Luk 13

A 'ta kwlacala na, a cɩ 'ku

1Na, 'dɛ 'la clɩɩa nɩkplaan, ncɛlɩ ya ci 'nyɩ ma ya Zozii, Galileenyaa, Pilatɩ 'cakalɩwa 'lɛ mala ‑dolua ɩya mala ‑teyiyimlaa 'nʋa na, 'la wɔlɩa 'dɩkʋsalɩ. 2Ɔ ya maa 'cla lebhe: «Ka a gugu 'lɛ le Galileenya ‑naa ‑glɩa nyinyinʋya 'kadɩ 'nyɩ ma zia ‑daa Galileenyaa 'fɩan 'kʋ, 'dɛ ‑sa 'la wɔlɩ ŋeni 'lɛ maa bha? 3N claa anyɩ le ‑wɔɔ, ‑ma a 'ta kwlacala na, anyɩ ‑ma, anyɩa 'fɩan cɩ 'ka 'lɛ 'ku.

4'Nyɩ ncɛlɩ ‑naa 'kʋgba ‑ngbaata Silowee 'la 'kʋtotopalʋa bhliliwa 'lɛ 'wlu 'nyɩ ʋ 'bhla 'lɛ na, ka a gugu 'lɛ le mala ‑tobhua zia Zolizalɛmʋnyaa 'fɩan 'nʋa 'kʋ bha? 5N claa anyɩ le ‑wɔɔ, ‑ma a 'ta kwlacala na, anyɩ ma, anyɩa 'fɩan cɩ 'ka 'ku.»

'Figisua ‑ʋ tlʋ 'ta 'lɛ na 'la ‑nyandla

6'Nyɩ Zozii ya ‑nyandlaa ‑naa bu 'nyɩ ɔ ya maa 'cla lebhe: «Nclɔɔ bhlo ‑kaa 'figisu, ʋ ‑goloa ɔla 'kwlaa nɩkplaan. Ɔ yʋʋ 'wlu 'ca 'matɩkan ci, ‑ma ɔ 'tɩɩ 'lɩ. 7Na, ɔ ya 'kwla nɩkplaan 'la lobholinʋnyɔa 'cla lebhe: 'Lɩka ɩ nʋnɩ liowli ‑mɔta, n ci 'lɛ 'figisu ‑naa 'wlu 'caa 'matɩkan 'nyɩ n 'lɩ 'tɩɩ 'lɛ. Na 'dɩʋ. 'Lɩsaa 'la gbʋ ʋ cɩ 'ka ka 'lɛ ‑dʋdʋ 'kpɔkpɔ nyumo bha? 8‑Ma 'kwlaa 'la 'klʋlɩnyɔa yɔɔ 'cla lebhe: ‑A to, 'talɩ ka kʋʋ lio ‑naa 'cin ɩya n 'kʋʋ cɩ 'bhli ɩya n 'kʋʋ tɩtɔ guoon zʋ. 9'Kʋklʋʋn clɩɩa nɩkplaan ʋ cɩ sɛ tlʋ. N 'ta sɛɛ na 'nyɩ ‑n cɩnɩʋ 'dɩ.»

Zozii ya 'ŋlɔ bhlo nyɔkwɛclɩɩa 'kʋ jabha

10Nyɔkwɛclɩɩ* bhlo 'kʋ, Zozii ‑kʋa bhibhiepalʋ* bhlo ‑zɔn 'nyɩ ɔ caa. 11'Nyɩ 'lɩka, 'Ŋlɔ bhlo ‑kʋa 'dɛ, 'wugo ‑nyunyu ‑kʋa 'mɔɔ nɩkplaan 'nyɩ ʋ ‑bhubhua 'mɔɔ ‑aan liowli 'kʋgba ‑ngbaata. Ɔ ‑klua nɩkplaan 'nyɩ ɔ mino 'taa ɩya ɔ 'kaa 'nanɩ 'kʋ 'nylugolu. 12Na, daa Zozii 'lɩɔ 'lɛ na, ɔ yɔɔ la 'nyɩ ɔ yɔɔ 'cla lebhe: «'Ŋlɔ, ‑naa 'bhlɛa yɔɔ cɩ 'wlʋ.» 13Ɔ yɔɔ sɩ 'kʋgbɛ: 'Kplookʋ ɔ ya 'kʋ 'nylugolu 'nyɩ ɔ ya Laagɔ ‑evliwolɩɛ bhɔ.

