Luk 5

Zozii ya ‑bɛka ‑gɩlɩnyaa la

(Mat 4.18-22; Mak 1.16-20; Zan 1.35-51, 21.1-11)

1Clɩɩ bhlo, 'nylugoa Zenezalɛtɩdua 'la 'nyia cɩ, 'nyɩ Laagɔ 'la wɔɔnyɩtʋa 'nyukwliinpogbʋ na, ‑alawleea mɛa 'mɔɔ. 2Ɔ ya gɔlɩ ‑mɔsɔ 'nyigboa 'kʋ 'lɩ. ‑Zliibhlanyaa yaanɩa 'mɩɩ nɩkplaan 'wlʋ, 'nyɩ ma wɔlʋa mala ‑dadɩa. 3Ɔ ya bhlo nɩkplaan 'tɔ, ‑ʋ ‑glɩa 'lɛ Simɔɔn 'nʋa na 'nyɩ ɔ yɔɔ 'cla le ɔ 'su gɔlʋa ɩya salɩ 'nyigboa ‑vakɩ. Ɔ ya gɔlʋa nɩkplaan sakʋ 'nyɩ ɔ caanɩa ‑alawleea. 4Daa ɔ bhɩalɩ 'lɛ nyɩtɛlɩɛ na, ɔ yaa Simɔɔn 'cla lebhe: «Mʋ 'kʋklʋʋn 'nyɩsidiian, a 'pa ala ‑dadɩa ɩya a 'ka ‑zlii 'kʋbhli.» 5Simɔɔn yɔɔ neenŋonu lebhe: «Canyɔ, 'kwlɩ ‑kʋ ‑anyɩ dobheni bhɩada ‑aan ‑a 'ta lʋʋ bhlogbɩɩ 'lɩ. ‑Ma ‑n ya 'lɛ sɛɛ gba na, n cɩ 'ka ‑dadɩa 'pa.» 6Ma ‑dadɩa 'pa, ma ya ‑zlii ‑bhutukpa 'kʋbhli, 'nyɩ mala ‑dadɩa ya 'ŋatɔlɩɛ bhɔ. 7‑Ma ya ma 'yea ‑ɔ nɩnɩ 'lɛ daa gɔlʋa na la le ma ci ɩya ma klalɩ maa. Ma ya ci, ma ya gɔlɩa ‑mɔsɔa yeli 'nyɩ saa 'titia ɩ yea 'lɛ na, ɩ 'matɩa le ɩ 'kaa 'kʋmla.

8Na, daa Simɔɔn Pɩɛlɩ 'lɩ 'lɛ ɩmɩ ‑naa 'ciin na, ɔ ya Zozii ‑deliin ‑kukoonkplii sasla 'nyɩ ɔ ya 'cla lebhe: «‑Kwlenyɔ, ‑naa mɛɛn cɩ, sa n ‑glɩ nyinyinʋnyɔ.» 9Saa 'titia ‑zliia ‑zua 'lɛ na, ŋanɔ ya Simɔɔn ɩya ɔ 'yea 'fɩan ‑ɔ ‑kʋa 'mɔɔ 'lɛ cɩ na pla. 10'Sɛtɛɛ bhlogbɩɩ ŋanɔ plamʋ 'lɛ Zakɩ ɩya Zaan, Simɔɔn 'la 'namʋnyaa ‑ɔ ‑glɩ 'lɛ Zebedee ‑yowliecɩa na. ‑Ma Zozii ya Simɔɔn 'cla lebhe: «Ŋanɔ 'la 'bhlɔɔ! ‑Ma ‑ɩ bhɔlʋnɩ 'lɛ ‑da na, ncɛlɩ ‑n ‑cɩ kanɩ 'lɛ jli.» 11Na, daa maya gɔlɩa cɔlɔ 'lɛ 'nyigboa 'kʋ na, ma ya ‑tɛtɛa 'fɩan te 'nyɩ ma ‑ya 'lɛ Zozii gɩlɩ.

Zozii ya kokobhebhlanyɔ bhlo jabha

(Mat 8.1-4; Mak 1.40-45)

12Clɩɩ bhlo, Zozii ‑kʋa 'du bhlo 'kʋ. Nclɔɔ bhlo ‑kʋa 'yɛpɩ ɔla 'nyɛkɛa ‑tɛtɛa ɛ 'cɩlɩa kokobhe 'kʋ. Daa ɔ 'lɩ 'lɛ Zozii na, ɔ yɔɔ ‑deliin 'klʋsagblii 'nyɩ ɔ yɔɔ 'clalɩ lebhe: «‑Kwlenyɔ, ‑n ‑ka ‑wa na, ‑n cɩɩn jabha 'nyɩ n cɩ ‑kplɔ.» 13Zozii ya sɔɔn ‑glɔ, ɔ yɔɔ cɩkla 'nyɩ ɔ ya 'cla lebhe: «N ‑wa, 'maa jabha.» Dɩpɩa bhlogbɩɩ, kokobhea yɔɔ cɩ 'wlʋ 'nyɩ ɔ ya ‑kplɔ. 14Na, Zozii yɔɔ 'cla lebhe: «‑Naa solua sɛɛ nclɔɔ bhlogbɩɩ, ‑ma mʋ, ‑n pala ‑ncɩ ‑teyiyinyɔa, ‑n ‑sa ‑naa ‑kplɔlɩɛa 'la vavalɩɩa, saa Moyizi 'la ‑jlɩmaa bhli 'lɛ 'kʋ na, ɩya ma 'ka dɩpɩa ‑danʋfʋɛ lili lebhe ‑n ya ‑zaagbʋsa jabha.»

