Nehemia 3
3
Ku yahiwa limota sinca
1Limota la munzi la yahiwa ka mukwa wo. Muprisita yo muhulu Eliashibi ni baprisita ba bañwi ba yaha munyako o bizwa Munyako wa Lingu, ba u kakula, mi ba beya likwalo mwa libaka za zona. Ba yaha limota ku be ku y'o fita fa Tawa ya Mwanda ni kwa Tawa ya Hananele.
2Batu ba Jeriko ba yaha sibaka se si tatama.
Zakuri mwan'a Imiri, yena a yaha sibaka se siñwi se si tatama.
3Ba mushiku wa Hasenaa, bona ba yaha munyako o bizwa Munyako wa Litapi. Ba beya likota za munyako ni likwalo mwa libaka za zona, mi ba beya lipakiso ni mikwalelo ya ku kwalisa kwa munyako.
4Meremoti, mwan'a Uria ni muikulu wa Hakoza, a yaha sibaka se si tatama.
Meshulami, mwan'a Berekia ni muikulu wa Meshezabele, yena a yaha se si tatama seo.
Haili Zadoki, mwan'a Baana, yena a yaha se si tatama.
5Batu ba mwa munzi wa Tekoa ba yaha se si tatama. Kono batu ba munzi, ba ba zibahala, ba hana ku eza musebezi o ne ba filwe ki bazamaisi.
6Joyada mwan'a Pasea, ni Meshulami mwan'a Besodeya, ba yaha Munyako wa Jeshana. Ba beya likota za munyako ni likwalo mwa libaka za zona ni lipakiso ni mikwalelo ya ku kwalisa kwa munyako.
7Melatia wa kwa Gibioni, Jadoni wa kwa Merehoti, ni batu ba mwa minzi ya Gibioni ni Mizipa, ba yaha sibaka se si tatama, mane ku y'o fita kwa ndu ya mubusisi wa naha ye kwa wiko wa Nuka ya Yuferati.
8Uziele mwan'a Harehaya, mumbuti wa gauda, a yaha kalulo ye tatama.
Hanania, muezi wa milyani ye nunka hande, a yaha sibaka se si tatama mane ku y'o fita kwa Limota le Likima.
9Refaya mwan'a Huri, mubusisi wa kalulo ye ñwi ya sikiliti sa Jerusalema, a yaha sibaka se si tatama.
10Jedaya mwan'a Harumafi a yaha kalulo ye tatama, ili ye fakaufi ni ndu ya hae.
Hatushi mwan'a Hashabineya, yena a yaha kalulo ye tatama.
11Malika mwan'a Harimi, ni Hashubi mwan'a Pakati-Moabi, ba yaha kalulo ye tatama, hamoho ni Tawa ya Liondo.
12Shalumi mwan'a Haloheshi, mubusisi wa kalulo ya bubeli ya sikiliti sa Jerusalema, yena a yaha kalulo ye tatama. Bana ba hae ba basizana ba tusa mwa musebezi wo.
13Hanuni ni ba ba ne ba yahile mwa munzi wa Zanoa ba yaha Munyako wa Musindi. Ba beya likwalo mwa libaka za zona, ba beya cwalo lipakiso ni mikwalelo ya ku kwalisa sikwalo, mi ba lukisa limota la butelele bo bu eza mapeka a mianda i ketalizoho, ku be ku y'o fita kwa Munyako wa Siloko.
14Malikia mwan'a Rekabi, mubusisi wa sikiliti sa Beti-Hakerema, a lukisa Munyako wa Siloko. A beya likwalo mwa libaka za zona, mi a beya lipakiso ni mikwalelo ya ku kwalisa sikwalo.
15Shalumi mwan'a Kolohoze, mubusisi wa sikiliti sa Mizipa, a lukisa Munyako wa Liwelu-welu. A beya situwa fa munyako, a beya likwalo mwa libaka za zona, mi a beya lipakiso ni mikwalelo. Kwa Lisa la Siloe, a yaha limota le li bapani ni simu ya bulena, mane ku y'o fita kwa mapahamelo a shetumuka ku zwa kwa Munzi wa Davida.
