Estere 9

Majuda ba feza lila za bona

1Lizazi la bulishumi ka a malalu la kweli ya Adara la fita. N'e li lona lizazi leo taelo ya bulena n'e swanezi ku ezahala, ili lizazi le ne ba isepisize lila za Majuda kuli ba ta ba tula. Kono bakeñisacwalo, bona ba tulwa ki Majuda. 2Mwa libaka za Majuda kaufela ze mwa minzi ya mubuso, Majuda ba itukiseza ku lwanisa mañi ni mañi ya ka lika ku ba lwanisa. Kai ni kai batu ne ba ba saba, mi ne ku si na ya n'a ka kona ku lwana ni bona. 3Hande-nde, manduna kamukana ba libaka ze ñwi za mubuso, babusisi, bazamaisi ni lindulumeti ba tusa Majuda, kakuli kaufel'a bona ne ba saba Morodekai. 4Ne ku zibahala hande mwa mubuso kamukana kuli ka nako yeo Morodekai n'a s'a na ni maata mwa ndu ya bulena, mi n'a sa zwelapili ku ba ni maata hahulu. 5Cwale Majuda ne ba kona ku ikezeza mo ne ba latela ka lila za bona. Ba ba lwanisa ka mikwale, mi ba ba bulaya ka buñata.

6Mwa Shushani, ona muleneñi kasibili, Majuda ba bulaya batu ba mianda i ketalizoho. 7Ba bulaya cwalo ni Parishandata, Dalufoni, Asipata, 8Porata, Adalia, Aridata, 9Parimashita, Arisai, Aridai ni Vaizata, 10ba ba ne ba li bana ba bashimani ba lishumi ba Hamani, mwan'a Hamedata, ya n'a li sila sa Majuda. Nihakulicwalo ha ba si ka hapa se siñwi.

11Palo ya batu ba ba ne ba bulailwe mwa Shushani ya y'o bihiwa ku mulena, lona zazi leo. 12Cwale yena a li ku Muoli Estere, “Mwa Shushani feela, Majuda ba bulaile batu ba mianda i ketalizoho, ku kopanyeleza ni bana ba Hamani ba lishumi. Mwa libaka ze ñwi za mubuso ba ezize cwañihe! Cwale u sa batañi ka nako ye? U ta si fumana. Ni bulelele se siñwi hape s'o bata, mi u ta si fumana.”

13Estere a alaba, a li, “Haiba muñ'a ka a lata cwalo, a lumelele Majuda ba mwa Shushani kuli kamuso ba eze hape se ba lumelezwi ku si eza kacenu. Mi ba paheke litupu za bana ba ba lishumi fa silaha.” 14Mulena a laela kuli ku eziwe cwalo, mi taelo ya zibiswa mwa Shushani. Litupu ze lishumi za bana ba Hamani za pahekiwa. 15Ka lizazi la bulishumi ka a mane mwa kweli ya Adara, Majuda ba mwa Shushani ba kopana hape, mi ba bulaya batu ba bañwi ba mianda ye milalu mwa hae. Kono ni teñi ha ba si ka hapa se siñwi.

16Majuda ba mwa libaka ze ñwi za mubuso ba kopana, mi ba itwanela. Ba fenya lila za bona ka ku bulaya batu ba likiti ze mashumi a supile ka ze ketalizoho, ba ba ne ba ba toile. Kono ha ba si ka hapa se siñwi. 17Fo, n'e li ka lizazi la bulishumi ka a malalu, la kweli ya Adara. Habusa, la bulishumi ka a mane, ha ku si ka ba ni lipulao hape mwa libaka ze ñwi, mi ba li eza lizazi la mukiti ni la tabo. 18Majuda ba mwa Shushani, nihakulicwalo, bona ba pumula ka lizazi la bulishumi ka a ketalizoho. Kakuli ne ba se ba bulaile lila za bona ka la bulishumi ka a malalu ni la bulishumi ka a mane, kihona ba pumula ka la bulishumi ka a ketalizoho. 19Kikabakaleo, Majuda ba ba pila mwa minzi ye minyinyani, ye si na makwakwa, ha ba buluka lizazi la bulishumi ka a mane mwa kweli ya Adara kuli li be lizazi la pumulo ni la tabo, ili nako ya mukiti wa ku fana limpo yo muñwi ku yo muñwi.

Mukiti wa Purimi

20Morodekai a ñola litaba zeo kaufela. A lumelela mañolo kwa Majuda kamukana, ba fakaufi ni ba kwahule, kai ni kai mwa mubuso wa Peresia. 21A ba bulela ku buluka mazazi a la bulishumi ka a mane ni la bulishumi ka a ketalizoho mwa kweli ya Adara kuli a be mazazi a pumulo silimo ni silimo. 22A, ki ona mazazi o ne ba tuzi Majuda lila za bona. N'e li kweli ya maswabi ye n'e fetuhile kweli ya tabo ni nyakalalo. Ba bulelelwa ku buluka mazazi ao kuli a be a mikiti ni a ku fa limpo kwa banabahabo bona ni kwa babotana. 23Cwale Majuda ba latelela likelezo za Morodekai, mi mukiti wo, wa ba wa sizo lilimo kaufela.

24 # Est 3.7 Hamani ye n'e li sila sa Majuda, mwan'a Hamedata ni muikulu wa Agagi, n'a lauzi ka taula ye bizwa puri kuli a fumane lizazi l'a n'a ka bulaya Majuda ka lona. N'a lelile ku ba feza mbuu. 25Kono Estere a ya ku mulena, mi mulena a ñola litaelo ze tahisize kuli Hamani a tahelwe ki ziezi ka bumaswe bw'a n'a lelile kwa Majuda, mane yena ni bana ba hae ba silahiwa. 26Kikabakaleo pumulo ha i bizwa Purimi, kikuli Taula. Kabakala liñolo la Morodekai, ni kabakala z'e n'e ezahalile kaufela ku bona, Majuda ba eza mulao. 27Majuda ba ikezeza mulao wa bona, baikulu ba bona, ni mutu kaufela ya n'a ta ikeza Mujuda, kuli ka nako ya teñi, ka silimo ni silimo, mazazi ao a mabeli a bulukwe ili ka ku ya ka litaelo za Morodekai. 28Kwa lukiswa kuli lusika lwa Majuda kaufela ni masika a sa taha kamukana, mwa manaha ni mwa minzi kaufela, ba lukela ku hupula ni ku buluka mazazi a Purimi ka linako kamukana ze sa taha.

29Cwale Muoli Estere, mwan'a Abihaili, a ñola liñolo la ku tiisa liñolo la pili le ne li ñozwi ki Morodekai bakeñisa mukiti wa Purimi. 30Liñolo leo ne li ñolezwi Majuda kaufela, mi la lumelwa mwa manaha a mwanda ka mashumi a mabeli ni manaha a supile kamukana a mwa mubuso wa Peresia. Ne li lakaleza Majuda kozo ni buiketo. 31Ne li laela kuli ba buluke mazazi a Mukiti wa Purimi ka nako ya teñi, sina mo ne ba tomezi milao ya ku itima lico, ni linako za ku silisa. Taelo yeo n'e laezwi ki Morodekai hamoho ni Muoli Estere. 32Taelo ya Estere, ya ku tiisa milao ya Purimi, ya ñolwa mwa buka.

Currently Selected:

Estere 9: Lozi09

Highlight

Copy