Mat 26

Ma ya Zozii 'la 'bhlawɔlɩ gʋa

(Mak 14.1-2; Luk 22.1-2; Zan 11.47-53)

1Daa Zozii bhɩalɩ 'lɛ wɔlɩ ‑naa ‑tɛtɛa calɩɛ na, ɔ ya ɔla gɩlɩnyaa* 'cla lebhe: 2«A ‑ci sɛɛ lebhe ‑ɔ ‑tonɩ clɩɩ ‑mɔsɔ ɩya geyliinwlʋfɛtlɩa* 'ka ŋeni. Ma cɩ 'ka Nclɔɔa 'Cʋa* ‑sa ɩya ma 'kɔɔ dabhlalɩsu 'kʋ bho.»

3Na, ‑teyiyinyaa tocɩa ɩya ncaakpasɩa ya ‑teyiyinyɔ -kpasaa ma la 'lɛ Kayifʋ na 'la 'slea nɩkplaan 'wluwlalɩ. 4Ma ya wɔlɩ gʋa le ma 'kaa Zozii ziziekoteen 'kʋbhlili ɩya ma kɔɔ 'bhla. 5'Bhlɩmɔɔn ma claa lebhe: «Ɩ 'la 'plɩa 'fɛtlɩa nɩkplaan ɩya ɩ 'la ka sɛ 'lɔlʋa sidiin 'kasɛ ‑lamʋ.»

'Ŋlɔ bhlo ya Zozii ‑asʋnbanyɩ 'wlu 'kɔsɔ

(Mak 14.3-9; Luk 7.36-50; Zan 12.1-8)

6Zozii ‑kʋa Betanii, kokobhebhlanyɔ Simɔɔn 'bhisleen. 7Daa ma 'kʋa 'lɛ 'tlɔnblɩ 'kʋ na, 'ŋlɔ bhlo ya Zozii cɩmɛ, ɔ ya ‑alɩbatlɩkpalɩwa ‑a 'ka 'lɛ 'pɛlʋtɛtʋ ‑asʋnbanyɩ nɩkplaan na, 'ma 'nyɩ ɔ yɔɔ mɛ 'wlu 'kɔsɔ. 8Gɩlɩnyaa* 'lɩ 'lɛ ɩmɩ -naa ciin na, dɔgbɛ ya maa pla, 'nyɩ ma ya 'cla lebhe: «'Lɩsaa 'la gbʋ ‑asʋnbanyɩ ‑naa gbɩɔa 'lɛ sa bha? 9Ma cɩa 'mɛɛ 'pɛlʋ 'tɛtʋ zʋ 'nyɩ ma cɩa ɛla 'dalaa ŋaazɩnya 'nyɩ.» 10Zozii ya sɛɛ cibhlili 'nyɩ ɔ ya maa 'cla lebhe: «'Lɩsaa 'la gbʋ a bhɩa 'lɛ 'ŋlɔa 'kwlɩ bha? Nʋnʋgbɩ 'nanɩ ɔ wlʋʋn 'lɛ cɩ nʋda. 11‑Ghɛɛ, ŋaazɩnyaa, a -ya maasɔ -kʋ 'lɛ clɩɩa 'fɩan, ‑ma ‑amʋ, a 'taan clɩɩa 'fɩan ‑ka. 12‑Asʋnbanyɩa ɔ 'kɔsɔɔn 'lɛ 'wlu na, 'na nyɛkɛa 'la ‑gluuzʋlɩɛ ɔ bhɔsʋa 'lɛ. 13N solu anyɩ ‑nʋawlɛ, ‑laagɔzɔn bhuoa daa ‑tɛtɛa ma cɩ 'ka 'lɛ Dɩnanɩ* ‑naa ‑sa na, ma cɩ ɩmɩa ɔ ya 'lɛ nʋ na, nyɩtɛmʋ, 'nyɩ ma cɩɔ luoli.»

Zuda bhɔsʋa Zozii 'la 'pɛlʋzʋwɔlɩ

(Mak 14.10-11; Luk 22.3-6)

14Na, 'kʋgba ‑mɔsɔa nɩkplaan bhlo, ma la 'lɛ Zuda Isikalɩɔtʋ na, ɔ ya ‑teyiyinyaa tocɩa 'bhlɩ mʋ 15'nyɩ ɔ ya maa 'cla lebhe: «'Lɩsaa a ‑waa 'lɛ lebhe a 'kaan 'nyɩ ɩya n 'kɔɔ anyɩ 'nyɩ bha?» Ma yɔɔ ‑daangbʋ ‑glʋʋ ɩya 'kʋgba 'nyɩ. 16Ɩ bhɔlʋ 'lɛ 'dɛ na, ɔ 'matɩanɩa ɔla 'kubhlida.

