Romanonan 7

Morto so por libra hende di su obligashon pa ku Lei

1Rumannan, sigur sigur boso ku konosé Lei di Moises sa ku e Lei ei tin poder riba un hende miéntras e ta na bida. 2Por ehèmpel, un esposa ta mará na su esposo pa Lei tanten e esposo ta na bida, pero si e esposo fayesé, e muhé ei no ta mará mas na e Lei ku tabata uni su esposo kuné. 3Pues si un muhé uni ku un otro hòmber, tanten su esposo ta na bida, e ta haña nòmber di adúltera. Ma ora su esposo fayesé, e no ta mará mas na e Lei ei i por kasa ku un otro hòmber, sin ku esei ta hasié un adúltera.

4Asina ta sosodé ku boso tambe, mi rumannan. Ta pasobra Kristu a sakrifiká su kurpa, boso ta morto pa loke ta trata Lei di Moises. Awor boso ta pertenesé na un otro, esta, na Esun ku a lanta for di morto pa nos por biba un bida fruktífero pa Dios. 5Pasobra tempu ku nos tabata sigui nos naturalesa pekaminoso, Lei di Moises tabata sirbi pa lanta mal deseo den kada parti di nos kurpa i nos a karga fruta ku tabata hiba na morto. 6Sinembargo awor nos ta morto pa Lei di Moises, e Lei ku tabatin nos prezu. Di e manera ei nos ta liber pa sirbi Dios den e bida nobo di su Spiritu i no segun e reglanan di e Lei bieu.

E problema di piká den hende

7Ta bisa nos ke bisa anto ku Lei di Moises ta pekaminoso? Apsolutamente ku nò! Sinembargo ta Lei a siña mi kiko ta maldat. Por ehèmpel, lo mi no tabata sa kiko ta kudishá kos di otro hende, si no tabatin pará den Lei: ‘No deseá!’#Éksodo 20:17; Deuteronomio 5:21 8Pero piká a probechá di e mandamentu ei i a lanta tur sorto di kudishi den mi. Pues si no tabatin Lei, piká lo tabata morto! 9Tabatin un tempu ku ami, sin ku mi tabata kai bou di Lei, tabatin bida, pero ora e mandamentu a bini, piká a lanta kabes den mi bida 10i mi a muri. A resultá ku e mandamentu ku mester a duna mi bida, a trese morto pa mi, 11pasobra piká a probechá di un mandamentu tantu pa engañá#Génesis 3:13 mi komo pa mata mi. 12Asina ta ku Lei di Moises riba su mes ta santu, i su mandamentunan ta santu, hustu i bon.

13Kiko awor? Ta algu bon tabata mi morto? Apsolutamente ku nò! Al kontrario, piká a usa algu bon pa kousa mi morto i dje manera ei el a laga mira su kara. Asina tambe, pa medio di e mandamentu, a sali na kla kon ekstremadamente pekaminoso piká ta!

14Nos sa tòg ku Lei ta spiritual, pero t'ami ta hende di karni i wesu, bendí ku piká manera ta bende katibu. 15Mi no ta komprondé mi mes aktonan, pasobra mi no ta hasi loke mi ke, pero ta nèt loke mi tin rabia riba dje mi ta hasi!#Galatanan 5:17 16Mi no ke hasi e maldat ku mi ta haña mi ta hasi, anto esei ta un prueba ku mi ta rekonosé ku Lei ta bon. 17Ke men ku no ta ami mes ta hasi maldat mas, sino e piká ku ta biba den mi. 18Pasobra mi sa ku no tin nada bon den mi, ku ta hende di karni i wesu; ounke mi tin deseo di hasi loke ta bon, mi no ta hasié tòg. 19Sí, mi no ta hasi e bon ku mi ke hasi, sino e maldat ku mi no ke hasi. 20Ke men, si mi no hasi e bon ku mi mes ke hasi, ta pasobra no t'ami ta aktua, sino e piká ku ta biba den mi.

21Mi ta deskubrí pues e prinsipio akí: ounke mi ke hasi loke ta bon, ta maldat so mi ta haña mi ta hasi. 22Den mi paden mi ta gusta Lei di Dios, 23pero di otro banda mi ta mira un otro lei den henter mi kurpa, ku ta kontra di Lei di Dios ku mi ke sigui ku mi mente. E otro lei ei ta e lei di piká den mi, ku tin mi kompletamente den su gara.

24Esta un hende mizerabel mi ta! Ken lo libra mi di e poder di morto ku ta obra den mi kurpa? 25Dios so por libra mi i p'esei mi ta gradisiÉ pa medio di Señor Hesu-Kristu!#7:25 Dios…Hesu-Kristu!; otro posibel tradukshon: Dios so ta Esun ku por libra mi pa medio di Señor Hesu-Kristu; ku E sea alabá!

Pa konkluí, t'esaki ta mi situashon: di un banda mi ta sirbi Lei di Dios ku mi mente, di e otro banda, ku mi naturalesa pekaminoso mi ta sirbi e lei di piká den mi.

Currently Selected:

Romanonan 7: BPK13

Highlight

Copy