14‑Ma dɔgbɛ ya bhibhiepalʋatoa* pla, sa Zozii ya nyɔkwɛclɩɩa 'kʋ nclɔɔ jabha na. Ɔ ya wɔɔnyɩtʋ 'ma nyɩ ɔ ya ‑alawleea 'cla lebhe: «Clɩɩ ‑ngbʋflʋ ‑kʋ le nclɔɔ 'ka lobholi nʋ. Na, clɩɩ ‑naa 'kʋ 'ɩ ‑fata 'lɛ le a ci ɩya ma 'ka anyɩ jabha, ‑ma ‑n 'ta nyɔkwɛclɩɩa 'kʋʋ.» 15‑Kwlenyɔa yɔɔ neenŋonu lebhe: «Yooyoncɛlɩnyɩ, nyɔkwɛclɩɩa 'kʋ, anyɩa 'fɩan, nclɔɔ nclɔɔ ‑blulu 'ta ɔla bhlii ‑aana ɔla 'flumu, 'nyɩ ɔ fa 'tɛɛ 'nyumlakan bha? 16'Nyɩ ŋlɔ ‑naa ‑ɔ ‑glɩ 'lɛ Ablaamʋ 'la 'cʋ 'nyɩ Sataan* gʋa 'lɛ ‑aan liowli 'kʋgba ‑ngbaata 'wugo na, nyɔkwɛclɩɩa 'kʋ ɩ 'ta 'lɛ ‑fata le ma 'dɩa 'mɔɔ 'bhli bha?» 17Ɔ 'bhli 'lɛ ‑sa 'kʋ na, ɔla ‑zɔbhɛlɩgbanyaa 'fɩan ‑zo ya maa pla 'nyɩ ‑alawleea 'fɩan nʋa ‑pɔpʋɛ ‑jakajakagbɩ ‑naa 'fɩan ɔ nʋa 'lɛ na 'la gbʋ.

‑Mutadɩsucie 'la ‑nyandla

(Mat 13.31-32; Mak 4.30-32)

18Na, Zozii ya 'cla lebhe: «'Lɩsaa ‑kʋa 'lɛ le Laagɔ 'la Nyɩbhɛlɩdua* bha? 'Lɩsaa n 'cɩ 'kʋʋ 'lɛ palalɩ bha? 19Ka ʋ ‑kʋ 'lɛ ‑mutadɩsuciea#13.19 Ka ‑mutadɩsuciea ‑kʋ 'lɛ le ‑nyɔɔcie. nclɔɔ ma 'lɛ 'nyɩ ɔ golo 'lɛ ɔla 'kwlaan na. Ɛ wlʋ, ɛ plɩ su 'nyɩ ‑laagɔɔn 'la libhlia sla ɩla ‑palɩ ʋla 'labhɩa nɩkplaan.» 20Ɔ ya ‑awlɛ 'cla lebhe: «'Lɩsaa n cɩ 'kaa 'lɛ Laagɔ 'la Nyɩbhelɩdua palalɩ bha? 21Ka ʋ ‑kʋ 'lɛ le 'zɩa* 'ŋlɔ ma 'lɛ, ɔ zʋ 'lɛ ‑faliikpoongbɩ 'kadɩ ‑mɔta nɩkplaan 'nyɩ ɩ 'fɩan flu 'lɛ na.»

A bleli gbinicoa neen

22Zolizalɛmʋ 'la ‑gugwiea 'kʋ, Zozii 'plɩlɩa dikadɩa ɩya dicʋa 'kʋ, 'nyɩ ɔ caa. 23Na, nclɔɔ bhlo yɔɔ neencla lebhe: «‑Kwlenyɔ, na ncaapɛ ‑tɛɛ cɩ 'ka 'lɛ gbʋʋnsalɩɛ 'lɩ bha?» Na, ɔ ya maa 'cla lebhe: 24«A 'sɩslɩlɩ ɩya a 'ka gbinicoa neen bleli, sa n solu anyɩ, ncaabhutukpa cɩ 'ka 'matɩ le ma 'ka ble, ‑ma 'ma cɩ 'ta mino.

25Daa 'sletoa cɩ 'ka 'lɛ 'kʋbho, ɔ 'ka gbinea kpaslɩlɩ ɩya a ‑ka 'lɛ ‑jlukuun ‑to na, dɛ a 'ka 'lɛ gbinea bhuti ɩya a 'ka 'cla lebhe: A to, kalɩ ‑anyɩ gbine ɩya ɔ 'ka anyɩ neenŋonu lebhe: Anyɩ, n 'ta anyɩ ‑ci.

