1 Tim 5

Ncɛlɩ 'la pɔlɛcɩfalɩlɩɛ

1‑Naa zalalɩa ‑glɛɛglɛnyɔ 'ci, ‑ma 'maa soluo le ‑n to. 'Ma ncaanyɩgbɩa le ‑n bholiecɩ, 2ŋlʋkpasɩa, le ‑n 'nɔcɩ ɩya ŋlʋgbɩa le ‑n mɛɛncɩ. Nʋnʋ ɩmɩ ‑naa ‑tɛtɛa, wɔɔgugwiea ‑ɛ ‑kplɔ 'lɛ na nɩkplaan.

'Kuzluŋwlɛ 'la wɔlɩ

3Falɩ 'kuzluŋwlɛa ‑ɔ ‑glɩ 'lɛ 'kuzluŋwlɛ 'titi na, pɔlɛ cɩ, zʋlɩɛ nɩkplaan. 4Gbazɩ 'kuzluŋlɔ ‑ka 'cuo, ‑aana liliecɩ ‑ka na, maa ɩ ‑fata 'lɛ lebhe ‑ɔ 'plɩlɩ Laagɔ 'la wɔɔnyɩtʋa 'kʋ ‑bɛɛ, maa 'titi mala 'lɔlʋa 'la klalɩlɩɛa 'la gbazɔ ɩya ma 'ka mala valɩnyaa 'la dlua ma ‑ka 'lɛ na ‑plʋ. 'Lɩka ɩmɩa ‑ɩ ‑ka 'lɛ Laagɔ 'tʋ na. 5‑Ɔ ‑glɩ 'lɛ 'kuzluŋlɔa ɔmɔ 'titi bhlogbɩɩ ‑kʋ 'lɛ sa, 'nyɩ ‑ɔ 'ta 'lɛ klalɩnyɔ ‑ylɛylɛ ‑ka na, ɔ ya ɔla pɔlɛkʋtɛlɔa Laagɔ 'kʋ zʋ. Ɔ bhibhie clɩɩa 'fɩan, 'nyɩ ɔ 'clalɩ ɔla klalɩɛ. 6‑Ma 'kuzluŋlɔa ‑ɔ gugu 'lɛ 'wɩwɩlilɩɛ bhlobhlo 'la wɔlɩ na, ka ɔ ‑ka ‑ja 'titio na, ɔ ya tooto 'ku. 7Ɩmɩ ‑naa ‑ma, 'maa luolii maa ɩya ma 'la ka maa 'gesalɩda 'lɩ. 8Gbazɩ nclɔɔ 'ta ɔla 'lɔlʋnya pɔlɛcɩfalɩ, ‑n ‑nana ‑ma maa 'titia ‑ɔ ‑kʋ 'lɛ ɔla 'slea nɩkplaan na, ɔ ya pɔɔtɛtɛa ‑blɔ 'nyɩ ɔ zi ɔmɔa ‑ɔ 'ta 'lɛ pɔɔtɛtɛ -ka na 'kʋ.

9'Fɩɔn 'ŋlɔ 'la 'ŋlɩ 'ka 'lɛ 'kuzluŋwlɛa 'la ‑kandea 'la ‑afluwaa nɩkplaan ‑zieo na, ɩ ‑fata lebhe ɔ kalɩ liowli ‑gwlɩɩ ‑mɔta 'bhebhe ɩya ɔ 'plɩ 'ŋlɔa, ‑ɔ ya 'lɛ ŋodi bhlogbɩɩ 'cɩ na. 10Ɩ ‑fata ‑awlɛ lebhe ma cibhlilio, ɔla 'nanɩnʋlɩɛ 'la gbʋ ɩya ɔ 'plɩ 'ŋlɔa ‑ɔ ya 'lɛ ɔla 'cuo 'nanɩ lolu, ‑ɔ ya 'lɛ lowie 'nanɩ kla, ‑ɔ ya 'lɛ Laagɔ 'la ncɛlɩ lobho, ‑ɔ ya 'lɛ 'kwlɩbhɩabhɩanya klalɩ 'nyɩ ‑ɔ ya 'lɛ ɔcɩ 'kʋ 'wlʋ 'nyɩ ɔ ya 'lɛ wɔɔnanɩ ‑bhutukpa nʋ na. 11‑Ɔ ‑glɩ 'lɛ 'kuzluŋwlɛa ‑ɔ ‑glɩ ka 'lɛ ŋlʋgbɩa na, gbɛga maa. Sa ŋodicɩcɩɛ 'la 'tʋ ‑ka maa 'bhla na, ka ma tla 'lɛ Klisi kɔkʋʋn, 12'nyɩ ma zʋ 'lɛ ‑sa macɩ Laagɔ 'la 'tɩtɩplalɩɛa ‑zɔn, sa ma 'ta mala ‑bɛka ‑ndanyɩa zʋ na. 13‑Awlɛ, sa ma 'ta 'lɛ nʋnʋlobholi ‑ka na, ka ma bi 'lɛ 'sli 'sli. 'Ma bhlolʋ 'ta 'dɛ, ‑ma ka ma ‑glɩ 'lɛ dlɛdlʋdlɛŋwlɛ, maa zʋ 'ta 'lɛ wɔlɩ sa, 'nyɩ ma bhili 'lɛ wɔlɩa ‑ɩ 'ta 'lɛ mala wɔlɩ ‑glɩ na, nɩkplaan. 14Ɩla gbʋ na, n ‑wa lebhe, 'kuzluŋlʋgbɩaa 'cɩ ŋodie, ma valɩ 'cuo ɩya ma 'lɩ mala 'slia 'klʋ ɩya ma 'la ka ‑zɔbhɛlɩgbanyɔa ‑ala wɔɔnyinyi nyɩtɛda 'nyɩ. 15Sa 'kuzluŋwlɛ ‑anʋa ya tooto mlɔ, 'nyɩ ma ya Sataan* gɩlɩ. 16Na, gbazɩ 'ŋlɔa ‑ɔ ‑ka 'lɛ Zozii 'la pɔɔtɛtɛ na ‑ka ɔla 'lɔlʋa nɩkplaan 'kuzluŋwlɛ ‑ka na, 'naa ɔ klalɩ maa. ‑Ma ɔ 'la telia maa ‑laagɔnɩkplaa ɩya ɔ 'ka sɛ 'kuzluŋwlɛa ‑ɔ 'ta 'lɛ klalɩnya ‑ylɛylɛ ‑ka na, 'klʋlɩlɩɛ mino.

