Tsakariyaxi 9
9
Yawé niukieya 'Ixaheri memaye'unie wahepaɨtsita mieme
1'Ikɨ, kemɨtiyɨni niukiyari kanihɨkɨtɨni Yawé kemutayɨ, Karɨraki kwieyari hetsiemieme kanihɨkɨtɨni meta Ramatsiku. Yurikɨ Yawé teɨteri kwi kaniwataxeiyani metatsiere yunaime 'Ixaheri nuiwarimama, 2meta 'auriena mukuma Kamati kanitaxeiyani, metatsiere Tiru, Tsiruni mame, tsepa mɨkɨ kwinimieme memɨtemaiwawe.
3Tiru kiekatari yukiekari kuraruyari 'e'atitewame meputawewi,
pɨrata mepukuxeɨri tumuanari mɨhɨkɨtɨni hepaɨ,
meta huru haxu kaye 'utɨa mieme mɨhɨkɨtɨni hepaɨ.
4Peru Ti'aitame pɨtiwanawairieni wapiinitɨarika,
haramaratsie kaneikaxɨrimɨkɨ tita mɨtiwaxikutɨriya,
meta tai kanitixɨtsitɨamɨkɨ.
5'Atsikaruni kiekatari mepixeiya, hikɨ waɨkawa mepɨtimamani,
Kahatsa kiekatari waɨkawa mepɨteka'eniexɨani,
meta yaxeikɨa mepɨyɨni 'Ekuruni kiekatari
kepauka kememɨteta'ikwewakai yamɨkatiyɨni.
Kahatsa kiekatari ti'aitame mepɨnawaiyarieni,
meta 'Atsikaruni kiekatari mepakumawere.
6Teɨteri memɨka'upapa 'Atsiruri kiekariyaritsie mepɨyutikiitɨani,
meta ne piritsiteutsixi kememɨteyuti'ɨre nepɨwanawairieni.
7Wateta nepɨwanawairieni wai muxuxure,
meta 'ikwai mɨka'itiya.
Meta piritsiteutsixi yayupaɨmetɨ
mepɨyuhayewa takakaɨyari hetsiemieme,
Kura kwieyaritsie kuyaxi tewa'aitɨwamete mepakɨne,
meta 'Ekuruni kiekatari kewutseutsixi wahepaɨ me'anetɨ mepakɨne.
8Hikɨri ne netuki nepɨta'ɨwiya
xewitɨ mɨkaheutahakenikɨ meta xewitɨ mɨkahewayeyeikanikɨ.
Hatsuakuri xewitɨ mɨtatsi'aye'unie pɨkawaka'una neteɨterima,
karikɨ hikɨri ne nekatinita'ɨwiyani.
Ti'aitame kemɨtinuani Kerutsareme
9Waɨkawa keneyutemawieka, neniwe 'uka Tsiyuni.
Keneutahiwani temawierikakɨ, neniwe 'uka Kerutsareme.
Neuxei, mana pamie 'ahepa meti'aitɨwame,
heitserie yamɨtikamie, tiyuwikweitsitɨwame meta mariwetɨ mɨkahayuyeitɨwa.
'Akanamieni puxutsie 'anakaitɨ,
puxu temaikɨ hetsie, puxu 'ukaratsi nu'ayatsie.
10'Epɨrahini kaxetamama kuyaxa mieme pukumaweriya
meta kawayutsixi Kerutsareme miemete.
Tupite kuyaxa miemete pɨtimura,
hikɨ nuiwarite memɨyuxewinikɨ niukiyari pɨwataxatɨani.
Pɨtita'aita haramaratsie ka'atɨkaime meta tapa haramaratsie paitɨ ye'atɨkaime,
'Eupɨrate hatuxameyaritsie tsutɨme
'atsita kwie manu'axe paitɨ.
'Ixaheritsixi kememɨtehekwariyarieni
11'Ekɨta,
tɨratu nemuwewikɨ nexuriyakɨ 'ahamatɨa
nepɨwaxɨna putsu muyewakita memati'u 'ahetsɨa miemete memanutaxɨriya.
12Xekenehu yukiekari 'aixɨa mɨrekukurarutuiyarietsie,
xe'anutaxɨriyatɨ xemɨta'ikwewakai,
karikɨ hikɨ mɨpaɨ nekanaineni mɨpaɨ xemɨtemaikakɨ
nekatinixepitɨamɨkɨ hutakɨa tita xemɨteheuyehɨa.
13Kura netupi hepaɨ nekanikuha'aritɨamɨkɨ,
meta 'Epɨrahini ne'ɨrɨ nekanayeitɨamɨkɨ.
Tsiyuni, 'aniwema nepɨwayuitɨani,
Kɨretsiya kiekatari waniwema memɨwatakwinikɨ,
yumemiwame 'ixiparaya nepɨmatsihayeitɨani.
14Yawé matsiɨkɨtɨ payuyeitɨani wahetsie,
meta 'ɨrɨteya mimierɨkari hepaɨ 'anenetɨ payekɨne.
Yawé naimekɨmɨyɨwe pitahɨtsieni 'awa,
hikɨ kanayeyeimɨkɨ 'eka mɨtɨrɨkaɨye tatsutɨa miemetsie yewetɨ.
15Yawé Naimekɨmɨtɨrɨkaɨye pɨwa'ɨwiyani yuteɨterima,
mɨkɨ naime mekanititarakuni
tetexi kɨmana memɨtituaxienikekai.
Kwinie mepɨte'uhiwani winukɨ memɨtarɨweka hepaɨ,
xuriyakɨ mepeu'ɨwatɨkani tekɨxi tukita mieme hepaɨ,
meta mawari taiyame 'awateya hepaɨ.
16'Iya tukaritsie Yawé Kakaɨyari
yuteɨterima puwatawikweitsitɨani muxatsi wahepaɨ,
hikɨ Yawé kwieyatsie
meputixawatɨreni tetexi witsimɨ'anene kuruna hetsie matei hepaɨ.
17'Aixɨa pɨti'aneni meta witsipɨti'aneni naitɨ.
Tɨriku temari metɨrɨkawime puwarayeitɨani,
meta kaxie winuyari mɨhekwa 'ukari 'ɨimarixi puwatemawieritɨani.
Currently Selected:
Tsakariyaxi 9: hch
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.
