2 Pɩɛ 1
1
‑Ayopalɩɛ
1‑Amʋ Simɔɔn Pɩɛlɩ, n ‑glɩ Zozi Klisi 'la lobhoco ɩya ɔla lobhulobhunyɔ*. ‑Amʋ ‑ɔ zie 'lɛ maa ‑ɔ 'lɩ 'lɛ pɔɔtɛtɛa ‑sakasakaa ‑ala Laagɔ ɩya gbʋʋnsanyɔ Zozi Klisi 'plɩlɩ 'lɛ 'kʋnylugolulɩɛ 'kʋ 'nyɩ ɔ gba 'lɛ ‑a 'lɩ 'lɛ na. 2'Naa Laagɔ ɩya ‑ala ‑Kwlenyɔ Zozii 'la cibhlililiea ‑lalɩ anyɩ 'nyupalɩɛ ɩya pupue nikadieen.
Nʋnʋgbɩa ‑ɩ ‑fata 'lɛ lebhe gʋgwlanyɔ 'plɩlɩ 'kʋ na
3Laagɔ 'la 'tɛtɩa nɩkplaan, ɔ ya -anyɩ lɩɩa ‑tɛtɛa ɩ ‑fata 'lɛ lebhe -a kalɩ ‑ala jabhʋa nɩkplaan ɩya ‑a kɔɔ gɩlɩ na 'nyɩ. ‑Masa, ɔ ya gba 'nyɩ ‑a ya ɔmɔa ‑ɔ 'plɩlɩ 'lɛ ɔmɔ 'titi ɔla 'klʋagbaa ɩya ɔla 'tɛtɩa 'kʋ 'nyɩ ɔ ya 'lɛ ‑anyɩ la na cibhlili. 4'Klʋagba ‑naa ɩya 'tɛtɩ ‑naa 'kʋ, Laagɔ 'plɩlɩ 'lɛ 'nyɩ ɔ ya 'lɛ ‑anyɩ 'nanɩ 'kadɩa ‑ɩ kalɩ 'lɛ gbʋ 'nyɩ ɔ talɩ 'lɛ ‑ndanyɩ 'kʋ na 'nyɩ le a 'ka ɩmɩ ‑naa 'kʋplɩlɩ ɩya a 'ka 'zɩa* ‑ɩ wlʋlʋ 'lɛ ‑laagɔzɔan 'la lɩɩa 'la 'tʋa nɩkplaan na, nɩkplaan 'wlʋ ɩya aya Laagɔ 'kanɩ bhlo 'plɩ. 5Wɔlɩ ‑naa bhlogbɩɩ 'la gbʋ na, a ya 'lɛ ala pɔɔtɛtɛa Zozi Klisi 'kʋ zʋ na, a 'sɩslɩlɩ ɩya a mino ɩya a nʋ a 'ye 'nanɩ. A nʋnɩ 'lɛ a 'ye 'nanɩ na, a 'plɩ wɔɔcibhlilinya. 6A ‑cinɩ 'lɛ wɔlɩ na, a kla acɩ 'kʋ. A klanɩ 'lɛ acɩ 'kʋ na, a 'plɩ pɔɔklanya. A ‑glɩnɩ 'lɛ pɔɔklanya na, a kʋlʋ Laagɔ. 7A ‑kʋlʋnɩ 'lɛ Laagɔ na, a wabhawabhalɩ bholiecɩ 'bhisa ɩya a wabha ncɛlɩa 'fɩan. 8Na, wɔɔnanɩ ‑naa ‑ka ala nʋnʋgbɩ ‑glɩ 'nyɩ a kɩɩ clɩɩa ‑tɛtɛa 'kʋplɩlɩ na, ɩ cɩ gba 'nyɩ ‑ala ‑Kwlenyɔ Zozi Klisi 'la cibhlililiea cɩ 'ca tlʋ. 9Sa, ɔmɔa, ɩmɩ ‑naa 'ta 'lɛ ɔla nʋnʋgbɩ ‑glɩ na, ka ɔ ‑kʋ 'lɛ le 'citutunyɔ 'bhisa, ka ɔ 'bhubhuo 'lɛ. Ɔ ya bo le ɔla nyinyia ɔ nʋa 'lɛ ‑godogodoa na, ma yɔɔ mɩ ɩla 'zɩa cɩ -sa.
