Lobh 3

Bhubhubhubhunyɔ bhlo ya jabha

1Clɩɩ bhlo, Pɩɛlɩ ɩya Zaan mʋa Laagɔpaakadiea* ‑zɔn, 'plɩplɩylʋʋn 'la 'ŋwacɩ ‑mɔta 'la bhibhielia 'la gbʋ. 2Nclɔɔ bhlo, ma ya 'lɛ bhubhubhubhunyɔ cɩ valɩ na, ‑kʋa Laagɔpaakadiea 'la gbinea ma la 'lɛ gbini 'nanaa na ne 'kʋ sa. Clɩɩa 'fɩan, ka ma lamʋa 'mɔɔ 'lɛ 'nyɩ maa zʋa 'mɔɔ 'lɛ 'dɛ sa le ɔ 'ka maa ‑ɔ blea 'lɛ Laagɔpaakadiea ‑zɔn na 'dala ‑zla. 3Ɔ ya Pɩɛlɩ ɩya Zaan 'lɩ, ma mʋa Laagɔpaakadiea ‑zɔn blekan na, 'nyɩ ɔ ya maa 'dala ‑zla. 4Na, Pɩɛlɩ yɔɔ 'ciinkope 'cɩɩ, ɩya Zaan ‑masɛɛ, 'nyɩ Pɩɛlɩ yɔɔ 'cla lebhe: «Kope ‑anyɩ 'ciin!» 5'Nyɩ nclɔɔa kopea maa 'ciin, ɔ gugua lebhe ɔ cɩ 'kaa maa lʋʋ wlɩɩn 'lɩlɩ. 6Pɩɛlɩ yɔɔ 'cla lebhe: «N 'ta ‑asɩkɛ ‑ka, n 'ta 'dala ‑ka. ‑Ma lʋʋa n ‑ka 'lɛ na, n nyɩɔ mʋ. Nazalɛtɩnyɔ Zozi Klisi 'la 'ŋlɩa nɩkplaan, ‑bhokʋ ɩya ‑n namʋ!» 7Ɔ ya ɔla 'lipasɔ sɔa 'kʋbhli 'nyɩ ɔ yɔɔ 'kʋbho. Dɩpɩa bhlogbɩɩ, nclɔɔa 'la kplia ɩya ɔla ‑kʋkɔfʋa ya kla. 8Ɔ ya ɔcɩɩn 'sʋ, ɔ ya 'nylugo 'nyɩ ɔ ya 'namʋ bhɔ. Ɔ namʋa, ɔ -bluublulua 'kʋ, ɔ woa Laagɔ ‑evli, 'nyɩ ɔya maasɔ ya 'lɛ Laagɔpaakadiea ‑zɔn ble. 9Ncɛlɩa 'fɩan yɔɔ 'lɩ, ɔ namʋa 'nyɩ ɔ woa Laagɔ ‑evli. 10Ma cibhlilia 'mɔɔ. Ɔmɔ ‑kʋa 'lɛ Laagɔpaakadiea 'la gbinea ma la 'lɛ gbini 'nanaa na ne 'kʋ sa 'nyɩ ‑ɔ zlaa 'lɛ. Na, nikpoo ya ncɛlɩa sla ‑gbɔɔn 'nyɩ neen ya maa yɛ, wɔlɩa ‑ɩ 'plɩlɩa 'lɛ nclɔɔ ‑naa 'kʋ na, ɩla gbʋ.

Pɩɛlɩ solu ‑alawleea

11Nclɔɔa ‑salɩ 'tanɩa Pɩɛlɩ ɩya Zaan ‑vakɩ. Na, ncɛlɩa 'fɩan ya maa cɩ 'wluwlalɩ, gbinea ma la 'lɛ Salomɔɔn 'la gbinea na cɩ, 'nyɩ neen ya maa yɛ. 12Daa Pɩɛlɩ 'lɩ 'lɛ le ncɛlɩ ‑didio maa na, ɔ ya maa 'cla lebhe: «Izlayɛlɩnyanyɩ*, 'lɩsaa 'la gbʋ ɩmɩa ‑ɩ plɩ 'lɛ na, ɩ slaa 'lɛ anyɩ nikpoo bha? 'Lɩsaa 'la gbʋ a kopea 'lɛ ‑sa ‑anyɩ 'ciin le saa ‑anyɩ 'titi ‑ala 'wluun 'la 'tɛtɩ ɩya ala ‑laagɔgɩlɩlɩɛa -ɩ gba 'lɛ 'nyɩ nclɔɔ -naa ya 'lɛ namʋ na. 13Ablaamʋ, Izakɩ ɩya Zakɔpʋ 'la Laagɔa, ‑a tokadɔcɩ 'la Laagɔa, ɔmɔ ‑ɔ ‑gba 'lɛ ɔla lobhoco Zozii 'klʋ, a ‑sa 'lɛ 'nyɩ a ‑blɔ 'lɛ Pilatɩ ‑deliin na, ɔmɔ ‑naa ‑ɔ 'matɩa 'lɛ le ‑ɔ kaa 'mɔɔ 'cintalɩ ‑ma na. 14A ya ‑kplɔkplɔnyɔa ɩya 'kʋnylugolunyɔa ‑blɔ 'nyɩ a ya 'lɛ ncaabhlanyɔ 'la ŋaazɩɩnlɩlɩɛ 'clalɩ. 15Na, jabhʋa toa a gba 'lɛ 'nyɩ ma 'bhla 'lɛ na, Laagɔ yɔɔ 'kua sidiin ‑sa. ‑A ‑lio ɩla ‑danʋfʋɛ. 16Ɔla 'ŋlɩa 'la pɔɔtɛtɛa ‑a ‑ka 'lɛ na, ɩmɩ ‑ɩ zʋ 'lɛ nclɔɔ ‑naa a ‑jlɛ 'lɛ ‑da 'nyɩ a -ci 'lɛ na 'tɛtɩɩn. Pɔɔtɛtɛa ‑a -zʋɔ 'lɛ 'kʋ na, ɛmɛ -ɛ gba 'lɛ 'nyɩ anyɩa 'fɩan 'ci 'kʋ, ɔ ya 'lɛ jabha.

