Simuluho 14

Abrame u pilisa Lota

1Amarafele n'a li mulena wa Shinari, Arioki mulena wa Elasari, Kedorelaomere mulena wa Elami, ni Tidali mulena wa Goimi. 2Malena bao ba lumelelana ku y'o lwanisa malena ba ketalizoho, ili Bera mulena wa Sodoma, Birisha mulena wa Gomora, Shinabi mulena wa Adima, Shemebere mulena wa Zeboimi ni mulena wa Bela kamba Zoari. 3Malena bao ba ketalizoho ba lumelelana ku kopanya limpi za bona mwa Libala la Sidimi, le li se li fetuhile Liwate la Lizwai kacenu. 4Ne ba zamaisizwe ki Kedorelaomere ka lilimo ze lishumi ka ze peli, kono mwahal'a silimo sa bulishumi ka ze talu ba mu fetuhela. 5Ka silimo sa bulishumi ka ze ne, Kedorelaomere ni ba ba ne ba lumelelani ni yena ba tisa limpi za bona, mi ba tula Marefaimi mwa Ashiteroti-Karnaimi ni Mazusini mwa Hami, ni Maemimi mwa Shave-Kiryataimi. 6Ba tula ni Mahori mwa malundu a Seiri, mane ku y'o fita kwa Parani kwa makalelo a lihalaupa. 7Cwale ba kuta, mi ba t'o fita kwa Kadeshi kapa Liwelu-welu la Katulo, mi ba tula naha kaufela ya Maameleke, hamohocwalo ni ya Maamori ba ba ne ba pila mwa Hazazoni-Tamare.

8Cwale malena ba Sodoma, Gomora, Adima, Zeboimi ni Bela ba tisa limpi za bona ku t'o lwanela mwa Libala la Sidimi. 9Ba t'o lwanisa Kedorelaomere wa kwa Elami, Tidali wa kwa Goimi, Amarafele wa kwa Shinari, ni Arioki wa kwa Elasari. Cwale malena ba bane ba lwanisa ba ketalizoho. 10Libala la Sidimi kaufela ne li tezi misima ya tala, mi malena ba Sodoma ni Gomora, ha ba lika ku saba ndwa, ba wela mwateñi. Ba bañwi ba y'o pilela mwa malundu. 11Malena ba bane bao, ba nga lika kamukana ze n'e li mwa Sodoma ni Gomora, hamohocwalo ni lico, mi ba ikela. 12Ba ngelela ni Lota, mwan'a munyan'a Abrame, ni z'a n'a na ni zona kamukana, kakuli n'a pila mwa Sodoma.

13Kono mutu ya n'a bandukile a taha, mi a t'o bulelela Abrame wa Muheberu taba yeo. N'a pila fakaufi ni likota za Mamare wa Muamori, ya n'a li mwanahabo Eshikoli ni Anere. Bao n'e li balikani ba Abrame. 14Abrame ha s'a utwile kuli mwanahabo u swelwi, a biza batu ba hae ba ba sepahala, ili ba mianda ye milalu ni ba lishumi ka ba supile ni a li muñwi hamoho, mi ba latelela malena bao, mane ba y'o fita kwa Dani. 15Koo, Abrame ni batu ba hae ba kauhanya mwa litopa, ba ba lwanisa busihu, mi ba ba tula. Ba ba lelekisa, mane ba y'o ba fitisa kwa Hoba, ili kwa mutulo wa Damaseka. 16Ba amuha lika za bona ze ne hapilwe kaufela. Abrame kih'a kuta ni Lota ni za hae kamukana, hamohocwalo ni basali ni batu ba bañwi.

Melekisedeke u tohonolofaza Abrame

17Abrame ha s'a kutile, a sin'o tula Kedorelaomere ni malena b'a n'a kopani ni bona, mulena wa Sodoma a y'o mu katanyeza mwa Libala la Shave le li bizwa hape Libala la Mulena. 18#Maheb 7.1-10 Melekisedeke ya n'a li mulena wa Salema ni muprisita wa Mulimu, Muambakani ya Pahami, a tiseza Abrame buhobe ni waine. 19A mu tohonolofaza ka manzwi a, a li,

“Mulimu, Muambakani ya Pahami

ya ezize lihalimu ni lifasi,

a tohonolofaze Abrame!

20Ku lumbekwe Mulimu,

Muambakani ya Pahami,

ya ku konisize ku tula lila za hao!”

Mi Abrame a mu fa kalulo ya bulishumi ya z'a n'a hapile kaufela.

21Cwale, mulena wa Sodoma a li ku Abrame, “U ipulukele z'o il'o hapa kaufela, kono u ni kutiseze batu ba ka, kamukan'a bona.” 22Abrame kiha s'a mu alaba, a li, “Ni konka ka Muñ'a Bupilo, Mulimu Muambakani ya Pahami, ya ezize lihalimu ni lifasi! 23Ha ni na ku nga sifi ni sifi s'e li sa hao, nihaili bwanda, kamba kahala ka ku tamisa makatulo a hao, kuli u si ke wa bulela ni kamuta kuli, ‘Ki na ya fumisize Abrame.’ 24Ha ku na se ni ka ikungela. Ni ta amuhela feela se ba itusisize batu ba ka, ni kabelo ya balikani ba ka. Bo Anere, Eshikoli ni Mamare, bao, bona ba ta nga kabelo ya bona.”

Currently Selected:

Simuluho 14: Lozi09

Highlight

Copy