Baroma 1

Litumeliso

1Ki na Paulusi, mutanga wa Jesu Kreste. Ni muapositola ya ketilwe ni ku bizwa ki Mulimu kuli ni bulele Litaba ze Nde za mubuso wa hae.

2Mulimu n'a sepisize kale litaba ze nde zeo ka bapolofita ba hae, mwa Mañolo a Kenile. 3Litaba ze nde zeo li talusa za Mwan'a hae, Mulen'a luna Jesu Kreste. Kwa neku la butu, n'a pepilwe mwa lusika lwa Davida. 4Kwa neku la bumulimu bwa hae, u bonisizwe ka maata kuli ki Mwan'a Mulimu, ha s'a zusizwe kwa bafu. 5Ka yena, Mulimu u ni file tukelo ya ku ba muapositola kuli, ka libizo la hae, ni bonise macaba kaufela swanelo ya ku lumela ni ku mamela. 6Ni mina cwalo, ba ba mwa Roma, mu bizizwe ki Mulimu kuli mu be ba Jesu Kreste.

7Ni ñolela mina kaufela ba ba mwa Roma, ba ba latwa mi ba ba bizizwe ki Mulimu ku ba batu ba hae.

Mu fiwe sishemo ni kozo ki Mulimu Ndat'a luna ni Mulen'a luna Jesu Kreste.

Paulusi u lakaza ku y'o bona bakreste ba mwa Roma

8Ni kala ka ku itumela ku Mulimu wa ka, ka Jesu Kreste, kabakala mina kaufela, kakuli lifasi kamukana li utwile tumelo ya mina. 9Mulimu u kona ku paka kuli ze ni bulela ki niti, yena Mulimu ye ni sebeleza ka pilu ya ka kaufela, ka ku luta Litaba ze Nde za Mwan'a hae. Mulimu wa ziba kuli na mi hupulanga. 10Kamita ha ni lapela, ni kupa kuli Mulimu, ka ku lata kwa hae, a lukise linto kaufela kuli ni kone ku t'o mi lekula cwale. 11Kakuli ni lakaza hahulu ku mi bona, kuli lu kone ku t'o ikabela hamoho mpo ya Moya, ye ka mi tiisa. 12Se ni bulela kikuli mina, ni na cwalo, lu ta fumana tuso hamoho, na ka tumelo ya mina, ni mina ka tumelo ya ka.

13 # Lik 19.21 Banabahesu, mu swanezi ku ziba kuli i se li hañata ni nze ni itukiseza ku t'o mi potela, kono kamita ku bile ni se siñwi se si ni palelisizwe ku eza cwalo. Ne ni bata kuli musebezi wa ka u beye miselo ni ku mina cwalo, sina m'o beyezi miselo mwa macaba a mañwi. 14Ni na ni tameho kwa batu kaufela, ku ba ba zwezipili, ni ku ba ba si ka zwelapili, kwa baituti ni ba ba si ka ituta. 15Ki lona libaka ha ni lakaza ku t'o mi luta ni mina Litaba ze Nde za Mulimu, mina ba ba pila mwa Roma.

Maata a Litaba ze Nde

16 # Mar 8.38 Ha ni swabi ku bulela Litaba ze Nde. Ki maata a Mulimu a ku pilisa ba ba lumela kaufela, Majuda pili, kono ni bona balicaba. 17#Hab 2.4 Kakuli mwa Litaba ze Nde ku patuluzwi mw'a ezeza Mulimu kuli batu ba kone ku kutisana ni yena. Ki ka tumelo, ku zwa kwa makalelo mane ku isa kwa mafelelezo. Sina mo ku ñolezwi kuli, “Yena ya eziwa ya lukile ka tumelo, u ta pila.”

Mulatu wa batu kaufela

18Kaniti, buhali bwa Mulimu bu bonahala bu zwa kwa lihalimu, ili ku lwanisa sibi ni bumaswe kaufela bwa batu ba ba hanisa ba bañwi ku ziba niti, ka likezo za bona ze maswe. 19Mulimu u ba fa mulatu, kakuli se ba kona ku ziba batu bakeñisa Mulimu si zibahalile ku bona. Ki Mulimu kasibili ya ba zibisize sona. 20#But 13.1-9; Litu 17.8 Ku zwa kwa simuluho ya lifasi, za Mulimu ze sa bonwi, ili ona maata a hae a kamita ni bumulimu bwa hae, li bonahezi hande-nde. Batu ba kona ku li bona ka misebezi y'a ezize. Cwalehe, ha ba na buitatulo ni hanyinyani! 21#Baef 4.17-18 Ba ziba Mulimu, kono ha ba mu fi likute le li mu lukela. Ku itumela ku yena, ha ba itumeli. Mihupulo ya bona i fetuhile ye si na tuso. Minahano ya bona ya mbango i unsufezi. 22Ba li ba talifile, kanti ki likuba. 23#Mul 4.16-18; But 11.15; 12.24; 13.10-19 Bakeñisa ku lapela Mulimu ya sa shwi, ba lapela maswaniso a lika ze shwa ze cwaleka mutu, linyunywani, lifolofolo, kamba lihahabi.

24Batu ba ba bukuba cwalo, Mulimu u ba tuhelezi ku eza ze maswe ze lakazwa ki lipilu za bona, mi ba na ni takazo ya buhule bo bu swabisa, kuli ba shubule mibili ya bona. 25Ba fetula niti ya Mulimu ku i eza buhata. Ba lapela ni ku sebeleza ze ezizwe ki Mulimu, bakeñisa ku lapela ni ku sebeleza yena Mubupi kasibili, ya swanezi ku lumbiwa kamita! Amen.

26Kabakala ze ba eza batu, Mulimu u ba tuhelezi ku zwelapili mwa litakazo ze swabisa. Mane, basali ba fetula mikwa ya sipepo ku i eza ye si ya sipepo. 27Kamukwaoswana ni bona banna ba tuhela mukwa wa sipepo wa ku ina ni basali ba bona, mi ba libisa litakazo za bona kwa banna ba bañwi. Se ba tabela kalombe feela, mi ki fo, Mulimu wa ba nata kabakala likezo ze maswe za bona.

28Batu ba hana ku buluka zibo ya niti ka za Mulimu. Kacwalo u ba tuhelezi mwa minahano ya bona ye sinyehile, kuli ba eze lika ze sa swaneli ku eziwa. 29Ba tezi ze maswe za mifuta-futa. Ba na ni lunya ni lutimbo, mi ba lakaza za ba bañwi. Ba shwelana muna mi ba bulayana. Ba na ni likañi ni lindwa mi ba pumana. Ba seba. 30Ba sinyana mabizo mi ba toya Mulimu. Ki banyefuli, baikuhumusi, ni ba ba itumba. Mane, ba hupula mikwa ye miñwi ye miñata ya ku eza ze maswe. Ha ba kuteki bashemi ba bona. 31Ki batu ba ba si na lizwalo, ba ba sa ezi se ba sepisize, mi ha ba bonisi sishemo kamba makeke ku ba bañwi. 32Ba ziba kuli mulao wa Mulimu u bulela cwana kuli batu kaufela ba ba pila ka mukwa wo, ba swanelwa ki lifu. Kono ba zwelapili ba nze ba eza zona zeo mi, ka bumaswe bo bu fitelela, ba lumelela ba ba li eza.

Currently Selected:

Baroma 1: Lozi09

Highlight

Copy