2 Tes 2
2
Ɩmɩa -ɩ -cɩ ka 'lɛ 'plɩ 'fɩɔn ɩya ‑Kwlenyɔa 'ka 'lɛ ci na
1Bholiecɩnyɩ, ‑ɩ ‑glɩ 'lɛ ‑ala ‑Kwlenyɔ Zozi Klisi 'la ciliea ɩya ‑ala ɔcɩ cɩ 'la 'wluwlalɩlɩɛa na, wɔlɩ bhlogbɩɩ ‑tɛɛ ‑a 'clalɩ 'lɛ anyɩ: 2Nclɔɔ ‑ka anyɩ 'cla lebhe ‑Kwlenyɔ 'la ciclɩɩa ya ŋeni na, a 'la 'talɩa acɩ 'ciin 'wugo 'la 'wlʋa anyɩ 'wlu naa, pɔlɛɛn 'la 'wlʋa anyɩ. Ka ɔ ‑ka anyɩ 'cla lebhe Laagɔ nekʋ ɔ nyɩtɛ 'lɛ, ‑aana ka ɔ ‑ka anyɩ ‑afluwa pala, 'nyɩ ɔ ‑ka 'cla lebhe ‑anyɩ ziea 'lɛ 'titio na, a 'la poo 'nyukwliin. 3A 'la 'talɩa acɩ 'cin ɩya nclɔɔ bhlogbɩɩ 'la 'nyiglili anyɩ ‑ylɛylɛ 'titi. Sa 'fɩɔn clɩɩ ‑naa 'ka 'lɛ ŋeni na, ɩ ‑fata lebhe ncɛlɩ ‑blɔ Laagɔ ‑bɛɛ ɩya ‑Abhɔlɛnyɔa, ‑ɔ -valɩɔ 'lɛ le ɔ 'ka mlɔ na, ci. 4Ɔmɔ ‑naa cɩ 'ka ‑tɛtɛa 'fɩan ‑ɩ ‑glɩ 'lɛ Laagɔ 'la gʋgwlɛ na, gbatlɩ mʋnʋ ɩya ɔ 'ka ɔcɩ 'kʋ ‑to, ɔ 'ka Laagɔpaakadiea* ‑zɔn ble, ɔ 'ka sakʋ ɩya ɔ 'ka 'cla lebhe ɔmɔ 'titi ‑glɩ 'lɛ Laagɔ. 5A luoli 'ta lebhe n ya anyɩ wɔlɩ ‑naa solu daa n ‑kʋ kaa 'lɛ anyɩ cɩ na, bha?
6'Nyɩ a ‑cinɩ ‑pɔtɔnʋ lʋʋa ‑ʋ kla kɔɔ 'lɛ 'kʋ le daa ɔla clɩɩa 'ka 'lɛ ŋeni na, ɔ 'ka ‑zɔnwlʋ. 7Sa ‑abhɔlɛ 'la 'tɛtɩa ‑ɩ ‑zizieo 'lɛ na, nʋ tooto ɩla lobholia. Na, daa ma cɩ 'ka 'lɛ ɔmɔa ‑ɔ klɔɔ 'lɛ 'kʋ na, gbɛga na, dɛ ɛla lobholia cɩ 'ka 'lɛ ‑zɔnwlʋ 'kpataa. 8Dɛ 'la daa na, ‑Abhɔlɛnyɔa cɩ 'ka ‑zɔnwlʋ ɩya ‑Kwlenyɔ Zozii 'ka ɔla ‑sasanyɔmʋa 'ma ɩya ɔ 'kɔɔ 'bhla ɩya ‑Kwlenyɔ Zozi Klisi 'la ciliɛa 'kɔɔ mlɔa. 9Daa ‑Abhɔlɛnyɔa -ya Sataan* 'la 'tɛtɩa cɩ 'ka 'lɛ ci ɩya ɔ 'ka 'ciinzizielɩlobholi ɩya nikpooslaslawɔlɩ ‑mizimizia -ɩ -cɩ ka 'lɛ ncɛlɩ 'nyiglili na, nʋ. 10Ɔ cɩ 'ka ‑abhɔlɛ nʋ 'ci 'ci le ɔ 'ka maa ‑ɔ cɩ 'ka 'lɛ 'ku na 'nyiglili. Ma cɩ 'ka 'ku ‑ofi lebhe ma 'ta ‑nʋawlɛa ‑ɛ cɩ kaa 'lɛ maa gbʋʋnsa na, wabha 'nyɩ ma 'ta ŋonu ma 'kɛɛ 'ma. 11Ɩla gbʋ dɛ Laagɔ la 'lɛ maa 'tɛtɩa ‑ɩ cɩ ka 'lɛ gba ma 'ka mlɔ ɩya ma 'ka yodi ‑nʋawlɛ la na 'kʋ. 12'Lɩka -sa Laagɔ cɩ 'ka 'lɛ maa 'fɩan ‑ɔ 'ta 'lɛ ‑nʋawlɛa ‑nʋawlɛ la 'nyɩ ‑ɔ ya 'lɛ ‑abhɔlɛ wabha na, gbaylɩsa.
Laagɔ ya anyɩ desla: A 'nylugo kpaan
13Bholiecɩnyɩ, anyɩa ‑Kwlenyɔ ‑wa 'lɛ na, ɩ ‑fata lebhe ‑a bhɔlʋ Laagɔ clɩɩa 'fɩan ala gbʋ, sa Laagɔ ya anyɩ bhɔdaa tooto desla, le a 'ka gbʋʋnsalɩɛ 'lɩ, 'Wugoa ‑ʋ gba 'lɛ nclɔɔ kplɔ 'lɛ na 'la klalɩɛa nɩkplaan ɩya ‑nʋawlɛa 'la pɔɔtɛtɛkalɩlɩɛ nɩkplaan. 14Ɩmɩ ‑naa 'kʋ Laagɔ la 'lɛ anyɩ, Dɩnanɩa* ‑a ‑sa 'lɛ anyɩ na, 'la 'sasʋʋn lebhe a 'ka ‑ala ‑Kwlenyɔ Zozi Klisi 'la 'klʋagbaa 'lɩmʋ. 15Na bholiecɩnyɩ, a 'nylugo kpaan ɩya a zʋ cacawɔlɩa ‑a ca 'lɛ anyɩ wɔɔnyɩtʋʋn ‑aana zielɩɛ nɩkplaan na, nanɩ sa.
16'Naa ‑ala ‑Kwlenyɔ Zozi Klisi 'titi ɩya ‑a To Laagɔ ‑ɔ wabha 'lɛ ‑anyɩ 'nyɩ ‑ɔ nyɩ 'lɛ ‑anyɩ 'lʋkʋlʋkʋ 'la pɔlɛɛnzʋlɩɛa ɩya pɔlɛkʋtɛlɔ na, 17zʋ anyɩ pɔlɛɛn ɩya ɔ 'nyɩ anyɩ 'tɛtɩ ɩya a 'ka clɩɩa 'fɩan 'nanɩ nʋ ala nʋnʋgbɩɩn ɩya ala wɔɔnyɩtʋʋn.
Currently Selected:
2 Tes 2: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.
