Luk 10

Zozii ya gɩlɩnya ‑gwlɩɩ ‑mɔta ɩya 'kʋgba lobhu

(Mat 10.7-16)

1Ɩmɩ ‑naa 'la leean, ‑Kwlenyɔa ya ‑awlɛ gɩlɩnya* ‑gwlɩɩ ‑mɔta ɩya 'kʋgba ‑mɔsɔ desla 'nyɩ ɔ ya maa 'dia ‑tɛtɛa ɩya daa ‑tɛtɛa ɔmɔ 'titi cɩ 'kaa 'lɛ mʋ na, ɔcɩ 'kʋklʋun lobhu ‑mɔsɔ ‑mɔsɔ. 2Ɔ ya maa 'cla lebhe: «'Kwlaa 'la tlʋtlʋlɩɩa ‑zu. ‑Ma lobholinʋnyaa 'ta ‑zu. Na, a bhibhie 'kwlaa toa le ɔ lobhu lobholinʋnya ɔla 'kwlaa nɩkplaan. 3A mʋ! 'Lɩka ka n lobhu 'lɛ anyɩ 'bhlabhlɩ 'bhisa, mlanyinyi sidiin. 4A 'la famʋa 'dala, ‑keteku, ‑gbanbʋɩ ɩya aya nclɔɔ bhlogbɩɩ 'la 'papalɩa ‑ayo ‑gugwie 'kʋ.

5'Slitʋtʋʋntʋa a cɩ 'ka 'lɛ nɩkplaan ble na, a 'cla ‑bɛɛ lebhe: 'Naa pupue kʋ sle ‑naa 'kʋ. 6'Nyɩ nclɔɔ ‑ɔ ‑wa 'lɛ pupuea ‑ka 'yɛpɩ ‑kʋ na, ala pupuea ɛ cɩɔ 'kʋ kʋ. ‑Ma ‑n 'ta sɛɛ na, ala pupuea, ɛ cɩ anyɩ 'kʋ cɔlɔ. 7A kʋ 'dɛ 'la 'slea nɩkplaan, a li ɩya a 'mla ɩmɩa ma cɩ 'ka 'lɛ anyɩ 'nyɩ na, sa lobholinʋnyɔ, ɔya ɔla dluuplʋlɩɛ ‑fata na. ‑Ma a 'la bia 'sli 'sli. 8Du 'tʋtʋʋntʋa a cɩ 'ka 'lɛ nɩkplaan ble 'nyɩ ka ma ‑ka anyɩ 'kʋplada zʋ na, a li ɩmɩa ma cɩ 'ka 'lɛ anyɩ 'nyɩ na. 9A jabha guzenyaa ‑ɔ cɩ ka 'lɛ 'dɛ kʋ na ɩya a 'cla maa lebhe: Laagɔ 'la Nyɩbhɛlɩdua* ya cɩ mɛ. 10‑Ma 'du 'tʋtʋʋntʋa a cɩ 'ka 'lɛ nɩkplaan ble, 'nyɩ maa cɩ 'ta 'lɛ anyɩ kla na, a mʋ 'clikpua nɩkplaan ɩya a 'cla lebhe: 11Ala 'dua nɩkplaan 'la pipia 'bhebhea ‑ɩ mɛ 'lɛ ‑ala kplia cɩ na, ‑a gbɔtʋɩ 'nyɩ ‑a calɩɩ anyɩ 'ciin. ‑Ma 'bhlɩmɔɔn a cibhlili le Laagɔ 'la Nyɩbhɛlɩdua ya cɩ mɛ. 12N solu anyɩ le 'dɛ 'la clɩɩa 'kʋ, Sodɔmʋdua 'la gbaylɩsalɩɛa cɩ 'ka cɔbha ɩya ɩ 'ka 'dɛ 'la 'dua 'nɩa 'kʋzi.»