16Nehemia mwan'a Azibuki, mubusisi wa kalulo ya sikiliti sa Beti-Zuri, yena a yaha sibaka se si tatama, ku be ku y'o fita kwa libita la Davida, kwa lisa, ni kwa mandu a masole.
Malivi ba ba sebelize kwa limota
17Malivi bao ba ba tatama, ni bona ba tusize kwa ku yaha limota sinca.
Rehumi mwan'a Bani a yaha kalulo ye tatama.
Hashabia, mubusisi wa kalulo ye ñwi ya sikiliti sa Keila, a yaha kalulo ye tatama ka libizo la sikiliti sa hae.
18Bavai mwan'a Henadadi, mubusisi wa kalulo ya bubeli ya sikiliti sa Keila, yena a yaha sibaka se si tatama.
19Ezeri mwan'a Jeshua, mubusisi wa Mizipa, a yaha kalulo ye tatama, ku libana ni ndu ya lilwaniso, ku be ku y'o fita fa sibaka fo li y'o sikuluhela limota.
20Baruki mwan'a Zabai a yaha sibaka se si tatama, mane ku y'o fita kwa makenelo a ndu ya Eliashibi, muprisita yo muhulu.
21Meremoti, mwan'a Uria ni muikulu wa Hakoza, yena a yaha sibaka se si tatama, a be a y'o fitelela ndu ya Eliashibi.
Baprisita ba ba sebelize kwa limota
22Baprisita bao ba ba tatama, ni bona ne ba tusize kwa ku yaha limota sinca.
Baprisita ba ba zwa mwa sibaka se si fakaufi ni Jerusalema, ba yaha sibaka se si tatama.
23Benjamine ni Hashubu ba yaha sibaka se si tatama, ili se si fapil'a mandu a bona.
Azaria mwan'a Maaseya, ili muikulu wa Ananaia, a yaha sibaka se si tatama, sa fapil'a ndu ya hae.
24Binui mwan'a Henadadi a yaha sibaka se si tatama, ku zwa fa ndu ya Azaria ku y'o fita fa sikutwana sa limota.
25Palali mwan'a Uzai a yaha sibaka se si tatama, ku kalela fa sikutwana ni tawa ye fa ndu ye kwahalimu ya bulena, fakaufi ni lapa la balibeleli.
26Yena a yaha homoho ni ba ba sebeza mwa Tempele ni ku pila mwa Ofele, mi ba y'o fita kwa sibaka se si kwa upa fakaufi ni Munyako wa Mezi ni Tawa ya Balibeleli.
Bayahi ba bañwi
27Batu ba munzi wa Tekoa ba yaha kalulo ye tatama, ili kalulo ya bona ya bubeli, ku zwa fa sibaka se ne si talimani ni tawa ye tuna ya balibeleli ba Tempele, ku y'o fita fa limota le ne li li fakaufi ni Ofele.
28Sitopa sa baprisita sa yaha sibaka se si tatama, ku kalela kwa Munyako wa Pizi ku liba kwa mutulo. Yo muñwi ni yo muñwi a yaha sibaka se si libani ni ndu ya hae.
29Zadoki mwan'a Imeri a yaha sibaka se si tatama, ili sa fapil'a ndu ya hae.
Shemaya mwan'a Shekania, mulibeleli wa Munyako wa upa, a yaha sibaka se si tatama sa Zadoki.
30Hanana mwan'a Shelemia ni Hanuni mwan'a wa busilela wa Zalafi ba yaha sibaka se si tatama, ili sibaka sa bona sa bubeli.
Meshurami mwan'a Berekia a yaha sibaka se si tatama sa fapil'a ndu ya hae.
31Malikia, mumbuti wa gauda, a yaha sibaka se si tatama, ku be ku y'o fita kwa ndu ye n'e sebeliswa ki babeleki ba mwa Tempele, ni balekisi. Ndu ye n'e li fakaufi ni Munyako wa Tibelelo, fakaufi ni ndu ye n'e li fahalimw'a situwa sa limota mwahal'a mutulo ni upa.
32Mambuti ba gauda ni balekisi ba yaha sibaka sa mafelelezo, se ne si kalela fa ndu ye mwa sikutwana mane ku y'o fita kwa Munyako wa Lingu.
Currently Selected:
Nehemia 3: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.