Geyliinwlʋfɛtlɩa 'la bhɔsʋalɩɛ

(Mak 14.12-17; Luk 22.7-14)

17'Flawia ‑ɩ 'ta 'lɛ 'zɩ* nɩkplaan 'ka na, 'la 'fɛtlɩa 'la ‑bɛka clɩɩa 'kʋ, gɩlɩnyaa* ya Zozii cɩmɛ, 'nyɩ ma yɔɔ neencla lebhe: «'Ndagbazɩ ‑n ‑wa 'lɛ lebhe, a bhɔsʋalɩ geyliinwlʋfɛtlɩa* 'la nyɩa bha?» 18Ɔ ya maa 'cla lebhe: «A ble 'dua nɩkplaan nclɔɔ ‑naa 'bhlɩ ɩya a 'clɔɔ lebhe: Canyɔa nabhe: 'Na clɩɩa ya cɩmɛ, na ‑n 'bhisleen n ‑ya 'na gɩlɩnyaa cɩ 'ka 'lɛ geyliinwlʋfɛtlɩa lili.» 19Gɩlɩnyaa ya saa Zozii solua 'lɛ maa na nʋ 'nyɩ ma ya geyliinwlʋfɛtlɩa bhɔsʋa.

Zozii ‑ci ɔla 'pɛlʋzʋnyɔa

(Mak 14.18-21; Luk 22.21-23; Zan 13.21-30)

20Daa 'ylʋ bhli 'lɛ na, Zozii ɔya 'Kʋgba ‑mɔsɔa ‑kʋa 'tlɔnblɩ 'kʋ. 21Daa ma ‑kʋa 'lɛ lida na, ɔ ya nesa 'nyɩ ɔ ya 'cla lebhe: «N solu anyɩ ‑nʋawlɛ lebhe anyɩ sidiin bhlo cɩ 'kaan 'pɛlʋzʋ.» 22'Nyɛkɛ ya maa 'kɔtɔ 'nyɩ nclɔɔ nlɔɔ claa 'mɔɔ neen lebhe: «‑Kwlenyɔ, ‑amʋ bha?» 23Ɔ ya maa neenŋonu lebhe: «Ɔmɔa n ‑yɔɔsɔ falɩ 'lɛ ‑dakɔa nɩkplaan sɔ nebhlo na, ɔmɔ ‑ɔ ‑cɩ kaan 'lɛ 'pɛlʋzʋ. 24Ka Nclɔɔa 'Cʋa cɩ 'ka 'lɛ mʋ, saa ɩ ‑zieo 'lɛ ɔla 'sasʋʋn na. ‑Ma nclɔɔa ‑ɔ cɩ kɔɔ 'lɛ 'pɛlʋzʋ na, ‑munzue yɔɔ bho. 'Dɛ 'la nclɔɔa, ɩ nanɩa ɔla da lebhe ɔ 'la ‑valɩɔa.» 25Zuda, ɔmɔa ‑ɔ zʋa 'lɛ Zozii 'pɛlʋ na, ɔ ya nesa 'nyɩ ɔ yɔɔ 'cla lebhe: «Canyɔ, ‑amʋ bha?» Ɔ yɔɔ neenŋonu lebhe: «Ɩmɩ ‑n nyɩtɛ 'lɛ.»

‑Kwlenyɔ 'la ‑kplɔkplɔnyɩa

(Mak 14.22-25; Luk 22.15-20; 1 Kolt 11.23-26)