'Dia ‑ɩ 'ta 'lɛ ŋonu le ‑ɩ ka cwlacala na

(Mat 11.21-23)

13‑Munzue bhoo Kolazini! ‑Munzue bhoo Bɛsayida! Sa, 'ciinzizielɩlobholia ma nʋnʋ 'lɛ ala ‑dʋdʋa 'kʋ na, Tili ɩya Sidɔɔndia 'kʋ ɩ kaa ‑nʋnʋɔ na, ɩ yaanɩa ‑baagɩcɩ bibie, ɩ yaanɩa 'tɩtɔ 'wlu 'kɔsɔ 'nyɩ ɩ yaanɩa tooto kwlacala. 14‑Ghɛɛ, 'tɩtɩplaclɩɩa 'kʋ, Tili ɩya Sidɔɔn 'la gbaylɩsalɩɛa cɩ 'ka cɔbha ɩya ɩ 'ka a 'nɩa 'kʋzi. 15'Nyɩ ‑mɔɔ Kapɛnayumʋ, ‑n gugu le ‑n cɩ 'kʋto ‑aan ‑laagɔɔn bha? ‑Wɔɔ, ka ‑n cɩ ka 'lɛ ‑gluu pla ‑aan 'kuduku.

16Na, ‑ɔ ‑ka anyɩ 'nyukwliinpo na, ‑amʋ ɔ po 'lɛ 'nyukwliin. ‑Ma ‑ɔ ‑ka anyɩ 'kwlaan 'pa na, ‑amʋ ɔ 'pa 'lɛ 'kwlaan. 'Nyɩ ɔ ‑kaan 'kwlaan 'pa na, ɔmɔa ‑ɔ lobhuun 'lɛ na, ɔmɔ ɔ 'pa 'lɛ 'kwlaan.

Gɩlɩnyaa Zozii lobhu 'lɛ na ya cɔlɔ

17Gɩlɩnyaa* ‑gwlɩɩ ‑mɔtaa ɩya 'kʋgba ‑mɔsɔa ya pɔlɛkʋmɛnɔɔn cɔlɔlʋ 'nyɩ 'cla lebhe: «‑Kwlenyɔ, 'wugwi ‑nyinyia 'titio, ɩ nyɩ ‑anyɩ 'klʋ ‑naa 'ŋlɩ nɩkplaan.» 18Zozii ya maa 'cla lebhe: «N ‑jlɛa Sataan*, ɔ wlʋa ‑laagɔɔn 'nyɩ ɔ bhlia 'lɛ, le ‑kosuzadlɛ 'bhisa. 19'Lɩka, n ya anyɩ ‑kwletɛtɩa 'fɩan 'nyɩ le a namʋnʋ tla ɩya ‑laagangbiti 'kʋ, ɩya ‑zɔbhɛlɩgbanyɔa 'la 'tɛtɩa ‑tɛtɛa 'kʋ, 'nyɩ lʋʋ bhlogbɩɩ cɩ 'ta anyɩ mino. 20'Bhlɩmɔɔn, a 'la nʋa 'klʋa 'wugwi ‑nyinyia 'nyɩ 'lɛ anyɩ na, ɩla ‑pɔpʋɛ. ‑Ma a nʋ ‑pɔpʋɛ ‑ofi lebhe ala 'ŋlɩ ‑zieo ‑laagɔɔn.»

Zozii nʋ ‑pɔpʋɛ

(Mat 11.25-27)

21Dɩpɩa bhlogbɩɩ, ‑Kplɔkplɔ ‑Wugoa* ya gba pɔlɛkʋmɛnɔ ya Zozii yeli 'nyɩ ɔ ya 'cla lebhe: «N woo ‑evli, To, ‑laagɔɔn ɩya ‑dʋdʋ 'la ‑Kwlenyɔ, ɩmɩ ‑naa ‑n zizieli 'lɛ wɔɔcibhlilinya ɩya dɩgalɩnya, 'nyɩ ‑n ya 'lɛ gba 'cicuoa ya 'lɛ cibhlili na, ɩla gbʋ. ‑Ghɛɛ, To, sɛɛ ɩ ‑plɔɔ 'lɛ 'tʋ le ɩ kʋ. 22N To yaan ‑tɛtɛa 'fɩan 'nyɩ. Nclɔɔ bhlogbɩɩ 'ta 'Cʋa ‑ci, ɩ ka kʋ le ‑n 'ta Toa na, 'nyɩ nclɔɔ bhlogbɩɩ 'ta Toa ‑ci, ɩ ka kʋ le ‑n 'ta 'Cʋa, ɩya ɔmɔa 'Cʋa ‑wa 'lɛ le ɔ 'ka Toa pala na.»

