Marikuxi 7

Tita ka'itiyakame meyeitɨa tewi

(Mar 7:1-23 – Mat 15:1-20)

1Merikɨtsɨ 'auriena mekaniyukuxeɨrieni paritseutsixi meta hipatɨta 'inɨarikɨ memɨte'ɨkitametetɨkai Kerutsareme memeyekɨnekai, 2mekaniwaruxeiya teyɨ'ɨkitɨwametemama hipatɨ metekwakame wamamá ka'itiyakaku mekamaimatɨkaitɨ huriyutsixi wayeiyari kemɨ'ane. Mekaniniukixiekaitɨni mɨkɨ. 3(Paritseutsixi meta hipatɨ huriyutsixi teɨteriyari yunaitɨ, xɨka kwinimieme meka'utimaimani, tixaɨtɨ mepɨkatekwaka, yututsima wayeiyaritsie yametekahutɨ. 4Tetuayamete wakiita retinaneme, pɨkatikwaka katihauxinietɨkaime. Waɨkawata mɨiretɨ yeiyari kanixuaweni yamemɨtekahunikɨ, tekɨxite, xarite, katsute kememɨte'itie). 5Hikɨ paritseutsixi meta 'inɨarikɨ te'ɨkitamete mɨpaɨ mekatenita'iwawiya:

—¿Titayari yututsima wayeiyaritsie yamekatekahu 'ahetsɨa miemete teyɨ'ɨkitɨwamete, wamamate ka'itiyatɨkaikaku metekwa'a?

6Mɨkɨ mɨpaɨ katiniwaruta'eiya:

—Kitsariyaxi 'aixɨa putayɨ tihekɨatatɨ xeme xehepaɨtsita, xemɨte'itawa, mɨpaɨ katine'uka:

»“'Ikɨ teɨteri yutenikɨ xeikɨa 'aixɨa meputiyuane nehepaɨtsita,

peru wa'iyari 'ateewa puyeika.

7Yakɨ xeikɨa mekanenayexeiyani,

tita memɨte'ɨkita, teɨteri wa'aitsika pɨhɨkɨ xeikɨa”.

8Tita mɨti'aitakai Kakaɨyari xete'uhayewaka, teɨteri wayeiyaritsie xeteniwiyani, tekɨxite harewemete kexemɨtehauxina, tawarita hepaɨna mɨireme kexemɨteyurie».

9Mɨpaɨta katiniwarutahɨawe:

—Xeme xeikɨa yuyeiyaritsie yaxetekahutɨ xekanakɨne, xe'ihayewaka tita Kakaɨyari mɨti'aita. 10Muitsexi mɨpaɨ kanainekaitɨni: “Yaketinekamieni kememaitɨka 'apaapa meta 'amaama”. Tawarita mɨpaɨ kanaineni: “Kemɨ'ane 'axamutaineni yupaapa meta yumaama wahepaɨtsita, ke'umierieni”. 11Xemetsɨ pɨta mɨpaɨ xekateni'ɨkitani: “Tewi pɨyɨwe mɨpaɨ mɨtikɨhɨaweni yupaapa yatɨni yumaama, nepiini naime kɨmana nemɨmatsiparewienikeyu, mɨkɨ kuruwani kanihɨkɨtɨni” (nepimini Kakaɨyari manuyɨne). 12'Ana mɨkɨ waɨriyarika pɨkapitɨarie 'atsimɨtiyurienikɨ yupaapa yatɨni yumaama hetsiemieme. 13Xekaneyeitɨani Kakaɨyari niukieya, yaxetekahutɨ yuyeiyaritsie, xemɨyukuxaxatɨwa. Waɨkawamekɨ xepɨteyurie 'ikɨ hepaɨ.

14Tawarita yu'aurie waruta'inieka teɨteri, mɨpaɨ katiniwarutahɨawe:

—Xekeneneu'eni yunaitɨ, meta xeketenemaiwaweni: 15Tewi 'aurie tixaɨtɨ pɨkatixuawe hetsiena heutahame mɨyɨwe ka'itiyakame meyeitɨani. Tita taɨtana mɨratineika, mɨkɨ pɨta kanihɨkɨtɨni tewi ka'itiyakame mayeitɨwa. 16Xewitɨnetɨ mu'enaxɨ ke'u'ena.

17Hikɨ teɨteri waruku'eirieku, kiita heutahaku, teyɨ'ɨkitɨwametemama mekanita'iwawiya 'ɨxatsi hepaɨtsita kemɨti'ɨkitakai.

18Mɨkɨ mɨpaɨ katiniwarutahɨawe:

—¿Kari xemeta 'atsixepɨkatemaiwawe wahepaɨ? ¿Xeme mɨpaɨ xekatehetimaiwe, naitɨ tewi 'aurie mɨtixuawe hetsiena heutahame pɨkayɨwe ka'itiyakame meyeitɨani? 19'Iyarieyatsie mɨkaheutahakekɨ, yuriepana pɨta kaneukahakeni, 'ariketa kanihɨamɨkɨ.

