Lobh 14

Pɔlʋ ɩya Banabasɩ ‑kʋ Ikoniɔmʋdua 'kʋ

1Wɔlɩa bhlogbɩɩ ‑ɩ 'plɩ ‑awlɛ 'lɛ Ikonɩɔmʋdua 'kʋ. Pɔlʋ ɩya Banabasɩ ya Zifʋnyaa* 'la bhibhiepalʋa* ‑zɔn ble, 'nyɩ saa 'titia ma nyɩtɛa 'lɛ na, ɩ ya gba na Zifʋnya ɩya maa ‑ɔ 'ta 'lɛ Zifʋnya ‑glɩ na, ‑bhutukpa ya mala pɔɔtɛtɛa Zozii 'kʋ zʋ. 2‑Ma Zifʋnyaa ‑anʋa ‑ɔ 'ta 'lɛ ŋonu le ‑ɔ ka mala pɔɔtɛtɛa Zozii 'kʋ zʋ na, ma ya maa ‑ɔ 'ta 'lɛ Zifʋnya ‑glɩ na gbɩ zʋ le ma mʋnʋ Zozii 'la gɩlɩnyaa* gbatlɩ. 3'Bhlɩmɔɔn, Pɔlʋ ɩya Banabasɩ ya Ikoniɔmʋdua nɩkplaan ‑gwlɛlɩ. Ma 'tɛlɩa ‑Kwlenyɔa ‑deli 'kʋ, 'nyɩ ma ‑saa 'lɛ 'yɛpɩ 'la ncɛlɩa ɔla dananɔa 'la 'dɩa. ‑Kwlenyɔa gbaa 'nyɩ ma nʋa 'ciinzizielɩlobholi ɩya nikpooslalsawɔlɩ le ɔ 'kaa pala lebhe mala niwɔlɩ ‑glɩ ‑nʋawlɛ. 4'Dua 'kʋ 'la ncɛlɩa yaan do. ‑Anʋa ‑ya Zifʋnyaa ‑plɔa 'nyɩ ‑da -naanʋaa ya lobhulobhunyaa ‑plɔa 'lɛ. 5Na, Zifʋnyaa ɩya maa ‑ɔ 'ta 'lɛ Zifʋnya ‑glɩ na, maya ma tocɩa ya zʋ le ma 'ka Pɔlʋ ɩya Banabasɩ gbatlɩmʋnʋ ɩya ma 'ka maa cɔkʋʋn bhutili. 6‑Ma, ma ya sɛɛ cibhlili 'nyɩ ma ya 'gu, ma ya Likaoniibhlɩa 'kʋ mʋ, 'dia ‑ɩ ‑glɩ 'lɛ Lisli, Dɛlɩbee ɩya ɩla cɩa 'dia kʋ, 7'nyɩ 'yɛpɩ ‑masɛ, ma saa Dɩnanɩa*.

