Ezra 8
8
Batanga ba ba kutile kwa butanga
1Ki wo mukoloko wa litoho za mishiku ya ba ba ne ba isizwe kwa butanga mwa Babilona, mi ba kutela kwa Jerusalema ni Ezira, Aritazerisi ha n'a li mulena. Mabizo a bona ki a:
2Gerishomi wa mushiku wa Finehasi,
Daniele wa mushiku wa Itamare,
3Hatushi mwan'a Shekania wa mushiku wa Davida,
Zakaria wa mushiku wa Paroshi ni batu ba mushiku wa habo ba mwanda ka mashumi a ketalizoho mi ne ku na ni mikoloko ya lusika lwa bona,
4Eliehoenai mwan'a Zerakia wa mushiku wa Pakati-Moabi ni batu ba mianda ye mibeli,
5Shekania mwan'a Jahaziele wa mushiku wa Zatu ni batu ba mianda ye milalu,
6Ebedi mwan'a Jonatani wa mushiku wa Adini ni batu ba mashumi a ketalizoho,
7Jeshaya mwan'a Atalia wa mushiku wa Elami ni batu ba mashumi a supile,
8Zebadia mwan'a Mikaele wa mushiku wa Shefatia ni batu ba mashumi a supile ka li li liñwi,
9Obadia mwan'a Jehiele wa mushiku wa Joabi ni batu ba mianda ye mibeli ka lishumi ni ba supile ka a li muñwi,
10Shelomiti mwan'a Josifia wa mushiku wa Bani ni batu ba mwanda ka mashumi a silezi,
11Zakaria mwan'a Bebai wa mushiku wa Bebai ni batu ba mashumi a mabeli ka ba supile ni a li muñwi,
12Johanani mwan'a Hakatana wa mushiku wa Azigadi ni batu ba mwanda ka lishumi,
13Elifeleti ni Jeuele ni Shemaya ili ba mushiku wa Adonikami, ni batu ba mashumi a silezi, kono bao ba fita mwamulahonyana,
14Utai ni Zabudi ba mushiku wa Bigivai ni batu ba mashumi a supile.
Ezira u fumana Malivi ba ku sebeza mwa Tempele
15Na kopanyeza sitopa seo kwatuko a liabwa le li bubela kwa munzi wa Ahava, mi lwa tola mwateñi mazazi a malalu. Na fumana kuli mwa sitopa seo ne ku na ni baprisita, kono ne ku si na Malivi. 16Na lumelela baeteleli ba supile ka ba babeli, ili bo Eliezere, Ariele, Shemaya, Elinatani, Jaribi, Elinatani, Natani, Zakaria ni Meshulami, ni baluti ba babeli, ili bo Joyaribi ni Elinatani. 17Na ba lumela ku Ido, nduna wa silalo sa Kasifia, ku y'o mu bulelela, yena ni ba utwana ni bona ili babeleki ba mwa Tempele, kuli ba lu lumelele batu ba ba ka y'o sebeleza Mulimu mwa Tempele. 18Ka sishemo sa Mulimu, ba lu lumelela Sherebia, munna wa Mulivi ya ikonela, ili wa ba Mahali. A taha ni bana ni banyani ba hae, ili ba ba fita fa lishumi ka supile ni a li muñwi hamoho. 19Hape ba lu lumelela Hashabia ni Jeshaya ba Merari ni banabahabo bona ba mashumi a mabeli. 20Fahalimw'a bao, ne ku na ni babeleki ba mwa Tempele ba mianda ye mibeli ka mashumi a mabeli, ili baikulu ba batu ba ba ne ba beilwe ki Mulena Davida ni manduna ba hae ku swalisana ni Malivi. Kaufel'a bona ne ba ñozwi ka mabizo.
