Simuluho 25

Baikulu ba bañwi ba Abrahama

(1 Lita 1.32-33)

1Abrahama a nyala musali yo muñwi ya n'a bizwa Ketura. 2Yena a mu pepela Zimerani, Jokeshani, Medani, Midiani, Ishibaki ni Shua. 3Jokeshani a pepa Seba ni Dedani, mi Dedani a pepa Maashurimi, Maletushimi ni Maleumimi. 4Bana ba Midiani n'e li Efa, Efere, Hanoki, Abida ni Elida. Bao kamukana n'e li baikulu ba Ketura.

5Abrahama a siyela Isaka liluwo la hae kaufela. 6Kono a si ka shwa kale, a aba limpo ku fa bana ba hae b'a n'a pepile kwa basali ba bañwi, mi a ba lumelela kwa naha ya kwa upa, ili kwahule ni mwan'a hae Isaka.

Lifu ni puluko ya Abrahama

7Abrahama u pilile lilimo ze mwanda ka mashumi a supile ni ze ketalizoho. 8A shwa a li mucembele luli, wa lilimo ze ñata ze nde, mi a y'o kopana cwalo ni bafu bahabo. 9Bana ba hae, bo Isaka ni Ishimaele, ba mu buluka mwa sikoti sa licwe sa Makapela, mwa simu ye n'e li ya Eferoni mwan'a Zohari wa Muhiti, kwa upa wa Mamare. 10#Sim 23.3-16 Ki yona simu y'a n'a lekile Abrahama kwa Mahiti, mi bubeli bwa bona, Abrahama ni musal'a hae Sara, ba bulukilwe hona mo. 11Mwamulaho wa lifu la Abrahama, Mulimu a fuyaula Isaka mwan'a hae, ya n'a yahile fakaufi ni siliba sa Ya Pila ya ni bona.

12Ki lo lusika lwa Ishimaele, mwan'a Abrahama ya pepilwe ki Hagare wa Muegepita mutang'a Sara. 13A, ki ona mabizo a bana ba Ishimaele ka ku tatamana kwa bona. Mweli wa Ishimaele n'e li Nebajoti. Yena a tatamwa ki Kedare, Abideela, Mibisamu, 14Mishima, Duma, Masa, 15Hadadi, Tema, Jeturi, Nafishi, ni Kedema. 16Bao ki bona bana ba Ishimaele, mi ao ki ona mabizo a bona, a minzi ni mafulo a bona cwalo. Hamoho ki malena ba lishumi ka ba babeli, ni masika a bona. 17Ishimaele a tokwahala a na ni lilimo ze mwanda ka mashumi a malalu ni ze supile, mi a y'o kopana ni bafu bahabo. 18Lusika lwa Ishimaele ne lu yahile mwa naha ye mwahal'a Havila ni Shuri, kwa upa wa Egepita mwa nzila ye ya kwa Asiria. Ba ne ba kauhani ni bahabo bona.

Ku pepwa kwa Isau ni Jakobo

19Ye ki yona taba ya Isaka, mwan'a Abrahama. 20Isaka n'a na ni lilimo ze mashumi a mane h'a nyala Rebeka, mwan'a Betuele wa Muarami wa kwa Mesopotamia, ili kaizel'a Labani wa Muarami. 21Kakuli musal'a hae n'a si na bana, Isaka a mu lapelela ku Muñ'a Bupilo. Muñ'a Bupilo a alaba tapelo ya hae, mi Rebeka a itwala. 22Cwale mambile ao a sundana mwa mba ya hae, mi a li, “Haiba ki mona mo ku ta inela, kanti cwale tuso ya ku pila ki ifi?” Kih'a y'o lapela ku Muñ'a Bupilo, a kupa kalabo.

23 # Baro 9.12 Muñ'a Bupilo a li ku yena,

“Mwa mba ya hao ku na ni macaba

a mabeli.

U ta pepa batu ba babeli ba ba toyani.

Yo muñwi u ta ba ni maata ku fita

yo muñwi,

mi yo muhulu u ta ba mutang'a

yo munyinyani.”

24Nako ya hae ya ku puluha ya fita, mi a pepa mambile. 25Wa pili kwa ku pepwa n'e li yo mufubelu, mi mubili wa hae n'o na ni buambo sina siapalo sa boya, kih'a beiwa libizo la Isau. 26Munyan'a hae h'a pepwa, n'a swalelezi ka tata lisito la Isau, mi a bizwa Jakobo. Bana bao ha ba pepiwa Isaka n'a s'a na ni lilimo ze mashumi a silezi.

Isau u lekisa litukelo za buhulu bwa hae

27Bashimani ba hula, mi Isau a ba muzumi yo mutuna, mutu wa mwa naheñi, kanti haili yena Jakobo n'a kuzize, n'a itolelanga feela mwa hae. 28Isaka n'a olisa Isau, kakuli n'a ikolanga ku ca lifolofolo z'a n'a bulayanga, kono haili Rebeka, yena n'a olisa Jakobo.

29Zazi le liñwi Jakobo n'a apeha lico, mi Isau a fita a zwa kwa ku zuma mwa naheñi. 30N'a shwile tala. Kiha s'a li ku Jakobo, “Ni lapile. A ku ni fe kwa lico zeo, ze eza ike ki ze fubelu.” Kikabakaleo h'a bizwa Edomo.

31Kono Jakobo a alaba, a li, “Ni ta ku fa kwateñi, haiba wena u ni fa litukelo za hao za mweli.”

32Isau a li, “Ku lukile! Ni na, ni tuha ni shwa. Cwale litukelo zeo li ta ni tusa sika mañi?”

33 # Maheb 12.16 Jakobo a alaba, a li, “U konke pili kuli u ni fa litukelo za hao.”

Isau a konka, mi a lekisa litukelo za hae za mweli ku Jakobo. 34Cwale Jakobo a mu fa buhobe ni busunso. A ca ni ku nwa. Kiha s'a yema, a zwa. Isau ki mw'a n'a nyaziselize cwalo litukelo za hae za ku ba mweli.

Currently Selected:

Simuluho 25: Lozi09

Highlight

Copy