Simuluho 32

Jakobo u itukiseza ku kopana ni Isau

1Jakobo a zwelapili mwa musipili wa hae, mi a katanyezwa ki mangeloi a Mulimu. 2H'a bona, a bulela, a li, “Ye ki mpi ya Mulimu,” mi a biza sibaka seo Mahanaimi.

3Jakobo a luma batu ku muhulwan'a hae Isau kwa Seiri mwa naha ya Edomo. 4A ba taluseza cwana, a li, “Ha mu ka fita, mu bulelele Isau, mu li, ‘Jakobo, mutang'a hao ya ikokobeza, n'a inzi ku malum'ahe Labani, mi kabakala ku pateha, kihona h'a liyehile mane ku t'o fita nako ye. 5U na ni limbongolo, lingu, lipuli ni batanga ba banna ni basizana. Wa ipiha ku wena, muñ'a hae, ka sepo ya kuli mwendi u ka mu amuhela ka musa.’ ”

6Balumiwa ha ba kutela ku Jakobo, ba li, “Lu il'o fita ku muhulwan'a hao Isau, mi s'a li mwa nzila ni yena ku t'o ku katanyeza. U taha ni batu ba mianda ye mine.” 7Jakobo a saba hahulu ni ku zieleha. A kauhanya batu b'a n'a zamaya ni bona, ni lingu za hae, lipuli, likomu ni likamele cwalo ka likalulo ze peli. 8A hupula, a li, “Haiba Isau u tela ku t'o ni lwanisa, u ta kala ka kalulo ya pili, mi ya bubeli i ta banduka.”

9Jakobo kih'a lapela, a li, “Oho, wena Mulimu wa kuku Abrahama, ni Mulimu wa ndate Isaka, a ku ni utwe! Wena Muñ'a Bupilo ya ize ku na, ‘Kutela mwa naha ya henu ni kwa banabahenu. Na, ni ta ku lukiseza hande lika kaufela!’ 10Luli ha ni swanelwi ki musa ni busepahali b'o ni bonisize, na, mutang'a hao. Ha ku na se ni silile ni sona fa Nuka ya Jordani. Ni fitile feela haisi ona mulamu wa ka, mi cwale ni kutile ni litopa ze, ze peli. 11Na lapela, u ni tuse kwa maata a muhulwan'a ka Isau. Na saba mwendi u tela ku t'o lu lwanisa ni ku lu bulaya kaufel'a luna, mane ni bona basali ni bana cwalo. 12#Sim 22.17 U hupule sepiso ya hao, ha u ize, ‘Ni ta ku lukiseza lika kaufela, mi ni ta atisa lusika lwa hao kuli lu si ke lwa konwa ku balwa. Ba ta ba ba bañata sina mushabati wa liwate.’ ”

13Ha s'a inzi busihu kaufela fo, kiha s'a ketela muhulwan'a hae Isau limpo kwa lika z'a n'a na ni zona: 14lipuli za litole ze mianda ye mibeli ni lipoho za zona ze mashumi a mabeli, lingu za litole ze mianda ye mibeli ni lipoho ze mashumi a mabeli, 15likamele za mabisi ze mashumi a malalu ni bana ba zona, litole ze mashumi a mane ni lipoho ze lishumi, limbongolo ze mashumi a mabeli ze sihali ni ze tunanyana ze lishumi. 16Mutapi o muñwi ni o muñwi a u beya mwa pabalelo ya yo muñwi wa batanga ba hae, mi a li ku bona, “Mu ni etelele, mi mu siye sibaka mwahal'a mitapi.” 17A laela mutanga wa pili, a li, “Ha u katana muhulwan'a ka Isau, mi a buza kuli, ‘Muñ'a hao ki mañi? Wena u ya kai? Ki mañi muñ'a limunanu z'o soteza ze?’ 18U alabe cwana, u li, ‘Ki za mutang'a hao Jakobo. Ki mpo y'a lumelela muñ'a ka Isau. Yena Jakobo kasibili wa taha mwamulaho a luna.’ ” 19A fa taelo ye swana ku wa bubeli, ku wa bulalu, ni ku bona kamukana ba ba ne ba soteza mitapi, a li, “Se ki sona se mu swanezi ku bulela ku Isau ha mu katana ni yena. 20Mu bulele cwana, mu li, ‘Eeni, mutang'a hao Jakobo wa ta mwamulaho a luna.’ ” Jakobo a li, “Ni ta mu wisa pilu ka limpo ze ni tangeta, mi ha ni ta katana ni yena mwendi u ta ni swalela.” 21Limpo za itangeta, mi yena a lobala hona mwa mafulo mo.

Jakobo u mangana ni lingeloi kwa Peniele

22Bona busihu bo Jakobo a zuha, a nga basali ba hae ba babeli, ni batanga ba bona ba basali ba babeli ni bana ba hae ba lishumi ka a li muñwi, mi ba sila Nuka ya Jaboki fa mupao. 23#But 10.12 Ha s'a ba silisize, a silisa cwalo ni liluwo la hae kamukana. 24#Hos 12.3-4 A siyala a li nosi.

Cwale, a t'o manganiswa ki mutu ku fitela ha ku patalala. 25Mutu yo h'a bona kuli Jakobo wa mu palelwa, a mu nata mwa noka, mi ya leya ha ba nze ba mangana. 26Mutu yo a li, “Ni tuhele ni zamaye, kakuli li tuha li pazula.”

Kono Jakobo a mu alaba, a li, “Ha ni na ku ku tuhela konji ha u ta ni fuyaula pili.”

27Mutu yo a buza, a li, “Ki wena mañi libizo la hao?”

Yena a mu alaba, a li “Ki na Jakobo.”

28 # Sim 35.10 Mutu yo a li, “Ha u sa na ku bizwa Jakobo. U ta bizwa Isilaele, kakuli u lwanile ni Mulimu ni batu, mi u tuzi.”

29 # Baat 13.17-18 Jakobo a li, “A ku ni bulelele libizo la hao.”

Kono a alaba, a li, “U ni buzezañi libizo la ka?” Kiha s'a fuyaula Jakobo.

30Jakobo a li, “Ni boni Mulimu ka meeto, mi ni sa pila!” Kiha s'a biza sibaka seo Peniele. 31Lizazi la pazula Jakobo h'a funduka mwa Peniele, mi n'a cuñuta kabakala noka ya hae. 32Kikabakaleo bana ba Isilaele ha ba sa ci nama ya noka ni kacenu. I n'e li hona fa silama fo, f'a n'a natilwe Jakobo.

Currently Selected:

Simuluho 32: Lozi09

Highlight

Copy