Likezo 13

Barnabasi ni Saule ba ketwa mi ba lumiwa

1Mwa keleke ya kwa Antioke ne ku na ni bapolofita ni baluti. Barnabasi, ni Simioni ya bizwa Yo Munsu, ni Lusiusi wa kwa Sirene, ni Manaene ya n'a hulelezi hamoho ni mubusisi Heroda, ku beya Saule. 2Zazi le liñwi, ha ne ba nze ba sebeleza Mulena ni ku itima lico, Moya o Kenile wa li ku bona, “Mu ni ketele bo Barnabasi ni Saule ku y'o eza musebezi o ni ba bizelize.”

3Cwale, mwamulaho a ku itima lico ni ku lapela, ba ba beya mazoho mi ba ba fundula.

Barnabasi ni Saule ha ba li mwa Sipera

4Bo Barnabasi ni Saule ha ba se ba lumilwe ki Moya o Kenile, ba ya kwa Selusia, mi ku zwa mo, ba ya kwa Sipera ka sisepe. 5Ha ba fita mwa Salamisi, ba bulela linzwi la Mulimu mwa masinagoge a Majuda, ba nze ba tusiwa ki Joani Mareka mwa musebezi wa bona.

6Ha ba se ba zamaile mwa soli kaufela mane ba y'o fita kwa Pafosi, ba kopana ni mutu yo muñwi wa mabibo, ili mupolofita wa buhata wa Majuda ya n'a bizwa Bar-Jesu. 7N'a li mulikan'a mubusisi wa soli seo, ili Sergiusi Paulusi, mutu ya butali. Mubusisi yo a biza bo Barnabasi ni Saule kakuli n'a bata ku t'o utwa linzwi la Mulimu. 8Kono Elimasi, kikuli Wa Mabibo ha ku taluswa, n'a ba hanyeza mi n'a lika ku zwisa mubusisi mwa tumelo. 9Kono Saule, ya n'a bizwa Paulusi hape, a tezi Moya o Kenile, mi a lubukela wa mabibo yo. 10A li, “Wena mwan'a Satani, sila sa ze lukile, ya tezi mikwa ye maswe kaufela, u ta tuhela lili ku kopamisa linzila za Mulena ze otolohile? 11Cwalehe, utwa! Lizoho la Mulena li ta ba falimw'a hao cwale, mi u ta ba sibofu, mi ha u na ku bona nihaili liseli la lizazi ka nakonyana.”

Kapili-pili meeto a hae a kwahelwa ki mbundu, a ba mwa lififi mi a zamaya-zamaya a bata ba ba ka mu swala kwa lizoho. 12Mubusisi ha s'a boni ze ezahalile, a lumela. N'a komokisizwe hahulu ki tuto ya Mulena.

Paulusi ni Barnabasi ha ba li mwa Antioke wa Pisidia

13Cwale bo Paulusi ni balikani ba hae ba fuula mwa Pafosi mi ba y'o fueka mwa Perga, ili mwa naha ya Pamfilia. Joani Mareka kih'a ba siya ku kutela kwa Jerusalema. 14Ba zwa mwa Perga, mi ba t'o fita mwa Antioke wa Pisidia. Ka Lizazi la Pumulo ba kena mwa sinagoge, mi ba ina. 15Ha ku se ku balilwe mwa Buka ya Mulao ni bapolofita, bazamaisi ba sinagoge ba ba lumela liñusa. Lona la li, “Banabahesu, haiba mu na ni manzwi a mu ka kutaza ka ona batu bao, mu eze cwalo.” 16Cwale Paulusi a yema, a ba kobeta ka lizoho, mi a li,

“Batu ba Isilaele ni mina balicaba ba ba lapela Mulimu, mu ni teeleze! 17#Mut 1.7; 12.51 Mulimu wa sicaba se sa Isilaele u ketile bo kukw'a luna. U hulisize sicaba se ha ne si pila mwa Egepita, mi ka lizoho la hae le li maata, a si zwisa mwateñi. 18#Lipa 14.34; Mul 1.31 A si babalela mwa lihalaupa ka lilimo ze mashumi a mane. 19#Mul 7.1; Josh 14.1 A felisa mishobo ye supile mwa naha ya Kanana, mi a fa sicaba sa hae maata mwa naha yeo kuli i be ya sona. 20#Baat 2.16; 1 Sam 3.20 Ne i ka ba ya bona cwalo ka lilimo ze batil'o eza mianda ye mine ni mashumi a ketalizoho.

“Ku zwa fo, a fa bo kukw'a luna baatuli, mane ku t'o fita ka nako ya mupolofita Samuele. 21#1 Sam 8.5; 10.21 Cwale kiha ba kupa mulena, mi Mulimu a ba fa Saule, mwan'a Kishi wa lusika lwa Benjamine, ya ba busize lilimo ze mashumi a mane. 22#1 Sam 13.14; 16.12; Lipi 89.20 Ha s'a tuluzi Saule, Mulimu a ba fa Davida ku ba mulen'a bona. A li ka yena, ‘Ni fumani Davida, mwan'a Jese. Ki mutu ye ni kolwa, ya ka eza se ni lata kaufela kuli a si eze!’ 23Ki mwa lusika lwa Davida mo Mulimu a zwisize Jesu Mupilisi wa Isilaele, sina mw'a n'a sepiselize. 24#Mat 1.4; Luk 3.3 Jesu a si ka fita kale, Joani n'a s'a lutile ba Isilaele kaufela kuli ne ba swanezi ku baka ni ku kolobezwa. 25#Mat 3.11; Mar 1.7; Luk 3.16; Joa 1.20,27 Joani ha s'a tuha a feza musebezi wa hae, a li, ‘Kana mu hupula kuli ki na mañi? Ha si na ye mu libelezi, kono wa taha mwamulaho wa ka, ye ni sa swaneli nihaiba ku tamulula makatulo kwa mahutu a hae.’

