Ezra 9

Ezira u bilaela ka ku nyalana kwa Maisilaele ni balicaba

1Zeo kaufela ha li se li felile, ba bañwi kwa baeteleli ba Isilaele ba t'o ni bulelela kuli batu, baprisita ni Malivi ha ba si ka ikauhanya ni batu ba ba pila mwa Kanana, Amoni, Moabi ni Egepita, kamba ku ketahana kwa mikwa ya Mahiti, Maperizi, Majebusi ni Maamori. Kutwi ne ba eza lika ze nyenyisa, ze swana ni ze ne ba eza batu bao. 2Banna ba Majuda ne ba nyala basali ba balicaba, mi ka mukwa wo, batu ba Mulimu ba ba kenile ne ba se ba silafalizwe. Mane lifosi ze tuna n'e li bona baeteleli ni manduna kasibili. 3Ha ni utwa cwalo na pazula liapalo za ka, na imbwetukela kabakala maswabi, na kumula milili ni mulelu wa ka, mi na inyongamena ni felezwi ki maata. 4Na ina hona fo ni nze ni swabile ku fitela nako ya sitabelo sa manzibwana ha si eziwa. Batu kiha ba t'o kubukana ku na, ili ba ba ne ba sabile kamukana kabakala s'a n'a bulezi Mulimu wa Isilaele bakeñisa libi za ba ba ne ba kutile kwa butanga.

5Nako ya sitabelo sa manzibwana ha i se i fitile, na yema fo ne ni inzi, ni nze ni swabile, ni sa apezi liapalo za ka ze pazuhile, mi na kubama ku lapela, ni yemiselize mazoho a ka ku Muñ'a Bupilo, Mulimu wa ka. 6Na li, “Mulimu, ni swabile hahulu, mane ha ni koni ku nangukisa toho ya ka fapil'a hao. Libi za luna li bundami, mane li fitelela litoho za luna, mi li y'o fita kwahalimu. 7Ku zwa kwa mazazi a bo kukw'a luna ku t'o fita nako ye, luna, batu ba hao, lu fosize hahulu. Kabakala libi za luna, luna, malen'a luna, ni baprisita ba luna lu wezi mwa mazoho a malena ba balicaba, mi lu bulailwe, lwa uzwezwa, mi lwa ngiwa sina mapantiti, ni ku swabiswa hahulu sina mo lu sa inezi ni kacenu le. 8Cwale ka nako ye kuswani, Muñ'a Bupilo, Mulimu wa luna, u lu shemubile ka ku bandukisa ba bañwi ba ku luna, ku t'o pila ka buiketo mwa sibaka se, se si kenile. U lu bandukisize mwa butanga, mi u lu file bupilo bo bunca. 9Ne lu li batanga, kono ha u si ka lu tuhelela mwa butanga cwalo. U ezize kuli malena ba Peresia ba lu shemube ni ku lu lumelela ku funduka ni ku t'o ku yahela sinca Tempele ya hao ye n'e s'e sinyehile, ni ku t'o fumana buiketo kwanu mwa Juda ni Jerusalema.

10“Kono cwale, Mulimu, se lu ka bulela ki sika mañi mwamulaho a lika ze ñata ze ezahlile ze? Lu hanile litaelo kamukana. 11N'o lu file zona ka batanga ba hao, bona bapolofita. Ne ba lu bulelezi kuli mwa naha mo lu ka y'o ina ki naha ye silafezi, kakuli batu ba ba yahile ku yona ba talize naha yeo ka likezo ze nyenyisa ze masila, ku zwa kwa makalelo, mane ku y'o fita kwa mafelelezo a yona. 12#Mut 34.11-16; Mul 7.1-5 Ba lu bulelezi kuli lu si ke lwa nyalana ni bona batu bao, mi lu si ke lwa lika ku ba tusa ka ku ba zwisezapili haiba lu bata ku ikola naha ni ku i siyela baikulu ba luna kuya kuile. 13Nihakulicwalo, mwamulaho a ze ezahalile ku luna ili ku lu utwisa butuku ka libi ni lifoso za luna, lwa ziba kuli wena, Mulimu wa luna, u lu utwisize butuku hanyinyani feela, ili butuku bo bu sa likani ni milatu ya luna, kakuli ki fo u sa lu pilisa. 14Cwalehe, lu ka tula cwañi milao ya hao hape ni ku nyalana ni batu ba ba maswe cwalo? Haiba lu ka eza cwalo, u ta nyema kuli mane u be u lu bulaye kaufel'a luna ku si na ni ya ka banduka. 15Oho Muñ'a Bupilo, Mulimu wa Isilaele, wena ha u na sobozi, mi kikabakaleo ha u lu pilisize. Lu itumelela milatu ya luna ku wena. Ha lu na tukelo ya ku taha fapil'a hao.”

Currently Selected:

Ezra 9: Lozi09

Highlight

Copy