15Na, Zozii 'la 'ŋlɩ mʋmʋnʋa 'kʋ, 'nyɩ ncaabhutukpa 'wlalɩawlu le ma 'kɔɔ 'nyukwliinpo ɩya ɔ 'ka maa jabha. 16‑Ma ɔmɔ, ɔ mʋa daa ɩ ‑kʋ 'lɛ ɩcɩɩn na 'nyɩ ɔ bhibhiea.

Zozii ya bhubhubhubhunyɔ bhlo jabha

(Mat 9.1-8; Mak 2.1-12)

17Clɩɩ bhlo, Zozii ‑kʋa cada. Na, Falizɩɛnnya* ɩya ‑jlɩmaacanya ya Galilee ɩya Zudeebhlɩa 'la 'dia ‑tɛtɛa 'kʋ ɩya Zolizalɛmʋdua 'kʋ 'wlʋlʋ, 'nyɩ ma ‑kʋmʋa ncɛlɩa sidiin sa. Laagɔ 'la 'tɛtɩa nɩkplaan, ɔ jabhaa ncɛlɩ. 18Na, ncɛlɩ ya futo, ma bhɛa bhubhubhubhunyɔ bhlo 'kʋpʋlʋʋ 'kʋ. Ma 'matɩa le ma 'kaa 'mɔɔ blee ɩya ma kɔɔ Zozii ‑deliin zʋ. 19‑Masa ‑alawleea 'la gbʋ, 'ma 'lɩ 'taa 'lɛ 'plɩda na, ma ya ‑palʋa 'wlu ‑gblaa, ma ya 'yɛpɩ kofo ‑sa, ma ya ɔya ɔla 'kʋpʋlʋʋa kofoa neen bleli 'nyɩ ma yɔɔ ncɛlɩa sidiin, Zozii ‑deliin kwlee. 20Ɔ 'lɩ 'lɛ mala pɔɔtɛtɛa na, ɔ ya bhubhubhubhunyɔa 'cla lebhe: «‑Naa nyinyia ɩ yɔɔ ‑vɔɔ.» 21Na, ‑jlɩmaacanyaa ɩya Falizɩɛnnyaa 'cla mala wɔɔgugwiea nɩkplaan lebhe: «'Ndaa nclɔɔ 'titi ‑ɔ ‑kʋa 'lɛ ‑da 'nyɩ ‑ɔ vla 'lɛ ‑sa Laagɔ bha? Ɩ ‑ka ‑kʋ le ‑n 'ta Laagɔ bhloo na, ncaasaa ‑ɔ ‑cɩ ka 'lɛ nyinyi valɩɛ mino bha?» 22‑Ma Zozii ya mala wɔɔgugwie cibhlili, 'nyɩ ɔ ya maa 'cla lebhe: «'Lɩsaa 'la gbʋ, a gugua 'lɛ ‑sa ala pɔlɩa nɩkplaan bha? 23Ma 'ka 'lɛ 'cla lebhe: ‑Naa nyinyia ɩ yɔɔ ‑vɔɔ, ‑aana ma 'ka 'lɛ 'cla lebhe: ‑Bhokʋ ɩya ‑n namʋ na. ‑Anɩsaa ‑ɩ 'tɛa 'lɛ bha? 24‑Ma, a 'ka 'lɛ cibhlili le Nclɔɔa 'Cʋa* ‑ka ‑dʋdʋa 'kʋ ‑jioli ɩya ɔ 'ka nyinyi va na, ɔ ya bhubhubhubhunyɔa 'cla lebhe: ‑Bho 'kʋ, 'ma ‑naa 'kʋpʋlʋʋa ɩya ‑n mʋ ‑n 'bhisleen.» 25'Kplookʋ, maa 'ci 'kʋ, ɔ ya 'kʋbho, ɔ ya 'kʋpʋlʋʋa 'ma 'nyɩ Laagɔ 'la ‑evliwolɩɛ nɩkplaan, ɔ ya ɔ 'bhisleen mʋ. 26Nikpoo ya maa 'fɩan sla 'nyɩ ma woa Laagɔ ‑evli. Ŋanɔ ‑plaa maa 'nyɩ ma claa lebhe: «‑A ya ‑yaka nikpooslaslawɔlɩ 'ciinlɩ.»