23Na, Zozii ya ɔla gɩlɩnyaa* 'klʋtla 'nyɩ ɔ ya maa ‑asule 'cla lebhe: «Ɩ kʋ 'nanɩ, 'cia ‑ɩ ‑jlɛ 'lɛ ɩmɩa a ‑jlɛ na! 24Sa, n solu anyɩ le Laagɔnekʋnyɩtɛnya ‑bhutukpa ɩya nyɩbhɛlɩ ‑bhutukpa ya wabha le ma 'kaa ɩmɩa a ‑jlɛ 'lɛ na 'lɩ, ‑ma ma 'tɩɩ 'lɩ, ma 'kaa ɩmɩa a nu 'lɛ na 'nu, ‑ma ma 'tɩɩ 'nu.»

Samaliinyɔa 'la ‑nyandla

(Mat 22.34-40; Mak 12.28-34)

25Na, ‑jlɩmacanyɔ bhlo ya 'kʋbho 'nyɩ ɔ 'ka 'lɛ Zozii 'gbuzu ‑zɔn 'pa na, ɔ yɔɔ neencla lebhe: «Canyɔ, 'lɩsaa n cɩ 'kaa 'lɛ nʋ ɩya n 'kaa 'lɛ jabhʋa ‑ʋ bhɩa 'ta 'lɛ na 'lɩ bha?» 26Zozii yɔɔ 'cla lebhe: «Wɔɔsaa ‑ɩ ‑zieo 'lɛ ‑jlɩmaa nɩkplaan bha? Wɔɔsaa ‑n zɛlɩzɛlɩ 'lɛ 'yɛpɩ bha?» 27Ɔ yɔɔ neenŋonu lebhe: «Wabha ‑Kwlenyɔ ‑naa Laagɔ ‑naa pɔlɛa ‑tɛtɛa nɩkplaan, ‑naa 'wugoa ‑tɛtɛa nɩkplaan, ‑naa 'tɛtɩa nɩkplaan ɩya ‑naa wɔɔgugwiea ‑tɛtɛa nɩkplaan, ɩya ‑n wabha ‑n 'yʋ le ‑mɔɔ 'titi ‑ncɩ 'bhisa.» 28Zozii yɔɔ 'cla lebhe: «‑N ya 'nanɩ nyɩtɛ. Nʋ ɩmɩ ‑naa ɩya ‑n ka jabhʋa nɩkplaan ble.»

