1 Tim 1
1
‑Ayopalɩɛ
1‑Amʋ Pɔlʋ, n ‑glɩ Zozi Klisi 'la lobhulobhunyɔ*, ‑jiolia Laagɔ ‑ala gbʋʋnsayɔa ɩya Zozi Klisi ‑ala pɔlɛkʋtɛlɔa, 'nyɩɩn 'lɛ na nɩkplaan. 2N zieo, ‑mɔɔ Timoti, n ma 'lɛ le ‑amʋ 'titi 'na valɩvalɩco, Zozi Klisi 'la pɔɔtɛtɛa 'la gbʋ na. 'Naa To Laagɔ ɩya ‑ala ‑Kwlenyɔ Zozi Klisi 'la ‑walʋa, ŋaazɩɩnlɩlɩɛ ɩya pupuea ŋenio 'kʋ.
Zʋlʋ maa ‑ɔ ca 'lɛ yooyo -wɔlɩa na pɔlɛ 'kʋ
3Saa n ‑kʋ 'lɛ Masedʋanɩbhlɩa 'kʋ mʋda 'nyɩ n soluo 'lɛ na, 'maa ‑to Efɛzɩdua 'kʋ ɩya ‑n ka maa ‑anʋa ‑ɔ ca 'lɛ yooyo wɔlɩa na solu lebhe ma 'la nʋa sɛɛ. 4'Cla maa lebhe ma 'talɩ 'ninia ɩya tokadɔkadɔcɩa 'la zɛlɩlɩɛa ‑ɩ 'ta 'lɛ 'wlʋ ɩya guo ‑ka na 'cin. Ɩmɩ ‑naa gba 'ta ɩya Laagɔ bhɔsʋabhɔsʋawɔlɩa ‑ɩ glalɩlɩ 'lɛ pɔɔtɛtɛ nɩkplaan 'kʋ na, ɩ 'ka 'kʋglalɩ, ‑ma ka ɩ lamʋ 'lɛ wɔɔtɩtʋɛ. 5Na, ɩmɩa n 'matɩ 'lɛ na, ɩmɩ ‑ɩ ‑glɩ 'lɛ lebhe ncɛlɩ kalɩ ‑walʋa ‑ʋ 'wlʋlʋ 'lɛ pɔlɛa ‑ɛ ‑kplɔ 'lɛ na 'ciin, ‑ʋ 'wlʋlʋ 'lɛ wɔɔgugwɩe 'nanɛ ɩya ‑nʋawlɛpɔɔtɛtɛ nɩkplaan na. 6‑Ma ‑anʋa ya ‑gugwie ‑naa 'kʋ 'wlʋ 'nyɩ ma ya 'lɛ 'kpɔkpɔwɔɔtɩtʋɛ nɩkplaan mlɔnʋ. 7Ma la macɩ ‑jlɩmaacanya*, 'dɛndlana ma 'ta ɩmɩa ma nyɩtɛlɩ 'lɛ ‑sa 'tɛtɩtɛtɩɩn na ‑ci.
8‑A ci sɛɛ 'bhlɩmɔɔn lebhe ‑jlɩmaa nanɩ, ɩ ‑ka ‑kʋ lebhe ‑a ‑kaa 'saa ɩ ‑fata 'lɛ na 'ma na. 9Na, ‑a 'nu ɩmɩ ‑naa 'nanɩ. ‑Jlɩmaa 'ta 'dɛ 'kʋnylugolunyɔ 'la gbʋ ‑kʋ, ‑ma a ‑kʋ 'dɛ maa ‑ɔ zʋ 'ta 'lɛ ‑jlɩmaa ‑ylɛylɛ ɩya maa ‑ɔ 'ta 'lɛ 'nyiyilie ‑ka na, mala gbʋ. A ‑kʋ 'dɛ maa ‑ɔ gʋgwla 'ta 'lɛ Laagɔ na ɩya nyinyinʋya 'la gbʋ. A ‑kʋ 'dɛ maa ‑ɔla 'nyiyi 'ta 'lɛ Laagɔ ɩya ‑kplɔkplɔlʋʋ ‑ylɛylɛ na 'la gbʋ. A ‑kʋ 'dɛ maa ‑ɔ bhla 'lɛ ma 'nɔcɩ ɩya ma tocɩ na 'la gbʋ. A ‑kʋ 'dɛ ncaabhlanyaa ‑tɛtɛa, 10‑badaaglunya, ŋodiea maa bhlobhlo mʋ 'lɛ ‑gbiti 'kʋ, geyepɛlʋzʋnya, yodizʋnya, ‑kplakpladanʋfʋɛlinya ɩya maa 'fɩan ‑ɔ mʋnʋ 'lɛ cacawɔlɩa ‑ɩ ‑gɩlɩɔ 'lɛ 'ciin na gbatlɩ na, mala gbʋ. 11'Klʋagba Laagɔa ‑ɔ 'matɩ 'lɛ ‑ala 'nanɩ na, 'lɩka ɩmɩa ‑ɩ ‑kʋ 'lɛ Dɩnanɩa* ɔ zʋʋn 'lɛ wlɩɩn na, nɩkplaan na.
