebhe: «'Lɩsaa 'la gbʋ, daa ‑aya Falizɩɛnnyaa* zlo 'lɛ ‑zeli na, ‑naa gɩlɩnyaa zlomʋ 'taa 'lɛ ‑zeli bha?» 15Zozii ya maa 'cla lebhe: «Daa 'cɩcɩɛnʋnyɔa ‑kʋ ka ka 'lɛ maa sidiin na, 'tlɔnblɩkʋcinyaa cɩ cɩɩnkalɔɔn kʋ bha? ‑Wɔɔ! ‑Ma clɩɩ bhlo, ma cɩ 'ka maa 'cɩcɩɛnʋyɔa sidiin ‑sa. Na, 'dɛ 'la daa ma cɩ 'ka 'lɛ ‑zelizlo. 16Maa 'ma 'ta lokwi ‑lele ɩya ma 'ka lokwia ‑ɛ ya 'lɛ cɔbha na, tʋndʋa. Sa, lokwi -lelea cɩ 'ka gba ɩya tooto ‑lokwia 'ka ‑gbɔɔn 'ŋatɔ na. 17Maa 'ma 'ta nʋcalʋ ɩya ma 'kʋʋ 'bhua ‑ɩ ya 'lɛ ‑gwlɛlɩ na, nɩkplaan zʋ. Ma ‑ka sɛɛ nʋ na, ka 'bhua wlɔ 'lɛ, nʋa 'kɔsɔ 'lɛ sa 'nyɩ 'bhua gbɩɔ 'lɛ. ‑Ma nʋcalʋ, 'bhu ‑leli nɩkplaan ma zʋʋ 'lɛ 'nyɩ nʋa ɩya 'bhua zʋɔ 'lɛ sa.»
Zozii ya 'ŋlɔ bhlo jabha 'nyɩ ɔ ya 'lɛ ŋlʋcʋkwla 'kwɩɩngalɔ
(Mak 5.21-43; Luk 8.40-56)
18Daa Zozii ‑kʋa 'lɛ maa ‑sa soluda na, Zifʋnyaa* 'la ‑kwleto bhlo ya ci, ɔ yɔɔ ‑deliin ‑kukoonkplii sasla 'nyɩ ɔ yɔɔ 'cla lebhe: «'Na 'ciŋlʋcʋkwlaa ya ‑pɔtɔnʋ 'titi 'ku. ‑Ma, 'maa ci ɩya ‑n kɔɔ sɔkʋgbɛ ɩya ɔ 'ka jabha.» 19Zozii ya 'kʋbho 'nyɩ ɔya ɔla gɩlɩnyaa* yɔɔ 'kʋgɩ. 20Na, 'ŋlɔ bhlo, ‑dolu wlʋa 'lɛ cɩ ‑aan liowli 'kʋgba ‑mɔsɔ 'wugo na, ya leen 'wlʋlʋ, ɔ ya Zozii cɩmɛ 'nyɩ ɔ ya ɔla nɩkplaanplalokwia 'la numlua cɩkla. 21Sa, ɔ claa ɔcɩ lebhe: «Gbazɩ n ‑kaa mino, 'nyɩ n ‑kaa ɔla lokwia ‑tɛɛ cɩkla na, n cɩa jabha.» 22Na, Zozii ya kwlacala, ɔ yɔɔ 'lɩ 'nyɩ ɔ yɔɔ 'cla lebhe: «N ‑nyɔŋlɔ, pɔɔvʋ ‑la 'bhlɔɔ! ‑Naa pɔɔtɛtɛa yɔɔ jabha.» 'Nyɩ dɩpɩa bhlogbɩɩ 'ŋlɔa ya jabha.
23Zozii ya Zifʋnyaa 'la ‑kwletoa 'bhisleen ble. Ɔ 'lɩ 'lɛ ‑takpabhlɩnyaa ɩya saa 'slea 'dɩdɔa 'lɛ na, ɔ ya 'cla lebhe: 24«A 'wlʋ ‑zɔn: 'Cileea 'ta ka 'ku, ‑ma ka ɔ ŋɔmʋ 'lɛ.» Ma nyanɩa 'mɔɔ. 25‑Ma, daa ma wlaa 'lɛ ‑alawleea ‑zɔn na, ɔ ya ble, ɔ ya ŋlʋcʋkwlaa sɔ 'kʋbhli 'nyɩ ɔ ya galɔ. 26'Nyɩ wɔlɩ ‑naa ya 'dɛ 'la 'bhlɩa ‑tɛtɛa 'kʋ dlolu.