Zozii ya Levii la

(Mat 9.9-13; Mak 2.13-17)

27Wɔlɩ ‑naa 'plɩ 'lɛ na, Zozii ya ‑zɔnwlʋ 'nyɩ ɔ ya ‑lapooclanyɔ bhlo 'lɩ, ma lɔɔ Levii, ɔ ‑kʋa ‑lapooplʋpalʋa ‑zɔn sa. Ɔ yɔɔ 'cla lebhe: «Gɩlɩɩn!» 28Ɔ ya 'kʋbho, ɔ ya ‑tɛtɛa 'fɩan te 'nyɩ ɔ yɔɔ gɩlɩ.

29Levii ya ɔ 'bhisleen Zozii 'tlɔnblɩsapalɩ. 'Nyɩ ‑lapooclanya ‑bhutukpa ɩya ‑buunncɛlɩ ‑yamaasɔ ‑kʋa 'tlɔnblɩa 'kʋ. 30Na, Falizɩɛnnyaa* ɩya mala ‑jlɩmaazienya* 'ŋuŋuoa 'nyɩ ma claa Zozii 'la gɩlɩnyaa* lebhe: «'Lɩsaa 'la gbʋ aya ‑lapooclanyaa ɩya nyinyinʋnyaa lia 'lɛ 'nyɩ a 'mlanɩa 'lɛ dabhlo bha?» 31Na, Zozii ya wɔɔnyɩtʋ 'ma 'nyɩ ɔ ya maa 'cla lebhe: «Maa ‑ɔ ‑ja 'lɛ na, ‑n 'ta maa ‑ɔ 'matɩ 'ta 'lɛ ‑dɔtɛ, ‑ma maa ‑ɔ 'ta 'lɛ ‑ja na. 32N 'ta 'kʋnylugolunya lakan ci, ‑ma nyinyinʋnya lakan n ci 'lɛ le ma 'ka kwlacala.»

Zozii nyɩtɛ ‑zelizlolɩɛ 'la wɔlɩ

(Mat 9.14-17; Mak 2.18-22)

33Ncɛlɩ ya Zozii 'cla lebhe: «'Nyuwluzʋnyɔ Zaan 'la gɩlɩnyaa* zlo ‑azla ‑zeli 'nyɩ ma bhibhie. Falizɩɛnnyaa 'nʋa ‑ma, sɛɛ bhlogbɩɩ. ‑Ma ‑mɔɔ ‑naanʋa, ma li 'nyɩ ma mla.» 34‑Ma Zozii ya maa 'cla lebhe: «A cɩ 'ta mino ɩya a 'ka 'tlɔnblɩkʋcinyaa 'cla lebhe ma zlo ‑zeli, daa maya 'cɩcɩɛnʋnyɔa ‑kʋ ka ka 'lɛ sa na. 35‑Ma clɩɩ cɩ 'ka ŋeni ɩya ma 'ka 'cɩcɩɛnʋnyɔa maa sidiin ‑sa. Na, 'dɛ 'la clɩɩa nɩkplaan, dɛ ma cɩ 'ka 'lɛ ‑zelizlo.»

36Zozii ya ‑awlɛ maa ‑nyandlaa bhlo nɩkplaan 'cla lebhe: «Maa 'ma 'ta lokwi ‑lele cɩ 'ŋatɩ ɩya ɔ 'ka lokwia ‑ɛ ya 'lɛ cɔbha na ta. Ma ‑ka sɛɛ nʋ na, lokwi ‑lelea ya 'ŋatɩɔ 'bhlɩɩ, ‑ma ɛla 'pɛlʋa ʋya cɔbhacɔbhalokwia ɩ klaklalɩ 'ta. 37Maa 'ma 'ta nʋcalʋ ɩya ma 'kʋʋ 'bhua ‑ɩ ya 'lɛ ‑gwlɛlɩ na nɩkplaan. Gbazɩ ma ‑ka sɛɛ nʋ na, ka nʋcalʋa cɩ 'ka 'lɛ 'bhua wla, ʋ 'ka sakɔsɔ ɩya 'bhua 'ka ‑gbɩɔ. 38‑Ma 'bhu ‑leli nɩkplaan ɩ ‑fata 'lɛ le ma zʋ nʋcalʋ. 39Ncaatʋtʋʋntʋa ‑ɔ mla 'lɛ ‑diinvɛɛan ‑ɛ ya 'lɛ ‑gwlɛlɩ na, 'ɔ ŋonu 'tanɩ ɩya ɔ 'ka ‑lɩɩlele 'mla, sa ɔ cla lebhe: Ɛmɛa ɛ ya 'lɛ ‑gwlɛlɩ na, ɛmɛ ‑ɛ 'nanɩ 'lɛ.»

Currently Selected:

Luk 5: NTLD13

Highlight

Copy