Maheberu 12
12
Mulimu Ndat'a luna
1Haili luna, lu potolohilwe ki lipaki zeo ze ñata-ñata. Hakulicwalo, lu zwise ze lu imela mwa nzila, ni sibi se si lu kumalezi ka tata, mi lu mate ka ku tiya mwa siyano ye lu li ku yona. 2Lu lubukele feela Jesu, kakuli ki ku yena fo lu tomile tumelo ya luna ku zwa kwa makalelo ku y'o fita kwa mafelelezo. H'a si ka zwafa kabakala sifapahano. Kakuli n'a libelezi tabo ye ka mu tahela, h'a si ka isa pilu kwa maswabi a ku shwela fa sifapahano. Mi cwale, u inzi ku la bulyo la lubona lwa Mulimu.
3Mu mu hupule! Mu hupule ni mw'a itiiselize ha n'a lwaniswa ki baezalibi. Mi ni mina cwalo mu si ke mwa katala kapa ku zwafa. 4Mwa ndwa ya mina ni sibi, ha mu si ka fita kale fa nako ya ku lwanela ku bulaiwa. 5#Job 5.17; Mash 3.11-12 Kana mu se mu libezi manzwi a tiisa pilu ao Mulimu a bulela ku mina inge kwa bana ba hae? U ize,
“Mwan'a ka, mamela Mulena h'a ku shapa,
mi u si ke wa zwafa h'a ku kalimela.
6Kakuli Mulena u kalimela y'a lata kaufela,
mi u shapa y'a talima ili mwan'a hae kamukana.”
7Mu itiise mwa butata. Mu bu talime ili kalimelo ya mushemi, kakuli manyando a mina a bonisa kuli Mulimu u mi sweli sina bana ba hae. Kana u kile a ba teñi mwana ya si ka kalimelwa ki ndat'ahe? Batili! 8Haiba mu sa kalimelwi sina mo ba kalimelwa bana ba hae kaufela, libaka kikuli mu bana ba mwendakumongo, isiñi bana ba hae luli. 9Bo ndat'a luna ba ba lu pepile ne ba lu kalimela, mi ne lu ba kuteka. Hakulicwalo lu swanezi ku ipeya hahulu ni ku fita kwatas'a Ndat'a luna ya kwa lihalimu kuli lu pile! 10Bo ndat'a luna ne ba lu kalimela nakonyana feela sina mo ne ba bonela kuli ne ku lu lukela. Kono Mulimu u eza cwalo ku lu tusa kuli lu be ni kabelo kwa ku kena kwa hae. 11Nako ye lu kalimelwa ka yona, lu fumana kuli kalimelo ki nto ye swabisa, ye sa tabisi. Kono kwapili, bona bao ba ba kalimezwi ba kutula mupuzo o' tahiswa ki kalimelo, ili kozo ni bupilo bo bu lukile.
Litaelo ni likelezo
12 #
Isa 35.3
Cwale mu nanule mazoho a mina a lepelela, mi mu tiise mañwele a mina a si na maata! 13#Mash 4.26 Mu zwelepili mu nze mu zamaya mwa linzila ze otolohile, kuli lihutu la sihole li si ke la palelwa kono li foliswe.
14Mu like ku pila ka kozo ni batu kaufela, mi mu like ku pila bupilo bo bu kenile, kakuli ya si na bona h'a na ku bona Mulena. 15#Mul 29.18 Mu tokomele kuli mwahal'a mina ku si ke kwa ba ni ya ka fetuhela sishemo sa Mulimu. Mu tokomele kuli ku si ke kwa ba ni ya swana sina simela se si baba, se si mela ni ku tahisa kozi kwa batu ba bañata ka sifanu sa sona. 16#Sim 25.29-34 Mu tokomele kuli ku si ke kwa ba ni ya pila ka buhule, kamba ya si na taba ni za Mulimu sina Isau, ya n'a lekisize litukelo za buhulu bwa hae ka mulalelo u li muñwi. 17#Sim 27.30-40 Mwa ziba kuli mwamulaho, a bata ku fumana mbuyoti ku ndat'ahe. Kono a lelekwa, kakuli n'a tokwile mukwa wa ku fetula s'a n'a ezize, niha n'a si bata ka meeto a mafubelu.
18 #
Mut 19.16-22; 20.18-21; Mul 4.11-12; 5.22-27 Ha mu si ka sutelela fakaufi ni linto ze swana sina lilundu le li ca mulilo, kapa ku sabiswa ki lififi le linsu suu, kapa ñuli, sina ba sicaba sa Isilaele kwa lilundu la Sinai. 19Ba utwa ni lilata la tolombita ni mulumo wa linzwi. Ha ba utwa linzwi leo ba kupa kuli ba si ke ba li utwiswa hape. 20#Mut 19.12-13 Ne ba kaleliswa ki taelo yeo, ye li, “Sibupiwa sifi kapa sifi se si ka ngunyuta lilundu, niha i ka ba folofolo, si swanezi ku pobaulwa ka macwe, si bulaiwe.” 21#Mul 9.19 I n'e li pono ye ne sabisa hahulu-hulu, mane Mushe a li, “Mawee, na saba, mane na ngangama!”
22Nihakulicwalo mu tile kwa lilundu la Sione, kwa munzi wa Mulimu ya pila, kwa Jerusalema wa kwa lihalimu, ni likiti-kiti za mangeloi a ona. 23Mu tile kwa mukopano wa tabo wa baeli ba Mulimu, bao mabizo a bona a ñozwi kwa lihalimu. Mu tile ku Mulimu, yena muatuli wa batu kaufela, ni kwa mioya ya batu ba ba lukile, ba ba se ba petehile. 24#Sim 4.10 Mu tile ku Jesu ya lukisize bulikani bo bunca, ni kwa mali a hasizwe, a' bulela ze nde hahulu ku fita za mali a Abele.
25 #
Mut 20.22
Mu tokomele, mi mu si ke mwa hana ku teeleza ya bulela! Ba ba hanile ku teeleza ya n'a ba fa litemuso ka libizo la Mulimu, mwa lifasi, ha ba si ka banduka. Luna lu ta banduka cwañi, haiba lu fulalela ya bulela ni luna a li kwa lihalimu! 26#Hag 2.6 Muta wani, linzwi la hae la nyanganisa lifasi, kono cwale u sepisize, a li, “Ni ta nyanganyisa hape i si lifasi feela, kono ni lihalimu cwalo.” 27Ha kutwi “Hape” ku lu bonisa hande fo ku sweu kuli ze bupilwe kaufela li ta nyanganyiswa ni ku zwiswa, ili kuli ze sa koni ku nyanganyiswa li siyale cwalo.
28A lu itumeleñi, kakuli lu se lu fumani mubuso o si ke wa nyanganyiswa. Lu bonise buitumelo bwa luna mi lu sebeleze Mulimu ka mukwa o' ka mu tabisa, ka likute ni sabo. 29#Mul 4.24 Kakuli kaniti Mulimu wa luna ki lubya lo lu ciseleza.
Currently Selected:
Maheberu 12: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
