2 Tim 2

‑Naa 'gulua 'kwlɩbhɩɛ

1Na ‑mɔ, 'na 'cʋ, Zozi Klisi 'la ‑wawʋa nɩkplaan, 'maa zʋ 'tɛtɩ. 2Ɩmɩa n cɔɔ 'lɛ, 'nyɩ ncaabhutukpa li 'lɛ ɩla ‑danʋfʋɛ na, cɩɩ ncɛlɩa ma cɩ 'lɛ ‑delikʋtɛbhalɩ 'nyɩ maa 'titi ‑ma cɩɩ 'lɛ ‑buun ncɛlɩ calɩɛ mino na.

3Ŋonu ɩya ‑mɔɔ ‑ma 'kwlɩ bhɩamʋɔ, Zozi Klisi 'la 'sojanyɔ 'titi 'bhisa. 4Sa, nclɔɔ ‑ylɛylɛ mʋ 'ta 'soja 'kʋ ɩya ɔ 'ka ‑awlɛ maa ‑ɔ 'ta 'lɛ 'sojanya ‑glɩ na 'la wɔlɩ 'ciinkope, ɩ ‑ka ‑kʋ le ɔ ‑wa le ɔ 'ka ɔmɔa ‑ɔ lɔɔ 'lɛ na 'tʋpla na. 5'Sɛtɛɛ bhlogbɩɩ, sɔmɩfanyɔ 'ka 'lɛ ‑ajaakpaa 'lɩ na, ɩ ‑fata lebhe ɔ 'plɩlɩ sɔmɩfalɩɛa 'la ‑jlɩmaa 'kʋ. 6‑Awlɛ, 'kɔɔgolonyɔa ‑ɔ sɛ 'lɛ na, ɔmɔ -ɔ lili 'lɛ gologololɩɩa 'la 'caa ‑bɛɛ. 7Na, 'ma 'nu wɔlɩa n bhli 'lɛ 'kʋ na. 'Nyɩ ‑Kwlenyɔ cɩ 'ka gba ɩya ‑n ka 'ɩ ‑tɛtɛa 'la ‑zɔn 'nu.

8'Maa 'pa Zozi Klisi pɔlɛ. Ɔ ya 'kwɩɩnkʋbho. Saa Dɩnanɩa* n plici 'lɛ na, ɩ bhli 'lɛ 'kʋ na, ɔ 'wlʋlʋ Daviti 'la 'lɔlʋa nɩkplaan. 9‑N ‑ci sɛɛ lebhe Dɩnanɩ ‑naa 'la gbʋ n sɛ 'lɛ, 'nyɩ n ‑kʋ 'lɛ ‑abhluakɩɩn, le saa ‑abhɔlɛnyɔ ‑kʋ 'lɛ na. ‑Ma Laagɔ 'la wɔɔnyɩtʋa 'ta ‑abhluakɩɩn ‑kʋ. 10Dɛ n kla 'lɛ pɔlɛ 'kwlɩbhɩaa ‑tɛtɛa sidiin, Laagɔ 'la deslaslanyaa 'la gbʋ, ɩya maa ‑ma, ma 'ka gbʋʋnsalɩɛa ‑ɩ 'wlʋlʋ 'lɛ Zozi Klisi nɩkplaan na ɩya 'klʋagbaa ‑a ‑kʋ 'lɛ 'lʋkʋlʋkʋ ɩya 'lʋkʋlʋkʋ na 'lɩ. 11'Nyɩ ɩ ‑ŋwa 'kʋ lebhe ma 'tɛbhalɩ wɔɔnyɩtʋ ‑naa ‑deli 'kʋ.

«‑A ‑yɔɔsɔ ‑ka 'ku na,

‑a ‑yɔɔsɔ cɩ 'ka jabha.

12‑A ‑yɔɔsɔ ‑ka sɛ na,

‑a ‑yɔɔsɔ cɩ 'ka ‑kwle.

‑Ma ‑a ‑kɔɔ ‑blɔ na,

ɔmɔ ‑ma, ɔ cɩ 'ka ‑anyɩ ‑blɔ.

13'Nyɩ ‑anyɩ, ‑a 'ta ɔla pɔɔtɛtɛ ‑ka na,

ɔmɔ, ɔya ‑delikʋtɛlɔ ‑ŋwa 'kʋ,

sa ɔ cɩ 'ta ɔmɔ 'titi ɔcɩ ‑blɔlɩɛ mino na.»