26Daa ma ‑kʋa 'lɛ lida na, Zozii ya 'flawo 'ma, ɔ ya Laagɔ bhɔlʋ, ɔ yʋʋ 'kliindɩdɩlɩ, ɔ yʋʋ gɩlɩnyaa* 'nyɩnɩ 'nyɩ ɔ ya maa 'cla lebhe: «A 'ma, a li, ʋmʋ ‑naa, 'na 'nyɛkɛa ʋ ‑glɩ 'lɛ.» 27'Nyɩ ɔ ya ‑khɔbhɛ 'ma, 'nyɩ ɔ bhɩalɩ 'lɛ Laagɔ bhɔlʋlɩɛ na, ɔ yɛɛ maa 'nyɩnɩ 'nyɩ ɔ ya 'cla lebhe: «Anyɩa 'fɩan a 'mla, 28sa ɛmɛ ‑naa, 'na ‑dolua ɛ ‑glɩ 'lɛ, mɛnʋdolua ‑ʋ 'kɔsɔ 'lɛ sa, ncaabhutukpa 'la nyinyivalɩɛ 'la gbʋ na. 29N solu anyɩ lebhe: ‑Ɩ 'manɩɔ 'lɛ ‑da na, 'n cɩ 'tanɩ ‑diinvɛɛn ‑naa 'mla ‑aan ɩya clɩɩa 'kʋa n ‑ya anyɩsɔ ka 'lɛ ɛla ‑lɩɩlelea n To 'la Nyɩbhɛlɩdua nɩkplaan 'mlanɩ na, ɩ 'ka ŋeni.» 30Daa ma bhɩalɩ 'lɛ bhlɩlɩɛ na, Zozii ɩya ɔla gɩlɩnyaa ya ‑zɔnwlʋ 'nyɩ ma ya ‑Olivʋsikikea 'wlu mʋ.

Pɩɛlɩ ya Zozii ‑blɔ

(Mak 14.26-31; Luk 22.31-34; Zan 13.37-38)

31Zozii ya ɔla gɩlɩnyaa* 'cla lebhe: «Dobheni ‑naa bhlogbɩɩ, ‑amʋ 'wluku, anyɩa 'fɩan 'la pɔɔtɛtɛa cɩ 'ka bhli. ‑Masa ɩ ‑zieo lebhe: N cɩ 'ka mlakpanyɔa 'bhla ɩya 'bhlabhlɩa 'ka dlolu. 32‑Ma daa n cɩ 'ka 'lɛ 'kwɩɩnkʋbho na, n cɩ 'ka anyɩ 'kʋklʋʋn pʋ 'yɛpɩ Galilee.» 33Pɩɛlɩ ya nesa 'nyɩ ɔ yɔɔ 'cla lebhe: «‑Mɔ 'wluku, ka ma 'fɩan ‑ka bhli 'titio na, ‑amʋ ‑tɛɛ 'nyɩ ‑ɔ cɩ 'ta bhlimʋ.» 34Zozii yɔɔ 'cla lebhe: «N soluo mɩ lebhe: Dobheni ‑naa bhlogbɩɩ, 'fɩɔn ‑gʋgɔ 'ka 'lɛ 'pa na, ‑n ‑cɩ kaan dɩ ‑mɔta ‑blɔlʋ.» 35Pɩɛlɩ yɔɔ 'cla lebhe: «Ka ɩ ‑ka ‑kʋ lebhe, n ‑nyɔɔsɔ 'ku 'titio na, ‑wɔɔ 'n cɩ 'tɔɔ ‑blɔ.» 'Nyɩ gɩlɩnyaa 'fɩan ya sɛɛ bhlogbɩɩ nyɩtɛ.

Zɛtɩsemanii

(Mak 14.32-42; Luk 22.40-46)