10Ɩla gbʋ na, bholiecɩnyɩ, a vi ‑nwɔ ɩya a zi ‑bɛkadaa 'kʋ ɩya a 'ka pala lebhe aya Laagɔ 'la lalɩɛa ɩya ɔla deslalɩɛa ‑fata. 'Nyɩ gbazɩ, a ‑ka sɛɛ nʋ na, 'a cɩ 'ta nyinyiin bhlili ‑ylɛlylɛ. 11Na, 'lɩka ‑sa, ‑jioli cɩ 'ka 'lɛ ‑nyɩɔ le a ble ‑ala ‑Kwlenyɔ ɩya ‑ala gbʋʋnsanyɔ Zozi Klisi 'la Nyɩbhɛlɩdua ‑ʋ 'ta 'lɛ 'wluzɔnbhɩalɩda 'ka na nɩkplaan.
Pɩɛlɩ luoli ncɛlɩa saa ɩ ‑fata 'lɛ lebhe ma namʋ na
12Na, ɩla gbʋ, n cɩ 'ka anyɩ luolida 'kʋ clɩɩa 'fɩan, ka a ‑kaa 'mɩɩ ‑ci 'titio na ɩya a 'ka -nʋawlɛa ma ca 'lɛ anyɩ na kʋlʋ kpaan. 13'Nyɩ, n gugu lebhe n ‑kʋ ka 'lɛ ‑laagɔzɔan na, ɩ 'nylugoluo 'kʋ le n luoli anyɩ wɔlɩ ‑naa ɩya a 'la ka ŋɔmʋ, 14sa n ‑ci lebhe 'ɩ cɩ 'ta ‑gwlɛlɩ 'nyɩ n cɩ 'ka 'lɛ anyɩ cɩɩnwlʋlʋ, saa ‑ala ‑Kwlenyɔ Zozi Klisi palaan 'lɛ mɩ na. 15‑Ma, n cɩ 'ka saa 'fɩan nʋ ɩya daa n cɩ 'ka 'lɛ anyɩ sidiin 'wlʋ na, a 'ka mino ɩya a 'ka ‑azla cacawɔlɩ ‑naa luoli.
16Na, ‑n 'ta 'ninipalɩɛ nɩkplaan, ‑a 'ta 'lɛ gba 'nyɩ a 'ta 'lɛ ‑Kwlenyɔ Zozi Klisi 'la ciliea ɩya ɩla 'tɛtɩa cibhlili, ‑ma ka ‑ala 'ci 'lɩɔ 'lɛ ɔla 'klʋagbaa nɩkplaan. 17Sa, ɔ ya 'ŋwleenfalɩlɩɛ ɩya 'klʋagba To Laagɔ wlɩɩn 'lɩlɩ, daa ɔ 'nu 'lɛ ‑blɩɩzɔan ‑ʋ 'wlʋlʋ 'lɛ Laagɔ 'bhlɩ 'nyɩ ʋ 'cla 'lɛ lebhe: 'Lɩka 'na ‑wawaŋodicoa, ɔmɔa ɩ mɛmaan 'lɛ pɔlɛ 'kʋ le n sla de na. 18Na, ‑blɩɩzɔn ‑naa ‑ʋ 'wlʋlʋa 'lɛ ‑laagɔɔn na, ‑anyɩ 'titi, ‑a yaa 'mʋʋ 'nu, daa ‑a ‑yɔɔsɔ ‑kʋa 'lɛ ‑kplɔkplɔ ‑kikea 'wlu na.
19Na, Laagɔnekʋnyɩtɛnyaa* 'la wɔɔnyɩtʋa gba 'nyɩ ‑ala pɔɔtɛtɛa 'ghlibholi. 'Nyɩ ɩ nanɩ le a falɩʋ pɔlɛ cɩ, sa ka ʋla wɔlɩa ‑kʋ 'lɛ le saa ‑kanie ŋamanɩ 'lɛ dabhlo 'tutu nɩkplaan ‑aan 'nyɩ ‑zeli ze 'lɛ na, ɩya ziplizoliea 'ka 'kʋbho ɩya ɛ 'ka ala pɔlɩa nɩkplaan leli. 20‑Ma, ‑bɛɛ, ɩ nanɩ lebhe a cibhlili sɛɛ lebhe: Nclɔɔ bhlogbɩɩ cɩ 'ta ɔla 'wluun 'manɩ ɩya ɔ 'ka Laagɔnekʋnyɩtɛnyaa 'la wɔɔnyɩtʋa ‑ʋ ‑kʋ 'lɛ Zieziewɔlɩa* nɩkplaan na ‑zɔnsa. 21Sa, ‑n ta Laagɔnekʋnyɩtɛnyaa 'titi -ɔ 'ta 'lɛ mala 'wluun 'manɩ le ma 'ka Laagɔ 'la wɔlɩ nyɩtɛ. ‑Ma, ‑Kplɔkplɔ ‑Wugoa* 'la klalɩɛ nɩkplaan ncɛlɩ nyɩtɛlɩ 'lɛ Laagɔ ne 'kʋ.
Currently Selected:
2 Pɩɛ 1: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.