‑Salɩ Dɩnanɩa ‑nʋawlɛɛn

14Na, ɩmɩ ‑naa ‑tɛtɛa, luolii ncɛlɩ ɩya ‑n solu maa Laagɔ 'la 'ŋlɩa nɩkplaan, le ma 'la 'tɩtɔa wɔlɩ. Sa wɔɔtɩtʋɛ ‑lalɩ 'ta nclɔɔ lʋʋ ‑ylɛylɛ, ‑ma ka ɩ gba 'lɛ 'nyɩ maa ‑ɔ pui 'lɛ 'nyukwliin na, mlɔ 'lɛ. 15'Maa 'sɩslɩlɩ, ɩya Laagɔ 'ci 'kʋ, ‑n 'plɩ nclɔɔa ‑ɔ ya 'lɛ ɩmɩa ma 'matɩlɩɔ 'lɛ wlɩɩn na nʋ, lobholinʋnyɔa, ‑zo cɩ 'ta 'lɛ pla, ‑ofi lebhe ɔ calɩ ‑nʋawlɛɛwɔɔnyɩtʋa 'ciingɩlɩɛ nɩkplaan na. 16‑Ma ‑ʋ ‑glɩ 'lɛ yooyo -dlɛdlʋa na, 'maa tlʋbhalɩʋ cɩ da, sa ka dlɛdlʋdlɛnyaa tlʋbhalɩ 'lɛ Laagɔ cɩ da 'nyɩ ma mʋmʋnʋ 'lɛ 'kʋ. 17Ka mala cacawɔlɩa ‑kʋ 'lɛ le goonjea ‑a nylanylanɩ 'lɛ 'kʋ na 'bhisa. 'Sɛ 'la ncɛlɩ Imenee ɩya Filɛtɩ ‑glɩ 'lɛ. 18Ma nabhe 'kwɩɩnkʋbhodaa ya tooto 'plɩ. 'Lɩka saa ma tlʋbhalɩ 'lɛ ‑nʋawlɛa cɩ da, 'nyɩ ma gba 'lɛ ncɛlɩa ‑anʋa 'la pɔɔtɛtɛa bhli 'lɛ na. 19‑Ma 'bhlɩmɔɔn, ‑gbidia Laagɔ zʋ 'lɛ ‑gluu na, 'nylugo kpaan. 'Lɩka wɔɔnyɩtʋa 'kʋa ɩ 'slalɩ 'lɛ na. ‑Kwlenyɔ ‑ci ɔ 'nʋa, 'nyɩ ncaatʋtʋʋntʋa ‑ɔ sla 'lɛ ‑Kwlenyɔ 'ŋlɩ na, 'naa ɔ tlʋbhalɩ nyinyi cɩ da.

20‑N ‑ci sɛɛ lebhe paakadie ‑zɔn, ‑n 'ta ‑asɩkɛ ɩya 'dalapɔpʋadakwɩ ‑tɛɛ 'ta 'lɛ 'yɛpɩ ‑kʋ. ‑Ma si ɩya mamɛ ‑naanɩ ‑kʋmʋ 'yɛpɩ. ‑Anɩ ‑glɩ clɩɩkadɩ ‑naanɩ, 'nyɩ ‑anɩ ‑glɩ 'lɛ 'kpɔkpɔclɩɩ 'kʋ ‑naanɩ. 21Na, nclɔɔ ‑ɔ ‑ka wɔɔnyinyi ‑naa ‑tɛtɛa ɔcɩ cɩ wɔlʋ na, ɔ cɩ clɩɩkadɩ 'la ‑dakɔ 'plɩ, ‑dakɔa ʋ ‑kplɔ 'lɛ, ʋ toa cɩ 'lɛ lʋʋ nʋnʋ 'nyɩ ‑ʋ ‑bhɔsʋɔ 'lɛ nʋnʋgbɩ 'nanɩa ‑tɛtɛa 'la gbʋ na.

‑Kwlɛnyɔ 'la lobhoco 'la 'namʋ

22'Maa 'gulu nyɩgbɛɛlilie ɩya ‑n 'matɩ 'kʋnylugolulɩɛ, pɔɔtɛtɛ, ‑wawʋ ɩya pupue, ‑n ‑ya maa ‑ɔla pɔlɛa ‑kplɔ 'lɛ, 'nyɩ ‑ɔ la 'lɛ ‑Kwlenyɔ na. 23‑Ma, 'kpɔkpɔwɔɔtɩtʋɛa, tlʋbhalɩɛ cɩ da. ‑N ‑ci sɛɛ lebhe ka ɛ lamʋ 'lɛ 'slagbʋ. 24'Nyɩ ‑Kwlenyɔ 'la lobhoco, ɩ 'ta ‑fata lebhe ɔ 'sla 'slagbʋ. ‑Ma ɩ nanɩ lebhe ɔ wabha ncɛlɩa 'fɩan, ɔ mino calɩɛ ɩya pɔɔklalɩɛ. 25Pɔɔwɔtɛ nɩkplaan ɔ cɩ 'ka 'lɛ maa ‑ɔ cilio 'lɛ gbatlɩ na calɩ. Laagɔ cɩ gba, ma cɩ sɛɛ kwlacala le ma 'ka ‑nʋawlɛa cibhlilio, ‑a 'ta ‑ci. 26Na, mala wɔɔgugwiea cɩ 'ka ɛla daa cɔlɔ ɩya ma 'ka gɔzɛ 'la ‑gbesia ‑ɩ ‑kaa 'lɛ maa, 'nyɩ ‑ɩ gba 'lɛ ma nʋ 'lɛ saa ɛ ‑wa 'lɛ na, neen 'wlʋ.

Currently Selected:

2 Tim 2: NTLD13

Highlight

Copy