Mat 14

'Nyuwluzʋnyɔ Zaan 'la 'kwɩa 'la cɩa wɔlɩ

(Mak 6.14-16; Luk 9.7-9)

1'Dɛ 'la 'bhlɛsʋan, Ewlɔdʋ, Galileebhlɩa 'kʋ 'la ‑kwletoa, ya Zozii 'la 'ŋlɩ 'nu 2'nyɩ ɔ ya ɔla cɩa ncɛlɩa 'cla lebhe: «Nclɔɔ ‑naa 'Nyuwluzʋnyɔ Zaan ɔ ‑glɩ 'lɛ. Ɔmɔ ‑ɔ ‑bho 'lɛ 'kwɩɩn 'kʋ, dɛ ɔ ‑ka 'lɛ 'ciinzizielɩlobholi 'la nʋtɛtɩ.»

3Ewlɔdʋ yaa gba ma ya Zaan 'kʋbhli, ma yɔɔ gʋa 'nyɩ ma yɔɔ ‑palʋʋn 'pa, ɔ bholi Filipʋ nʋŋlɔ Ewlodiadɩ 'wluku. 4Sa Zaan yaa 'mɔɔ 'cla lebhe: «‑N 'ta ‑jioli ‑ka ɩya ‑n kɔɔ 'cɩ.»

5Na, Ewlɔdʋ yaa wabha le ɔ 'kaa 'mɔɔ 'bhla, ‑ma ɔ 'gulua 'bhlɩnyaa, sa ma lia ‑danʋfʋɛ le Zaan ‑glɩa Laagɔnekʋnyɩtɛnyɔ* na.

6Clɩɩa 'kʋa Ewlɔdʋ 'la valɩclɩɩa 'cɩlɩ 'lɛ 'kʋ na, ɩla ‑pɔpʋɛnudaa, Ewlodiadɩ ‑nyɔŋlɔ ya 'tlɔnblɩkʋcinyaa 'ci 'kʋ 'lʋ celi 'nyɩ pɔlɛ 'kʋ ya Ewlɔdʋ mɛma. 7Na ɔ ya ‑ndanyɩ ta lebhe lʋʋa 'fɩan ŋlʋgbɩɔa cɩ 'kɔɔ 'lɛ 'clalɩ na, ɔ cɩɔ mʋ 'nyɩ. 8Ɔ 'nɔ yɔɔ gbɩ zʋ 'nyɩ ŋlʋgbɩɔa ya Ewlɔdʋ 'cla lebhe: «'Nyɩnɩɩn ‑da, 'cɛnzɩ nɩkplaan, 'Nyuwluzʋnyɔ Zaan 'la 'wlua.» 9Wɔlɩa ya nyɩbhɛlʋa 'nyɛkɛ cɩ 'kɔtɔlʋ, ‑ma ɔla ‑ndanyɩtalɩɛa ɩya 'tlɔnblɩkʋcinyaa 'la gbʋ na, ɔ ya ‑jioli 'nyɩ le ma 'nyɩɔ mʋ 10'nyɩ ɔ ya nclɔɔ ‑palʋʋnpapalʋa ‑zɔn lobhu le ɔ 'dɩ Zaan 'wlu 'kʋ. 11Nclɔɔa ya 'wluklea 'cɛnzɩɩn zʋ, ɔ yʋʋ ‑lamʋ, ɔ yʋʋ ŋlʋgbɩɔa 'nyɩnɩ 'nyɩ ɔ yʋʋ ɔ 'nɔ fa. 12Na, Zaan 'la gɩlɩnyaa* ya ci, ma ya ɔla ‑blaanyɛkɛa 'ma, ma yɛɛ ‑gluu zʋ 'nyɩ ma ya Zozii 'dɩ fa.

