Zan 15

A mɛɛn cɩ

1«‑Amʋ ‑glɩ 'lɛ ‑ghlɛzɛɛnbhlukpoa 'titi 'nyɩ n To ‑glɩ 'lɛ 'kwlaatoa. 2'Labhʋa ‑tɛtɛa ‑ʋ mɛɛn 'lɛ cɩ 'nyɩ ‑ʋ tlʋ 'ta 'lɛ 'ca na, ka ɔ dɩʋ 'lɛ. ‑Ma 'labhʋa ‑tɛtɛa ‑ʋ tlʋ 'lɛ 'ca na, ka ɔ kpɔtʋʋ 'lɛ le ʋ 'ka ‑kplɔ ɩya ʋ 'ka ‑awlɛ ‑gbɔɔn tlʋ. 3Na, wɔɔnyɩtʋa n solu 'lɛ anyɩ na, ʋ ya anyɩ tooto ‑kplɔ. 4A mɛɛn cɩ ɩya n 'ka anyɩ cɩ mɛ! 'Labhʋa ‑ʋ 'ta 'lɛ 'bhlukpoa cɩ ‑mɛɛ na, ʋ tlʋ 'ta 'ca. 'Sɛtɛɛ bhlogbɩɩ, anyɩ ‑ma a 'taan cɩ ‑mɛɛ na, a cɩ 'ta mino ɩya a 'ka 'ca tlʋ.

5‑Amʋ ‑glɩ 'lɛ ‑ghlɛzɛɛnbhlukpoa, 'nyɩ a ‑glɩ 'lɛ 'labhɩa. Na, ɔmɔa ‑ɔ mɛɛn 'lɛ cɩ 'nyɩ n ‑mɛɛ 'lɛ cɩ na, 'dɛ ‑naanɔa cɩ 'ka 'ca ‑bhutukpa tlʋ, ‑ma a 'taan wlɩɩn ‑ka na, 'a cɩ 'ta lʋʋ bhlogbɩɩ nʋlɩɛ mino. 6Ɩ ‑ka ‑kʋ lebhe nclɔɔ 'taan cɩ ‑mɛɛ na, ka ma pɔɔ 'lɛ ‑jlukuun, 'labhʋa ma 'dɩ 'lɛ, 'nyɩ ‑ʋ yɛ 'lɛ na 'bhisa. 'Labhɩ ‑sʋsʋɔa, ka ma bhlii 'lɛ 'kʋ, ma pɩɩ 'lɛ ‑kosuun 'nyɩ ɩ si 'lɛ. 7Ɩ ‑ka 'kʋ lebhe a 'kaan cɩ ‑mɛɛ 'nyɩ 'na wɔɔnyɩtʋa ‑ka anyɩ nɩkplaan ‑kʋ na, a 'clalɩ ɩmɩa a ‑wa 'lɛ na, ‑ma a cɩɩ 'lɩ. 8A ‑ka 'ca ‑bhutukpa tlʋ 'nyɩ a ‑ka 'na gɩlɩnya* ‑glɩ na, ɩ ‑glɩ n To 'la 'klʋagba.

9Saa Toa ‑waan 'lɛ na, 'sɛtɛɛ amʋ ‑ma n ‑wa anyɩ. Na, a kʋ 'na ‑walʋa nɩkplaan. 10A ka 'na ‑jlɩmaa 'kʋplɩlɩ na, a cɩ 'ka 'na ‑walʋa nɩkplaan kʋ, saa n 'plɩlɩ 'lɛ n To 'la ‑jlɩmaa 'kʋ 'nyɩ n ‑kʋ 'lɛ ɔla ‑wawʋa nɩkplaan na. 11Ka n solu 'lɛ anyɩ wɔlɩ ‑naa ɩya 'na pɔlɛkʋmɛnɔa 'ka anyɩ nɩkplaan kʋ ɩya ala pɔlɛkʋmɛnɔa 'ka 'kʋglalɩ. 12'Lɩka 'na ‑jlɩmaa: A wabhawabhalɩ le saa n wabha 'lɛ anyɩ na. 13‑Walʋ bhlogbɩɩ 'ta 'ghli ɩya ʋ 'ka ʋmʋa ‑ʋ gba 'lɛ 'nyɩ nclɔɔ ŋonu 'lɛ le ɔ cɩ maa ɔ ‑wa 'lɛ na 'la gbʋ 'ku na, 'kʋzi. 14A ‑ka ɩmɩa n 'clalɩ 'lɛ anyɩ na nʋ na, 'dɛndlana a ‑glɩ n 'nagwɩɛcɩ. 15N la 'tanɩ anyɩ lobhocuo, sa lobhoco 'ta ɩmɩa ɔ toa nʋ 'lɛ naa ‑ci. N 'nagwɩɛcɩ n lanɩ 'lɛ anyɩ, sa ɩmɩa ‑tɛtɛa n 'nunu 'lɛ Toa neen na, n nyɩɩ anyɩ solu.