Bhubhubhubhunyɔ bhlo ya Lislidua 'kʋ jabha

8Nclɔɔ bhlo ‑kʋa Lislidua 'kʋ, 'ɔ mino 'taa ɩya ɔ 'kaa ɔla bhɩa 'kʋ 'nylugo. Ka ma valɩɔ 'lɛ bhubhubhubhunyɔ cɩ 'nyɩ ɔ 'ta 'ka ‑azla namʋ. 9Clɩɩ bhlo, Pɔlʋ nyɩtɛa 'nyɩ nclɔɔ ‑naa ‑poa 'mɔɔ 'nyukwliin. Pɔlʋ 'la 'cia yɔɔ 'kʋ bhlili, ɔ yɔɔ 'ciinkope 'cɩɩ 'nyɩ ɔ ya 'lɩ lebhe ɔ ‑kaa pɔɔtɛtɛ lebhe ɔ cɩa jabha. 10Na, ɔ ya nɩkplaan ‑gaa 'nyɩ ɔ yɔɔ 'cla lebhe: «‑Bho 'kʋ ɩya n 'nylugo ‑naa bhɩa 'kʋ!» Nclɔɔa ya ɔcɩɩn 'sʋ, ɔ ya 'nylugo 'nyɩ ɔ ya 'namʋ zʋ. 11‑Alawleea 'lɩ 'lɛ ɩmɩa Pɔlʋ wlʋa 'lɛ nʋda na, 'kasɛ ya talo 'nyɩ ncɛlɩa claa likaoniiwɔlɩɩn lebhe: «‑Zliia ya ncɛlɩ kaci 'nyɩ ɩya ‑anyɩ sidiin kwli!» 12Banabasɩ ma laa 'lɛ Zewusu#14.12 Zewusu ‑glɩ Glɛkɩnyaa ’la ‑zlee ’kadie. 'nyɩ ma laa 'lɛ Pɔlʋ Elɩmɛsɩ, ‑ofi lebhe ɔmɔ ‑glɩa 'lɛ mala nekʋnyɩtɛnyɔ. 13Zewusu 'la gʋgwlapalʋa ‑kʋa 'dua 'la bledaa. Na, ɔla ‑teyiyinyɔa ya -bhliiŋodiea gʋgwlapalʋa 'la gbinea ne 'kʋ fa, ma -palɩa 'mɩɩ 'flawasɩ ‑blɩɩn. Ɔ ya ‑alawleea ya bhlo 'plɩ 'nyɩ ɔ ya wabha lebhe ma 'kɩɩ 'bhla ɩya ma 'ka Pɔlʋ ɩya Banabasɩ gʋglwa. 14Daa lobhulobhunyaa* ‑ɔ ‑glɩ 'lɛ Pɔlʋ ɩya Banabasɩ 'nu 'lɛ wɔlɩ ‑naa na, ma ya mala lokua macɩ cɩ 'ŋatɩlɩ, ma ya sɔmɩ fa, ma ya ‑alawleea 'bɩɩnmʋnʋ, ma yaan ‑gaa 'nyɩ ma ya 'cla lebhe: 15«‑A 'nagwɩɛcɩnyɩ, 'lɩsaa a nʋa 'lɛ ‑sa bha? Ncɛlɩ ‑a ‑glɩ 'lɛ anyɩ 'bhisa. Ka ‑a sa 'lɛ anyɩ Dɩnanɩa* le a 'ka ‑sa 'la yooyo gbɩ ‑naa bɩ 'kʋ 'wlʋ ɩya a 'ka ‑Jajalaagɔa 'klʋtla. Ɔmɔ ‑ɔ nʋ 'lɛ ‑laagɔɔn, ɩya lɩɩa ‑tɛtɛa ‑ɩ ‑kʋ 'lɛ 'yɛpɩ na, ‑dʋdʋa, ɩya lɩɩa ‑tɛtɛa ‑ɩ ‑kʋʋ 'lɛ 'kʋ na, ge, ɩya lɩɩa ‑tɛtɛa ‑ɩ ‑kʋɛ 'lɛ nɩkplaan na. 16‑Godogodoa, ɔ yaa 'bhlɩ 'bhlɩ 'kʋ 'la ncɛlɩ ne te le ma bhli mala 'wluun 'la ‑gugo. 17'Bhlɩmɔɔn, ɔ 'ta maa ɔla 'nanɩa nɩkplaan ‑yla. ‑Masa ɔ la anyɩ bhlabhlanyu 'nyɩ ala gologololɩɩa tlʋ 'lɛ, ɔ nyɩ anyɩ nyɩ 'nyɩ pɔlɛkʋmɛnɔ yeli 'lɛ ala pɔlɩa.» 18‑Ma wɔɔnyɩtʋ ‑naa 'ka 'lɛ ‑alawleea pɔlɛɛn bhlili ɩya ma 'la 'ka 'lɛ maa ‑teyiyimlaa va na, ɩ ya 'tɛbhalɩ.