17'Bhlɩmɔɔn, bholiecɩnyɩ, n ‑ci sɛɛ lebhe ka a 'taa 'lɛ ‑ci dɛ a ya 'lɛ ɩmɩa a nʋ 'lɛ na nʋ, a tocɩa 'bhisa. 18‑Ma Laagɔ yaa tooto ɔla nekʋnyɩtɛnyaa* neen nyɩtɛlɩ lebhe 'kwlɩ cɩ 'kaa ɔla ‑Sasanyɔa* bhɩa, ɩmɩ ɔ ‑glalɩ 'lɛ 'kʋ. 19Na, a calakwla ɩya a ‑tla Laagɔ 'klʋ ɩya ɔ 'ka anyɩ ala nyinyia cɩ ‑sa. 20‑Sa a cɩ 'ka 'lɛ nyɔkwɛa ‑Kwlenyɔa 'nyɩ 'lɛ na 'lɩ, daa ɔ cɩ 'ka 'lɛ Zozii, ɔla ‑Sasanyɔa ɔ ‑sa 'lɛ 'nyɩ ɔ 'nyɩ 'lɛ anyɩ na lobhu na. 21‑Ma ɔ cɩ 'ka ka ‑laagɔɔn ‑kʋ ‑aan ɩya wɔlɩa Laagɔ nyɩtɛlɩa 'lɛ ‑godogodoa ɔla ‑kplɔkplɔ nekʋnyɩtɛnyaa neen lebhe lɩɩa 'fɩan cɩ 'ka ɩla tooto saa 'plɩ na, ɩla clɩɩa 'ka ŋeni. 22‑Masa, Moyizi ya 'cla lebhe: ‑Kwlenyɔ, ala Laagɔ cɩ 'ka ‑amʋ 'bhisa 'kʋ 'la Laagɔnekʋnyɩtɛnyɔ* a bholiecɩa sidiin ‑sa ɩya ɔ 'ka anyɩ 'nyɩ. A po ɩmɩa 'fɩan ɔ cɩ 'ka 'lɛ anyɩ solu na 'nyukwliin. 23'Nyɩ ncaatʋtʋʋntʋa ‑ɔ cɩ 'ta 'lɛ Laagɔnekʋnyɩtɛnyɔ ‑naa 'nyukwliinpo na, ɔ cɩ 'lɔlʋa sidiin mlɔnʋ. 24Na, Laagɔnekʋnyɩtɛnyaa 'fɩan, ‑ɩ bhɔlʋ 'lɛ Samɩɛlɩ 'kʋ ‑aan 'nyɩ ‑ɩ ŋeni ɔla 'jeenkʋnyaa 'kʋ na, maa ‑masɛ, ma ya wɔlɩa ‑ɩ plɩ 'lɛ ‑yaka na nyɩtɛ. 25Anyɩ ‑ɔ ‑glɩ 'lɛ Laagɔnekʋnyɩtɛnyaa 'la ‑ajaalinya, anyɩ ‑ɔ -cɩ ka 'lɛ mɛnʋa 'la ‑ndanyɩa ‑aja 'kʋ lili. ‑Mɛnʋ ‑naa Laagɔ ‑ya a tokadɔcɩ li 'lɛ, daa ɔ 'cla 'lɛ Ablaamʋ lebhe: ‑Naa valɩnɩkplaa nɩkplaan, ‑dʋdʋa 'kʋ 'la 'lɔlɩa 'fɩan cɩ 'ka 'lɛ 'nyupalɩɛ 'lɩlɩ na.

26Ala gbʋ Laagɔ ‑sa 'lɛ ɔla lobhocoa 'nyɩ ɔ yɔɔ 'lɛ anyɩ 'bhlɩ ‑bɛɛ lobhulu, le ɔ 'ka anyɩ 'nyupalɩ ɩya ɔ 'ka gba nclɔɔ nclɔɔ 'ka ɔla wɔɔnyinyia kɔkʋʋn ‑tla.»

Currently Selected:

Lobh 3: NTLD13

Highlight

Copy