26“Banabahesu, mina ba lusika lwa Abrahama, ni mina bazwahule kaufela ba ba sebeleza Mulimu! Ki ku luna ko ku tisizwe linzwi le li pilisa! 27Kakuli batu ba ba pila mwa Jerusalema, ni malen'a bona, ha ba si ka utwisisa kuli Jesu ki mañi, mi ha ba si ka utwisisa se si bulezwi ki bapolofita, ze balwa kamita ka la Pumulo. Kono zeo ba li talelelize ka ku atula Jesu. 28#Mat 27.22-23; Mar 15.13-14; Luk 23.21-23; Joa 19.15 Niha ne ba si ka fumana libaka la ku mu atulela lifu, ba kupile Pilato kuli a mu bulaye. 29#Mat 27.57-61; Mar 15.42-47; Luk 23.50-56; Joa 19.38-42 Mi ha ba se ba talelelize ze ne ñozwi ka yena kaufela, ba mu zwisize fa sifapahano, mi ba mu beile mwa libita. 30Kono Mulimu u mu zusize kwa bafu. 31#Lik 1.3 Ka mazazi a mañata Jesu a iponahaza ku b'a n'a zwile ni bona kwa Galilea ku ya kwa Jerusalema, bao ili lipaki za hae kwa batu ba Isilaele cwale. 32Luna kasibili lu mi tiseza litaba ze nde zeo z'a n'a sepisize Mulimu ku bo ndat'a luna. 33#Lipi 2.7 Ze, u li talelelize ku luna bana ba bona, ka ku zusa Jesu, sina mo ku ñolezwi mwa Pina ya Bubeli kuli,

‘Ki wena Mwan'a ka.

Ni ku pepile kacenu.’

34 # Isa 55.3 Mulimu n'a bulezi kuli n'a ka mu zusa kwa bafu kuli a si ke a bola. Mulimu n'a ize,

‘Ni ta mi fa limbuyoti ze kenile,

ze tiile, ze ni sepisize Davida.’

35 # Lipi 16.10 Kikabakaleo ha s'a tiisa cwana mwa Pina ye ñwi, h'a li,

‘Ha u na ku lumelela Ya Kenile wa hao kuli a bole.’

36Davida, yena, ha s'a sebelelize Mulimu ka nako ya hae, a shwa, a y'o bulukiwa mwa sibaka sa bo ndat'ahe, mi a bola. 37Kono ya zusizwe ki Mulimu kwa bafu h'a si ka bola. 38Mu zibe, banabahesu, kuli ki ka Jesu swalelo ya libi ha i lutiwa ku mina. 39Ki ka yena kuli mutu kaufela ya lumela u lukululwa mwa litamo za sibi, zeo Mulao wa Mushe n'o sa koni ku mi lukulula ku zona. 40Mu tokomele kuli mina mu si ke mwa tahelwa ki ze ne bulezwi ki bapolofita, ha ba li,

41 # Hab 1.5 ‘Mu bone, mina ba mashungu!

Mu komoke mi mu shwe!

Kakuli ni ka eza kezo,

mwa mazazi a mina,

kezo ye ne mu si ke mwa i kolwa,

niha ne mu ka i talusezwa ki mutu!’ ”

42Paulusi ni Barnabasi ha ba zwa mwa sinagoge, ba kupiwa ku kuta hape ka la Pumulo le li tatama ku t'o luta ka litaba zeo. 43Mi kopano ye ne li mwa sinagoge ha i se i hasani, ba bañata mwahal'a Majuda ni balicaba ba ba keni mwa Bujuda ba latelela Paulusi ni Barnabasi, mi ba ba kutaza ku tiiseza mwa ku sepa lilato la Mulimu.

44Ka la Pumulo le li tatama, i batil'o ba batu kaufela ba mwa hae ba ba ne ba tile ku t'o utwa linzwi la Mulimu. 45Kono Majuda ha ba bona buñata bwa batu, ba kenelwa ki muna, mi ba hanyeza se ne si bulelwa ki Paulusi, mi ba mu nyefula. 46Kono, bo Paulusi ni Barnabasi kiha ba ba bulelela ka bundume, ba li, “I ne li swanelo kuli linzwi la Mulimu li bulelwe pili ku mina, kono ha mu li hana mwa ikatula ili mina kuli ha mu swanelwi ki bupilo bo bu sa feli. Hakulicwalo, lu ta mi siya, lu ye ku balicaba. 47#Isa 42.6; 49.6 Kakuli ki mona mw'a lu laelezi Mulimu, h'a ize,

‘Ni ku beile ku ba liseli la balicaba,

ku fitisa bupilo kwa mafelelezo a lifasi.’ ”

48Balicaba ha ba utwa cwalo, ba taba, mi ba lumba linzwi la Mulimu, mi ba ba ketezwi bupilo bo bu sa feli kaufela ba lumela.

49Mi linzwi la Mulena la hasanela kai ni kai mwa silalanda seo kaufela. 50Kono Majuda ba susueza basali ba balumeli ba ba kutekeha, ni ba bahulu ba munzi cwalo ku lwanisa bo Paulusi ni Barnabasi, mi ba ba leleka mwa silalo sa bona. 51#Mat 10.14; Mar 6.11; Luk 9.5; 10.11 Kono bona kiha ba ba tutula liluli la makatulo a bona, mi ba ya kwa Ikone. 52Haili balutiwa, mwa Antioke, ne ba tezi tabo ni Moya o Kenile.

Currently Selected:

Likezo 13: Lozi09

Highlight

Copy