1 Bakorinte 5

Mikwa ye maswe mwa Keleke

1 # Mul 22.30 Cwale ki taba ye bulelwa kai ni kai kuli mwahal'a mina ku na ni buhule bo bu maswe, bo bu li nihaili baezalibi ha ba koni ku bu eza. Kutwi, mutu u pila ni musal'a ndat'ahe! 2Mi mu sa ikuhumusa! I ne i ka ba hande ha mu ka swaba, mi ha ne mu ka zwisa mwahal'a mina mutu ya ezize nto ye cwalo. 3Haili na, niha ni li kwahule ni mina ka mubili, ni mwahal'a mina ka moya. Mi ka libizo la Mulen'a luna Jesu ni se ni atuzi mutu yo, ya ezize kezo ye maswe cwalo, inge ni inzi ni mina koo. 4Ha mu kopana hamoho, mi na, ni mwahal'a mina ka moya wa ka, ka maata a Mulen'a luna Jesu ya inzi ni luna. 5I ta ba swanelo kuli mutu yo a fiwe Satani kuli mubili wa hae u sinyiwe, mi moya wa hae u kone ku piliswa ka Lizazi la Mulena.

6 # Magal 5.9 Ha ku swaneli kuli mu ikuhumuse! Mwa ziba pulelo ye li, “Mumelanyana feela o munyinyani u hulisa liñende-tuna.” 7#Mut 12.5 Mu zwise mumela wani wa kale wa sibi kuli mu fetuhe ba ba kenile luli. Kihona mu ka swana ni liñende le linca, le li si na mumela. Ha ni li ki sona se mu se mu li sona! Kakuli mukiti wa luna wa Paseka u s'o kalile. Yena Kreste, ya li ngu ya Paseka, u s'a tabilwe. 8#Mut 13.7; Mul 16.3 A lu ezeñi mukiti wa luna, isiñi ka buhobe bo bu na ni mumela wa kale, mumela wa sibi ni buhule, kono ili ka buhobe bo bu si na mumela, buhobe bo bu kenile, bwa niti.

9Mwa liñolo le ni mi ñolezi, ni mi bulelezi kuli mu si ke mwa kopana ni batu ba mahule. 10Ha ne ni bulela cwalo, ne ni sa hupuli ba mikwa ye maswe kaufela ba ba mwa lifasi, ili ba ba shwela ba bañwi muna, kamba masholi, kamba ba ba lapela maswaniso. Kakuli bao, ku kauhana ni bona haisi ku zweelela mwa lifasi! 11Ne ni bata ku mi bulelela kuli mu si ke mwa kopana ni mutu ya ipiza mukreste mi a li lihule, kamba ya shwela ba bañwi muna, kamba ya lapela maswaniso, kamba lihata, kamba litahwa, kamba lisholi. Mu si ke mwa lika nihaili ku ca ni mutu ya cwalo.

12Ha si taba ya ka ku atula be i si bakreste, fo ki niti. Mulimu ki yena ya ta ba atula. 13#Mul 13.5; 17.7 Kono ha si swanelo ya mina, nji, ku atula be ili lilama za keleke ya mina? Sina mo ku ñolezwi kuli, “Mu zwise mutu ya maswe mwahal'a mina.”

Currently Selected:

1 Bakorinte 5: Lozi09

Highlight

Copy