'Kʋklʋʋnpʋnya ‑kpasɩa

17'Kʋklʋʋnpʋnya ‑kpasɩa ‑ɔ nʋ 'lɛ mala lobholia 'nanɩ na, maya dluuplʋlɩɛ 'la 'ci ‑mɔsɔ ‑fata, ‑n ‑nana ‑ma maa 'titia ‑ɔ sɛlɩ 'lɛ wɔɔnyɩtʋa 'la plicilobholi ɩya ʋla calobholia nɩkplaan na. 18Zieziewɔlɩa* cla lebhe: «A 'la gʋa bhliia ‑ɛ namʋnʋ 'lɛ 'bleea 'kʋ 'nyɩ ɛ sɛɛ 'lɛ 'ciin na, 'la nea.» 'Nyɩ ɩ cla ‑awlɛ 'lɛ lebhe: «Ɩ ‑fata lebhe lobholinʋnyɔ 'lɩ ɔla dluuplʋlɩɛa.»

19Gbazɩ ma ‑ka 'kʋklʋʋnpʋnyɔkpasa wɔlɩ 'kʋ gɩ na, ‑naa lɩɩ ‑nʋawlɛ, ɩ ‑ka ‑kʋ lebhe ‑n 'ta ka ‑danʋfʋɛcɩ ‑mɔsɔ, ‑aana ‑mɔta, neen 'nu na. 20‑Ma ‑anʋa ‑ka nyinyi nʋ na, salɩ maa ncɛlɩa 'fɩan 'ci 'kʋ 'bɩ, ɩya ‑da -naanʋaa ‑ma, ŋanɔ 'ka maa pla.

21Laagɔ, Zozi Klisi ɩya ‑kplɔkplɔbhlaandleecɩa* 'ci 'kʋ, n bhibhieo le ‑n 'plɩlɩ wɔlɩ ‑naa 'kʋ, ɩya ‑naa nʋnʋgbɩa ‑tɛtɛa nɩkplaan, ‑naa gbazlɩlɩa nɩkplaan ‑aana ‑naa 'plɩa nclɔɔ bhlogbɩɩ leen. 22‑Naa ‑gbɛa nclɔɔ sɩ 'wlu 'faanfan le ‑n kɔɔ ncɛlɩa sidiin, lobholi 'klʋlɩda 'nyɩ. ‑Naa 'maa ncɛlɩ 'la nyinyi 'la ‑tobhu. ‑Ma 'maa namʋnʋ ‑kplɔlɩɛɛn.

23‑Naa 'mlaanɩ 'nyu bhlobhlo, ‑ma 'maa 'mlamʋnɩ ‑diinvɛɛn pɛ, ‑naa nɩkpla ɩya gua ‑ʋ bhlɔɔ 'lɛ klɛɛklɛɛ na, 'la gbʋ.

24Ncɛlɩ ‑anʋa ‑kʋ, 'fɩɔn ma 'ka 'lɛ maa 'tɩtɩpla na, ma ‑jlɛ mala nyinyia 'kpataa, ‑ma ‑anʋa ‑kʋ, ɩ 'la da bɔɔn 'fɩɔn, 'nyɩ ma 'nɩa wlʋ 'lɛ ‑zɔn. 25Na, sɛɛ ‑tɛɛ bhlogbɩɩ nʋnʋgbɩ 'nanɩa ‑ma, ma lɩɩ 'lɛ 'kpataa, 'nyɩ ɩmɩa maa 'lɩ 'ta 'lɛ 'kplookʋ 'ciin 'titio na, 'ɩ cɩ 'ta 'lɛ ziziekoteen ‑tolu.

Currently Selected:

1 Tim 5: NTLD13

Highlight

Copy