1 Joani 5

Mo lu ka tulela lifasi

1Mutu kaufela ya lumela kuli Jesu ki yena Kreste, yo ki wa Mulimu. Mi ya lata mushemi u lata ni mwana cwalo. 2Mo lu zibela kuli lu lata bana ba Mulimu, ki ha lu lata Mulimu mi lu eza z'a lu laela. 3#Joa 14.15 Kakuli se, ki sona se si taluswa ka ku lata Mulimu. Ku talusa kuli lu swanezi ku utwa litaelo za hae. Mi litaelo za hae, ha li na tata hahulu ku luna. 4Ya li wa Mulimu kaufela u kona ku tula lifasi. Mi mo lu ka tulela lifasi ki ka tumelo ya luna. 5Ki mañi ya ka kona ku tula lifasi, haisi feela yena ya lumela kuli Jesu ki Mwan'a Mulimu?

Bupaki bakeñisa Jesu Kreste

6Jesu Kreste ki yena ya tile. U tile ni mezi ni mali. H'a si ka taha ni mezi feela, kono u tile ni mali a hae cwalo. Mi Moya ki ona kasibili o bonahaza kuli ki niti, kakuli Moya ki niti. 7Ku na ni lipaki ze talu. 8Ki Moya, ni mezi ni mali, mi ze talu zeo za lumelelana. 9Haiba lu lumela bupaki bo lu fiwa ki batu, kanti bupaki bo lu fiwa ki Mulimu bu na ni maata hahulu ku fita bo, mi ki bona bupaki bw'a file Mulimu ka Mwan'a hae. 10Cwale, mutu kaufela ya lumela ku Mwan'a Mulimu, u na ni bupaki bo mwa pilu ya hae. Ya sa lumeli ku Mulimu, u mu ezize lihata, kakuli h'a si ka lumela s'a bulezi Mulimu h'a pakile za Mwan'a hae. 11#Joa 3.36 Bo, ki bona bupaki. Mulimu u lu file bupilo bo bu sa feli, mi bupilo bo ki bwa luna ka Mwan'a hae. 12Mutu kaufela ya na ni Mwana u na ni bupilo bo. Mutu kaufela ya si na Mwan'a Mulimu h'a na bupilo.

Bupilo bo bu sa feli

13Ni mi ñolela zeo kaufela ili ku mi zibisa kuli mu na ni bupilo bo bu sa feli, mina ba ba lumela libizo la Mwan'a Mulimu. 14Ha lu si na sabo fapil'a Mulimu, libaka ki le. Lwa ziba kuli u ta lu utwa haiba lu kupa se si lumelelana ni s'a lata yena. 15Cwale, sina mo lu zibela kuli wa lu utwa, ha lu kupa se siñwi ku yena, lu ziba hape kuli u lu fa se lu mu kupa.

16Haiba mutu a bona mwanahabo a eza sibi se si sa isi kwa lifu, a lapele, mi Mulimu u ta fa mwanahabo yo bupilo, haiba luli sibi se si ezizwe ki sibi se si sa isi kwa lifu. Kono ku na ni sibi se si isa kwa lifu, mi ha ni buleli kuli ku lapelwe ka sibi se si cwalo. 17Kezo ye maswe kaufela ki sibi, kono ku na ni libi ze sa isi kwa lifu.

18Lwa ziba kuli ha ku na mulumeli ya pihelela ku eza sibi, kakuli u mwa pabalelo ya Mwan'a Mulimu, mi Ya Maswe h'a koni ku mu zieza.

19Lwa ziba kuli lu ba Mulimu, ni kuli lifasi kaufela li mwatas'a puso ya Ya Maswe.

20Lwa ziba hape kuli Mwan'a Mulimu u tile, mi u lu file kutwisiso kuli lu zibe Mulimu wa niti. Lu inzi lu nze lu kopana ni Mulimu wa niti ka Mwan'a hae Jesu Kreste. Ki yena Mulimu wa niti. Mi bo ki bona bupilo bo bu sa feli.

21Bana ba ka, mu ambuke milimu ya buhata!

Currently Selected:

1 Joani 5: Lozi09

Highlight

Copy