36Zozii -ya ɔla gɩlɩnyaa* ya dabhlo ŋeni, ma la 'dɛ Zɛtɩsemanii 'nyɩ ɔ ya maa 'cla lebhe: «A kʋ ‑da sa ɩya n 'ka bhibhiekan mʋ.» 37Ɔ ya Pɩɛlɩ ɩya Zebedee ‑yowliecɩa ‑mɔsɔa famʋ, cɩɩnkalɔ ɩya pɔɔvʋ yaanɩa 'mɔɔ pɔlɛɛn cilie bhɔ. 38Na, ɔ ya maa 'cla lebhe: «Cɩɩnkalɔa ‑ʋ ‑kʋʋn 'lɛ nɩkplaan na, ʋ faan 'kwɩɩn. A kʋ ‑da ɩya a klalɩɩn ‑zelibhlalɩɛ.» 39Ɔ ya 'pɛpɛ 'kʋklʋʋn mʋ 'nyɩ ɔ ya 'klʋ sagblii, ɔ bhibhiea 'nyɩ ɔ claa lebhe: «N to, ‑jioli ‑ka ‑kʋ na, 'naa ‑kɔbhɛɛ ‑naa tlʋbhalɩɩn cɩ da! 'Bhlɩmɔɔn, ‑n 'ta saa ‑amʋ n ‑wa 'lɛ naa, ‑ma saa ‑mɔɔ ‑n ‑wa 'lɛ na.» 40Ɔ ya gɩlɩnyaa 'bɩɩncili 'nyɩ ɔ ya maa 'claan ŋeni. Ɔ ya Pɩɛlɩ 'cla lebhe: «'Lɩka a 'ta mino ɩya a 'kaan 'ŋwacɩwlu bhlo 'bhebhe nɩkplaan ‑zelibhlalɩɛ klalɩ! 41A 'la ŋɔmʋa ‑ma a bhibhie ɩya a 'la ka gbɩɩnclalɩɛɛn bhlili. 'Wugoa ‑ka 'tɛtɩ, ‑ma 'nyɛkɛa 'taan 'tɛ.» 42Ɔ ya ‑awlɛ maa ‑mɔsɔda cɩɩnwlʋlʋ 'nyɩ ɔ bhibhiea, ɔ claa lebhe: «N To, ka ɩ ‑ka ‑kʋ lebhe, ‑kɔbhɛ ‑naa cɩ 'taan cɩ datlʋbhalɩlɩɛ mino na, 'dɛndlana, 'naa ‑naa pɔɔsa ‑nʋɔ.» 43'Nyɩ ɔ ya ‑awlɛ ci, ɔ ya maa claan ŋeni, sa mala 'cia yaanɩa 'kʋwɔbha na. 44Ɔ ya maa cɩɩnwlʋlʋ, ɔ ya ‑awlɛ mʋ 'nyɩ ‑mɔtada, ɔ bhibhiea 'nyɩ ɔ nyɩtɛa wɔlɩa bhlogbɩɩ. 45Na, ɔ ya gɩlɩnyaa 'bɩɩncili 'nyɩ ɔ ya maa 'cla lebhe: «A ŋɔmʋ ka ‑azla, a nyɔkwɛ ka ‑azla! 'Lɩka 'ŋwacɩa 'kʋa ma cɩ 'ka 'lɛ Nclɔɔa 'Cʋa* nyinyinʋnya wlɩɩn 'pɛlʋzʋlʋ na, ɛ ya ŋeni. 46A ‑bho 'kʋ! ‑A 'plɩ ‑a mʋ! 'Lɩka, 'na 'pɛlʋzʋnyɔa ya ci.»

Ma ya Zozii 'kʋbhli

(Mak 14.43-50; Luk 22.47-53; Zan 18.2-11)

47Wɔlɩ ‑naa ‑kʋ kaa Zozii neen 'nyɩ Zuda, 'kʋgba ‑mɔsɔa nɩkplaan bhlo, ɔ ya 'lɛ futo. Ncaabhutukpa gɩlɩa 'mɔɔ, ma bhɛa ‑banjlɛtɩcɩ ɩya sikli. Ma ‑glɩa ‑teyiyinyaa tocɩa ɩya ncaakpasɩa 'la lobhulobhunya*. 48Ɔmɔa, ‑ɔ zʋa 'mɔɔ 'lɛ 'pɛlʋ na, ɔ ya maa ghleda pala, ɔ ya 'cla lebhe: «Ɔmɔa n cɩ 'ka 'lɛ ‑kpacɩ cɩ ŋʋŋɔnʋ na, ɔmɔ ‑ɔ ‑kʋ 'lɛ 'dɛ. A bhlio 'kʋ!» 49'Kplookʋ ɔ ya Zozii 'bɩɩnmʋnʋ, 'nyɩ ɔ yɔɔ 'cla lebhe: «‑Ayoka canyɔ!» 'Nyɩ ɔ yɔɔ ‑kpacɩ cɩ ŋʋŋɔnʋ. 50Zozii yɔɔ 'cla lebhe: «N 'nagɔ, ɩmɩa ‑n ci 'lɛ nʋkan na, 'maa nʋɩ.» Na ma yɔɔ cɩmɛ, ma yɔɔ 'kʋbhli 'nyɩ ma yɔɔ 'nylugolu. 51Maa ‑ɔ ya Zozii namʋa 'lɛ na, mala nɩkplaan bhlo, ɔ ya ɔla lɛtɛa, ɛla tɩkpaa nɩkplaan jli, ɔ ya ‑teyiyinyɔ ‑kpasaa 'la lobhocoa 'kʋpa 'nyɩ ɔ yɔɔ 'nyukwli 'kʋsa. 52Zozii yɔɔ 'cla lebhe: «Cala ‑naa lɛtɛa ɛla daa, sa maa ‑ɔ ma 'lɛ ‑banjlɛtɩ na, ‑banjlɛtɩ 'la 'kwɩ ma cɩ 'ka 'lɛ 'ku. 53‑N gugu lebhe, n cɩ 'ta mino ɩya n 'ka n To la, ɩya 'kplookʋ, ɔ kaa ‑amʋa ‑bhlaandleecɩ* 'la tavʋkandi 'kʋgba ‑mɔsɔ ‑la bha? 54‑Ma ɩ 'ta ‑sa 'plɩ na, 'nsasa Zieziewɔlɩa cɩ 'ka 'lɛ 'kʋglalɩ bha?»