Ezira u etelela batu mwa ku itima lico ni ku lapela
21Honafo, kwatuko a Liabwa la Ahava na fa litaelo za ku itima lico ni ku ikokobeza fapil'a Mulimu wa luna, ni ku mu kupa ku lu etelela mwa musipili wa luna, ku lu babalela hamoho ni bana ba luna ni ze lu na ni zona kamukana. 22Ne ni ka be ni swabile hahulu ku kupa mulena sitopa sa balwani ba lipizi, sa ku lu sileleza kwa lila lifi kamba lifi mwa nzila, kakuli ne ni se ni mu bulelezi kuli Mulimu wa luna u tohonolofaza mutu ufi ni ufi ya mu sepa, mi u nyemela ni ku utwisa butuku ufi ni ufi ya mu fulalela. 23Cwale lwa itima lico mi lwa lapela kuli Mulimu a lu sileleze, mi a alaba litapelo za luna.
Limpo za Tempele
24Kwa baprisita ba bahulu na keta Sherebia, Hashabia ni ba bañwi ba lishumi. 25Cwale na ba likanyeza silivela ni gauda fa sikala ni ku bala mikeke y'a n'a lu file mulena, baelezi ba hae, manduna ni batu ba Isilaele kuli li y'o sebeza kwa Tempele. Na li fa baprisita. 26Ni ba file likilo ze likiti ze mashumi a mabeli ka ze ketalizoho ni mianda i ketalizoho ka mashumi a malalu ni ze silezi za silivela, mikeke ye mwanda ya silivela ya bukiti bwa likilo ze mashumi a supile, ni likilo ze likiti ze ne ka mianda ye mine ni mashumi a mabeli ka ze ne ya gauda. 27Hape ni ba file mikeke ye mashumi a mabeli ya gauda ya bukiti bwa likilo ze supile ka i liñwi, ni mikeke ya kopa ya mibeli ye minde, ye n'e likana ni mikeke ya gauda kwa teko.
28Na li ku bona, “Mina mu kenile fapil'a Muñ'a Bupilo, Mulimu wa bo ndat'a mina, hamohocwalo ni libyana za silivela ni za gauda, ili limpo ze mu mu file ka pilu ya mina kaufela. 29Mu li babalele ka tokomelo, mane mu y'o fita kwa Tempele. Kwateñi, ha mu li mwa mandu a baprisita, mu li likanye hape fa sikala, mi mu li fe baeteleli ba baprisita ni ba Malivi, ni kwa baeteleli ba sicaba sa Isilaele mwa Jerusalema.” 30Cwale baprisita ni Malivi ba nga silivela ni gauda ni libyana, mi ba li isa kwa Jerusalema mwa Tempele.
Ba kutela kwa Jerusalema
31N'e li ka lizazi la bulishumi ka a mabeli mwa kweli ya pili ha lu zwa kwa Liabwa la Ahava ku ya kwa Jerusalema. Muñ'a Bupilo a ba ni luna, mi a lu sileleza kwa ku lwaniswa ki lila, ni kwa ku bandamenwa mwa nzila ha ne lu nze lu zamaya. 32Ha lu y'o fita kwa Jerusalema, lwa y'o pumula mazazi a malalu. 33Cwale ka la bune lwa ya kwa Tempele, lwa likanya silivela, gauda, ni libyana fa sikala, mi lwa li fitisa ku muprisita yo muhulu Meremoti, mwan'a Uria. Yena n'a inzi ni Eliazare mwan'a Finehasi ni Malivi ba babeli, bo Jozabadi mwan'a Jeshua ni Nodia mwan'a Binui. 34Lika kaufela za baliwa ni ku likanyiwa fa sikala, mi za ñolwa ka yona nako yeo.
35Ba ba ne ba kutile kwa butanga kaufela ba nga limpo za ku y'o ezeza Mulimu wa Isilaele litabelo za ku cisa. Ba fitisa lipoho ze lishumi ka ze peli ka libizo la Isilaele kamukana, lipoho za lingu ze mashumi a supile ka a mabeli ni ze silezi, lingunyana ze mashumi a supile ka ze supile, ni lipuli ze lishumi ka ze peli za ku zwisa libi. Limunanu zeo kaufela za ciswa ili ku ezeza Muñ'a Bupilo litabelo. 36Hape ba nga liñolo le ne ba filwe ki mulena, mi ba li fa babusisi ba mulena ni manduna ba naha ye kwa wiko wa Nuka ya Yuferati, mi bona ba ba fa tuso ya bona kwa batu ni kwa neku la lisebelezo za mwa Tempele.
Currently Selected:
Ezra 8: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
