Baroma 12

Ku sebelezwe Mulimu mwa Bupilo bo Bunca

1Cwale banabahesu, Mulimu h'a lu bonisize sishemo sa hae ka nzila ye cwalo, na mi lapela kuli mu mu fe bupilo bwa mina inge sitabelo, ili sitabelo se si kenile, mi se si ka mu tabisa. Ki ona mukwa wa niti wa ku sebeleza Mulimu. 2Mu si ke mwa ikenya hahulu ku za lifasi le, kono mu tuhele Mulimu a mi fetule mwahali, a fetule minahano ya mina. Kihona mu ta kona ku utwisisa s'a lata Mulimu, se ili se sinde, se si mu tabisa, ni se si kondile.

3Kabakala mpo ya sishemo y'a ni file Mulimu, ni mi bulelela cwana kaufel'a mina. Mu si ke mwa ikupula kuli mu ba batuna hahulu ku fita mo mu inezi. Mu be ni mihupulo ye bonisa ku ishuwa kwa mina, mi yo muñwi ni yo muñwi wa mina a ikatule ka tikanyo ya tumelo y'a mu file Mulimu. 4#1 Bakor 12.12 Lu na ni lilama ze ñata fa mubili u li muñwi, mi lilama zeo kaufela li eza misebezi ye fapahana. 5Kamukwaoswana, niha lu li ba bañata cwalo ni luna, lu mubili u li muñwi ku Kreste, mi lu ngungahanyizwe yo muñwi ku yo muñwi sina lilama ze fapahani za mubili u li muñwi. 6#1 Bakor 12.4-11 Lu na ni limpo ze fapahani, ze lu swanezi ku sebelisa ka tikanyo ya sishemo s'a lu file Mulimu. Haiba Mulimu u lu file mpo ya ku ziba ku toloka linzwi la hae, lu eze cwalo ka ku ya ka tumelo ye lu na ni yona. 7Haiba ki mpo ya ku luta, lu swanezi ku luta. 8Haiba ki ya ku tiisa ba bañwi lipilu, lu swanezi ku eza cwalo. Ya na ni s'a ikabela ni ba bañwi, a eze cwalo ku si na butimani. Y'a li muzamaisi, a zamaise ka tokomelo. Ya tusa ba ba li mwa butata, a eze cwalo ka tabo.

9Lilato li swanezi ku ba la niti luli. Mu toye se si maswe, mi mu kumalele ku se sinde. 10Mu latane sina mo ba latanela batu ni bahabobona, mu nze mu kutekana ka musa. 11Mu sebeze ka tata, mi mu si ke mwa ba buzwa. Mu sebeleze Mulena ka pilu ye na ni mafulofulo. 12Mu be ni tabo kabakala sepo ya mina. Mu tiye lipilu mwa manyando, mi mu lapele ka mutundamenyi. 13Mu ikabele ze mu na ni zona ni banabahabo mina ba balumeli ha ba li tokwile, mi mu amuhele hande baenyi.

14 # Mat 5.44; Luk 6.28 Mu kupe Mulimu ku tohonolafaza ba ba mi nyandisa. Mu mu kupe ku ba fuyaula, isiñi ku ba kuta! 15#Litu 7.34 Mu tabe ni ba ba tabile, mi mu lile ni ba ba lila. 16#Mash 3.7 Mu be ni moya u li muñwi kwa batu kaufela. Mu si ke mwa ikuhumusa, kono mu eze ka buikokobezo ze nyinyani ze mu kupiwa ku eza. Mu si ke mwa ipona butali.

17Haiba mutu a mi eza maswe, mu si ke mwa mu eza maswe ni mina. Mu eze kamita zeo mu ikutwa kuli ki ze nde kwa batu kamukana. 18Mu like mo mu konela kaufela ku pila ka kozo ni batu kamukana. 19#Mul 32.35 Mu si ke mwa kutisa bumaswe, balikani ba ka, kono mu tuhele buhali bwa Mulimu bu lukise litaba. Kakuli ku ñozwi kuli, “Ki na ya ta kutiseza. Ki na ya ta likanyisa, ku bulela Mulena.” 20#Mash 25.21-22 Mi hape ku ñozwi kuli, “Haiba ya ku toile a shwile tala, u mu fe lico. Haiba a nyolilwe, u mu fe mezi. Ka ku eza cwalo, u ka mu zieza ni ku mu swabisa.” 21U si ke wa komwa ki bumaswe, kono u kome bumaswe ka bunde.

Currently Selected:

Baroma 12: Lozi09

Highlight

Copy