55'Nyɩ Zozii ya ncɛlɩa 'cla lebhe: «Ncaabhlanyɔ 'bhisa, a ya ‑banjlɛtɩcɩ ɩya sikli 'ma 'nyɩ a yaan 'kʋbhlikan ci. Clɩɩa 'fɩan ‑tɛtɛa, n ‑kʋa Laagɔpaakadiea* ‑zɔn sa 'nyɩ n caa, ‑ma a 'taan 'dɛ 'kʋbhlili. 56‑Ma ka ɩmɩ ‑naa ‑tɛtɛa ŋeni 'lɛ ɩya Laagɔnekʋnyɩtɛnyaa 'la Zieziewɔlɩa* 'ka 'klʋglalɩ.» Na, gɩlɩnyaa* yɔɔ te, 'nyɩ ma ya 'gu.

Zozii ‑kʋ 'tɩtɩplakandikadiea ‑deliin

(Mak 14.53-65; Luk 22.54-55,63-71; Zan 18.12-24)

57Ncɛlɩa ‑ɔ bhli 'lɛ Zozii 'kʋ na, ma yɔɔ 'ma 'nyɩ ma ‑yɔɔsɔ ya ‑teyiyinyɔ ‑kpasaa ma la 'lɛ Kayifʋ na, 'bhlɩ mʋ. ‑Jlɩmaazienyaa* ɩya ncaakpasɩa 'wlalɩa 'yɛpɩ 'wlu. 58Pɩɛlɩ gɩlɩa 'mɔɔ 'pɛɛnpɛɛn ‑aan 'nyɩ ma ya 'lɛ ‑teyiyinyɔ ‑kpasaa 'bhisleen ŋeni. Ɔ ya ble 'nyɩ ɔ ya lobhocuoa cɩ sakʋ, ɩya ɔ 'ka saa ɩ cɩ kaa 'lɛ 'plɩplɩlɩ na 'lɩ. 59Na, ‑teyiyinyaa tocɩa ɩya 'tɩtɩplakandea 'fɩan 'matɩa ‑kplakpladanʋfʋɛliliea ma cɩ 'kaa 'lɛ 'kʋ 'plɩlɩ, ɩya ma 'kaa 'mɔɔ 'lɛ 'bhla na. 60‑Ma, ma 'ta ‑ylɛylɛ 'lɩ. 'Bhlɩmɔɔn, ‑kplakpladanʋfʋɛlinya ‑bhutukpa yaa ci 'nyɩ ma ya nyɩtɛ. Bhɩalɩdaa, ‑mɔsɔ ya ci 61'nyɩ ma ya 'cla lebhe: «Nclɔɔ ‑naa ya 'cla lebhe: N cɩ mino, n cɩ Laagɔ 'la ‑Palʋa gbɔlʋ, 'nyɩ n cɩ clɩɩ ‑mɔta 'ma, n cɩʋ 'sla.» 62‑Teyiyinyɔ ‑kpasaa ya 'kʋbho, 'nyɩ ɔ yɔɔ 'cla lebhe: «Wɔlɩa ma gɩɔ 'lɛ 'kʋ na, ‑n ‑sa 'ta ne ‑ylɛylɛ bha?» 63‑Ma Zozii mɛa ɔla nea. ‑Teyiyinyɔ ‑kpasaa yɔɔ cla lebhe: «N slɔɔ 'wlʋ ‑Jajalaagɔ 'la 'ŋlɩa nɩkplaan lebhe, ‑n solu anyɩ, ka ɩ ‑ka ‑kʋ lebhe, ‑mɔ ‑ɔ ‑glɩ 'lɛ Klisi, Laagɔ 'la 'Cʋa na.» 64Zozii yɔɔ 'cla lebhe: «Ɩmɩ ‑n nyɩtɛ 'lɛ. ‑Ma n solu anyɩ lebhe ‑ɩ ‑bhɔlʋ 'lɛ ‑da na, a cɩ 'ka Nclɔɔa 'Cʋa* 'lɩ, ɔ 'ka 'tɛtɩa 'fɩan ɩ To 'lipasɔ 'kʋ sakʋ ɩya ɔ 'ka 'nyukplia 'kʋ cili.» 65‑Teyiyinyɔ ‑kpasaa ya ɔla lokua ɔcɩ cɩ 'ŋatɩlɩ 'nyɩ ɔ ya 'cla lebhe: «Ɔ ya Laagɔ vla. ‑Danʋfʋɛ saa ‑a 'matɩnɩ ‑awlɛ 'lɛ bha? A ya Laagɔ 'la vlalɩɛa 'nu. 66Na, wɔɔsaa a gugua 'lɛ bha?» Ma ya 'cla lebhe: «Ɔ ‑ya 'kwɩ ‑tɛɛ ‑fata.» 67Na, ma yɔɔ ‑daadʋ 'ciinŋwla 'nyɩ ma yɔɔ ‑kʋkɔɔntɩɩn bhutili. ‑Anʋa yɔɔ 'ciin 'sɛpɛ. 68Ma claa 'mɔɔ lebhe: «Klisi, nʋ Laagɔnekʋnyɩtɛnyɔ* 'bhisa, pala ‑anyɩ nclɔɔa ‑ɔ 'bhlɔɔ 'lɛ na.»

