Luka 13

Ku tuhela mikwa ye maswe kamba ku shwa

1Ka yona nako yeo, batu ba bañwi ba t'o kandekela Jesu ka Magalilea ba ba ne ba bulailwe ki Pilato ha ne ba nze ba cisa sitabelo ku Mulimu. 2Jesu a ba alaba, a li, “Kana mu hupula kuli Magalilea bao ha ba bulailwe cwalo, i n'e li baezalibi ba ba maswe ku fita Magalilea kaufela? 3Batili, mi na mi bulelela kuli ha mu sa tuheli mikwa ya mina ye maswe, ni mina, mu ta bulaiwa kaufela kamukwaoswana. 4Bale bo, ba lishumi ka ba supile ni a li muñwi ba ba ne ba wezwi ki kalani ya Siloe, kana mu hupula kuli i n'e li bona lifosi ze ne fita batu kaufela ba ba ne ba yahile mwa Jerusalema, nji? 5Batili! Ni mi bulelela kuli haiba mu sa tuheli mikwa ya mina ye maswe, mu ta shwa, kaufel'a mina, kamukwaoswana.”

Nguli ya kota ya feiga ye ne sa beyi

6Jesu kih'a ba bulelela nguli ye, a li, “Mutu n'a cezi kota ya feiga mwa simu ya hae ya veine. A ya ku yona ku y'o bata miselo, kono a y'o i tokwa. 7Kiha s'a li ku mulimi wa hae, ‘Bona, se li lilimo ze talu ni nze ni tahanga ku t'o bata miselo kwa kota ye, kono ni kutanga mazoho-zoho. U i leme! I sinyezañi mubu?’ 8Kono mulimi a li, ‘I tuhele silimo se feela, muñ'a ka. Ni ta yepa mukokolombwa, ni i beye musutelo. 9Haiba i beya isaho, ki hande. Ha i sa beyi, kihona u ta i lema.’ ”

Jesu u folisa musali ka la Pumulo

10Ka Lizazi la Pumulo Jesu n'a luta mwa sinagoge. 11Ne ku na ni musali ya kulile lilimo ze lishumi ka ze supile ni si li siñwi. N'a kenwi ki moya o maswe o n'e mu kotobanisize, a sa koni ku otoloha. 12Jesu h'a mu bona a mu biza, a li ku yena, “Musali, u lukuluzwi kwa butuku bwa hao.” 13A mu beya mazoho, mi kapili a otoloha a nz'a lumba Mulimu.

14 # Mut 20.9-10; Mul 5.13-14 Muzamaisi wa sinagoge a nyema kakuli Jesu n'a folisize ka Lizazi la Pumulo. Cwale kiha s'a huweleza kwa nyangela, a li, “Ku na ni mazazi a silezi, ao lu swanezi ku sebeza ka ona. Mu n'o tahanga ka ona mazazi ao kuli mu t'o foliswa, isiñi ka la Pumulo!”

15Mulena a mu alaba, a li, “Mina baipi! Kana mutu ni mutu ku mina h'a lukululangi pulu ya hae, kamba mbongolo ya hae, ku y'o i nwisa mezi ka la Pumulo, na? 16Cwale musali yo, mwan'a Abrahama ya n'a tamilwe ki Satani lilimo ze lishumi ka ze supile ni si li siñwi, kana n'a sa lukeli ku tamululwa mwa mawenge a hae ka la Pumulo?” 17Kalabo yeo, ya swabisa lila za Jesu kaufela, kono nyangela yona ne i tabiswa ki limakazo ze komokisa z'a n'a eza kaufela.

Nguli ya peu ya masitete

(Mat 13.31-32; Mar 4.30-32)

18Jesu a li, “Kana Mubuso wa Mulimu u swana niñi? Ni ka u likanyisa ni sika mañi? 19U swana ni peu ya masitete ye cezwi ki mutu mwa simu ya hae. Peu ya hula, ya ba kota, mi linyunywani za t'o yahela liyaleto za zona kwa mitai ya yona.”

Nguli ya mumela

(Mat 13.33)

20Mi hape Jesu a li, “Mubuso wa Mulimu ni ka u likanyisa niñi? 21U swana ni mumela w'a ngile musali mi, a nz'a luba, a u kopanya ni bupi kuli liñende li huhumuhe.”

Munyako o kumbani

(Mat 7.13-14, 21-23)

22Jesu h'a ya kwa Jerusalema, n'a nz'a luta mwa minzi ni minzinyana. 23Cwale mutu yo muñwi a mu buza, a li, “Mulena, kana ki ba banyinyani ba ba ka piliswa?”

Kih'a li ku yena, 24“Mu eze ka tata kuli mu kone ku kena ka munyako o kumbani, kakuli na mi bulelela, ki ba bañata ba ba ta bata ku kena, kono ha ba na ku kona.

25“Muñ'a ndu ha s'a zuhile, mi a mi kwalela kwande, mu ta ngongota, mu li, ‘Mulena, u lu kwalulele!’ U ta li ku mina, ‘Ha ni zibi ko mu zwa!’ 26Cwale mu ta alaba kuli, ‘Ne lu ca, lu nwa ni wena, mi u lutile habo luna!’ 27#Lipi 6.8 Yena hape u ta li, ‘Ha ni zibi ko mu zwa. A mu zwe ku na, mina kaufela ba ba eza ze maswe!’ 28#Mat 22.13; 25.30 #Mat 8.11-12 Mu ta lila ni ku kweca meeno ha mu ta bona bo Abrahama, Isaka, Jakobo ni bapolofita kaufela mwa Mubuso wa Mulimu, mina mu latezwi kwande. 29Batu ba ta zwa kwa upa ni kwa wiko, kwa mutulo ni kwa mboela, mi ba ta ina fa tafule mwa Mubuso wa Mulimu. 30#Mat 19.30; 20.16; Mar 10.31 Mu zibe kuli ba bañwi ba ba li kwapili ka nako ye ba ta ba kwamulaho, mi ba ba li kwamulaho, bona, ba ta ba kwapili.”

Jesu u lilelela Jerusalema

(Mat 23.37-39)

31Ka yona nako yeo, Bafalisi ba bañwi ba taha ku Jesu, mi ba li ku yena, “U swanezi ku zwa mo, u ye ku sili, kakuli Heroda u bata ku ku bulaya.”

32Jesu a li ku bona, “Mu y'o bulelela luwawa lo, ‘Ni sa leleka mioya ye maswe, ni ku folisa batu kacenu ni kamuso, mi la bulalu ni ta be ni felize musebezi wa ka.’ 33Nihakulicwalo, ni swanezi ku funduka kacenu, kamuso ni sa li mwa nzila, mi ni ta y'o fita la bulalu, kakuli ha ku swaneli kuli mupolofita a bulaelwe ku sili, isi mwa Jerusalema.

34“Mawee, Jerusalema, Jerusalema! Wena ya bulaya bapolofita, wena ya pobaula balumiwa ba Mulimu ka macwe! Ha si mo ne ni lakaleza ku kubukanya bana ba hao sina kuhu ha i kubukanya tuzwinyani mwa mafufa a yona, kono u hanile! 35#Lipi 118.26 Cwale, munzi wa hao u ta ba litota. Ha u sa na ku ni bona, na ku bulelela, ku fitela ha u ka li, ‘A tohonolofazwe ya taha ka libizo la Mulena!’ ”

Currently Selected:

Luka 13: Lozi09

Highlight

Copy