29‑Ma ‑jlɩmaacanyɔa ‑waa 'lɛ le ɔ 'kaa wɔɔmɛnɔ 'matɩ na, ɔ ya Zozii neencla lebhe: «'Nyɩ ncaasaa ‑ɔ ‑glɩa 'lɛ n 'yʋa bha?» 30Na, daa ɔ 'bhli 'lɛ sɛɛ 'kʋ na, Zozii yɔɔ ‑nyandlaa bhlo nɩkplaan solulɩɛ bhɔ 'nyɩ ɔ yɔɔ 'cla lebhe: «Nclɔɔ bhlo wlʋa Zolizalɛmʋ 'nyɩ ɔ mʋa 'dua ma la 'lɛ Zelikoo na 'kʋ. Ɔ ya ncaabhlanya sidiin bhlili, ma ya ɔla kalɩkalɩlɩɩa 'fɩan ‑salɩ, ma yɔɔ bhuti, ma ya ɔla zazanaanɔa 'dɛ te 'nyɩ ma ya mʋ. 31Ma 'plɩ 'lɛ 'nyɩ ma mʋ 'lɛ na, ‑teyiyinyɔ bhlo bhlia ‑gugwie ‑naa. Ɔ yɔɔ ‑zɔnvu 'nyɩ ɔ ya 'wlukpa. 32Levii 'la 'lɔkpʋnyɔ bhlo ‑ma ya 'dɛ ŋeni, ɔ yɔɔ 'lɩ 'nyɩ ɔ ya 'wlukpa. 33‑Ma Samaliinyɔ bhlo, ‑ɔ mʋa 'lɛ lowluun na, yɔɔ ‑zɔnvu 'nyɩ ŋaazɩ yɔɔ pla. 34Ɔ yɔɔ cɩ mɛ, ɔ ya 'kpʋ ɩya ‑diinvɛɛn ɔla 'jia neen 'kɔsɔ 'nyɩ ɔ yɩɩ gʋa. Ɔ yɔɔ ɔmɔ 'titi ɔla mlɛa 'kʋ ‑gbɛ, ɔ yɔɔ 'plɩplɩnya 'la pʋpalʋ bhlo ‑zɔn fa 'nyɩ ɔ yɔɔ tɩtɔ nʋ. 35‑Zeli ze 'lɛ na, ɔ ya 'dala 'ma, ɔ yaa ‑palʋa toa 'nyɩnɩ 'nyɩ ɔ yɔɔ 'cla lebhe: 'Lɩɔ 'klʋ ɩya lʋʋ ‑ʋ ‑ka 'dɛ 'kʋ palɩ na, daa n cɩ 'ka 'lɛ cɔlɔ na, ‑amʋ ‑ɔ cɩ kɔɔ 'lɛ mʋ cala. 36Na, ‑n ‑ka wɔlɩ nɩkplaan kope na, maa ‑mɔtaa nɩkplaan, ‑anɔsaa ‑ɔ palaa 'lɛ le ɔ ‑glɩ nclɔɔa ‑ɔ bhlili 'lɛ ncaabhlanyaa sidiin na, ɔ 'yʋ bha?» 37‑Jlɩmaacanyɔa yɔɔ neenŋonu lebhe: «Ɔmɔa ‑ɔ 'lɩɔ 'lɛ ŋaazɩɩn na.» Na, Zozii yɔɔ 'cla lebhe: «Mʋ ɩya ‑mɔɔ ‑ma, nʋmʋ sɛɛ.»

Zozii ya Mata ɩya Malii 'bhisleen mʋ

38Daa Zozii ɩya ɔla gɩlɩnyaa* ‑kʋa 'lɛ ‑gugwie 'kʋ na, ɔ ya 'du bhlo 'kʋ plalɩ 'nyɩ 'ŋlɔ bhlo, ɔ yɔɔ kla, ma lɔɔ Mata. 39Ɔ ‑kaa ɔ mɛnɔ bhlo, ma lɔɔ Malii. Ɔ ya ‑Kwlenyɔa ‑deliin sakʋ 'nyɩ ɔ poa ɔla wɔɔnyɩtʋa 'nyukwliin. 40Mata ‑kaa lobholi ‑bhutukpa. Ɔ ya ci 'nyɩ ɔ ya 'cla lebhe: «‑Kwlenyɔ, n mɛnɔ yaan 'lɛ lobholia teli na, 'ɩ nʋ 'tɔɔ lʋʋ bha? 'Maa 'clɔɔ le, ɔ ci, ɔ 'kaan klalɩ.» 41‑Kwlenyɔa yɔɔ neenŋonu lebhe: «Mata, Mata, ‑n ple pɔlɛ 'nyɩ ‑n gleli ‑ncɩ ‑lɩɩ ‑bhutukpa 'la nyɔmʋ. 42‑Ma bhlogbɩɩ ‑tɛɛ ‑ʋ kalɩ 'lɛ gbʋ. Malii sla 'lɛ ‑dɩnanaa de 'nyɩ 'ma cɩ 'tɔɔ mɩ ‑salɩ.»

Currently Selected:

Luk 10: NTLD13

Highlight

Copy