Mɨpaɨ 'utaitɨ, naime 'ikwai 'itiyakame kanixatakaitɨni. 20Tawarita mɨpaɨ kaniutayɨni:

—Tita tewi taɨta mɨratineika, mɨkɨ pɨta kanihɨkɨtɨni tita ka'itiyakame meyeitɨa. 21Karikɨ teɨteri wa'iyaritsie katinimiemetɨni, 'axa'iyaritɨarika, kememɨteyukumaɨwa teɨteri kemɨkatiheitserie, 22'inawari, xeime kemɨtiumieni, xeime kemɨtiukumayɨani kayɨ'ɨya kayɨkɨna, katiyupini mɨtihiwe'erie, 'axakememɨteyurie, 'irɨmari, kememɨteyukahiwe'erie merukuyatɨwetɨ, kememɨteyukwatsirie, 'axaniuki hipame wahepaɨtsita, kememɨteyukatawe'erie meta yakɨ xeikɨa kememɨteyɨkɨhɨawe. 23Mɨkɨ naitɨ 'axamɨti'ane, wataɨta katinimiemetɨni, meta tewi ka'itiyakame kanayeitɨwani.

Yuri kemɨti'eriekai 'ukaratsi tsirupenitsiyatanaka

(Mar 7:24-30 – Mat 15:21-28)

24Hikɨ mana yeyaka, Tiru kwieyaritsie kaneyani.#7:24 RV60 paine Tiro y de Sidón. Mana kiita kaneutahani, xewitɨ tɨma pɨka'imariekakekai pɨra'eriwakai Ketsutsi, peru pɨkayɨwekai mana mɨyuhayewakɨ kamariwatɨ. 25Merikɨtsɨ, 'ukaratsi kaniu'ena hepaɨtsitana, kakaɨyari mɨka'itiya kaninɨkaitɨni mɨkɨ nu'aya 'ukatɨme, hikɨ 'ukaratsi kwitɨwa hetsɨana nuaka, hɨxiena kaniutihɨximakeni. 26Mɨkɨ 'ukaratsi kanikɨriyekutɨkaitɨni, Tsirupenitsiyatsie kaninuiwametɨkaitɨni, waɨriyarika kanipitɨakaitɨni meyenɨ'anikɨ kakaɨyari 'axamɨ'ane mixɨnakɨ niweya.

27Ketsutsi mɨpaɨ katinitahɨawe:

—Kaneuyeweka tɨɨri meri memɨtihuxanikɨ, 'aixɨa pɨka'ane xɨka yuniwema paa warunawairieni, tsɨikɨri pɨta xɨka warumini.

28'Ukaratsi mɨpaɨ katinita'eiya:

—Yuri peputaine Ti'aitame, peru 'atsita tsɨikɨri mepitikwa'a tɨɨri memɨtekuhayeikawa mexatɨa mɨkawiwiwe temɨxikiyari.

29Ketsutsi mɨpaɨ katinitahɨawe:

—'Aixɨa pemutayɨkɨ, kenemieri 'aixɨa 'iyari, kamɨ kakaɨyari 'axamɨ'ane 'ari kanixɨna 'aniwe.

30Hikɨ yukie heta'aka kanitaxeiya yuniwe 'utatsie kakaime, kakaɨyari 'axamɨ'ane 'ixɨnaku.

Ketsutsi kemɨrenayehɨa tewi mɨkaheu'enakai mɨnenuriekai

(Mar 7:31-37 – Mat 15:29-31)

31Hikɨ Tiru kwieyaritsie heyeyaka Tsiruni kwieyaritsie kaneuyeyune. Tamamata Kiekarite mɨrakutewatsie 'uyeyaka, Karereya harakunayaritsie kaneta'ani. 32Mana mekani'atɨirieni tewi mɨkaheu'enakai mɨnenuriekai, waɨriyarika mekanipitɨani hetsiena mutimenikɨ.

33Yatewa heiwitɨka yɨxaɨtame teɨteri memɨka'anu'uwatsie, nakatana yu'itɨwame kaneuka'uitɨani, meta 'uta'aɨtsikawieka nenieya kaniumayɨani. 34Yuheima heutiniereka Ketsutsi kaniuka'ietɨyani, yuniukikɨ mɨpaɨ tewi katiniutahɨawe: «'Epata» (taniukikɨ kewatiyepietɨkani panuyɨne). 35Yapauka yunakata kaniwatiyepierixɨani meta nenieya kaniuxɨnarieni, heitseriemekɨ 'utaniutɨ kanayani.

36Hikɨ kaniwaruhɨritɨani xeime memɨkatehekuxaxatɨwanikɨ, peru kemɨtiwaruhɨritɨa, mɨme matsi yemekɨ mekatenikuxatakaitɨni naitsarie. 37Waɨkawamekɨ mekanihɨxiyakaitɨni teɨteri yame'utiyuatɨ: «Naime 'aixɨa katiniuyurieni, mɨkɨ memɨkaheu'enanakai meheu'enanakame kaniwarayeitɨwani, mɨkɨ memɨkaniuwawekai meniuwaweme kaniwarayeitɨwani».

Currently Selected:

Marikuxi 7: hch

Highlight

Copy