Zozii ya ncaatabhli ‑ngbi lililɩɩ 'nyɩ

(Mat 15.32-39; Mak 6.30-44; Luk 9.10-17; Zan 6.1-15)

13Daa Zozii 'nu 'lɛ wɔlɩ ‑naa na, ɔ ya gɔlʋʋn 'tɔ, ɔ ya 'dɛ 'wlʋ 'nyɩ ɔ ya daa ‑ɩ ‑kʋ 'lɛ ɩcɩɩn na mʋ. Ncaabhutukpa ya sɛɛ 'nu, ma ya mala 'dia 'kʋ 'wlʋ, ma namʋa 'nyɩ ma gɩlɩa 'mɔɔ. 14Daa Zozii 'wlʋ 'lɛ gɔlʋa nɩkplaan 'nyɩ ɔ kwli 'lɛ na, ɔ ya ncaabhutukpa 'lɩ, mala ŋaazɩ yɔɔ 'kʋkɔsɔ 'nyɩ ɔ ya mala guzenyaa jabha.

15Daa 'ylʋ mʋ 'lɛ na, Zozii 'la gɩlɩnyaa* yɔɔ cɩmɛ 'nyɩ ma yɔɔ 'cla lebhe: «‑Da ‑naa ‑glɩ ‑koteen 'nyɩ da yaan zili. 'Talɩ ncɛlɩa 'cin, ma 'ka 'dia 'kʋ mʋ ɩya ma 'ka mala lililɩɩ ‑pɩa.» 16‑Ma Zozii ya maa 'cla lebhe: «Ɩ 'ta ‑fata le ma mʋ 'yɛpɩ. Anyɩ 'titi a 'nyɩ maa lililɩɩ.» 17Na, ma yɔɔ 'cla lebhe: «'Flawi ‑ngbi ɩya ‑zlii ‑mɔsɔ ‑tɛɛ ‑a ‑ka 'lɛ ‑da.» 18Ɔ ya maa 'cla lebhe: «A ‑laan mɩ.» 19'Nyɩ ɔ ya ncɛlɩa 'fɩan 'cla le ma kʋ ‑pitia 'kʋ sa. Ɔ ya 'flawia ‑ngbia ɩya ‑zliia ‑mɔsɔa 'ma, ɔ ya 'ci 'kʋbhli, ɔ ya ‑laagɔɔn kope 'nyɩ ɔ ya Laagɔ bhɔlʋ. Ɔ ya 'flawia 'kliindɩdɩlɩ, ɔ yɩɩ gɩlɩnyaa 'nyɩnɩ 'nyɩ ma yɩɩ ncɛlɩa poli. 20Maa 'fɩan ya li, ma ya lo 'nyɩ 'klia ‑ɩ ‑to 'lɛ na, ma yɩɩ 'kubhli 'nyɩ ɩ ya ‑toku 'kʋgba ‑mɔsɔ 'kʋ ye. 21Ncɛlɩa 'fɩan ‑ɔ lia 'lɛ nyɩa na, ma cɩa ‑sa ncaatabhli ‑ngbi 'wlʋ, maa zɛlɩmʋ 'ta 'ŋwlɛa ɩya 'cuoa.

Zozii namʋnʋ 'nyi 'kʋtaan

(Mak 6.45-52; Zan 6.16-21)