19Daa wɔlɩ ‑naa 'plɩ 'lɛ na, Zifʋnya* ‑anʋa ya Antɩɔsʋ ɩya Ikonɩɔmʋ 'wlʋlʋ, ma ya ‑alawleea gbɩzʋ, 'nyɩ aya maasɔ ya ‑plɔ. Ma ya Pɔlʋ cɔkʋʋn bhutili, ma ya gugu lebhe ɔ ya 'ku, 'nyɩ ma yɔɔ jli, ma yɔɔ 'dua 'la glɔa leen 'pa. 20Na, gɩlɩnyaa* ya ci 'nyɩ ma yɔɔ cɩ 'wluwlalɩ. Ɔ ya 'kʋbho 'nyɩ ɔ ya 'dua nɩkplaan cɔlɔ. Daa ‑zeli ze 'lɛ na, ɔya Banabasɩ ya 'plɩ 'nyɩ ma ya Dɛlɩbee mʋ.

Pɔlʋ ɩya Banabasɩ ya Antɩɔsʋ cɔlɔ

21Daa ma bhɩalɩ 'lɛ duu ‑naa nɩkplaan, Dɩnanɩa* ‑salɩɛ, 'nyɩ ma gba 'lɛ 'nyɩ 'yɛpɩ 'la ncaabhutukpa 'plɩ 'lɛ gɩlɩnya* na, ma ya ‑awlɛ Lisli, Ikonɩɔmʋ ɩya Antɩɔsʋ 'plɩlɩ. 22Ma ya 'yɛpɩ 'la gɩlɩnyaa 'tɛtɩɩn zʋ le ma kalɩ Zozii 'la pɔɔtɛtɛ clɩɩa 'fɩan. Ma claa maa lebhe: «Ɩ ‑fata lebhe 'kwlɩ bhɩa ‑anyɩ ‑bhutukpa 'fɩɔn, ɩya ‑a ka Laagɔ 'la Nyɩbhɛlɩdua* nɩkplaan ble.»

23Na, ‑laagɔnɩkplaa sidiin, ma ya ncaakpasɩ desla, ma ya bhibhie, ma ya ‑zelizlo 'nyɩ ma ya maa ‑Kwlenyɔa, ma ‑zʋɔ 'lɛ mala pɔɔtɛtɛa 'kʋ na, wlɩɩn zʋ. 24Na, ma ya 'yɛpɩ 'wlʋ, ma ya Pisidiibhlɩa 'kʋ 'dɩlɩ 'nyɩ ma ya Panfiliibhlɩ 'kʋ mʋ. 25Ma ya Pɛzɩdua nɩkplaan Dɩnanɩa ‑sa 'nyɩ ɩla leen, ma ya Ataliidua 'kʋ kwli. 26Ma ya dɩpɩa 'nyi 'kʋtaan 'plɩlɩ 'nyɩ ma ya Antɩɔsʋ mʋ, gbazɩa ma zʋlʋa 'lɛ maa Laagɔ wlɩɩn, lobholia ma nʋa 'lɛ na 'la gbʋ na.

27Daa ma ŋeni 'lɛ na, ma ya ‑laagɔnɩkplaa 'wluwlalɩ. Ma yaa ɩmɩa ‑tɛtɛa Laagɔ 'plɩlɩ 'lɛ maa 'kʋ, 'nyɩ ɔ ‑glalɩ 'lɛ 'kʋ na, ɩya saa ɔ kalɩkalɩlɩ 'lɛ maa ‑ɔ 'ta 'lɛ Zifʋnyaa* ‑glɩ na pɔɔtɛtɛ 'la gbinea na, 'dɩkʋsalɩ. 28Na, Pɔlʋ ɩya Banabasɩ ya clɩɩ ‑bhutukpa gɩlɩnyaa cɩ li.

Currently Selected:

Lobh 14: NTLD13

Highlight

Copy