Pɩɛlɩ ya Zozii ‑blɔ

(Mak 14.66-72; Luk 22.56-62; Zan 18.17,25-27)

69Na, Pɩɛlɩ ‑kʋa ‑jlukuun, 'slea nɩkplaan sa. Lobhoŋlɔ bhlo yɔɔ cɩ ci 'nyɩ ɔ yɔɔ 'cla lebhe: «‑Mɔɔ ‑ma, ‑n ‑ya Zozii, Galileenyɔa namʋa.» 70‑Ma ncɛlɩa 'fɩan 'ci 'kʋ, ɔ ya cɩcɛlɩ 'nyɩ ɔ ya 'cla lebhe: «Wɔlɩa ‑n ‑na ‑n ka 'lɛ 'kʋbhli na, n 'tɩɩ ‑ci.» 71Ɔ ya 'kʋbho 'nyɩ ɔ mʋnʋnɩa 'sligbinea 'bɩɩn, ‑buun ŋlɔ bhlo ya ‑awlɛɔ 'lɩ 'nyɩ ɔ ya maa ‑ɔ ‑kʋa 'lɛ 'dɛ na 'cla lebhe: «‑Anɔ ‑naa, ɔya Zozii, Nazalɛtɩnyɔa namʋa.» 72Ɔ ya ‑awlɛ cɩcɛlɩ 'nyɩ ɔ ya 'cla lebhe: «N ta 'na Laagɔ, n 'ta nclɔɔ ‑naa ‑ci!» 73Ɩ 'ta ‑gwlɛlɩ 'nyɩ ncɛlɩa ‑ɔ ‑kʋa 'lɛ 'dɛ na, ma yɔɔ cɩmɛ 'nyɩ ma yɔɔ 'cla lebhe: «‑A ‑ci sɛɛ lebhe, ‑mɔɔ ‑ma, ‑n ‑kʋmʋ maa nɩkplaan. ‑Awlɛ, ‑naa ‑blɩɩzɔan sɔɔ ‑zɔn.» 74Ɔ ya ɔcɩ 'palɩɛ bhɔ, ɔ taa 'nyɩ ɔ 'cla lebhe: «N 'ta nclɔɔ ‑naa ci.» 'Kplookʋ, ‑gʋgɔ ya 'pa. 75'Nyɩ Pɩɛlɩ ya luoli lebhe Zozii yaa 'mɔɔ 'cla lebhe: «'Fɩɔn ɩya ‑gʋgɔ 'ka 'lɛ 'pa na, ‑n cɩ kaan dɩ ‑mɔta ‑blɔlʋ.» Na, ɔ ya ‑zɔnwlʋ 'nyɩ ɔ ya gbasa 'tu.

Currently Selected:

Mat 26: NTLD13

Highlight

Copy