16‑N 'ta anyɩ ‑ɔ 'taan 'lɛ desla, ‑ma ‑amʋ ‑ɔ sla 'lɛ anyɩ de 'nyɩ n ya 'lɛ anyɩ zʋ le a 'ka mʋ, a 'ka 'ca tlʋ ɩya ala 'caa 'ka kʋ. Na, tɛtɛa 'fɩan a cɩ 'ka 'lɛ Toa 'clalɩ 'na 'ŋlɩa nɩklplaan na, ɔ cɩ 'kɩɩ anyɩ 'nyɩ. 17‑Ma ɩmɩa n 'clalɩ 'lɛ anyɩ na, ɩmɩ ‑glɩ 'lɛ lebhe a wabhawabhalɩ.

‑Laagɔzɔan ‑zɔɔ Zozii 'la gɩlɩnyaa

18Gbazɩ ‑laagɔzɔan ‑ka anyɩ ‑zɔ na, a cibhlili sɛɛ lebhe ‑amʋ ɩ zɔbhɛlɩlɩ 'lɛ ‑bɛɛ. 19Ɩ ‑ka ‑kʋ lebhe a ‑kaa ‑laagɔzɔan 'nʋa ‑glɩ na, ‑laagɔzɔan cɩ 'kaa lʋʋa ‑ʋ ‑glɩ 'lɛ ʋ 'nʋ na wabha. ‑Ma a 'ta ‑laagɔzɔan 'nʋa ‑glɩ. Ka n sla 'lɛ anyɩ de lebhe a 'la 'kanɩ ‑laagɔzɔan 'nʋa 'plɩ. 'Lɩka wɔlɩa 'la gbʋa ‑laagɔzɔan ‑zɔ 'lɛ anyɩ na. 20A luoli wɔlɩa n solua 'lɛ anyɩ na. Lobhoco 'ta ɔ to 'kʋzi. Na, ma yaan 'lɛ gbaylɩ ‑sa na, anyɩ ‑ma sɛɛ ma cɩ 'ka anyɩ gbaylɩ ‑sa. ‑Ma ɩ ‑kaa ‑kʋ lebhe ma ya 'na niwɔlɩa 'kʋplɩlɩ na, anyɩ ‑ma ma cɩ anɩa 'kʋ 'plɩlɩmʋ. 21‑Ma 'na 'ŋlɩa 'la gbʋ, ma cɩ 'ka 'lɛ anyɩ ɩmɩ ‑naa 'fɩan cɩ nʋ, ‑ofi lebhe ma 'ta ɔmɔa ‑ɔ lobhuun 'lɛ na ‑ci. 22Ɩ ‑kaa ‑kʋ lebhe n 'taa ci 'nyɩ n 'taa maa solu na, mala nyinyia 'la ‑tobhua cɩ 'ta maa 'wlu ‑gbɛ, ‑ma ‑pɔtɔnʋ, ma 'tanɩ 'wluslalɩɛ ‑ka. 23Ɔmɔa ‑ɔ ‑zɔɔn 'lɛ na, n To ɔ ‑zɔ 'lɛ. 24Ɩ ‑kaa ‑kʋ lebhe n 'taa lobholi ‑naa ‑buun nclɔɔ 'ta ka ‑azla 'lɛ nʋ, maa sidiin nʋnʋ na, mala nyinyia 'la ‑tobhua cɩ 'taa maa 'wlu ‑gbɛ. ‑Ma ‑pɔtɔnʋ, ma yanɩɩ 'ciinlɩ, ‑ma ma ‑zɔ ka ‑azla n ‑ya n To. 25‑Ma ka ɩ 'plɩ 'lɛ sɛɛ ɩya wɔlɩa ‑ɩ ‑zieo 'lɛ mala ‑jlɩmaa 'la ‑afluwaa nɩkplaan lebhe: Ma yaan 'kpɔkpɔsa zɔbhɛlɩ na, 'ka 'kʋglalɩ.

26Daa 'kʋcinyɔa, n cɩ 'ka 'lɛ anyɩ tlɛlɩ na, cɩ 'ka 'lɛ ci na, ‑nʋawlɛ ‑Wugoa ‑ʋ 'wlʋlʋ 'lɛ Toa cɩ na, ʋ cɩ 'ka 'na ‑danʋfʋɛ li 27ɩya anyɩ ‑ma sɛɛ, bhɔdaa tooto, a ‑kʋa ‑amʋa cɩ na, a 'ka 'na ‑danʋfʋɛ li.»

Currently Selected:

Zan 15: NTLD13

Highlight

Copy