Pɔlʋ bhɔlʋ Zozi Klisi
12N bhɔlʋ ‑ala ‑Kwlenyɔ Zozi Klisi, ‑ɔ 'nyɩɩn 'lɛ 'tɛtɩ ‑naa na. N bhɔlʋɔ saa ɔ ya 'lɛ 'lɩ lebhe ɔ cɩɩn ‑delikʋtɛbhalɩ, 'nyɩ ɔ yaan 'lɛ ɔla lobholia nɩkplaan zʋ na, 13‑amʋa ‑ɔ nyɩtɛa 'lɛ ‑bɛkadaa ɔla wɔɔnyinyi, ‑ɔ saa 'mɔɔ 'lɛ gbaylɩ 'nyɩ ‑ɔ -kaa 'lɛ -bhɩakpa na. ‑Ma Laagɔ yaan ŋaazɩɩn 'lɩ, ‑ofi lebhe n 'taa ɩmɩa n nʋa 'lɛ na ‑ci 'nyɩ n 'ta ka kaa 'naa pɔɔtɛtɛa Klisi 'kʋ zʋ. 14‑Ala ‑Kwlenyɔ ya tete ɔ yaan wabha. Ɔ yaan pɔɔtɛtɛ ɩya ‑walʋa ‑ʋ 'wlʋlʋ 'lɛ Zozi Klisi nɩkplaan na yeli. 15'Lɩka wɔɔnyɩtʋa ‑ʋ ‑ŋwa 'lɛ 'kʋ le ma 'tɛbhalɩ ‑deli 'kʋ ɩya ncɛlɩa 'fɩan la ‑nʋawlɛ na. Zozi Klisi ya ‑laagɔzɔan ci le ɔ 'ka nyinyinʋnyaa gbʋʋnsa. N ‑glɩ maa 'fɩan sidiin 'la ‑bɛkanaanɔ. 16'Nyɩ Laagɔ ‑kaan ŋaazɩɩn 'lɩ na, ka ɩ 'plɩ 'lɛ sɛɛ lebhe Zozi Klisi 'kaan 'kʋ 'plɩlɩ, ‑amʋ nyinyinʋnyaa ‑tɛtɛa 'la ‑bɛka -naanɔa ɩya ɔ 'ka ɔla gbadalɩɛa 'fɩan pala, ɩya maa 'fɩan ‑ɔ -cɩ kɔɔ 'lɛ mala pɔɔtɛtɛa 'kʋ zʋ na, 'kaan dɩbalɩ, jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na 'la gbʋ.
17'Lʋkʋlʋkʋa Nyɩbhɛlʋa,
Laagɔ, ‑ɔ 'ku ta 'lɛ 'pʋpʋkʋ,
maa 'lɩ 'ta 'lɛ 'ciin 'nyɩ ‑ɔ ‑glɩ 'lɛ bhlo na,
'naa 'klʋnyɩlɩɛ ɩya 'klʋagba ŋenio
'lʋkʋlʋkʋ ɩya 'lʋkʋlʋkʋ. Ɩ kʋ sɛɛ.
18Timoti, 'na 'cʋ, 'lɩka wɔlɩa n zʋɔ 'lɛ wlɩɩn, saa Laagɔnekʋnyɩtɛnyaa* 'bhlia 'lɛ ‑bɛkadaa 'kʋ ‑naa 'sasʋʋn na, ɩya ɩ kɔɔ 'tɛtɩ 'nyɩ ɩya ‑n ka tananʋa vʋ, 19pɔɔtɛtɛ ɩya wɔɔgugwie 'nanɛ nɩkplaan. ‑Ma ‑anʋa 'ta wabha lebhe ma 'ka mala wɔlɩa 'nyukwliinpo 'nyɩ mala pɔɔtɛtɛa ya 'lɛ bhli le saa gɔlʋ gblo 'lɛ na. 20Imenee ɩya Alɛzandlɩ ‑kʋmʋ 'dɛ 'la ncɛlɩa sidiin. N ya maa Sataan* teli ɩya ma 'ka cibhlili lebhe ɩ 'ta ‑fata lebhe ma vla Laagɔ.
Currently Selected:
1 Tim 1: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.