22Dɩpɩa bhlogbɩɩ, Zozii ya ɔla gɩlɩnyaa* 'cla lebhe ma 'tɔ gɔlʋa nɩkplaan, ma pʋ 'kʋklʋʋn ɩya ma ‑bɛlɩɔ 'nyigean, daa ɔ 'talɩkaka 'lɛ ncɛlɩa 'cin na. 23Daa ɔ 'talɩ 'lɛ ncɛlɩa 'cin 'nyɩ ma mʋ 'lɛ na, ɔ ya 'kike bhlo 'kʋ mʋ le ɔ 'ka ɔcɩɩn kʋ ɩya ɔ 'ka bhibhie. 'Tutua pla 'lɛ na, ɔmɔ bhlo ɔ ‑kʋ kaa 'dɛ. 24Na, gɔlʋa ‑kʋanɩa 'nyisidiin, 'nyɩgagbɩa 'sɛpɛlɩa 'mʋʋ, sa ‑pupolua cilia maa gbatlɩ na. 25Ziplisa, ɔ ya 'nyia 'kʋtaan namʋnʋ 'nyɩ ɔ ya maa 'bɩɩn mʋnʋ. 26Gɩlɩnyaa 'lɩɔ 'lɛ 'nyia 'kʋtaan namʋnʋda na, ŋanɔ ya maa pla 'nyɩ ma claa lebhe: «Kuo ‑kʋ 'lɛ!» 'Nyɩ ma paa 'kasɛ. 27‑Ma Zozii ya nesa 'fan 'nyɩ ɔ ya maa 'cla lebhe: «A bhli ala pɔlɩa 'kʋ, ‑amʋ ‑kʋ 'lɛ, ŋanɔ 'la 'bhlaa anyɩ!» 28Na, Pɩɛlɩ ya nesa 'nyɩ ɔ yɔɔ 'cla lebhe: «‑Kwlenyɔ, ɩ ‑ka ‑kʋ lebhe ‑zaagbʋsa ‑mɔ ‑ka 'lɛ ‑kʋ na, gba n 'ka 'nyia 'kʋtaan namʋnʋmʋ ɩya n 'kɔɔ 'bɩɩn mʋnʋ.» 29Zozii yɔɔ 'cla lebhe: «Ci!» Pɩɛlɩ ya gɔlʋa nɩkplaan 'wlʋ, ɔ namʋnʋa 'nyia 'kʋtaan 'nyɩ ɔ mʋnʋa Zozii 'bɩɩn. 30‑Ma saa ɔ 'lɩlɩlɩa 'lɛ ‑pupolua na, ŋanɔ yɔɔ pla 'nyɩ ɔ ya 'kʋmlalɩɛ bhɔ, na ɔ ya nɩkplaan ‑gaa, ɔ ya 'cla lebhe: «‑Kwlenyɔ, ciin 'kʋ.» 31'Kplookʋ, Zozii ya sɔɔn ‑glɔ, ɔ yɔɔ 'kʋbhli 'nyɩ ɔ yɔɔ 'cla lebhe: «Pɩɛlɩ, ‑naa pɔɔtɛtɛa 'ta 'ghli! 'Lɩsaa 'la gbʋ ‑naa pɔlɛa ya 'lɛ tɩtɛlɩ bha?» 32Ma ya gɔlʋa nɩkplaan tɔ 'nyɩ ‑pupolua ya ‑dʋdʋ 'kʋ ci. 33Maa ‑ɔ ‑kʋa 'lɛ gɔlʋa nɩkplaan na, ma ya Zozii ‑deliin ‑kukoonkplii sasla 'nyɩ ma yɔɔ 'cla lebhe: «‑Zaagbʋsa ‑n ‑glɩ Laagɔ 'la 'Cʋ.»

Zozii ya Zenezalɛtɩbhlɩa 'kʋ guzenya jabha

(Mak 6.53-56; Zan 6.22-25)

34Daa Zozii ɩya ɔla gɩlɩnyaa* 'tɔ 'lɛ 'nyia na, ma ya Zenezalɛtɩbhlɩa 'kʋ 'pɛ. 35'Yɛpɩ 'la ncɛlɩa ya Zozii cibhlili, ma ya 'dɩ 'kʋ fafalɩ 'nyɩ ma ya mala guzenyaa 'fɩan 'ma, ma yɔɔ ‑la. 36Ma slaa 'mɔɔ 'wlu le ɔ tea guzenyaa ne ɩya ma 'kaa ɔla lokwia 'la numlua ‑tɛɛ cɩ kla. Na, maa 'fɩan ‑ɔ kla 'mʋʋ 'lɛ cɩ na, ma ya jabha.

Currently Selected:

Mat 14: NTLD13

Highlight

Copy