26Na, cɩ 'ka 'cla lebhe: ‑A ‑yɔɔsɔ ya li, ‑a ya mla 'nyɩ n ya 'lɛ ala 'clikpua nɩkplaan calɩ. 27Ɩya ɔ 'ka anyɩ 'cla lebhe: N 'ta daa a 'nylugolu 'lɛ na ‑ci. A 'wlʋlʋʋn cɩɩn, anyɩa ‑tɛtɛa ‑ɔla nʋnʋnʋgbɩa 'ta 'lɛ 'kʋnylugolu na. 28Daa a cɩ 'ka 'lɛ Ablaamʋ, Izakɩ, Zakɔpʋ ɩya Laagɔnekʋnyɩtɛnyaa 'fɩan Laagɔ 'la Nyɩbhɛlɩdua* nɩkplaan 'lɩ ɩya anyɩ, ma 'ka 'lɛ anyɩ ‑jlukuun 'pa na, dɛ a cɩ 'ka 'lɛ 'nʋgbʋ 'tu ɩya a 'ka 'lɛ ‑glaaslo li. 29Na, ncɛlɩ cɩ 'ka 'daba 'kʋ, 'lipasɔ 'kʋ, 'wlu 'kʋ ɩya gozɔn 'wlʋlʋ ɩya ma 'ka Laagɔ 'la Nyɩbhɛlɩdua nɩkplaan 'la 'tlɔnblɩa 'kʋ ci. 30Na, 'lɩka ‑sa leenbhɩalɩ ‑naanʋa cɩ 'ka 'lɛ ‑bɛka ‑naanʋa 'plɩ ɩya ‑bɛka ‑naanʋa 'ka leenbhɩalɩ ‑naanʋa 'plɩ.»

Zozii nyɩtɛ Zolizalɛmʋdua 'la wɔlɩ

31'Dɛ 'la 'ŋwacɩa bhlogbɩɩ 'kʋ, Falizɩɛnnya* ‑zlʋsaasa ya Zozii cɩ mɛ 'nyɩ ma yɔɔ 'cla lebhe: «'Plɩ ‑n ka mʋ, 'wlʋ ‑da, sa Ewlɔdʋ 'matɩ le ɔ 'kɔɔ 'bhla.» 32Ɔ ya maa 'cla lebhe: «A mʋ ɩya a 'cla ‑daazle ‑naa lebhe: 'Lɩka, ka n tli 'lɛ 'wugwi ‑nyinyi 'nyɩ n jabha 'lɛ ncɛlɩ ‑yaka ɩya ‑cɩpa, ɩya ‑mɔtazelia n ka 'na lobhlolia 'wluko. 33‑Ma ɩ ‑fata le n bhli 'na ‑gugwiea ‑yaka, ‑cɩpa ɩya clɩɩa ‑ɩ gɩɩ 'lɛ 'kʋ na, sa Laagɔnekʋnyɩtɛnyɔ* cɩ ta mino ɔ 'ka ‑buundu 'kʋ 'kulu ɩ ka ‑kʋ le ‑n 'ta Zolizalɛmʋ na.

34Zolizalɛmʋ, Zolizalɛmʋ, ‑mɔa ‑ɔ 'nyɩ ‑ɔ vʋ 'lɛ maa Laagɔ lobhuo 'lɛ 'bhlɩ na cɔkʋ 'nyɩ ‑ɔ bhla 'lɛ Laagɔnekʋnyɩtɛnya* na, dɩzlʋsaa n 'taa 'lɛ wabhalɩ le n 'kaa ‑naa 'cuoa 'wluwlalɩ, le saa ‑gʋgɔ 'wlalɩ 'lɛ ʋla 'cuo ʋla ‑papua ‑zɔn 'wlu na bha? ‑Ma a 'ta ŋonu. 35Na 'lɩka, Laagɔ cɩ 'ka anyɩ ala ‑palʋa teli. 'Nyɩ n solu anyɩ lebhe: 'A cɩ 'ta kɩnɩɩn 'lɩ ‑aan ɩya clɩɩa 'kʋ a cɩ 'ka 'lɛ 'cla lebhe: 'Naa 'nyupalɩɛ ŋeni ɔmɔa ‑ɔ cili 'lɛ ‑Kwlenyɔ 'la 'ŋlɩa nɩkplaan na, ɩ 'ka ŋeni.»

Currently Selected:

Luk 13: NTLD13

Highlight

Copy