Zozii ya 'citutunya ‑mɔsɔ jabha
(Mat 20.29-34)
27Daa Zozii ‑kʋa 'lɛ mʋda na, 'citutunya ‑mɔsɔ yɔɔ gɩlɩ, ma ‑gaa nɩkplaan 'nyɩ ma claa lebhe: «Daviti 'la 'Cʋ, 'maa 'lɩ ‑anyɩ ŋaazɩɩn!» 28Na, daa ɔ ble 'lɛ 'sleen na, 'citutunyaa yɔɔ cɩmɛ 'nyɩ Zozii ya maa 'cla lebhe: «A ‑ka pɔɔtɛtɛ lebhe ɩmɩa a 'clalɩ 'lɛ na, n 'cɩɩ nʋlɩɛ mino bha?» Ma yɔɔ 'cla lebhe: «‑Ghɛɛ, ‑Kwlenyɔ». 29Na, ɔ ya mala 'cia cɩkla 'nyɩ ɔ ya 'cla lebhe: «'Naa ɩmɩa 'la pɔɔtɛtɛa a ‑ka 'lɛ na, ɩ ‑glalɩ 'kʋ.» 30'Nyɩ mala 'cia ya 'gbokalɩ. 'Cizalalɩɛ nɩkplaan, Zozii ya maa 'cla lebhe: «A zʋlʋ pɔlɛ 'kʋ ɩya nclɔɔ bhlogbɩɩ 'la cibhlilia sɛɛ!» 31‑Ma maa, mala ‑zɔnwlʋmlɩɩn na, ka ‑tɛɛ ma bhɔ ɔla wɔlɩ 'dɛ 'la 'bhlɩa ‑tɛtɛa 'kʋ nyɩtɛlɩɛ.
Zozii ya ‑amunaanyɔ bhlo jabha
(Mat 12.22-24; Luk 11.14-15)
32Daa 'citutunyaa ‑kʋa 'lɛ ‑zɔnwlʋda na, ma ya Zozii 'wugonyunyunyɔ bhlo ‑la, ɔ ‑glɩa ‑amunaanyɔ. 33Zozii ya 'wugo -nyunyua 'tli 'nyɩ ‑amunaanyɔa ya nyɩtɛlɩɛ bhɔ. Nikpoo ya ‑alawleea sla 'nyɩ a claa lebhe: «Ma 'ta ka ‑azla 'pʋpʋ 'kʋ ‑sa 'la wɔlɩ Izlayɛlɩbhlɩa* 'kʋ 'ciinlɩ!» 34‑Ma Falizɩɛnnyaa* claa lebhe: «'Wugwi ‑nyinyia toa 'la 'tɛtɩa nɩkplaan ɔ 'tlili 'lɛ 'wugwi ‑nyinyia!»
‑Alawleea ya Zozii ŋaazɩpla
(Mak 6.6; Luk 8.1)
35Zozii 'plɩlɩa dikadɩa ɩya dicʋa ‑tɛtɛa 'kʋ. Ɔ caa Zifʋnyaa* 'la bhibhiepalɩa* ‑zɔn, ɔ saa Nyɩbhɛlɩdua 'la Dɩnanɩa* 'nyɩ ɔ jabhaa gua ‑tɛtɛa ɩya 'bhlɛa ‑tɛtɛa. 36Ɔ 'lɩ 'lɛ ‑alawleea na, a yɔɔ ŋaazɩpla, sa a ‑sɛa 'nyɩ a ‑zaa le 'bhlabhlɩa ‑ɩ 'ta 'lɛ kpanyɔ ‑ka na 'bhisa. 37Na, ɔ ya ɔla gɩlɩnyaa* 'cla lebhe: «Nyɩa ‑ɩ cɩ 'ka 'lɛ ‑dɩɔ na, ɩ ‑zu ‑bhutukpa, ‑ma lobholinʋnyaa 'ta ‑gbɔɔn ‑zu.» 38A 'clalɩ 'kwlaa toa le ɔ lobhu lobholinʋnya ɔla nyɩa 'dɩkan.
Currently Selected:
Mat 9: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.
